ܬܹܒܘ ܘܲܫܠܵܘ ܒܪܝܼܬܼܵـܐ ܣܸܦܪ̈ܵܐ ܩܲܖܡܵܝܵܐ ܕܐܘܪܲܝܬܵـܐ ܒܲܪܸܟܡܵܪܝ

(Genesis 7:13-24)

ܘܥܒܸܪܠܵܝ ܢܘܿܚ ܘܝܵܠܕ̈ܗ ܘܒܲܟܼܬܸܗ ܘܐܸܢܫܹ̈ܐ ܕܝܵܠܕ̈ܗ ܥܸܡܹܗ ܠܩܹܒܘܼܬܼܵܐ . ܡ̣ܢ ܩܖܵܡ ܡܵܝ̈ـܐ ܕܛܲܘܦܵܢܵܐ. ܘܡ̣ܢ ܚܲܝ̈ܘܵܢܹ̈ܐ ܢܵܖܝܼܦܹ̇ܐ؛ ܘܡ̣ܢ ܚܲܝܘܵܢܹ̈ܐ ܠܵܐ ܢܵܖܝܼܦܸ̇ܐ ܘܡ̣ܢ ܛܵܝܪܹ̈ܐ ܘܟܠ ܕܸܟܪܵܚܸܫ ܥܸܠܸܕ ܐܲܪܥܵܐ ܬܪܹܝܢ ܬܪܹܝܢ ܥܒܸܪܠܵܝ ܥܸܡܸܕ ܢܘܿܚ ܠܩܹܒܘܼܬܼܵܐ . ܐܘܼܪܙܵܐ ܘܢܸܩܒܼܵܐ ܕܹܝܟܼ ܕܸܦܩܸܖܠܸܗ ܐܲܠܵܗܵܐ ܠܢܘܿܚ.

 ܘܒܵܬܸܪ ܫܲܒܼܥܵܐ ܝܘܼ̈ܡܵܬܼܵـܐ ܡܵܝ̈ܐ ܕܛܲܘܦܵܢܵܐ ܗܘܹܝܠܵܝ ܥܸܠܸܕ ܐܲܪܥܵܐ. ܐܲܪܒܥܝܼܢ̄ ܝܘܼ̈ܡܵܬܼܵـܐ، ܘܙܸܕܠܵܝ ܡܵܝ̈ܐ ܘܟܸܡ ܛܵܥܢܝܼܠܵܗ̇ ܠܩܹܒܘܼܬܼܵܐ. ܘܝܼܪܸܡܠܵܗ̇ ܡ̣ܢ ܐܲܪܥܵܐ ܘܙܟܸܡܠܵܝ ܡܵܝ̈ܐ ܘܙܸܕܠܵܝ ܟܲܒܝܼܪܵܐ ܥܸܠܸܕ ܐܲܪܥܵܐ؛ ܘܟܪܵܚܫܵܐܗ̄ܘܵܐ ܩܹܒܘܼܬܼܵܐ ܠܪܸܫ ܡܵܝ̈ܐ. ܘܡܟܘܼܣܹܐܠܵܝ ܟܠܲܝ ܛܘܼܪ̈ܢܹܐ ܥܠܘܿܝܹ̈ܐ ܚܘܿܬܸܕ ܫܡܲܝܵܐ. ܚ̇ܲܡܫܲܥܣܲܪ ܕܪ̈ܵܥܹܐ ܡ̣ܢ ܠܥܹܠ ܙܸܕܠܵܝ ܡܵܝ̈ܐ. ܘܧܢܹܐܠܸܗ ܟܠ ܡܵܪ ܦܲܓܼܪܵܐ ܕܸܟܪܵܚܸ̇ܫ ܥܸܠܸܕ ܐܲܪܥܵܐ. ܘܦܸܫܠܸܗ ܢܘܿܚ ܘܐܗܵܢܝܼ ܕܗ̄ܘܹܝܗ̄ܘܵܐ ܥܸܡܹܗ ܒܓܘܿ ܩܹܒܘܼܬܼܵܐ. ܘܙܸܕܠܵܝ ܡܵܝ̈ܐ ܥܸܠܸܕ ܐܲܪܥܵܐ ܐܸܡܵܐܐ ܘܚ̇ܲܡܫܝܼܢ̄ ܝܘܼ̈ܡܵܬܼܵـܐ܀

 

ܚܒܪܗ

ܫܠܵܘ ܟܬܼܵܒܼܵܐ ܕܝܑܼܫܘܿܥ ܒܲܪܢܘܿܢ ܒܲܪܸܟܼܡܵܪܝ

(Joshua 5:15-6:5)

ܘܐܡܹܪܹܠܗ̄ ܪܵܒܵܐ ܕܥܲܣ̈ܟܵܪܵܬܼܵܐ ܕܡܵܪܝܵܐ ܬܵܐ ܝܑܼܫܘܿܥ؛ ܫܠܘܿܚ ܨܘܿܠܘܼܟܼ ܡ̣ܢ ܐܲܩ̈ܠܵܬܼܘܼܟܼ. ܡܒܹܝܕ ܕܘܼܟܬܼܵـܐ ܕܝܼܘܸܬ ܩܝܼܡܵܐ ܒܓܵܘܵܗ̇ ܩܲܕܝܼܫܬܵـܐ ܝܠܵܗ̇. ܘܥܒܸܖܠܸܗ ܝܑܼܫܘܿܥ ܗܵܕܲܟܼ.

 ܘܐܝܼܪܝܼܚܘܼ ܓܼܠܸܩܬܵـܐ ܗ̄ܘܵܐܗ̄ܘܵܐ ܡ̣ܢ ܩܲܖ̄ܡ ܒܢܲܝ̈ ܝܼܣܪܵܝܹܠ. ܘܠܲܝܬܼܗ̄ܘܵܐ ܕܢܵܦܸܩ ܘܝܵܐܢ ܕܥܵܒܸܪ. ܘܐܡܹܪܹܠܗ̄ ܡܵܪܝܵܐ ܬܵܐ ܝܑܼܫܘܿܥ؛ ܚ̇ܙܝܼ ܕܸܡܣܘܼܦܹܐܠܝܼ ܒܐܝܼ̈ܕܵܬܼܘܼܟܼ ܠܐܝܼܪܝܼܚܘܼ، ܘܠܡܲܠܟܵܐ ܕܝܵܠܗ̇، ܘܠܟܠܸܗ ܚ̇ܲܝܠܵܗ̇. ܚ̇ܖܘܼܪܘܼܠܵܗ̇ ܠܸܡܖܝܼܢ̄ܬܵـܐ. ܟܘܼܠܘܿܟܘܼܢ ܓܲܒܼܪܹ̈ܐ ܥܵܒܼܵܕܹ̈ܐ ܕܫܲܪܸܐ. ܘܚ̇ܖܘܼܪܘܼܠܵܗ̇ ܠܸܡܖܝܼܢ̄ܬܵـܐ ܚ̇ܖܵܐ ܓܵܗܵܐ ܒܝܲܘܡܵܐ. ܗܵܕܲܟܼ ܥܒܼܘܼܖܘܼ ܐܸܫܬܵـܐ ܝܘܼ̈ܡܵܬܼܵـܐ. ܘܫܲܒܼܥܵܐ ܟܵܗ̈ܢܹܐ ܫܵܩܠܝܼܢ̄ ܩܲܪ̈ܢܵܬܼܵـܐ ܘܡܵܚ̇ܝܹܢ ܩܲܖ̄ܡ ܩܸܒܼܘܼܬܼܵܐ. ܘܠܝܲܘܡܵܐ ܕܫܲܒܼܥܵܐ ܚܸ̇ܖܪܘܼܠܵܗ̇ ܠܸܡܖܝܼܢ̄ܬܵـܐ ܐܸܫܒܲܥ ܓܵܗ̈ܬܼܵܐ ܘܟܵܗ̈ܢܹܐ ܡܵܚܹܝܢ ܒܩܲܪ̈ܢܵܬܼܵܐ. ܘܟܘܼܕ ܡܵܚܹܝܢ ܒܩܲܪ̈ܢܵܬܼܵـܐ ܘܫܵܡܥܘܼܬܘܼܢ ܩܵܠܵܐ ܕܩܲܪܢܵܐ، ܫܘܼܕ ܡܥܵܝܸܛ ܟܠܸܗ ܥܲܡܵܐ ܥܵܝܲܛܬܵـܐ ܪܲܒܬܼܵـܐ ܘܒܸܕ ܢܵܦܸܠ ܫܘܼܪܵܐ ܕܸܡܖܝܢ̄ܬܵـܐ ܒܕܘܼܟܬܹܗ، ܘܒܸܕ ܝܵܣܹܩ ܟܘܼܕ ܚܲܕ̄ ܒܲܪܩܘܼܒܼܠܸܗ܀

 

ܕܚܕܒܫܒܐ ܕܬܠܬܐ ܕܨܘܡܐ

ܦܵܘܠܘܿܣ ܫܠܝܼܚܵܐ ܐܸܓܲܪܬܵܐ ܕܲܠܘܵܬܼ ܪ̈ܗ̄ܘܿܡܵܝܹܐ ܐܲܚܲܝ̈ ܒܲܪܸܟܼܡܵܪܝ

(Romans 7:14-2 5 )

ܒܲܝܕܿ ܟܝܵܖܥܘܼܟܼ ܢܵܡܘܿܣܵܐ ܕܪܘܼܚܵܐ̄ܝܠܹܗ، ܘܐܵܢܵܐ ܦܲܓܼܪܵܢܵܐܝܘܸܢ ܘܸܡܙܘܼܒܿܢܵܐ ܠܸܚܛܝܼܬܼܵـܐ. ܡܸܢܕܿܝܼ ܕܟܥܵܒܖܸܢ ܠܵܐ ܟܝܵܖܥܸܢ، ܘܠܵܐ ܡܸܢܕܿܝܼ ܕܸܟܥܵܓٕܸܒܠܝܼ ܟܥܵܒܼܖܸܢ. ܐܸܠܵܐ ܡܸܢܕܿܝܼ ܕܸܟܿܣܵܢܸܢ ܗܵܘܵ ܟܥܵܒܼܖܸܢ. ܘܐܸܢ ܡܸܢܕܿܝܼ ܕܠܵܐ ܟܥܵܓٕܸܒܠܝܼ ܟܥܒܼܖܸܢ، ܟܣܵܗܕܸܢ ܥܸܠܸܕ ܢܵܡܘܿܣܵܐ ܕܚܲܩܵܢܝܼܠܹܗ. ܕܵܗܵܐ ܠܵܐ ܐܵܢܵܐ ܟܥܒܼܖܸܢ ܗܵܖܝܼ، ܐܸܠܵܐ ܚܛܝܼܬܼܵـܐ ܕܸܟܿܥܵܡܪܵܐ ܒܓܵܘܝܼ. ܘܐܵܢܵܐ ܟܝܵܖܥܸܢ ܕܠܵܐ ܟܥܵܡܪܵܐ ܒܓܵܘܝܼ ܛܵܒܼܬܵـܐ. ܝܵܥܢܝܼ ܒܓܵܘ ܦܲܓܼܪܝܼ. ܡܒܹܝܕ ܕܒܵܥܸܢ ܛܵܒܼܬܵـܐ ܣܵܢܵܐܝܼܠܵܗ̇ ܛܵܠܝܼ، ܕܥܵܒܼܕܸܢܵܠܸܗ̇ ܠܲܝܬܼܒܝܼ. ܠܵܐ ܠܛܵܒܼܬܵـܐ ܕܟܸܒܥܸܢ ܕܥܵܒܼܕܸܢ ܟܥܵܒܼܖܸܢ، ܐܸܠܵܐ ܒܝܼܫܬܵـܐ ܕܠܵܐ ܟܒܥܸܢ ܕܥܵܒܼܕܸܢ ܐܗܵܝܵ ܟܥܵܒܼܕܸܢ. ܘܐܸܢ ܡܸܢܕܝܼ ܕܠܵܐ ܟܒܥܸܢ ܟܥܵܒܖܸܢ، ܠܵܝܘܸܢ ܐܵܢܵܐ ܒܸܥܒܼܵܖܵܐ، ܐܸܠܵܐ ܚܛܝܼܬܼܵـܐ ܕܸܟܿܥܵܡܪܵܐ ܒܓܵܘܝܼ.

 ܟܚܵܙܸܢ ܒܵܕܲܡ ܕܢܵܡܘܿܣܵܐ ܟܿܬܵܦܸ̇ܩ ܥܸܡܸܕ ܗܲܘܢܝܼ، ܗܵܘܵ ܕܟܸܒܥܸܐ ܕܥܵܒܸܖ ܛܵܒܼܬܵـܐ. ܐܸܠܐ ܗܲܪ ܒܿܝܼܫܬܵـܐ ܩܵܪܘܼܒܼܬܵܐܝܠܵܗ̇ ܥܸܠܝܼ.  ܐܵܢܵܐ ܟܦܵܨܚܸܢ ܒܢܵܡܘܿܣܵܐ ܕܐܲܠܵܗܵܐ ܒܒܲܪܢܵܫܵܐ ܕܓܵܘܵܝܸܐ، ܐܸܠܵܐ ܟܚܵܙܸܢ ܢܵܡܘܿܣܵܐ ܐܚܸܪ̄ܢܵܐ ܒܗܲܕܵܡܹ̈ܐ ܕܝܼܠܝܼ ܕܟܸܡܩܵܬܸܠ ܕܲܪܩܘܼܒܼܠ ܢܵܡܘܿܣܵܐ  ܕܚܘܼܫܵܒܼܝܼ̈ ܘܟܸܿܡܝܵܣܹܝܪܠܝܼ ܠܢܵܡܘܿܣܵܐ ܕܸܚܛܝܼܬܼܵـܐ ܕܐܝܼܬܼ ܒܓܵܘ ܗܲܕܵܡܹ̈ܐ ܕܝܼܠܝܼ. ܒܲܪܢܵܫܵܐܝܘܸܢ ܣܵܦ̇ܝܼܠ. ܡܵܢܝܼ ܒܸܕ ܡܟܼܵܠܸܨܠܝܼ ܡܦܲܓܼܪܵܐ ܗܵܕܼܝܼ ܕܡܲܘܬܼܵܐ؟ ܬܲܘܕܝܼܬܼܵܐ ܬܵܐ ܐܲܠܵܗܵܐ ܒܡܵܪܢ ܝܑܼܫܘܿܥ ܡܫܝܼܚܵܐ܀