ܚܖܒܫܒܐ ܕܚܡܫܐ ܕܫܠܝܚܐ

June 28, 2009

ܬܹܒܼܘ ܘܲܫܠܵܘ ܬܸܢܝܵܢ ܢܵܡܘܿܣܵܐ ܣܸܦܪܵܐ ܕܲܚܲܡܫܵܐ ܕܐܘܿܪܵܝܬܵـܐ ܒܲܪܸܟܼܡܵܪܝ

(Deuteronomy 1:34-40)

      ܘܐܡܹܪܹܠ̄ܗ ܡܘܼܫܸܐ ܬܵܐ ܥܲܡܵܐ؛ ܫܡܸܥܠܸܗ ܡܵܪܝܵܐ ܩܵܠܵܐ ܕܬܵܢܵܝܵܬܼܘܿܟܼ̈ܘܼܢ، ܘܥܝܼܩܠܸܗ. ܘܐܝܼܡܹܐܠܹܗ ܘܐܡܹܪܹܠ̄ܗ؛ ܕܠܵܐ ܚܲܖ̄ ܡܢ ܗܵܢ ܓܲܒܼܪܹ̈ܐ ܕܗܵܖܝܼ ܕܵܪܵܐ ܒܝܼܫܵܐ ܒܸܕܚܵܙܝܢ ܠܐܲܪܥܵܐ ܛܲܒܼܬܵـܐ ܕܐܝܼܡܹܐܠܝܼ ܠܸܗܒܼܵܠܵܗ̇ ܬܵܐ ܒܵܒܵܘܵܬܼܘܿܟܼ̈ܘܼܢ، ܐܸܠܵܐ ܬܵܐ ܟܵܠܵܒ ܒܸܪ ܕܝܘܿܦܲܢܵܐ؛ ܐܵܗܘܼ ܒܚܵܙܹܐܠܵܗ̇ ܘܛܵܠܹܗ ܒܝܵܗܒܸܢ ܐܲܪܥܵܐ ܕܸܪܚܸܫܠܹܗ ܥܸܠܵܗ̇، ܘܬܵܐ ܐܝ̈ܵܠܹܕ̄ܗ، ܡܒܹܝܕ ܕܸܫܡܸܥܠܹܗ ܠܡܵܪܝܵܐ. ܘܗܲܡ ܥܸܠܝܼ ܚܡܸܨܠܸܗ ܡܵܪܝܵܐ ܡܢ ܒܵܬܼܪܘܿܟܼܘܼܢ، ܘܐܡܹܪܹܠ̄ܗ ܛܵܠܝܼ؛ ܕܗܲܡ ܐܵܝܸܬ ܠܵܐ ܟܥܵܒܼܪܸܬ ܠܬܵܡܵܐ، ܐܸܠܵܐ ܐܸܢ ܝܑܼܫܘܿܥ ܒܲܪܢܘܿܢ، ܕܸܟܩܵܝܸܡ ܩܵܖ̄ܡܘܼܟܼ؛ ܐܵܗܘܼ ܒܥܵܒܸܪ ܠܬܵܡܵܐ؛ ܡܲܙܟܸܡܠܹܗ، ܡܒܹܝܕ ܕܐܵܗܘܼ ܒܸܕ ܡܲܝܪܸܬܼܠܵܗ̇ ܬܵܐ ܝܼܣܪܵܝܹܠ. ܘܥܸܪ̈ܒܘܿܟܼܘܼܢ ܘܩܸܢ̈ܝܵܢܘܿܟܼܘܼܢ ܐܡܹܪܠ̄ܘܿܟܼܘܼܢ ܬܵܐ ܢܸܗܒܵܐ ܒܸܕ ܗܵܘܝܢ ܐܝ̈ܵܠܕ̄ܘܿܟܼܘܼܢ ܕܠܵܐ ܝܼܖܸܥܠܵܝ ܗܕܝܘܼܡܝܲܘܡܵܐ ܛܲܒܼܬܵـܐ ܘܒܝܼܫܬܵـܐ، ܗܵܢܝܼܢ̄ ܒܥܵܒܼܪܝܼܢ̄ ܬܵܡܵܐ ܘܛܵܠܲܝ ܒܝܵܗܒܸܢܠܵܗ̄ ܘܗܵܢܝܼܢ̄ ܒܝܵܪܬܼܝܼܢܠܵܗ̇، ܘܐܲܟܼܬܘܼܢ ܕܥܘܼܪܘܼ ܘܡܲܛܸܥܢܘܼ ܘܪܸ̈ܚܘܼܫܘܼ ܒܓܘܿ ܒܲܪܝܼܵܐ ܠܐܘܼܪܚܵܐ ܕܝܵܡܵܐ ܕܣܘܿܦ܀ 
 

ܚܒܪܗ

ܫܠܵܘ ܢܒܼܝܼܘܼܬܹܗ ܕܐܹܫܲܥܝܵܐ ܒܲܪܸܟܼܡܵܪܝ

(Isaiah 1:21-27)

      ܕܐܲܝܟܼ ܦܸܫܠܵܗ̇ ܡܖܝܼܢ̄ܬܵـܐ ܡܗܘܼܝܡܲܢܬܵـܐ ܙܲܢܹܝܬܼܵـܐ؟ ܗܵܖܝܼ ܕܗ̄ܘܵܐܗ̄ܘܵܐ ܡܠܝܼܬܼܵـܐ ܥܸܕܠܘܼܬܼܵܐ. ܘܒܓܵܘܵܗ̇ ܐܝܼܬܼܗ̄ܘܵܐ ܚܲܩܘܼܬܵܐ، ܘܕܲܗܵܐ ܟܥܵܡܪܝܼܢ ܩܵܛܘ̈ܠܹܐ. ܦܵܪ̈ܲܟܼܝ ܦܸܫܠܵܝ ܡܘܼܣܸ̈ܠܝܹܐ، ܘܚܲܡܪܵܟܼܝ ܓܒܼܝܼܐܵܐ ܒܡܵܝܹ̈ܐ. ܪܹ̈ܫܵܢܹܐ ܕܝܼܠܵܟܼܝ ܚܵܝܸܢܹܐ، ܘܫܲܪ̈ܝܼܟܹܐ ܥܸܡܸܕ ܓܵܢ̈ܒܹܐ. ܟܠܵܝ ܟܸܒܥܵܝܢ̄ ܒܲܪܛܝܼܠ، ܘܟܸܡ ܩܵܠܸܩܠܝܼܢ̄ ܠܸܫܩܵܠܵܐ ܛܘܿܠ. ܬܵܐ ܝܵܬܘܼܡܵܐ ܠܵܐ ܟܕܵܝܢܝܼܢ̄، ܘܕܝܼܢܹܐ ܕܐܲܪܡܸܠܬܼܵـܐ ܠܵܐ ܟܥܵܒܸܪ ܠܓܹܝܒܲܝ.

      ܡܛܲܠܸܒܸܕ ܗܵܖܝܼ ܗܵܖܐܲܝܟܼ ܟܐܵܡܸܪ ܡܵܪܹ̈ܐ ܡܵܪ̈ܘܵܬܼܵܐ ܚܲܝܠܵܢܵܐ، ܙܲܟܼܡܵܐ ܕܝܼܣܪܵܝܹܠ؛ ܘܵܝܵܐ ܒܸܕ ܦܵܪܥܸܢ ܬܵܐ ܣܵܢܵܝܹ̈ܐ ܕܝܼܠܝܼ݂، ܘܒܸܕ ܫܵܩܠܸܢ ܛܘܿܠ ܡܢ ܕܸܫ̃ܡܸܢܝܼ. ܘܒܡܲܕܸܥܪܸـܢ ܐܝܼܖܝܼ ܥܸܠܲܟܼܝ ܘܒܸܕ ܡܨܵܦܸܢ ܫܸܚܬܵـܐ ܕܝܼܠܵܟܼܝ ܒܓܘܿ ܡܲܢܖܲܦ̮ܬܵـܐ. ܘܒܸܕ ܡܲܪܸܚܩܸـܢ ܥܵܘ̈ܠܹܐ ܕܝܼܠܵܟܼܝ ܟܠܲܝ. ܘܒܸܕ ܡܲܕܸܥܪܸـܢ ܕܲܝܵܢܹ̈ܐ ܕܝܼܠܵܟܼܝ ܡܐܲܝܟܼ ܩܵܖ̄ܡܲܝܬܼܵـܐ، ܘܡܲܫ̈ܝܼܪܵܢܵܟܼܝ ܡܐܲܝܟܼ ܫܵܪܲܝܬܼܵـܐ. ܘܒܲܬܸܪ ܕܐܲܝܟܼ ܒܸܕ ܦܵܝܫܲܬ ܩܪܝܼܬܼܵـܐ ܡܖܝܼܢ̄ܬܵـܐ ܕܙܲܕܝܼܩܘܼܬܼܵܐ، ܘܡܖܝܼܢ̄ܬܵـܐ ܕܗܲܝܡܵܢܘܼܬܼܵܐ. ܨܗܝܘܿـܢ ܒܕܝܼܢܵܐ ܒܦܵܝܫܵܐ ܡܚܘܼܠܲܨܬܵܐ، ܘܡܝܘܼܣܪ̈ܐ ܕܝܼܠܵܗ̇ ܒܙܲܕܝܼܩܘܼܬܼܵܐ. ܘܬܒܼܵܪܵܐ ܬܵܐ ܚܲܛܵܝܹ̈ܐ ܘܥܵܘ̈ܠܹܐ ܒܸܚܖܵܖܹ̈ܐ، ܘܗܵܢ ܕܸܫܒܸܩܠܵܝ ܠܡܵܪܝܵܐ ܒܸܕ ܦ̮ܵܢܝܢ܀ 
 

ܚܕܒܫܒܐ ܕܚܡܫܐ ܕܫܠܝܚܐ

ܦܵܘܠܘܿܣ ܫܠܝܼܚܵܐ ܐܸܓܲܪܬܵܐ ܕܲܠܘܵܬܼ ܩܘܿܪ̈ܲܢܬܵܝܸܐ ܐܲܚܲܝ̈ ܒܲܪܸܟܼܡܵܪܝ

(1 Corinthians 14:1-19)

      ܐܸܢ ܐܵܬܸܢ ܠܓܹܝܒܘܿܟܼܘܼܢ ܘܡܲܚܟܸܢ ܥܸܡܘܿܟܼܘܼܢ ܒܓܘܼܫܡܵܐ، ܡܵܐ ܒܸܕ ܡܚܲܨܠܸܢ ܛܵܠܘܿܟܼܘܼܢ، ܐܸܠܵܐ ܐܸܢ ܡܲܚܟܸܢ ܥܸܡܘܿܟܼܘܼܢ ܝܵܢ ܒܓܸܠܝܵـܢܵܐ ܝܵܢ ܒܝܼܕܲܥܬܼܵـܐ ܝܵܢ ܒܸܢܒܼܝܼܘܼܬܼܵܐ ܝܵܢ ܒܝܘܼܠܦܵܢܵܐ. ܗܲܡ ܡܸܢ̈ܕܵܢܹܐ ܗܵܢܲܝ ܕܠܲܝܬܼܒܲܝ ܓܝܵـܢܵܐ ܘܸܟܝܵܗܒܼܝܼܢ̄ ܩܵܠܵܐ ܐܸܢ ܙܵܡܵܪܵܐ ܘܐܸܢ ܩܝܼܬܼܵܪܵܐ، ܐܸܢ ܦܸܪܫܘܿܢܵܐ ܠܵܐ ܥܵܒܼܖܝܼܢ̄ ܒܝܼܢܝܼ ܩܝܼܢܬܵـܐ ܠܚܒܼܪܬܼܵܗ̇، ܕܐܲܝܟܼ ܒܸܕ ܦܵܝܸܫ ܝܼܖܝܼܥܵܐ ܡܸܢܕܝܼ ܕܦܵܝܸܫ ܡܙܘܼܡܪܵܐ ܝܵܢ ܡܸܢܕܝܼ ܕܦܵܝܸܫ ܛܪܝܼܦܵܐ. ܘܐܸܢ ܩܲܪܢܵܐ ܩܵܪܝܵܐ ܩܵܠܵܐ ܕܠܵܐ ܗܵܘܸܐ ܦܪܝܼܫܵܐ، ܡܵܢܝܼ ܒܸܕ ܚܵܛܸ̃ܪ ܬܵܐ ܫܲܪܸܐ؟ ܗܵܖܐܲܝܟܼ ܗܲܡ ܐܲܚܬܘܼܢ، ܐܸܢ ܐܵܡܪܘܼܬܘܼܢ ܬܵܢܵܝܬܼܵـܐ ܒܓܘܼܫܡܵܐ ܘܠܵܐ ܗܵܘܝܵܐ ܡܦܘܼܫܵܩܬܵـܐ، ܕܐܲܝܟܼ ܒܸܕ ܦܵܝܸܫ ܝܼܖܝܼܥܵܐ ܡܸܢܕܝܼ ܕܐܵܡܪܘܼܬܘܼܢ؟ ܒܸܕ ܗܵܘܘܿܬܘܼܢ ܟܼܕܲܝܓܸܕ ܥܸܡܸܕ ܦܘܿܚܵܐ ܟܡܲܚܟܘܿܬܘܼܢ. ܗܘܿܠܸܗ ܬܲܪ̈ܙܹܐ ܕܠܸܫܵܢܹ̈ܐ ܟܲܒܝܼܪܹ̈ܐ ܐܝܼܬܼ ܒܥܵܠܡܵܐ، ܘܠܲܝܬܼ ܚܲܖ̄ ܡܸܢܲܝ ܕܠܵܐ ܩܵܠܵܐ، ܘܐܸܢ ܠܵܐ ܝܵܖܥܸܢ ܚܲܝܠܵܐ ܕܩܵܠܵܐ، ܒܸܕ ܗܵܘܸܢ ܒܲܪܒܪܵܝܵܐ ܬܵܐ ܗܵܘ ܕܸܟܡܲܚܟܸܐ، ܘܗܲܡ ܗܘ ܕܸܟܡܲܚܟܸܐ ܒܸܕ ܗܵܘܸܐ ܛܵܠܝܼ ܒܲܪܒܪܵܝܵܐ. ܗܵܖܐܲܝܟܼ ܗܲܡ ܐܲܚܬܘܼܢ، ܡܒܹܝܕ ܡܵܪ ܓܼܝܼܪܸܬܵܐ ܗ̄ܘܘܿܬܘܼܢ ܒܓܵܘ ܚܸ̈ܠܐܵܬܼܵܐ ܕܪܘܼܚܵܐ، ܬܵܐ ܒܸܢܝܵـܢܵܐ ܕܥܹܕܬܵܐ ܛܠܘܼܒܘܼ ܕܙܵܝܕܘܼܬܘܼܢ.

      ܘܐܵܗܘܼ ܕܸܟܡܲܚܟܸܐ ܒܓܘܼܫܡܵܐ، ܫܘܼܕ ܡܨܵܠܸܐ ܕܸܡܦܵܫܸܩ. ܡܒܝܕ ܐܸܢ ܗܵܘܸܐ ܕܸܡܨܵܠܸܢ ܒܓܘܼܫܡܵܐ ܪܘܼܚܝܼܠܵܗ̇ ܡܨܲܠܘܿܝܸܐ، ܘܗܲܘܢܝܼ ܕܠܵܐ ܦܹܐܪܹ̈ܐ ܝܼܠܗ. ܒܵܕܲܡ ܡܵܐ ܥܵܒܼܖܸـܢ؟ ܡܨܵܠܸܢ ܒܪܘܼܚܝܼ، ܘܡܨܵܠܸܢ ܗܲܡ ܒܗܲܘܢܝܼ؛ ܘܡܙܲܡܪܸـܢ ܒܪܘܼܚܝܼ ܘܡܙܲܡܪܸـܢ ܗܲܡ ܒܗܲܘܢܝܼ. ܘܐܸܠܵܐ ܐܸܢ ܡܒܲܪܟܸܬ ܒܪܘܼܚܵܐ، ܗܘܿ ܕܠܵܐ ܟܦ̮ܵܗܸܡ ܥܸܠܘܼܟܼ، ܕܐܲܝܟܼ ܒܸܕ ܐܵܡܸܪ ”ܐܵܡܹܝܢ،“ ܥܸܠܸܕ ܫܸܟܸܪ ܕܝܼܠܘܼܟܼ، ܡܒܹܝܕ ܠܵܐ ܟܝܵܕܹܥ ܡܵܐ ܟܐܵܡܪܸܬ؟ ܐܵܝܸܬ ܪܲܢܕܵܐ ܟܸܡܒܲܪܟܸܬ، ܐܸܠܵܐ ܬܲܢܲܝܬܼܘܼܟܼ ܠܵܐ ܟܦܵܝܫܵܐ ܦ̮ܗܝܼܡܬܵـܐ. ܟܫܲܟܪܸـܢ ܬܵܐ ܐܲܠܵܗܵܐ ܕܒܸܫ ܟܲܒܝܼܪܵܐ ܡܟܠܘܿܟܼܘܼܢ ܟܡܲܚܟܸܢ ܒܓܘܼܫܡܵܐ، ܐܸܠܵܐ ܒܥܹܕܬܵܐ ܟܸܒܥܢ ܕܚܲܡܸܫ ܬܵܢܵܝ̈ܵܬܼܵـܐ ܒܗܵܘܢܝܼ ܡܲܚܟܸܢ ܕܗܲܡ ܠܚܸܪ̈̄ܢܹ̈ܐ ܡܲܠܦܸܢ، ܒܸܫ ܟܲܒܝܼܪܵܐ ܡܢ ܪܸܒܘܼܵܬܼܵܐ ܕܬܵܢܵܝܵ̈ܬܼܵـܐ ܒܓܘܼܫܡܵܐ܀