ܬܹܒܼܘ ܘܲܫܠܵܘ ܡܲܦܩܵܢܵܐ ܣܸܦܪܵܐ ܕܲܬܪܹܝܢ ܕܐܘܿܪܵܝܬܵـܐ ܒܲܪܸܟܼܡܵܪܝ

(Exodus 19:1-9; 20:18-19)

      ܒܝܲܪܚܵܐ ܕܸܬܠܵܬܼܵـܐ ܒܵܬܸܪ ܢܦܵܩܬܵـܐ ܕܸܒܢܲܝ̈ ܝܼܣܪܵܝܹܠ ܡܢ ܡܸܨܪܹܝܢ، ܒܗܘܿ ܝܲܘܡܵܐ ܐ̄ܬܹܐܠܵܝ ܠܒܲܪܝܼܵܐ ܕܣܝܼܢܲܝ. ܡܘܼܛܥܸܢܠܵܝ ܡܢ ܪܦܝܼܖܝܼܢ ܘܐ̄ܬܹܐܠܵܝ ܠܒܲܪܝܼܵܐ ܕܣܝܼܢܲܝ. ܘܝܼ̄ܬܸܒܼܠܵܝ ܒܒܲܪܝܼܵܐ. ܘܝܼ̄ܬܸܒܼܠܵܝ ܬܵܡܵܐ ܝܼܣܪܵܝܹܠ ܒܲܪܩܘܼܒ̄ܠ ܛܘܼܪܵܐ. ܘܣܸܩܠܸܗ ܡܘܼܫܹܐ ܠܓܹܝܒܸܕ ܐܲܠܵܗܵܐ، ܘܩܪܹܐܠܸܗ ܠܓܹܝܒܸܗ ܐܲܠܵܗܵܐ ܡܢ ܛܘܼܪܵܐ، ܘܐܡܹܪܹܠ̄ܗ؛ ܗܵܖܐܲܝܟܼ ܐܲܡܪܸܬ ܬܵܐ ܒܝܼ ܝܲܥܩܘܿܒܼ، ܘܡܲܚܘܸܬ ܬܵܐ ܒܝܼ ܝܼܣܪܵܝܹܠ؛ ܐܲܟܼܬܘܼܢ ܚܙܹܐܠܘܿܟܼܘܼܢ ܡܸܢܕܝܼ ܕܸܥܒܸܖܠܝܼ ܒܡܸܨܪ̈ܝܹܐ، ܟܸܡ ܛܵܥܢܸܢܠܘܿܟܼܘܼܢ ܟܼܕܲܝܓܸܕ ܥܸܠܸܕ ܓܘܼܠܦܵܢܹ̈ܐ ܕܢܸܫܪܵܐ ܘܟܸܡ ܡܹܐܬܸܢܠܘܿܟܼܘܼܢ ܠܓܹܝܒܝܼ. ܘܕܵܗܵܐ ܐܸܢ ܫܡܵܥܵܐ ܫܵܡܥܘܼܬܘܼܢ ܒܩܵܠܝܼ ܘܢܵܛܪܘܼܬܘܼܢ ܘܲܥܕܵܐ ܕܝܼܠܝܼ، ܒܸܕ ܗܵܘܘܿܬܘܼܢ ܒܸܥܝܹ̈ܐ ܥܸܠܝܼ ܒܸܫ ܡܟܘܼܠܲܝ ܥܲܡܡܹ̈ܐ ܕܐܲܪܥܵܐ؛ ܡܒܲܝܕ ܕܝܼܠܝܼ ܐܝܼܠܵܗ̇ ܐܲܪܥܵܐ ܘܐܲܟܼܬܘܼܢ ܒܗܵܘܘܿܬܘܼܢ ܛܵܠܝܼ ܡܲܠܟܘܼܬܼܵܐ، ܘܟܵܗ̈ܢܹܐ ܘܥܲܡܵܐ ܩܲܕܝܼܫܵܐ. ܗܵܢܝܼ ܬܵܢܵܝ̈ܬܼܵـܐ ܐܲܡܪܸܬ ܬܵܐ ܒܝܼ ܝܼܣܪܵܝܹܠ.

      ܘܐ̄ܬܹܐܠܹܗ ܡܘܼܫܹܐ ܘܩܪܹܐܠܸܗ ܠܣܵܒܹ̈ܐ ܕܥܲܡܵܐ، ܘܡܘܼܚܟܹܐܠܸܗ ܛܵܠܲܝ ܟܠܲܝ ܬܵܢܵܝ̈ܬܼܵـܐ ܕܟܸܡ ܦܵܩܸܖܠܹܗ ܡܵܪܝܵܐ. ܘܡܓٕܘܼܘܸܒܠܹܗ ܟܠܸܗ ܥܲܡܵܐ ܒܸܚܖܵܖܸܐ، ܘܐܡܹܪܹܠ̄ܗ؛ ܟܠܡܸܢܕܝܼ ܕܐܵܡܸܪ ܡܵܪܝܵܐ ܒܸܕ ܥܵܒܼܖܘܼܟܼ. ܘܡܘܼܕܥܹܪܠܸܗ ܡܘܼܫܹܐ ܦܘܼܢܵܝܵܐ ܕܥܲܡܵܐ ܬܵܐ ܡܵܪܝܵܐ. ܘܐܡܹܪܹܠ̄ܗ ܡܵܪܝܵܐ ܬܵܐ ܡܘܼܫܹܐ؛ ܗܘܿܠܸܗ ܒܸܕ ܐܵܬܸܢ ܠܓܹܝܒܘܼܟܼ ܒܚܸܫܟܵܐ ܕܥܲܢܵܢܵܐ ܬܵܐ ܕܫܵܡܸܥ ܥܲܡܵܐ ܐܝܼܡܲܢ ܕܡܲܚܟܸܢ ܥܸܡܘܼܟܼ، ܘܗܲܡ ܥܸܠܘܼܟܼ ܕܸܡܗܲܝܸܡܢܝܼܢ.

      ܘܡܘܼܚܘܹܐܠܸܗ ܡܘܼܫܹܐ ܦܘܼܢܵܝܵܐ ܕܥܲܡܵܐ ܬܵܐ ܡܵܪܝܵܐ. ܘܟܠܹܗ ܥܲܡܵܐ ܟܚܵܙܹܐܗ̄ܘܵܐ ܩܵܠܹـ̈ܐ، ܘܒܸܪ̈ܩܹܐ ܘܩܵܠܵܐ ܕܩܲܪܢܵܐ. ܘܛܘܼܪܵܐ ܕܟܸܡܬܲܢܬܸܢ، ܘܚܙܹܐܠܸܗ ܥܲܡܵܐ ܘܙܕܹܥܠܸܗ ܟܵܒܝܼܪܵܐ، ܘܟܠܹܐܠܸܗ ܪܲܚܘܼܩܵܐ. ܘܐܡܹܪܠܵܝ ܬܵܐ ܡܘܼܫܹܐ؛ ܡܲܚܟܝܼ ܐܵܝܸܬ ܥܸܡܲܢ ܒܸܕ ܫܵܡܥܘܼܟܼ، ܘܠܵܐ ܡܲܚܟܸܐ ܥܸܡܲܢ ܐܲܠܵܗܵܐ ܕܠܵܐ ܡܵܝܬܘܼܟܼ܀

      ܚܒܪܗ

ܫܠܵܘ ܦܪܲܟܣܝܼܣ ܕܲܫܠܝܼܚܹ̈ܐ ܒܲܪܸܟܼܡܵܪܝ

(Acts 2:1-21)

      ܟܘܼܕ ܟܡܸܠܠܵܝ ܝܘܼ̈ܡܵܬܼܵـܐ ܕܦܲܢܛܹܩܘܼܣܛܹܐ، ܓٕܡܝܼܥܹܐ ܗ̄ܘܵܐܗ̄ܘܵܐ ܟܠܲܝ ܒܸܚܖܵܖܸܐ. ܗܘܹܐܠܸܗ ܡܢ ܓܼܵܦ̮ܠܹܐ ܩܵܠܵܐ ܡܢ ܫܡܲܝܵܐ ܟܼܕܲܝܓܸܕ ܦܘܿܚܵܐ ܚܲܝܠܵܢܵܐ ܦܸܫܠܹܗ ܡܸܠܝܵܐ ܡܸܢܹܗ ܟܠܸܗ ܗܘܿ ܒܲܝܬܼܵـܐ ܕܗ̄ܘܹܢ ܗ̄ܘܵܐ ܝܼ̄ܬܝܼܒܹܐ ܒܓܵܘܸܗ. ܘܦܸܫܠܵܝ ܚܸܙܝܸܐ ܛܵܠܲܝ ܠܸܫܵܢܹ̈ܐ ܕܸܟܦܵܝܫܝܼܢ̄ ܗ̄ܘܵܐ ܡܦܘܼܠܓܸ̈ܐ ܟܼܕܲܝܓܸܕ ܢܘܼܪܵܐ، ܘܝܼܬܒܼܠܵܝ ܥܸܠܸܕ ܟܠ ܚܲܖ̄ ܡܸܢܲܝ. ܘܦܸܫܠܵܝ ܡܸܠܝܹܐ ܟܠܲܝ ܒܪܘܼܚܵܐ ܕܩܘܼܕܫܵܐ، ܘܡܫܘܼܪܹܐܠܵܝ ܒܡܲܚܟܘܿܝܹܐ ܒܠܸܫܵܢܹ̈ܐ ܐ̄ܚܸܪ̈̄ܢܹܐ، ܕܐܲܝܟܼ ܕܪܘܼܚܵܐ ܕܸܗܒܸܠܵܗ̇ ܛܵܠܲܝ ܠܡܲܚܟܘܿܝܹܐ.

      ܘܐܝܼܬܼ ܗ̄ܘܵܐ ܐ̄ܢܵܫܹ̈ܐ ܕܥܵܡܪܝܼܢ̄ ܗ̄ܘܵܐ ܒܐܘܿܪܸܫܠܸܡ ܕܸܟܙܵܕܥܝܼܢ ܡܢ ܐܲܠܵܗܵܐ، ܝܗ̄ܘܼܖܵܝܹ̈ـܐ ܡܢ ܟܠ ܥܲܡܡܹ̈ܐ ܕܚܘܼܬܹܕ ܫܡܲܝܵܐ. ܟܘܼܕ ܗܘܹܐܠܸܗ ܩܵܠܵܐ ܗܵܘܵܐ، ܓٕܡܸܥܠܹܗ ܟܠܸܗ ܥܲܡܵܐ ܘܦܸܫܠܹܗ ܫܓܼܝܼܫܵܐ ܡܒܲܝܕ ܕܫܵܡܸܥ ܗ̄ܘܵܐ ܟܠ ܐ̄ܢܵܫܵܐ ܕܐܝܼܠܵܝ ܒܡܲܚܟܘܿܝܹܐ ܒܠܸܫܵܢܵܐ ܕܸܓܝܵܢܸܗ. ܒܗ̈ܝܼܬ̤ـܐ ܗ̄ܘܹܐܗ̄ܘܵܐ ܟܠܲܝ ܘܡܥܘܿܓٕܒܸܐ ܟܘܼܕ ܐܵܡܪܝܼܢ̄ ܗ̄ܘܵܐ ܚܲܕ̄ ܬܵܐ ܐܚܸܪ̄ܢܵܐ؛ ܗܵܢܝܼ ܟܠܵܝ ܕܐܝܼܠܵܝ ܒܡܲܚܟܘܿܝܹܐ ܡܘܿ ܠܹܝܠܵܝ ܓܠܝܼܠܵܝܹ̈ܐ؟ ܕܐܲܝܟܼ ܐܝܼܘܘܼܟܼ ܒܸܫܡܵܥܵܐ ܟܠ ܚܲܖ̄ ܡܸܢܲܢ ܒܠܸܫܵܢܵܐ ܕܦܸܫܠܲܢ ܗܘܼܝܹܐ ܒܓܵܘܸܗ؟

      ܘܚܲܕܟ̄ܡܵܐ ܡܵܣܸܚܪܝܼܢ̄ ܗ̄ܘܵܐ ܒܓܵܘܲܝ ܘܐܵܡܪܝܼܢ̄ ܗ̄ܘܵܐ. ܕܗܵܢܝܼ ܚ̇ܲܡܪܵܐ ܫܬܹܐܠܵܝ ܘܪܘܹܐܠܵܝ܀ ܘܒܲܬܸܪ ܕܐܲܝܟܼ ܩܸܡܠܹܗ ܫܸܡܥܘܿܢ ܟܹܐܦܵܐ ܥܸܡܸܕ ܚܲܕܸܥܣܲܪ ܫܠܝܼܚܹ̈ܐ. ܡܘܼܥܠܹܐܠܸܗ ܩܵܠܸܗ ܘܐܡܹܪܹܠ̄ܗ ܛܵܠܲܝ؛ ܓܲܒܼܪܹ̈ܐ ܝܗ̄ܘܼܖܵܝܹ̈ܐ ܘܟܘܼܠܲܝ ܗܵܢܲܝ ܕܸܟܥܵܡܪܝܼܢ̄ ܒܐܘܿܪܸܫܠܹܡ. ܗܵܖܝܼ ܦܵܝܫܵܐ ܝܑܼܕܸܥܬܵـܐ ܠܓܹܢ̄ܒܘܿܟܼܘܼܢ ܘܨܘܼܬܼܘܼ ܠܬܵܢܵܝܵܬܼ̈ܝܼـ܀ ܠܵܐ ܐܝܼܠܵܗ̇ ܕܐܲܝܟܼ ܕܐܲܟܼܬܘܼܢ ܕܸܟܚܵܫܒܼܘܼܬܘܼܢ ܕܗܵܢܝܼ ܫܬܹܐܠܵܝ ܚܲܡܪܵܐ ܘܪܘܹܐܠܵܝ. ܡܒܲܝܕ ܕܗܸܠ ܕܵܗܵܐ ܫܸܥ̄ܬܼܵـܐ ܒܬܸܠܲܬܼ ܐܝܼܠܵܗ܀ ܐܸܠܵܐ ܗܵܖܝܼܠܵܗ̇ ܕܝܼܠܵܗ̇ ܐ̄ܡܸܪܬܵܐ ܒܝܘܼܐܹܝܠ ܢܒܼܝܼܵܐ. ܒܸܕ ܗܵܘܸܐ ܒܝ̈ܘܼܡܵܬܼܵـܐ ܐ̄ܚܵܪܵܝܹܐ ܟܐܵܡܸܪ ܡܵܪܝܵܐ. ܒܸܕ ܫܵܦܟܸܢ ܪܘܼܚܝܼ ܥܸܠܸܕ ܟܠ ܡܲܪ ܦܲܓܼܪܵܐ. ܘܒܸܕ  ܡܢܵܒܝܢ ܒܢ̈ܘܿܢܘܿܟܼܘܼܢ ܘܒܢܵܬܼܘܼ̈ܟܼܘܼܢ. ܘܓٕܘܿܢ̈ܩܹܐ ܕܝܼܠܘܿܟܼܘܼܢ ܚܸܙܘܵܢܹ̈ܐ ܒܸܕ ܚܵܙܵܝܢ. ܘܣܵܒܹ̈ܐ ܕܝܼܠܘܿܟܼܘܼܢ ܚܸ̇ܠܡܹ̈ܐ ܒܸܕ ܡܚ̇ܲܠܡܝܼܢ̄܀ ܘܥܸܠܸܕ ܥܲܒܼ̈ܖܝܼ ܘܟܸܕܡ̈ܝܵܬܼܝܼـ ܒܸܕ ܫܵܦܟܸܢ ܪܘܼܚܝܼ ܒܝ̈ܘܼܡܵܬܼܵـܐ ܗܵܢܲܝ ܘܒܸܕ ܡܢܵܒܝܢ̄܀ ܘܒܸܕ ܝܵܗܒܸܢ ܢܝܼܫܵܢܹ̈ܐ ܒܸܫܡܲܝܵܐ ܘܥܵܓٕܝܼܒ̈ܘܵܬܼܵܐ ܥܸܠܸܕ ܐܲܪܥܵܐ؛ ܕܸܡܵܐ ܘܢܘܼܪܵܐ ܘܗܲܘܓܵܐ ܕܸܬܢܵܢܵܐ܀ ܒܩܵܠܒܵܐ ܫܸܡܫܵܐ ܠܚܸܫܟܵܐ، ܘܣܸܗܪܵܐ ܠܕܸܡܵܐ، ܡܩܲܡܡܵܐ ܕܐܵܬܸܐ ܝܲܘܡܵܐ ܕܡܵܪܝܵܐ. ܘܟܠ ܕܩܵܪܸܐ ܒܫܸܡܵܐ ܕܡܵܪܝܵܐ ܒܸܕ ܚܵܝܹ̈ܐ܀ 

ܚܕܒܫܒܐ ܕܦܢܛܩܘܣܛܐ

ܦܵܘܠܘܿܣ ܫܠܝܼܚܵܐ ܐܸܓܲܪܬܵܐ ܕܲܠܘܵܬܼ ܩܘܿܪ̈ܲܢܬܵܝܹܐ ܐܲܚܲܝ̈ ܒܲܪܸܟܼܡܵܪܝ

(1 Corinthians 12:1-17)

      ܥܸܠܸܕܿ ܪ̈ܘܼܚܵܢܝܵܬܼܵـܐ، ܐܵܚܢ̈ܘܵܬܼܝܼ، ܟܥܵܓٕܸܒܠܝܼ ܕܝܵܖܥܘܼܬܘܼܢ. ܕܚܲܢ̈ܦܹܐ ܗ̄ܘܘܿܬܘܼܢ ܗ̄ܘܵܐ، ܘܠܨܵܢܵܡܹ̈ܐ ܗܵܢܲܝ ܕܠܲܝܬܠܵܝـ ܩܵܠܵܐ ܕܠܵܐ ܦܘܼܪܫܵܢܵܐ ܛܵܝܥܘܼܬܘܼܢ ܗ̄ܘܵܐ. ܛܠܒܸܕ ܗܵܖܝܼ ܟܡܵܝܸܖܥܸܢ ܛܵܠܘܿܟܼܘܼܢ ܕܠܲܝܬܼ ܐ̄ܢܵܫܵܐ ܕܸܒܓܵܘ ܪܘܼܚܵܐ ܕܐܲܠܵܗܵܐ ܟܡܲܚܟܸܐ ܘܟܐܵܡܸܪ ”ܕܚܲܪܵܡܵܐ ܝܠܹܗ ܝܑܼܫܘܿܥ“ ܘܗܲܡ ܠܵܐ ܐ̄ܢܵܫܵܐ ܐܝܼܬܼܒܹܗ ܠܐܝܼܡܵܪܵܐ ”ܕܡܵܪܝܵܐ ܝܠܹܗ ܝܑܼܫܘܿܥ“ ܐܸܠܵܐ ܐܸܢ ܒܪܘܼܚܵܐ ܕܩܘܼܖܫܵܐ.

      ܦܠܵܓܼܵܐ ܕܸܚ̈ܠܵܝܵܬܼܵـܐ ܐܝܼܬܼ، ܐܸܠܵܐ ܚܲܖ̄ ܝܠܹܗ ܪܘܼܚܵܐ؛ ܘܸܦܠܵܓܼܵܐ ܕܬܸܫܡܸ̈ܫܝܵܬܼܵـܐ ܐܝܼܬܼ، ܐܸܠܵܐ ܚܲܖ̄ ܝܠܹܗ ܡܵܪܝܵܐ؛ ܘܸܦܠܵܓܼܵܐ ܕܚܲܝ̈ܠܵܘܵܬܼܵܐ ܐܝܼܬܼ، ܐܸܠܵܐ ܚܲܖ̄ ܝܠܹܗ ܐܲܠܵܗܵܐ ܕܸܟܡܲܥܒܸܖ ܟܠ ܒܟܠ ܐ̄ܢܵܫܵܐ. ܬܵܐ ܐ̄ܢܵܫܵܐ ܐ̄ܢܵܫܵܐ ܟܦܵܝܸܫ ܗܒܼܝܼܠܵܐ ܓܸܠܝܵܢܵܐ ܕܪܘܼܚܵܐ ܕܐܲܝܟܼ ܕܸܟܥܵܝܢܵܐܠܹܗ. ܐܝܼܬܼ ܕܝܼܠܵܗ̇ ܗܒܼܝܼܠܬܵـܐ ܛܵܠܹܗ ܒܪܘܼܚܵܐ ܬܵܢܵܝܬܼܵـܐ ܕܚܸܟܼܡܬܼܵـܐ، ܘܬܵܐ ܐܚܸܪ̄ܢܵܐ ܬܵܢܵܝܬܼܵـܐ ܕܝܼܕܲܥܬܼܵـܐ ܒܓܵܘܹܗ ܒܪܘܼܚܵܐ، ܬܵܐ ܐܚܸܪ̄ܢܵܐ ܗܲܝܡܵܢܘܼܬܼܵܐ ܒܓܵܘܹܗ ܕܪܘܼܚܵܐ، ܬܵܐ ܐܚܸܪ̄ܢܵܐ ܚ̈ܠܵܝܵܬܼܵـܐ ܕܒܵܣܘܿܡܸܐ ܒܓܵܘܹܗ ܕܪܘܼܚܵܐ، ܬܵܐ ܐܚ̇ܪ̄ܢܵܐ ܚܲܝ̈ܠܹܐ، ܘܬܵܐ ܐܚܸܪ̄ܢܵܐ ܢܒܼܝܼܘܼܬܼܵܐ، ܘܬܵܐ ܐܚܸܪ̄ܢܵܐ ܦܪܵܫܵܐ ܕܪ̈ܘܼܚܵܬܼܵـܐ، ܘܬܵܐ ܐܚܸܪ̄ܢܵܐ ܬܲܪ̈ܙܹܐ ܕܠܹܫܵܢܹ̈ܐ، ܘܬܵܐ ܐܚܸ̇ܪ̄ܢܵܐ ܦܘܼܫܵܩܵܐ ܕܠܸܫܵܢܹ̈ܐ. ܟܠܵܝ ܗܵܢܝܼ ܚܲܖ̄ ܪܘܼܚܵܐ ܟܥܵܒܸܖܠܵܝ ܘܟܸܡܦܵܠܹܐ، ܬܵܐ ܟܠ ܐ̄ܢܵܫܵܐ ܕܐܲܝܟܼ ܕܐܵܗܘܼ ܟܸܒܥܸܐ.

      ܡܒܲܝܕ ܕܐܲܝܟܼ ܕܦܲܓܼܪܵܐ ܚܲܖ̄ܝܠܹܗ ܘܐܝܼܬܼܒܹܗ ܗܲܕܵܡܹ̈ܐ ܟܲܒܝܼܪܹ̈ܐ، ܘܟܠܵܝ ܗܲܕܵܡܹ̈ܐ ܕܦܲܓܼܪܵܐ ܟܘܼܕ ܟܲܒܝܼܪܹ̈ܝܠܵܝ ܚܲܖ̄ ܦܲܓܼܪܵܐܝܠܵܝ، ܗܵܖܐܲܝܟܼ ܗܲܡ ܡܫܝܼܚܵܐ. ܗܲܡ ܐܲܚܢܝܼܢ̄ ܟܠܲܢ ܒܚܲܖ ܪܘܼܚܵܐ ܠܚܲܖ ܦܲܓܼܪܵܐ ܥܡܸܖܠܲܢ، ܐܸܢ ܝܗ̄ܘܼܕܼܵܝܹ̈ܐ ܘܐܸܢ ܚܲܢ̈ܦܹܐ، ܘܐܸܢ ܥܲܒܼܕܹ̈ܐ ܘܐܸܢ ܐ̄ܝܵ̈ܠܹܕ̄ܐ ܕܚܹܝܪܸ̈ܐ، ܘܟܠܲܢ ܚܲܖ̄ ܪܘܼܚܵܐ ܫܬܹܐܠܲܢ.

      ܗܲܡ ܦܲܓܼܪܵܐ ܠܵܐܝܠܹܗ ܚܲܖ̄ ܗܲܕܵܡܵܐ، ܐܸܠܵܐ ܟܲܒܝܼܪܹ̈ܐ. ܐܸܢ ܐܵܡܪܵܐ ܐܲܩܠܵܐ ”ܡܒܹܝܕ ܕܠܵܐ ܗܘܹܝܠܝܼ ܐܝܼܖܵܐ ܠܵܝܘܵܢ ܡܢ ܦܲܓܼܪܵܐ،“ ܠܵܐ ܡܒܹܝܕ ܗܵܖܝܼ ܠܵܝܠܵܗ̇ ܡܸܢܹܗ ܡܦܲܓܼܪܵܐ. ܘܐܸܢ ܐܵܡܪܵܐ ܢܵܬܼܵـܐ ”ܒܲܝܕ ܠܵܐ ܗܘܹܝܠܝܼ ܥܲܝܢܵܐ، ܠܵܝܘܵܢ ܡܸܢܹܗ ܡܦܲܓܼܪܵܐ،“ ܠܵܐ ܡܒܹܝܕ ܗܵܖܝܼ ܠܵܝܠܵܗ̇ ܡܸܢܹܗ ܡܦܲܓܼܪܵܐ. ܡܒܹܝܕ ܐܸܢ ܟܠܹܗ ܦܲܓܼܪܵܐ ܗܵܘܹܐܘܵܐ ܥܲܝܢܹ̈ܐ، ܐܲܝܟܵܐ ܒܸܕ ܗܵܘܝܵܘܵܐ ܡܲܫܡܲܥܬܼܵـܐ؟ ܘܐܸܢ ܟܠܹܗ ܗܵܘܹܐܘܵܐ ܡܲܫܡܲܥܬܼܵـܐ ܕܐܲܝܟܼ ܒܸܕ ܫܵܩܸܠ ܗ̄ܘܵܐ ܪܝܼܚܵܐ؟