ܬܹܒܘ ܘܲܫܠܵܘ ܒܪܝܼܬܼܵـܐ ܣܸܦܪ̈ܵܐ ܩܲܖܡܵܝܵܐ ܕܐܘܿܪܲܝܬܵـܐ ܒܲܪܸܟܼܡܵܪܝ

ܩܸܪ̈ܝܵܢܹܐ؛ [ܒܪܝܼܬܼܵܐ ܪܹܫ ܨܚܵܚܵܐ ܡܛ؛ ܘܲܩܪܵܐ ܝܲܥܩܘܿܒܼ ܠܲܒܢܵܘܗ̈ܝ؛ ܥܲܖ؛ ܡܸܢܝܵܢܵܐ ܝܒ؛ ܘܚܸܘܵܪ̈ܵܢ ܫܸܢܵܘܗ̈ܝ. ܐܲܩܸܦ ܡܸܢܹܗ ܕܲܨܚܵܚܵܐ؛ ܡܛ؛ ܡܸܢܝܵܢܵܐ؛ ܟܒ؛ ܒܪܵܐ ܕܬܲܪܒܝܼܬܼܵܐ ܝܵܘܣܸܦ؛ ܥܲܖ؛ ܡܢܝܵܢܵܐ؛ ܟܘ؛ ܢܸܗܘ̈ܝܵܢ ܥܲܠ ܪܹܫܹܗ ܕܝܵܘܣܸܦ.]

(Genesis 49:1-2, 8-12)

     ܘܩܪܹܐܠܸܗ ܝܲܥܩܘܼܒ ܠܝܵܠܕܹ̈ܗ ܘܐ̄ܡܹܪܹܠ̄ܗ ܛܵܠܲܝܗܝܼ؛ ܓٕܡܘܼܥܘܼ ܬܵܐ ܕܐܲܡܪܸܢܠܘܿܟܼܘܼܢ ܠܡܸܢܕܝܼ ܕܓܵܕܸܫ ܥܸܠܘܿܟܼܘܼܢ ܒܚ̇ܲܪܬܼܵܐ ܕܝܘܼ̈ܡܵܬܼܵـܐ . ܓٕܡܘܼܥܘܼ ܘܫܡܘܼܥܘܼ ܝܵܐ ܐܝ̈ܵܠܹܕ̄ܐ ܕܝܲܥܩܘܿܒܼ، ܘܡܵܨܝܼܬܼܘܼ ܠܝܼܣܪܵܝܹܠ ܒܵܒܘܿܟܼܘܼܢ.

     ܝܼܗܘܼܖܵܐ ܛܵܠܘܼܟܼ ܒܸܕ ܫܵܟܪܝܼܢ̄ ܐܲܚܸܢ̈ܘܵܬܼܘܼܟܼ؛ ܘܐܝܼܖܘܼܟܼ ܒܸܕ ܗܘܿܝܵܐ ܥܸܠܸܕ ܦܲܩܲܪܬܸܗ ܕܕܸܫ̃ܡܸܢܹ̈ܐ ܕܝܼܠܘܼܟܼ، ܘܛܵܠܘܼܟܼ ܒܸܕ ܣܵܓܼܖܝܼܢ̄ ܐ̄ܝܵܠܕܹ̈ܐ ܕܒܵܒܘܼܟܼ. ܓܘܼܪܝܵܐ ܕܐܲܪܝܵܐ ܝܼܗܘܼܖܵܐ، ܡܢ ܩܸܛܠܵܐ ܣܸܩܠܘܼܟܼ ܝܵܐ ܒܪܘܿܢܝܼ. ܒܪܸܟܠܸܗ ܘܕܡܸܟܼܠܸܗ ܟܼܕܲܝܓܸܕ ܐܲܪܝܵܐ، ܘܟܼܕܲܝܓܸܕ ܓܘܼܪܝܵܐ ܕܐܲܪܝܵܐ؛ ܘܡܵܢܝܼ ܒܸܕ ܡܘܿܩܸܡܠܸܗ؟

      ܘܠܵܐ ܟܧܵܢܝܵܐ ܪܹܫܵܢܘܼܬܼܵܐ ܡܢ ܝܼܗܘܼܖܵܐ، ܘܡܕܲܒܪܵܢܵܐ ܡܢ ܚ̇ܵܨܹܗ، ܗܸܠ ܕܐܵܬܸܐ ܗܵܘܵܐ ܕܐܝܼܠܵܗ ܕܝܼܠܹܗ؛ ܘܥܸܠܸܗ ܒܸܕ ܫܵܡܥܝܼܢ̄ ܥܲܡܡܹ̈ܐ. ܘܒܸܕ ܝܵܣܸܪ ܒܓܘܿ ܕܵܠܝܼܬܼܵـܐ ܓٕܵܚܫܸܗ. ܘܒܓܘܿ ܦܲܓٕܵܢܵܐ ܒܸܼܪܕ ܚܡܲܪܬܸܗ، ܘܒܸܕ ܡܲܚܘܹܪ ܒܓܘܿ ܚ̇ܲܡܪܵܐ ܓٕܘܼܠܠܸܗ، ܘܒܕܸܡܵܐ ܕܥܸܢܒܹܐ ܠܒܸܫܬܸܗ؛ ܥܲܝ̈ܢܹܗ ܒܸܫ ܣܡܘܿܩܹܐܠܵܝ ܡܢ ܚ̇ܲܡܪܵܐ، ܘܟܵܟܹ̈ܗ ܒܸܫ ܚ̇ܘܵܪܹ̈ܐܠܵܝ ܡܢ ܚܸ̇ܠܝܵܐ܀

 

ܫܠܵܘ ܢܒܼܝܼܘܼܬܹܗ ܕܸܙܟܲܪܝܵܐ ܒܲܪܸܟܼܡܵܪܝ

ܚܲܒܼܪܹܗ؛ [ܕܲܙܟܲܪܝܵܐ. ܨܚܵܚܵܐ ܕ ܡܸܢܝܵܢܵܐ ܚ؛ ܘܲܗܘܵܐ ܦܸܬܼܓܼܵܡܹܗ ܕܡܵܪܝܵܐ ܥܲܠ ܙܟܲܪܝܵܐ؛ ܥܲܖ ܡܸܢܝܵܢܵܐ ܝܕ؛ ܕܩܵܝܡܝܼܢ ܩܖܵܡ ܡܵܪܝܵܐ. ܐܲܩܸܦ ܡܼܢ ܨܚܵܚܵܐ ܙ ܡܢܝܵܢܵܐ ܛ؛ ܕܝܼܢܵܐ ܕܩܘܼܫܬܵܐ؛ ܥܲܖ ܡܢܝܵܢܵܐ ܝ؛ ܘܒܝܼܫܬܵܐ ܓܒܲܪ ܥܲܠ ܐܲܚܘܼܗܝ. ܐܲܩܸܦ ܡܢ ܨܚܵܚܵܐ ܚ ܡܢܝܵܢܵܐ ܕ؛ ܡܸܟܹܝܠ ܢܸܬܒܼܘܼܢ ܣܵܒܹ̈ܐ. ܥܲܖ ܡܢܝܵܢܵܐ ܗ؛ ܢܸܬܼܡܠܘܿܢ ܝܲܠܘܼܖܹ̈ܐ. ܐܲܩܸܦ ܡܸܢܹܗ ܕܲܨܚܵܚܵܐ ܚ ܡܢܝܵܢܵܐ ܝܒ؛ ܡܸܛܠ ܕܙܲܪܥܵܐ ܢܸܗܘܸܐ؛ ܥܲܖ؛ ܡܢܝܵܢܵܐ ܝܛ؛ ܘܩܘܼܫܬܵܐ ܘܲܫܠܵܡܵܐ. ܐܲܩܸܦ ܡܸܢܹܗ ܕܲܨܚܵܚܵܐ ܛ ܡܢܝܵܢܵܐ ܛ؛ ܕܘܼܨܝ ܛܵܒܼ؛ ܥܲܖ ܡܸܢܝܵܢܵܐ ܝܒ؛ ܘܲܚܠܵܦ ܚܲܖ ܝܘܿܡ.]

(Zechariah 6:9-11; 8:18-19; 9:9-12)

      ܗܵܖܐܲܝܟܼ ܟܐܵܡܸܪ ܡܵܪܝܵܐ ܚ̇ܲܝܠܵܢܵܐ؛ ܗܵܢܝܼ ܚ̇ܲܒܪܹ̈ܐ ܥܒܘܼܖܘܼ؛ ܡܲܚܟܘܿ ܚܲܩܘܼܬܼܵܐ ܟܠ ܐ̄ܢܵܫܵܐ ܥܸܡܸܕ ܚ̇ܲܒܼܪܹܗ. ܘܚܲܩܘܼܬܼܵܐ، ܘܫܲܪ̈ܥܹܐ ܕܸܫܠܵܡܵܐ ܕܘܼܢܘܼ ܒܬܲܪ̈ܥܹܐ ܕܝܼܠܘܿܟܼܘܼܢ. ܘܐ̄ܢܵܫܵܐ ܥܸܠܸܕ ܚ̇ܲܒܼܪܹܗ ܒܓܘܿ ܒܝܼܫܬܵـܐ ܠܵܐ ܡܬܲܚܸܡܠܘܼܬܘܼܢ ܒܠܸܒܘܿܟܼܘܼܢ . ܘܡܲܘ̈ܡܵܬܼܵـܐ ܕܕܘܼܓܠܵܐ ܠܵܐ ܒܵܥܘܿܬܘܼܢ، ܡܒܹܝܕ ܕܗܵܢܝܼ ܟܘܼܠܲܝ ܟܸܡ ܣܵܢܸܢܠܵܝ.

     ܘܗܘܹܐܠܸܗ ܥܸܠܝܼ ܚ̇ܲܒܪܵܐ ܕܡܵܪܝܵܐ ܚ̇ܲܝܠܵܢܵܐ ܠܐܝܼܡܵܪܵܐ؛ ܗܵܖܐܲܝܟܼ ܟܐܵܡܸܪ ܡܵܪܝܵܐ؛ ܨܲܘܡܵܐ ܕܐܲܪܒܥܵܐ ، ܘܨܲܘܡܵܐ ܕܚܲܡܫܵܐ، ܘܨܲܘܡܵܐ ܕܫܲܒܼܥܵܐ، ܘܨܲܘܡܵܐ ܕܥܸܣܪܵܐ، ܒܸܕ ܗܵܘܵܝܢ̄ ܬܵܐ ܒܲܝܬܼܵـܐ ܕܝܼܗܘܼܖܵܐ، ܬܵܐ ܦܸܨܚ̇ܘܼܬܼܵܐ ܘܪܘܵܙܵܐ، ܘܬܵܐ ܥܹܐܖܵܘ̈ܬܼܵܐ ܛܵܒܹ̈ܐ، ܒܥܝܼ ܚܲܩܘܼܬܼܵܐ ܘܫܠܵܡܵܐ. 

     ܦܨܘܿܚ̇ܝ ܟܲܒܝܼܪܵܐ ܝܵܐ ܒܪܵܬܵܐ ܕܨܸܗܝܘܿܢ. ܘܡܥܵܝܸܛܝ ܒܪܵܬܵܐ ܕܐܘܿܪܸܫܠܸܡ. ܗܘܿܠܸܗ ܡܲܠܟܵܐ ܕܝܼܠܵܟܼܝ ܒܐܝܼܬܼܵܝܵܐ ܠܓܹܝܒܲܟܼܝ ܙܲܕܝܼܩܵܐ ܘܡܚܲܠܨܵܢܵܐ ܡܲܟܝܼܟܼܵܐ، ܘܪܵܟܵܒܼܵܐ ܥܸܠܸܕ ܚ̇ܡܵܪܵܐ، ܘܥܸܠܸܕ ܓٕܵܚܫܵܐ ܒܸܪ ܕܸܚܡܲܪܬܵܐ. ܘܒܸܕ ܡܣܵܟܸܪ ܡܲܪܟܲܒܼܬܵܐ ܡܢ ܐܲܦܪܹܝܡ ܘܣܘܼܣܵܐ ܡܢ ܐܘܿܪܸܫܠܸܡ؛ ܘܒܸܕ ܦܵܝܫܵܐ ܬܒܸܪܬܵܗ̇ ܩܸܫܬܵـܐ ܕܫܲܪܪܸܐ. ܘܒܸܕ ܡܲܚܟܸܐ ܫܠܵܡܵܐ ܥܸܡܸܕ ܥܲܡܡܹ̈ܐ؛ ܘܒܸܕ ܚܵܟܸܡ ܡܢ ܝܵܡܵܐ ܠܝܵܡܵܐ ܘܡܢ ܢܸܗܪܵܐ ܗܸܠ ܬܚܘܼܡܹ̈ܐ ܕܐܲܪܥܵܐ.

 

ܫܘܼܪܵܝܵܐ؛ ܗܵܝܕܹܝܢ ܢܫܲܒܚܘܼܢ ܟܠܗܘܿܢ ܐܝܼܠܵܢܹ̈ܐ ܕܥܵܒܼܵܐ؛ ܠܡܲܥܲܠܬܹܗ ܕܲܡܫܝܼܚܵܐ ܢܝܲܩܲܪ ܒܲܙܡܝܼܪ̈ܵܬܼܵܐ ܕܪܘܼܚܵܐ ܗܲܠܸܠܘܼܝܵܐ ܐܹܗܲܠܸܠܘܼܝܵܐ ܐܹܗܲܠܸܠܘܼܝܵܐ ܀

ܦܘܼܢܵܝܵܐ؛ ܩܖܵܡ ܡܵܪܝܵܐ ܕܐܵܬܹܐ ܠܲܡܕܵܢܵܗ̇ ܠܐܲܪܥܵܐ؛ ܠܡܲܥܲܠܬܹܗ. ܘܫܲܪܟܵܐ.

 

 

 

ܦܵܘܠܘܿܣ ܫܠܝܼܚܵܐ ܐܸܓܲܪܬܵܐ ܕܲܠܘܵܬܼ ܪ̈ܗ̄ܘܿܡܵܝܹܐ ܐܲܚܲܝ̈ ܒܲܪܸܟܼܡܵܪܝ

ܫܠܝܼܚܵܐ؛ [ܕܲܪ̈ܗ̄ܘܿܡܵܝܹܐ ܨܚܵܚܵܐ ܝܐ ܡܢܝܵܢܵܐ ܝܓ؛ ܠܟܼܘܿܢ ܕܹܝܢ ܐܵܡܲܪ ܐ̄ܢܵܐ ܠܥܲܡܡܹ̈ܐ؛ ܥܲܖ ܡܢܝܵܢܵܐ ܟܕ؛ ܟܡܵܐ ܗܵܟܹܝܠ ܗܸܢܘܿܢ ܒܙܲܝܬܵܐ ܕܲܟܝܵܢܗܘܿܢ.]

(Romans 11:13-24)

ܛܵܠܘܿܟܼܘܼܢ ܟܐܵܡܪܸܢ ܥܲܡܡܹ̈ܐ؛ ܐܵܢܵܐ ܕܝܼܘܸܢ ܫܠܝܼܚܵܐ ܕܥܲܡܡܹ̈ܐ. ܬܵܐ ܟܸܕܡܸܬܵـܐ ܕܝܼܠܝܼ ܟܸܡܫܲܒܚܸܢ ܒܲܠܟܝܼ ܡܲܥܵܒܝܼܪܸܢ ܒܓܼܝܼܪܸܬܵܐ ܒܢܲܝ̈ ܛܘܼܟܼܡܝܼ ܘܡܲܚܗܸܢ ܚܲܖܟܡܵܐ ܡܸܢܲܝܗܝܼ. ܡܒܲܝܕ ܐܸܢ ܡܲܣܠܵܝܬܼܵـܐ ܕܝܼܲܠܝܼܗܝܼ ܨܵܠܲܚܬܵـܐ ܗܘܹܝܠܵܗ̇ ܬܵܐ ܥܵܠܡܵܐ. ܚܲܖ̄ܟܡܵܐ ܕܥܲܪܬܵܐ ܕܝܼܠܲܝܗܝܼ، ܐܸܠܵܐ ܐܸܢ ܚܵܝܹ̈ܐ ܕܡܢ ܒܝܼܢܝܼ ܡܝܼ̈ܬܹܐ. ܐܸܢ ܚܡܝܼܪܵܐ ܐܝܼܠܸܗ ܩܲܕܝܼܫܵܐ ܗܵܖܐܲܝܟܼ ܗܲܡ ܓܒܼܝܼܠܬܵـܐ، ܘܐܸܢ ܩܘܼܪܡܵܐ ܩܲܕܝܼܫܵܐܠܹܗ، ܗܕܲܟ ܗܲܡ ܦܲܓٕܵܢܹ̈ܐ.

 ܘܐܸܢ ܚܲܖܟܡܵܐ ܡܢ ܦܲܓٕܵܢܹ̈ܐ ܦܸܫܠܵܝ ܦܫܝܼ̈ܓܹܐ، ܘܐܵܝܸܬ ܕܙܲܝܬܼܵـܐ ܝܘܸܬ ܕܒܲܪܝܼܵܐ ܦܸܫܠܘܼܟ ܡܦܘܼܛܸܪܡܵܐ ܒܫܲܘܦܲܝܗ̈ܝܼ، ܘܸܗܘܹܐܠܘܼܟܼ ܫܲܪܝܼܟܵܐ ܒܩܘܼܪܡܵܐ ܕܙܲܝܬܼܵـܐ ܘܩܸܫܛܘܼܬܼܵܐ ܕܝܼܠܹܗ، ܠܵܐ ܫܵܩܠܸܬ ܫܘܼܒܼܗܵܪܵܐ ܐܸܠܸܕ ܦܲܓٕܵܢܹ̈ܐ. ܘܐܸܢ ܫܵܩܠܸܬ ܫܘܼܒܼܗܵܪܵܐ ܠܵܐܝܘܸܬ ܐܵܝܸܬ ܛܥܝܼܢܹܗ ܠܩܘܼܪܡܵܐ، ܐܸܠܵܐ ܐܵܗܘܼ ܩܘܼܪܡܵܐ ܛܥܝܼܢܘܼܟܼ ܝܼܠܹܗ. ܟܒܵܪܝܵܐ ܕܐܵܡܪܸܬ؛ ܕܦܲܓٕܵܢܹ̈ܐ ܦܸܫܠܵܝ ܦܫܝܼ̈ܟܹܐ ܕܐܵܢܵܐ ܒܫܲܘܦܲܝ̈ܗܝܼ ܦܵܝܫܸܢ ܡܦܘܼܛܸܪܡܵܐ. ܪܲܢܕܵܐ. ܗܵܢܝܼ ܡܒܹܝܕ ܕܠܵܐ ܡܗܘܼܝܡܸܢܠܵܝ ܦܸܫܠܵܝ ܦܫܝܼ̈ܟܹܐ. ܘܐܵܝܸܬ ܒܗܲܝܡܵܢܘܼܬܼܵܐ ܩܸܡܠܘܼܟ. ܠܵܐ ܥܵܠܸܬ ܒܗܲܘܢܘܼܟܼ، ܐܸܠܵܐ ܙܕܘܿܥ. ܡܒܹܝܕ ܐܸܢ ܐܲܠܵܗܵܐ ܥܸܠܸܕ ܦܲܓٕܵܢܹ̈ܐ ܟܝܵܢܵܝܹ̈ܐ ܠܵܐ ܚܸܣܠܹܗ، ܒܲܠܟܝܼ ܗܲܡ ܠܵܐ ܥܸܠܘܼܟ ܒܸܕ ܚܵܝܸܣ. ܚܙܝܼ ܒܲܕܲܡ ܒܲܣܝܼܡܘܼܬܼܵܐ ܘܩܸܫܝܘܼܬܼܵܐ ܕܐܲܠܵܗܵܐ؛ ܩܸܫܝܘܼܬܼܵܐ ܐܸܠܸܕ ܗܵܢܵܝ ܕܸܢܦܸܠܵܝ. ܘܥܸܠܘܼܟܼ ܒܲܣܝܼܡܘܼܬܼܵܐ ܐܸܢ ܟܵܠܸܬ ܒܒܲܣܝܼܡܘܼܬܼܵܐ، ܘܐܸܢ ܠܵܐ ܗܲܡ ܐܵܝܸܬ ܒܸܕ ܦܵܝܫܸܬ ܦܫܝܼ̈ܟܹܐ. ܘܗܵܢܵܝ ܐܸܢ ܠܵܐ ܟܵܠܵܝ ܒܢܘܼܩܨܵܢܘܼܬܼܵܐ ܕܗܲܝܡܵܢܘܼܬܼܵܐ ܕܝܼܠܲܝܗܝܼ، ܗܲܡ ܗܵܢܵܝ ܒܸܕ ܦܵܝܫܝܼܢ̄ ܡܦܘܼܛܸܪ̈ܡܹܐ. ܒܲܝܕ ܐܝܼܬ̄ܒܹܗ ܐܲܠܵܗܵܐ ܓܵܗܵܐ ܐ̄ܚܸܪܬܵܐ ܕܸܡܦܲܛܪܸ̈ܡܠܲܝ. ܐܸܢ ܐܵܝܸܬ ܕܡܢ ܙܲܝܬܼܵـܐ ܝܘܸܬ ܕܒܲܪܝܼܵܐ ܕܸܒܓܵܘ ܟܝܵܢܘܼܟܼ ܦܸܫܠܘܼܟ ܦܫܝܼܟܼܵܐ؛ ܘܕܠܵܐ ܒܸܟܝܵܢܘܼܟܼ ܦܸܫܠܘܼܟ ܡܦܘܼܛܸܪܡܵܐ ܐܲܝܟܼ ܙܲܝܬܼܵـܐ ܛܵܒܼܵܐ؛ ܡܵܩܲܕܵܐ ܒܸܫ ܟܲܒܝܼܪܵܐ ܗܵܢܵܝ ܐܸܢ ܦܵܝܫܝܼܢ̄ ܡܦܘܼܛܸܪ̈ܡܹܐ ܒܙܲܝܬܼܵـܐ ܕܸܟܝܵܢܲܝܗܝܼ܀