ܬܸܒܘ ܘܲܫܠܵܘ ܡܸܢܝܵܢܵܐ ܣܸܦܪܵܐ ܕܐܲܪܒܥܵܐ

ܕܐܘܿܪܵܝܬܵܐ ܒܲܪܸܟܼܡܵܪܝ

(Numbers 7:1-10; 9:15-20)

ܘܗܘܹܐܠܸܗ ܒܝܲܘܡܵܐ ܕܸܚܠܸܨܠܸܗ ܡܘܼܫܸܐ ܠܡܲܩܘܿܡܸܐ ܚܲܝܡܵܐ، ܟܸܡܡܵܫܸܚܠܵܗ̇ ܘܟܸܡܩܵܕܸܫܠܵܗ̇، ܘܠܟܠ ܐܵܡܵܢܹ̈ܐ ܕܝܼܠܵܗ̇، ܘܠܡܲܖܒܚܵܐ ܘܟܠܲܝ ܐܵܡܵܢܹ̈ܗ. ܟܸܡܡܵܫܸܚܠܲܝ ܘܟܸܡܩܵܕܸܫܠܲܝ. ܘܡܘܼܩܪܸܒܼܠܵܝ ܪܹܫܵܝܹ̈ܐ ܕܸܒܢܲܝ̈ ܝܼܣܪܵܝܹܠ،  ܪ̈ܲܒܲܝ ܒܵܬܐ ܕܒܵܒܵܘܵܬܲܝܗܝ، ܗܵܢܹܝܢ̄ ܕܗ̄ܘܵܐ ܗ̄ܘܵܐ ܪܹܫܵܝܹ̈ܐ ܕܫܲܒܼ̈ܛܹܐ، ܗܵܢܹܝܢ̄ ܕܗ̄ܘܵܐ ܗ̄ܘܵܐ ܡܘܼܩܝܼܡܸܐ ܥܸܠܸܕ ܡܸܢܝܵܢܵܐ. ܘܡܘܼܬܹܐܠܵܝ ܩܘܼܪܒܵܢܲܝܗܝ ܩܵܕ̄ܡ ܡܵܪܝܵܐ؛ ܐܸܫܸܬ ܡܲܪ̈ܟܒܼܵܬܵܐ ܟܘܼܕ ܗܵܢܹܝܢ̄ ܡܟܘ̈ܣܝܹܐ، ܘܬܪܸܥܣܲܪ ܬܲܘܪܹ̈ܐ، ܡܲܪ̈ܟܒܼܵܬܵܐ ܬܵܐ ܬܪܹܝܢ̄ ܪܹܫܵܝܹ̈ܐ، ܘܬܲܘܪܵܐ ܬܵܐ ܚܲܕ̄. ܘܟܸܡ ܡܲܩܸܪܒܼܝܼܢ̄ܠܲܝ ܩܵܕ̄ܡ ܚܲܝܡܵܐ، ܘܐ̄ܡܹܪܠܸܗ ܡܵܪܝܵܐ ܬܵܐ ܡܘܼܫܸܐ؛ ܫܩܘܿܠܠܲܝ ܡܸܢܲܝܗܝ ܘܦܵܝܫܝܼܢ̄ ܬܵܐ ܟܸܕܡܸܬܵܐ ܕܦܘܼܠܚ̇ܵܢܵܐ ܕܡܲܫܟܲܢ ܙܲܒܼܢܵܐ؛ ܘܗܲܒܼܠܲܝ ܬܵܐ ܠܹܘܵܝܹ̈ܐ ܟܘܼܕܚܲܕ̄ ܠܡܘܼܓٕܲܒ ܦܸܠܚ̇ܘܿܢܸܗ. ܘܫܩܸܠܠܸܗ ܡܘܼܫܸܐ ܬܲܘܪܹ̈ܐ ܘܡܲܪ̈ܟܒܼܵܬܵܐ ܘܟܸܡ ܝܵܗܒܸܠܠܲܝ ܬܵܐ ܠܹܘܵܝܹ̈ܐ؛ ܬܸܪ̄ܬܲܝܢ̄ ܡܲܪ̈ܟܒܼܵܬܵܐ ܘܐܲܪܒܵܥܐ ܬܲܘܪܹ̈ܐ ܝ̄ܗܒܸܠܠܸܗ ܬܵܐ ܒܢܲܝ̈ ܓܸܪܫܘܿܢ، ܠܡܘܼܓٕܲܒ ܦܸܠܚ̇ܘܿܢܵܐ ܕܝܼܠܝܲܗܝ، ܘܐܲܪ̈ܒܹܥ ܡܲܪ̈ܟܒܼܵܬܵܐ ܘܬܡܵܢܝܵܐ ܬܲܘܪܹ̈ܐ ܝ̄ܗܒܸܠܠܸܗ ܬܵܐ ܒܢܲܝ̈ ܡܪ̈ܵܪܝܼ، ܡܘܿܓٕܲܒ ܦܸܠܚ̇ܘܿܢܲܝܗܝ، ܒܐܝܼܖܵܐ ܕܐܝܼܬܼܵܡܲܪ ܒܸܪ ܕܐܲܗܪܘܿܢ ܟܵܗܢܵܐ. ܘܬܵܐ ܒܢܲܝ̈ ܩܵܗܵܬܼ ܠܵܐ ܝ̄ܗܒܸܠܠܸܗ، ܡܒܲܝܕ ܦܸܠܚ̇ܘܿܢܵܐ ܕܩܘܼܖܫܵܐ ܡܣܘܼܦܝܵܐ ܗ̄ܘܹܐܗ̄ܘܵܐ ܒܐܝܼ̈ܕܵܬܲܝܗܝ، ܘܛܵܥܢܝܼܢ̄ܗ̄ܘܵܐ ܠܸܗ ܠܪܘܼܫܵܢܲܝܗܝ. ܘܡܘܼܩܪܸܒܼܠܵܝ ܪܹܫܵܝܹ̈ܐ ܩܘܼܪܒܵܢܵܐ ܕܚ̇ܲܖܲܬܼܬܵܐ ܕܡܲܖܒܚܵܐ ܒܝܲܘܡܵܐ ܕܟܸܡܡܵܫܚܝܼܢ̄ܠܸܗ، ܘܡܘܼܩܪܸܒܼܠܵܝ ܪܹܫܵܝܹ̈ܐ ܩܘܼܪ̈ܒܵܢܲܝܗܝ ܩܲܕ̄ܡ ܡܵܪܝܵܐ. ܘܒܝܲܘܡܵܐ ܕܩܸܡܠܵܗ̇ ܚܲܝܡܵܐ، ܡܟܘܼܣܹܐܠܵܗ̇ ܥܢܵܢܵܐ ܠܡܲܫܟܲܢ ܙܲܒܼܢܵܐ، ܘܠܸܟܘܝܼܢܵܐ ܕܣܵܗܕܘܼܬܼܵܐ. ܘܒܒܘܼܪܡܵܫܸܐ ܟܗܵܘܸܐ ܗ̄ܘܵܐ ܥܸܠܸܕ ܚܲܝܡܵܐ، ܐܲܝܟܼ ܚܸܙܘܵܐ ܕܢܘܼܪܵܐ ܗܸܠ ܡܚܘܼܫܟܵܐ. ܘܗܵܖܐܲܝܟ ܟܗܵܘܸܐ ܗ̄ܘܵܐ ܒܕܵܝܼܡܘܼܬܼܵܐ؛ ܥܢܵܢܵܐ ܟܸܡܟܲܣܝܵܐܗ̄ܘܵܐ ܠܸܗ ܒܝܲܘܡܵܐ، ܘܚܸܙܘܵܐ ܕܢܘܼܪܵܐ ܒܠܲܝܠܸܐ. ܘܐܝܼܡܲܢ ܕܝܵܪܡܵܐ ܗ̄ܘܵܐ ܥܢܵܢܵܐ ܡܼܢ ܚܲܝܡܵܐ، ܒܵܬܲܪ ܕܐܲܝܟ ܟܡܲܛܸܥܢܝܼܢ̄ܗ̄ܘܵܐ ܒܢܲܝ̈ ܝܼܣܪܵܝܹܠ. ܘܐ̄ܙܵܗ̄ܘܵܐܠܵܝ ܠܕܘܼܟܬܼܵܐ ܕܢܵܚ̇ܬܼܵܐܗ̄ܘܵܐ ܒܓܵܘܵܗ ܥܢܵܢܵܐ . ܬܵܡܵܐ ܢܵܚ̇ܬܼܝܼܢ̄ܗ̄ܘܵܐ ܒܢܲܝ̈ ܝܼܣܪܵܝܹܠ ܘܒܬܵܢܹܝܬܼܵܐ ܕܟܸܡܵܐ ܕܡܵܪܝܵܐ ܟܡܵܛܸܥܢܝܼܢ̄ܗ̄ܘܵܐ ܒܢܲܝ̈ ܝܼܣܪܵܝܹܠ، ܘܒܬܵܢܹܝܬܼܵܐ ܕܟܸܡܵܐ ܕܡܵܪܝܵܐ ܟܫܵܪܹܐܗ̄ܘܵܐ. ܟܠܲܝ ܝܘ̈ܡܵܝܼܵܐ ܕܫܵܪܝܵܐ ܗ̄ܘܵܐ ܐܢܵܢܵܐ ܥܸܠܸܕ ܚܲܝܡܵܐ ܟܫܵܪܹܐܗ̄ܘܵܐ .  

 

ܚܒܪܗ

ܫܠܵܘ ܢܒܼܝܼܘܼܬܹܗ ܕܐܹܫܲܥܝܵܐ ܒܲܪܹܟܼܡܵܪܝ

(Isaiah 54:1-15)

ܡܫܵܒܸܚ ܥܩܲܪܬܼܵܐ ܕܠܵܐ ܡܘܼܗܘܹܐܠܵܗ̇، ܘܦܨܘܿܚ̇ ܒܬܸܫܒܘܿܚܬܵܐ، ܘܪܘܘܿܙ ܗܵܝܵـ ܕܠܵܐ ܡܚ̇ܘܼܒܸܐܠܵܗ̇. ܡܒܲܝܕ ܕܙܸܕܠܵܝ ܝܵܠܹܕ̄̈ܐ ܕܫܒܼܝܼܩܬܵܐ ܒܸܫ ܟܲܒܝܼܪܵܐ ܡܼܢ ܝܵܠܹܕ̄̈ܐ  ܕܡܲܪܬܓܲܒܼܪܵܐ. ܟܐܵܡܸܪ ܡܵܪܝܵܐ ܡܲܪܘܸܚ̇ ܕܘܼܟܬܼܵܐ ܕܚܲܝ̈ܡܵܬܲܟܼܝ  ܘܦܲܪ̈ܕܵܬܼܵܐ ܕܟܘ̈ܝܼܢܵܬܲܟܼܝ ܦܪܘܿܣܠܲܝ. ܘܠܵܐ ܚ̇ܲܝܣܲܬ. ܘܡܲܝܪܸܟܼܝ ܫܲܪ̈ܘܿܦ̇ܝܵܬܲܟܝ ܘܣܸܟܵܟܹ̈ܐ ܕܝܼܠܵܟܼܝ ܕܘܿܩܠܲܝ. ܡܒܲܝܕ ܠܝܲܡܢܸܐ ܘܠܥܲܣܪܹܐ ܒܸܕ ܙܵܝܕܲܬ ܘܙܲܪܥܲܟܼܝ ܒܸܕ ܝܵܪܸܬܼ ܥܲܡܡܹ̈ܐ، ܘܡܲܬܼܘ̈ܬܼܵܐ ܚ̇ܪ̈ܝܼܒܹܐ ܒܸܕ ܡܲܥܡܸܪ̄. ܠܵܐ ܙܵܕܥܲܬܝ ܡܒܲܝܕ ܠܵܐ ܟܦܵܝܫܲܬܝ ܡܪܘܼܙܵܠܬܵܐ، ܘܠܵܐ ܟܟܲܓٕܠܲܬܝ ܡܒܲܝܕ ܠܵܐ ܟܦܵܝܫܲܬܝ ܡܠܘܼܘܲܡܬܵܐ، ܘܒܢܵܫܝܲܬܝ ܢܸܟܼܦܵܐ ܕܙܥܘܿܪܘܿܬܼܵܟܼܝ، ܘܠܘܿܡܵܐ ܕܐܲܪܡܸܠܘܼܬܲܟܼܝ ܠܵܐ ܦܸܝܫܬܵܟܼܪܲܬܝ ܓܵܗܵܐ ܐ̄ܚܸ̇ܪܬܵܐ، ܡܒܲܝܕ ܡܵܪܲܟܼܝ ܒܸܕ ܥܵܒܸܕ ܥܸܡܲܟܼܝ ܗܵܖܐܲܝܟ، ܡܵܪܝܵܐ ܕܐܝܼܠܸܗ ܚ̇ܲܝܠܵܢܵܐ ܫܸܡܸܗ، ܡܚܵܠܨܵܢܵܐ ܩܲܕܝܼܫܵܐ ܕܝܼܣܪܵܝܹܠ، ܐܲܠܵܗܵܐ ܕܟܠܵܗ̇ ܐܲܪܥܵܐ ܟܦܵܝܹܫ ܩܸܪܝܵܐ. ܡܸܟܼܕܲܝܓܸܕ ܒܲܟܼܬܵܐ ܫܒܼܝܼܩܬܵܐ ܘܡܲܪܓܝܵܢܵܐ ܥܝܼܩܬܵܐ ܟܸܡ ܩܵܪܹܐܠܲܟܼܝ ܡܵܪܝܵܐ، ܘܡܐܲܝܟ ܒܲܟܼܬܵܐ ܕܸܒܓܘܿ ܙܥܘܿܪܘܼܬܼܵܗ ܟܦܵܝܫܵܐ ܫܒܼܝܼܩܬܵܐ. ܟܐܵܡܸܪ ܐܲܠܵܗܲܟܼܝ؛ ܒܹܚܡܬܼܵܐ ܙܥܘܿܪܬܵܐ ܟܸܡܫܵܒܼܩܸܢܠܲܟܼܝ، ܘܒܪ̈ܲܚܡܹܐ ܕܝܼܠܝܼ ܟܲܒܝܼܪܹ̈ܐ ܒܸܕ ܡܓٕܲܡܥܸܢܠܲܟܼܝ. ܒܹܚܡܬܼܵܐ ܪܵܒܵܐ ܡܘܼܦܬܸܠܠܝܼ ܦܵܬܼܘ̈ܬܼܝܼ ܡܸܢܲܟܼܝ، ܘܒܪ̈ܲܚܡܹܐ ܕܝܼܠܝܼ ܕܸܠܐܵܒܲܕ ܡܪܘܼܚܸܡܠܝܼ ܥܸܠܲܟܼܝ. ܟܐܵܡܸܪ ܡܵܪܝܵܐ ܡܚܲܠܨܵܢܲܟܼܝ؛ ܗܵܖܝܼ ܡܐܲܝܟ ܝܘܿܡܵܬܼܵܐ ܕܢܘܿܚ ܐܝܼܠܵܝ ܠܓܹܝܒܝܼ، ܕܝܼܡܸܐܠܝܼ ܕܠܵܐ ܓٕܵܪ̈ܝܢ̄ ܡܵܝܹܐ ܕܢܘܼܚ ܓܲܗܐ̄ܚܸ̇ܪܬܵܐ ܥܸܠܸܕ ܐܲܪܥܵܐ ܗܵܖܐܲܝܟ. ܡܒܲܝܕ ܕܛܘܼܪ̈ܢܹܐ ܒܸܕ ܚ̇ܵܬܲܝܢ̄ ܘܪ̈ܘܼܡܝܵܬܼܵܐ ܒܸܕ ܡܫܵܢܲܝܢ̄. ܘܪ̈ܲܚܡܹܐ ܕܝܼܠܝܼ ܡܸܢܲܟܼܝ ܠܵܐ ܟܸܡ ܫܵܢܲܝܢ̄، ܘܘܲܥܕܵܐ ܕܸܫܠܵܡܲܟܼܝ ܠܵܐ ܟܒܵܛܸܠ. ܟܐܵܡܸܪ ܡܵܪܝܵܐ ܡܪ̈ܲܚܡܵܢܵܐ؛ ܓٕܗܝܼܬܼܵܐ ܘܡܫܘܼܩܹܝܬܼܵܐ ܕܠܵܐ ܟܵܐܬܼܵܐ ܠܸܡܣܲܠܘܹܿܐ، ܗܘܿܠܸܗ ܐܵܢܵܐ ܒܸܕ ܥܵܒܼܕܸܢ ܟܹܐܦܸ̈ܐ ܕܝܼܠܲܟܼܝ ܒܸܠܘܼܪܹ̈ܐ، ܘܒܕܵܪܸܢ ܐܵܣܵܣܹ̈ܐ ܕܝܼܠܲܟܼܝ ܒܟܹܐܦܹ̈ܐ ܕܣܲܦܝܼܠܵܐ، ܘܸܒܒܵܢܹܢ ܓܘܼܕܵܢܹ̈ܐ ܕܝܼܠܲܟܼܝ ܒܟܸܐܦܹ̈ܐ ܕܐܝܼܵܣܦܘܿܢ، ܘܬܲܪ̈ܥܹܐ ܕܝܼܠܲܟܼܝ ܒܟܹܐܦܹ̈ܐ ܕܸܩܪܹܣܛܵܠܘܿܣ، ܘܸܬܚ̇ܘܼܡܵܢܲܟܼ̈ܝ ܒܟܹܐܦܹ̈ܐ ܡܓܘܼܒܼ̈ܝܹܐ. ܘܟܠܲܝ ܝ̈ܵܠܲܕ̄ܟܼܝ ܒܸܕ ܝܵܖܥܝܼܢ̄ܠܝܼ، ܘܒܙܵܝܸܕ ܫܠܵܡܵܐ ܕܝ̈ܵܠܲܕ̄ܟܼܝ ܘܒܙܲܕܝܼܩܘܼܬܼܵܐ ܒܸܕ ܦܵܝܫܲܬܝ ܡܘܼܩܘܹܝܬܼܵܐ . ܪܚܘܿܩ ܡܼܢ ܛ̇ܠܵܡܵܐ، ܡܒܲܝܕ ܠܵܐ ܟܙܵܕܥܲܬܝ، ܘܡܼܢ ܬܒܼܸܵܪܵܐ، ܡܒܲܝܕ ܠܵܐ ܟܩܵܪܸܒܼ ܥܸܠܲܟܼܝ. ܘܟܠ ܕܢܵܦܩܝܼܢ̄ ܡܼܢ ܐܝܼܕܵܬܼ̈ܝܼ؛ ܒܥܵܒܼܪܝܼܢ̄ ܥܸܠܲܟܼܝ، ܘܒܸܕܗܵܘܝܲܬܝ ܒܹܝܬܼ ܓܲܘܣܵܐ ܬܵܐ ܥܵܡܵܪܹ̈ܐ ܕܝܼܠܲܟܼܝ܀  

  

ܦܵܘܠܘܿܣ ܫܠܝܼܚܵܐ ܐܸܓܲܪܬܵܐ ܕܲܠܘܵܬܼ ܥܹܒܼܪ̈ܵܝܹܐ ܐܲܚܲܝ̈ ܒܲܪܸܟܼܡܵܪܝ

(Hebrews 9:5-15)

ܠܵܐ ܐܝܼܠܵܗ̇ ܕܲܗܵܐ ܥܸܕܵܢܵܐ ܕܡܲܚܟܘܼܟܼ ܥܸܠܸܕ ܟܠ ܚܖܵܐ ܡ̣ܢ ܗܵܢܹܝܢ̄ ܕܗܵܖܐܲܝܟ ܡܛܘܿܟ̈ܣܹܐ ܝܲܠܝܼܗܝ؛ ܘܠܸܟܘܝܼܢܵܐ ܒܲܪܵܝܬܼܵـܐ ܒܟܠ ܙܲܒܼܢܵܐ ܥܵܒܼܪܝܼܢ̄ܗ̄ܘܵܐ ܟܘܼܡܪܹ̈ܐ ܘܡܟܵܡܠܝܼܢ̄ܗ̄ܘܵܐ ܟܸܕܡܸܬܲܝܗܝ، ܘܠܸܟܘܝܼܢܵܐ ܓܵܘܵܝܬܼܵـܐ، ܚܖܵܐ ܓܲܗ ܒܫܲܢ̄ܬܵـܐ ܥܵܒܸܪܗ̄ܘܵܐ ܪܲܒܟܘܼܡܪܹ̈ܐ ܠܚܘܿܖܹܗ، ܒܗܵܘ ܕܸܡܵܐ ܕܡܲܩܪܸܒܼܗ̄ܘܵܐ ܡܒܲܕܲܠ ܓܝܵܢܹܗ ܘܡܒܲܕܲܠ ܚ̇ܛܝܼܬܼܵܐ ܕܥܲܡܵܐ. ܘܒܗܵܖܝܼ ܡܲܝܸܖܥܵܐܗ̣̄ܘܵܐ ܪܘܼܚܵܐ ܕܩܘܼܖܫܵܐ ܗܸܠܗܓܲܗ ܠܵܐܝܠܵܗ̇ ܓܠܝܼܬܼܵـܐ ܐܘܼܪܚ̇ܵܐ ܕܩܲܕܝܼܫܹ̈ܐ ܡܵܩܵܐ ܕܐܝܼܬܼ ܘܲܥܕܐ ܬܵܐ ܟܘܝܼܢܵܐ ܩܵܖ̄ܡܵܝܬܼܵܐ. ܘܐܝܼܬܼܗ̄ܘܵܐ ܗܲܖ ܡܲܬܼܠܵܐ ܠܗܵܘ ܙܲܒܼܢܵܐ ܒܓܵܘܹܗ ܦܵܝܫܝܼܢ̄ܗ̄ܘܵܐ ܡܘܼܩܸܪ̈ܒܹܐ ܩܘܼܪ̈ܒܵܢܹܐ ܘܕܸܒܼܚܹ̈ܐ ܗܵܢܹܝܢ̄ ܕܠܲܝܬܼܗ̄ܘܵܐܒܲܝ ܕܸܡܟܵܡܠܝܼܢ̄ ܢܝܼܬܵܐ ܕܗܵܘܵ ܕܡܲܩܪܸܒܼܗ̄ܘܵܐܠܲܝ، ܐܸܠܵܐ ܒܐܝܼܟܼܵܠܵܐ ܘܒܸܫܬܵܝܵܐ ܒܲܣ ܘܒܚܲܠܲܠܝ̈ܵܬܵܐ؛ ܬܲܪ̈ܙܹܐ ܬܲܪ̈ܙܹܐ ܕܐܝܼܠܵܝ ܦܘܼܩܵܕܹ̈ܐ ܕܒܸܣܪܵܐ ܕܸܪ̈ܝܹܐ ܗܸܠ ܙܲܒܼܢܵܐ ܕܨܿܠܘܿܝܸܐ ܟܠ ܡܢܕܝܼ. ܘܡܫܝܼܚܵܐ ܐ̄ܬܹܐܠܹܗ ܘܦܸܫܠܹܗ ܪܲܒܟܘܼܡܪܹ̈ܐ ܕܛܵܒܼܵܬܼ̈ܵܐ ܕܒܸܕܵܐܬܹܐ. ܘܥܒܹܪܠܸܗ ܠܟܘܝܼܢܵܐ ܪܲܒܬܼܵܐ ܘܟܡܝܼܠܬܵܐ ܕܠܵܐܝܠܵܗ̇ ܥܒܸܖܬܵܐ ܒܐܝܼܕ̈ܵܬܼܵܐ، ܘܠܵܐܝܠܵܗ̇ ܡ̣ܢ ܕܗܵܢܹܝܢ̄ ܒܸܪ̈ܝܵܬܼܵܐ. ܘܠܵܐ ܥܒܹܪܠܸܗ ܒܕܸܡܵܐ ܕܢܹܝܪ̈ܝܼܝܹܐ ܘܕܫܪ̈ܝܵܐ ܘܕܫܲܪ̈ܟܹܐ، ܐܸܠܵܐ ܒܕܸܡܵܐ ܕܸܩܢܘܿܡܹܗ ܥܒܹܪܠܸܗ ܚ̇ܖܵܐ ܓܲܗܵܐ ܠܒܹܝܬܼ ܡܲܩܕܫܵܐ ܘܚ̇ܙܹܐܠܹܗ ܚܵܠܵܨ ܐܲܒܲܕܝܼܢܵܝܵܐ. ܐܸܢ ܕܸܡܵܐ ܕܢܹܝܪ̈ܝܼܝܹܐ ܘܕܫܪ̈ܝܸܐ ܘܩܸܛܡܵܐ ܕܫܲܪܚ̇ܬܼܵܐ ܦܵܝܸܫܗ̄ܘܵܐ ܪܝܼܣܵܐ ܠܗܲܢ ܕܗ̄ܘܲܗ̣̄ܘܵܐ ܡܛܘܿܡܝܹ̈ܐ ܘܡܩܵܕܸܫܗ̄ܘܵܐܠܲܝ، ܒܡܲܢܖܘܿܦܹ̇ܐ ܕܒܸܣܪܲܝܗܝ، ܟܡܵܐ ܒܸܫ ܟܲܒܝܼܪܵܐ ܕܸܡܵܐ ܕܸܡܫܝܼܚܵܐ ܒܓܘܿ ܪܘܼܚܵܐ ܐܲܒܲܕܝܼܢܵܝܵܐ ܓܝܵܢܹܗ ܡܘܼܩܪܸܒܼܠܹܗ ܕܠܵܐ ܡܘܼܡܵܐ ܬܵܐ ܐܲܠܵܗܵܐ ܟܡܲܢܕܸܦ̇ ܢܝܼܬܲܢ ܡ̣ܢ ܥܒܼܵܕܹ̈ܐ ܡܝܼ̈ܬܹܐ ܬܵܐ ܕܟܼܵܕܡܘܼܟܼ ܐܲܠܵܗܵܐ ܒܹܝܚ̇ܵܝܹܐ. ܡܛܲܠܸܒܸܕ ܗܵܖܝܼ ܐܵܗܵܘܼ ܦܸܫܠܹܗ ܡܸܨܥܵܝܵܐ  ܕܥܲܗܕܵܐ ܚܲܖܬܵܐ، ܕܒܓܵܘܸܕ ܡܲܘܬܹܗ ܒܪܹܐܠܹܗ ܚܵܠܵܨ ܬܵܐ ܗܵܢܹܝܢ̄ ܕܬܒܹܪܠܵܝ ܥܲܗܕܵܐ ܩܲܕܡܝܵܐ، ܬܲܕ ܫܵܩܠܝܼܢ̄ ܡܘܼܠܟܵܢܵܐ ܗܵܢܹܝܢ̄ ܕܦܸܫܠܵܝ ܩܸܪ̈ܝܹܐ ܠܝܵܪܬܿܘܼܬܼܵܐ ܐܲܒܲܕܝܼܢܵܝܬܵܐ܀