ܬܸܒ̣ܘ ܘܲܫܠܵܘ ܣܸܦܪܵܐ ܕܒܪܝܼܬܼܵـܐ ܒܲܪܸܟܼܡܵܪܝ(1)
ܕܟܹܪܠܸܗ ܡܵܪܝܵܐ ܠܣܲܪܵܐ ܕܐܲܝܟ ܕܐ̄ܡܹܪܠܸܗ، ܘܥܒܸܖܠܸܗ ܡܵܪܝܵܐ ܬܵܐ ܣܲܪܵܐ ܕܐܲܝܟ ܕܡܘܼܚܟܹܐܠܹܗ. ܘܒܛܸܢܠܵܗ ܣܲܪܵܐ ܘܡܘܼܗܘܹܐܠܵܗ ܒܪܘܿܢܵܐ ܬܵܐ ܐܲܒܼܪܵܗܲܡ ܒܓܵܘ ܣܲܝܒܘܼܬܹܗ، ܡܐܲܝܟ ܙܲܒܼܢܵܐ ܕܡܘܼܚܟܹܐܠܹܗ ܥܸܡܹܗ ܐܲܠܵܗܵܐ.
ܩܪܹܐܠܹܗ ܐܲܒܼܪܵܗܲܡ ܫܸܡܵܐ ܕܸܒܪܘܿܢܸܗ ܐܝܼܣܚܵܩ، ܗܵܖܝܼ ܕܡܘܼܗܘܹܐܠܵܗ ܛܵܠܸܗ ܣܲܪܵܐ، ܘܡܛܘܼܗܹܪܠܸܗ ܐܲܒܪܵܗܲܡ ܠܐܝܼܣܚܵܩ ܒܪܘܿܢܸܗ ܒܝܲܘܡܵܐ ܕܬܡܵܢܝܵܐ، ܕܐܲܝܟ ܕܟܸܡܦܵܩܸܖܠܹܗ ܐܲܠܵܗܵܐ.
ܘܐܲܒܼܪܵܗܲܡ ܗ̄ܘܹܗ̄ܘܵܐ ܐܸܡܵܐ ܫܸ̈ܢܹܐ ܟܘܼܕ ܗܘܹܐܠܹܗ ܐܝܼܣܚܵܩ ܒܪܘܿܢܸܗ. ܘܐܡܹܪܠܵ̄ܗ ܣܲܪܵܐ: ܦܸܨܚܘܼܬܼܵܐ ܪܲܒܬܼܵܐ ܥܒܸܖܠܸܗ ܛܵܠܝܼ ܐܲܠܵܗܵܐ، ܘܐܲܝܡܵܐ ܕܫܵܡܸܥ ܒܸܕ ܦܵܨܸܚ ܥܸܡܝܼ. ܘܐܡܹܪܠܵ̄ܗ؛ ܡܵܢܝܼ ܐܝܼܬܼܗ̄ܘܵܐܒܹܗ ܕܐܵܡܸܪܗ̄ܘܵܐ ܬܵܐ ܐܲܒܪܵܗܲܡ ܕܣܲܪܵܐ ܒܸܕ ܡܲܡܨܵܐ ܒܪܘܿܢܵܐ ܕܡܘܼܗܘܹܐܠܵܗ̇ ܛܵܠܸܗ ܒܣܲܝܒܘܼܬܹܗ؟
ܫܠܵܘ ܣܸܦܪܵܐ ܩܲܕܼܡܵܝܵܐ ܕܲܫܡܘܼܐܹܝܠ ܒܲܪܸܟܼܡܵܪܝ(2)
ܝܼܕܸܥܠܸܗ ܗܲܠܩܵܢܵܐ ܠܚܲܢܵܐ ܒܲܟܼܬܹܗ، ܘܟܸܡ ܬܵܟܹܪܠܵܗ ܡܵܪܝܵܐ. ܘܒܵܬܸܪ ܙܲܒܼܢܵܐ ܕܝܘܼ̈ܡܵܬܼܵܐ ܒܛܸܢܠܵ̄ܗ ܚܲܢܵܐ، ܘܡܘܼܗܘܹܐܠܵܗ̇ ܒܪܘܿܢܵܐ، ܘܩܪܹܐܠܵܗ̇ ܫܸܡܸܗ ܫܡܘܼܐܹܝܠ، ܒܹܝܕ ܡ̣ܢ ܡܲܪܝܵܐ ܟܸܡܛܲܠܒܵܠܹܗ.
ܘܣܸܩܠܹܗ ܓܲܒܼܪܵܗ ܗܲܠܩܵܢܵܐ ܘܟܠܹܗ ܒܲܝܬܹܗ ܠܸܕܒܼܵܚܵܐ ܬܵܐ ܡܵܪܝܵܐ ܕܸܒܼܚܹ̈ܐ ܕܝܘܼ̈ܡܵܬܼܵܐ ܕܢܸܕܪܹ̈ܐ ܕܝܼܹܠܹܗ، ܘܚܲܢܵܐ ܠܵܐ ܣܸܩܠܵܗ. ܘܦܸܫܠܵܗ̇ ܒܡܵܡܘܿܨܹܐ ܒܪܘܿܢܵܗ ܗܸܠ ܕܟܸܡ ܚܵܣܠܵܠܸܗ...ܘܟܘܼܕ ܟܸܡ ܚܵܣܠܵܠܹܗ ܟܸܡ ܡܵܣܩܵܠܸܗ ܥܸܡܵܗ ܘܥܲܡ ܬܘܿܪܵܐ ܒܲܪ ܬܸܠܲܬܼ ܫܸ̈ܢܹܐ ܘܚ̇ܖܵܐ ܥܘܼܠܒܸܐ ܕܩܲܡܚܵܐ ܘܚ̇ܲܕ̄ ܙܸܩܵܐ ܕܚ̇ܲܡܪܵܐ. ܘܟܸܡ ܡܵܬܼܝܵܐܠܲܝ ܠܒܲܝܬܼܵܐ ܕܡܵܪܝܵܐ ܠܫܝܼܠܘܼ، ܘܗܸܫ ܝܵܠܕܵܐ ܗܵܘ ܙܥܘܿܪܵܐ. ܘܸܢܚܹܪܠܵܝ ܬܘܿܪܵܐ.
ܘܡܘܼܬܹܐܠܵܝ ܠܝܵـܠܵܕ̄ܐ ܠܓܹܝܒܸܕ ܥܵܠܝܼ، ܘܐܡܹܪܠܵܗ ܚܲܢܵܐ ܬܵܐ ܥܵܠܝܼ ܟܛܵܠܒܵܢ ܡܸܢܘܼܟ ܝܵܐ ܡܵܪܝܼ ܒܝܼܚܵܝܹܐܠܵܗ ܓܝܵܢܘܼܟ، ܐܵܢܵܐ ܐܝܼܘܲܢ ܗܵܝ ܒܲܟܼܬܵܐ ܕܗ̄ܘܵܗ̄ܘܵܐ ܩܸܡܬܵܐ ܥܸܡܘܼܟ ܗܵܪ̄ܟܼܵܐ ܠܡܨܵܠܘܿܝܹܐ ܩܲܕ̄ܡ ܡܵܪܝܵܐ ܛܵܠܸܒܸܕ ܗܵܕܝܼ ܝܵܠܕܵܐ. ܡܨܘܼܠܹܐܠܝܼ ܘܟܸܡ ܝܵܗܸܒܼܠܠܝܼ ܡܵܪܝܵܐ ܡܲܛܠܲܒ ܕܸܛܠܸܒܠܝܼ ܡܸܢܸܗ. ܘܗܲܡ ܟܸܡ ܝܵܗܒܲܢܠܹܗ ܬܵܐ ܡܵܪܝܵܐ ܟܠܲܝ ܝܘܼܡ̈ܬܼܵܐ ܕܚܲܝܹ̈ܐ ܕܝܼܹܠܹܗ، ܒܲܝܕ ܟܸܡ ܛܵܠܒܵܢܠܸ̄ܗ ܡ̣ܢ ܡܵܪܝܵܐ. ܘܣܗܸܖܠܵܝ ܬܵܡܵܐ ܬܵܐ ܡܵܪܝܵܐ܀
ܦܵܘܠܘܿܣ ܫܠܝܼܚܵܐ ܐܸܓܲܪܬܵܐ ܕܲܠܘܵܬܼ ܓܵܠܵܛܵܝܹ̈ܐ ܐܲܚܲܝ̈ ܒܲܪܸܟܼܡܵܪܝ
ܪܲܢܕܐܹܠܵܗ̇ ܕܚܵܣܡܘܼܬܘܼܢ ܒܸܥܒܼܵܖܹܐ ܛܵܒܹ̈ܐ ܒܟܘܼܠܥܸܕܵܢܵܐ ܘܠܵܐ ܐܝܼܡܵܢ ܕܸܠܓܹܝܒܘܿܟܼܘܼܢ ܐܝܼܘܸܢ ܒܲܣ. ܝܵܠܕ̈ܝܼ ܗܵܢܹܝܢ̄ ܕܡ̣ܢ ܕܵܫܲܢܬܵܐ ܟܸܡܟܲܒܠܸܢ ܗܸܠ ܕܦܵܝܸܫ ܨܝܼܪܵܐ ܒܓܵܘܘܿܟܼܘܼܢ ܡܫܝܼܚܵܐ. ܟܸܒܥܸܢܗ̄ܘܵܐ ܕܗܵܘܸܢ ܠܓܹܝܒܘܿܟܼܘܼܢ ܕܵܗܵܐ ܘܸܡܫܲܚܠܦܸܢ ܒܲܪܩܵܠܝܼ، ܒܲܝܕ ܚܝܼܪܵܐ̄ܝܘܸܢ ܒܓܵܘܘܿܟܼܘܼܢ. ܐܲܚܢܝܼܢ̄ ܐܵܚܢ̈ܘܵܬܼܝܼ ܟܼܕܲܝܓܸܕ ܐܝܼܣܚܵܩ ܝܵܠܕܹ̈ܐ ܐܝܼܘܘܼܟ ܕܡܘܼܠܟܵܢܵܐ، ܕܐܲܝܟ ܕܗܲܝܓܵܗܵܐ ܕܗܵܘܵ ܕܗ̄ܘܹܗ̄ܘܵܐ ܗܘܼܝܵܐ ܒܦܲܓܼܪܵܐ ܛܵܪܸܖ ܗ̄ܘܵܐ ܠܗܵܘܵ ܕܸܒܓܵܘ ܪܘܼܚܵܐ، ܗܵܖܐܲܝܟ ܗܲܡ ܕܵܗܵܐ.
ܐܸܠܵܐ ܡܵܐ ܐ̄ܡܹܪܠܸܗ ܟܬܼܵܒܼܵܐ؛ ܡܘܼܦܸܩܠܵܗ̇ ܠܐܲܡܬܼܵܐ ܘܠܸܒܪܘܿܢܵܗ. ܒܲܝܕ ܠܵܐ ܟܝܵܪܸܬܼ ܒܸܪܕ ܟܸܕܲܡܬܵܐ ܥܲܡ ܒܸܪܕ ܐܣܬܲܬܵܐ. ܒܵܕܲܡ ܐܲܚܢܝܼܢ̄ ܐܵܚܢ̈ܘܵܬܼܝܼ ܠܵܐܝܘܘܼܟ ܝܵܠܕܹ̈ܐ ܕܟܸܕܲܡܬܵܐ ܐܸܠܵܐ ܝܵܠܕܹ̈ܐ ܕܐܣܬܲܬܵܐ. ܩܘܼܡܘܼ ܒܚܹܐܪܘܼܬܼܵܐ ܗܵܝܵ ܕܸܡܫܝܼܚܵܐ ܟܸܡܥܵܒܸܖܠܲܢ ܒܓܵܘܵܗ ܚܹܐܪܹ̈ܐ. ܘܠܵܐ ܦܵܝܫܘܼܬܘܼܢ ܡܟܼܘܼܪܸ̈ܒܩܹܐ ܓܵܗܵܐ ܐ̄ܚܸܪܬܵܐ ܒܢܝܼܪܵܐ ܕܥܲܒܼܕܘܼܬܼܵܐ܀
