 |
||||||||||||||||
ܝܸܡܵܐ ܕܝܸ̈ܡܵܬܼܵܐ ܘܒܬܼܘܼܠܬܵܐ ܕܒܬܼܘܼ̈ܠܵܬܼܵܐ، ܡܲܪܝܲܡ ܡܢ ܢܲܨܪܲܬܼ ܒܝܲܖ ܩܲܫܝܼܫܵܐ ܐܲܢܕܪܵܘܣ ܝܘܿܢܲܢ
ܒܐܲܝܡܵܐ ܕܘܼܟܬܼܵܐ ܚܵܝܪܘܼܟܼ ܬܲܕ ܚܵܙܘܼܟܼ ܕܘܼܡܝܵܗܿ، ܘܐܲܝܟܵܐ ܔ̱ܝܠܘܼܟܼ ܬܲܕ ܝܵܖܥܘܼܟܼ ܫܘܼܦܪܵܗܿ؟ ܕܐܝܼܠܵܗܿ ܝܸܡܵܐ ܕܒܵܪܘܿܝܵܐ ܦܝܼܫܵܐ ܒܲܪܐ̄ܢܵܫܵܐ، ܘܢܲܒܘܼܥܵܐ ܕܦܲܓܼܪܵܢܵܝܘܼܬܼܵܐ ܕܗܵܘ ܕܠܲܝܬܠܸܗ ܫܘܼܪܵܝܵܐ. ܠܲܝܬ̄ܠܝܼ ܕܘܼܟܬܼܵܐ ܕܚܵܝܪܸܢ ܐܸܠܵܐ ܒܪܝܼܬܼܵܐ ܓܘܼܫܡܵܢܵܝܬܵܐ، ܕܚܸܙܘܝܼ ܠܵܐ ܟܡܵܛܹܐ ܠܫ̈ܡܲܝܵܬܼܵܐ. ܐܲܠܵܗܵܐ ܝ̄ܗܒܸܠܸܗ ܛܵܠܝܼ ܗܵܖܐܲܝܟܼ ܬܚܘܼܡܵܐ، ܘܠܵܐ ܐܝܼܠܵܐ ܒܐܝܼܖܝܼ ܬܲܕ ܡܲܐ̄ܪܡܸܢܠܵܗܿ. ܐܲܝܟܵܐ ܓ̱ܝܠܘܼܟܼ ܒܸܒܪܝܼܬܼܵܐ ܬܲܕ ܚܵܙܘܼܟܼ ܚܲܖ̄ ܕܘܼܡܝܵܐ ܕܡܦܵܫܸܩ ܛܵܠܲܢ ܫܘܼܦܪܵܐ ܕܗܵܘ ܗܲܝܟܠܵܐ ܕܒܸܣܪܵܐ ܘܕܸܡܵܐ ܕܫܪܹܐܠܸܗ ܒܓܵܘܹܗ ܒܪܕ ܐܲܠܵܗܵܐ؟ ܠܲܝܬܠܲܢ ܐܸܠܵܐ ܐܸܢ ܕܦܵܬܼܠܘܼܟܼ ܒܵܠܲܢ ܨܘܿܒ ܡܖܝܼܢ̄ܬܵܐ ܪܘܼܚܵܢܵܝܬܵܐ، ܢܨܘܼܒܼܬܵܐ ܩܖܵܡ ܥܲܝܢܲܢ̈. ܟܒܵܪܹܐ ܕܬܵܡܵܢ̄ ܒܚܵܙܘܼܟܼ ܚܖܵܐ ܛܸܠܵܢܝܼܬܼܵܐ، ܕܡܲܠܦܵܠܲܢ ܐܲܝܟܵܐܝ̄ܠܸܗ ܒܸܗܪܵܐ. ܒܲܝܢܲܬܼ ܡܸܢܕܵܢ̈ܐ ܡܵܪ̈ܛܝܼܡܵܐ ܗܵܘ ܡܸܢܕܝ ܒܸܫ ܫܲܦܝܼܪܵܐ ܘܡܸܠܝܵܐ ܡܸܢ ܪܘܼܚܵܐ ܕܩܘܼܖܫܵܐ ܐܝܼܠܵܗܿ ܥܹܕܬܵܐ ܩܲܕܝܼܫܬܵܐ، ܟܲܠܬܼܵܐ ܕܡܫܝܼܚܵܐ. ܥܸܠܵܗܿ ܢܚܸܬܼܠܸܗ ܪܘܼܚܵܐ ܒܝܲܘܡܵܐ ܕܦܸܢܛܸܩܘܣܛܹܐ، ܘܒܓܵܘܵܗܿ ܡܚܘܼܕܬܸܬܼܠܸܗ ܡܵܪܲܢ ܟܠܸܗ ܥܵܠܡܵܐ. ܩܵܪܘܼܟܼ ܡܵܐ ܟܐܵܡܸܪ ܛܲܟܼܣܲܢ ܟܲܠܕܵܝܵܐ ܥܸܠܸܕ ܥܹܕܬܵܐ ܘܡܲܪܝܲܡ ܒܡܲܚܟܘܿܝܹܐ ܒܸܚܖܵܖܹܐ؛
[ܥܘܢܝܬܐ ܕܐ̄ܪ̈ܙܐ ܕܕܘܟܪܢܐ ܕܡܪܬܝ ܡܪܝܡ ܢܛܪܬ̤ ܙܪ̈ܥܐ] ܟܠ ܚܖܵܐ ܡܸܢ ܒܵܪܵܗܿ؛ ܚܖܵܐ ܟܼܕܲܝܓܸܕ ܝܸܡܵܐ ܘܐ̄ܚܸܪܬܵܐ ܟܼܕܲܝܓܸܕ ܟܲܠܬܼܵܐ، ܟܛܵܠܒܝܼܢ̄ ܛܲܠܸܒܸܕ ܟܠܲܢ ܐ̄ܢܵܫܹܐ ܚܲܛܵܝܹ̈ܐ. ܐܸܢ ܟܸܒܥܘܼܟܼ ܕܝܵܖܥܘܼܟܼ ܡܵܢܝܼܠܵܗܿ ܡܲܪܝܲܡ، ܒܲܕܲܡ، ܚܵܝܪܘܼܟܼ ܠܣܢܝܼܩ̈ܘܵܬܲܢ ܪ̈ܘܼܚܵܢܵܝܹܐ ܘܕܐܲܝܟܼ ܟܚܵܙܘܼܟܼ ܡܸܠܝܘܼܬܲܝ ܒܥܹܕܬܵܐ ܩܲܕܝܼܫܬܵܐ. ܘܐܸܢ ܝܵܖܥܘܼܟܼ ܠܵܗܿ ܥܹܕܬܵܐ ܒܟܠܵܢܵܝܘܼܬܼܵܗܿ ܘܒܓܡܝܼܪܘܼܬܼܵܗܿ، ܓܵܪܲܓ ܦܵܝܫܵܐ ܩܲܪܝܼܒܼܬܵܐ ܠܡܫܝܼܚܵܐ ܡܵܪܲܢ ܡܐܲܝܟܼܘܵܬܸܕ ܡܲܪܝܲܡ ܒܬܼܘܼܠܬܵܐ، ܒܨܲܠܘܿܝܹܐ ܘܒܸܛܠܵܒܵܐ ܒܘܼܪܟܵܬܼܵܐ ܬܵܐ ܝܲܠܕ̈ܗܿ. News Archives |
