ܛܟܣܐ ܕܐ̄ܪ̈ܙܐ ܐܠܗܝ̈ܐ
ܕܝܲܘ̈ܡܵܬܼܵܐ ܫܚܝܼ̈ܡܹܐ
܀ ܀ ܀
ܛܟܣܐ ܕܓܠܝܢܗ ܕܡܪܢ
ܡܲܘܕܥܵܢܘܼܬܼܵܐ:
ܢܸܗܘܸܐ ܡܛܲܝܲܒܼ ܟܘܼܪܣܝܵܐ ܒܩܲܢܟܹܐ ܠܡܲܘܬܒܼܵܐ ܕܟܵܗܢܵܐ
ܡܩܲܕܫܵܢܵܐ، ܘܛܲܒܠܝܼܬܼܵـܐ
ܡܸܛܠ ܦܵܬܼܘܿܪܵܐ ܕܐ̄ܪ̈ܵܙܹܐ، ܘܒܹܝܬܼ ܓܲܙܵܐ ܬܘܼܒܼ ܕܒܹܗ
ܡܬܬܣܝܼܡ ܟܬܼܵܒܼܵܐ ܕܐܹܘܲܢܓܲܠܝܘܿܢ. ܘܢ̇ܵܦܹܩ ܟܵܗܢܵܐ ܡܢ݂
ܒܹܝܬܼ ܕܝܵܩܘܿܢ ܒܲܠܒܼܘܼܫܹ̈ܐ ܕܬܸܫܡܸܫܬܵـܐ
ܘܫܲܡܵܫܵܐ ܩܖܵܡܵܘܗܝ. ܘܩܵܐܹ̇ܡ ܟܸܢܫܵܐ. ܘܡܵܐ ܕܩ̇ܵܪܹܒܼ
ܟܵܗܢܵܐ ܠܲܩܖܵܡ ܡܲܖܒܚܵܐ ܣܵܓܹܖ ܘܩܵܐܹ̇ܡ ܘܲܡܫܲܪܸܐ:
ܒܫܸܡ ܐܲܒܵܐ ܘܲܒܪܵܐ ܘܪܘܼܚܵܐ ܕܩܘܼܖܫܵܐ.
ܘܪܵܫܹܡ ܥܲܠ ܩܢܘܿܡܹܗ ܟܲܖ ܡܪܝܼܡ ܐܝܼܖܹܗ ܕܝܲܡܝܼܢܵܐ ܩܲܠܝܼܠ
ܠܥܸܠ،
ܘܡܲܚܸܬܼ
ܠܵܗܿ ܠܘܵܬܼ ܚܲܖܝܹܗ،
ܘܟܸܢ ܠܘܵܬܼ ܟܲܬܼܦܹܗ ܕܝܲܡܝܼܢܵܐ ܘܒܵܬܲܪܟܸܢ ܕܣܸܡܵܠܵܐ.
ܘܒܹܗ ܒܛܘܼܦ̮ܣܵܐ ܢܸܗܘܘܿܢ ܟܠܗܘܿܢ ܪ̈ܘܼܫܡܹܐ ܕܲܨܠܝܼܒܼܵܐ
ܕܥܲܠ ܩܢܘܿܡ ܝܵܬܼܵܐ ܡܬܼܪܲܫܡܝܼܢ.
ܨܠܘܿܬܼܵܐ ܕܫܘܼܪܵܝܵܐ
ܟܵܗܢܵܐ:
ܢܸܣـܬܓܸܖ ܘܢܸܫܬܲܒܲܚ ܘܢܸܬܼܝܲܩܲـܪ ܘܢܸܬܼܪܲܡܪܲܡ
ܘܢܸܬܬܲܘܕܸܐ ܘܢܸܬܼܒܲܪܲܟܼ ܒܲܫܡܲܝܵـܐ ܘܒܲܐܪܥܵـܐ ܫܡܵـܐ
ܣܓܼܝܼܖܵـܐ
ܘܲܡܫܲܒܚܵܐ ܕܲܬܠܝܼܬܼܵܝܘܼܬܼܵܟܼ ܡܫܲܒܲܚܬܵܐ ܒܟܠܥܸܕܵܢ،
ܡܵܪܵܐ ܕܟܠ،
ܐܲܒܵܐ ܘܲܒܪܵܐ ܘܪܘܼܚܵܐ ܕܩܘܼܖܫܵܐ ܠܥܵܠܡܝܼܢ.
ܘܥܵܢܹܝ̇ܢ:
ܐܵܡܹܝܢ.
ܘܡܲܩܸܦ:
ܡܵܪܝܵܐ ܡܲܢܘܼ ܢܸܥܡܲܪ ܒܡܲܫܟܢܵـܟܼ ܘܡܲܢܘܼ ܢܸܫܪܸـܐ
ܒܛܘܼܪܵܟܼ ܩܲܕܝܼܫܵܐ،
ܒܕܲܟܼܝܘܼܬܼ ܚܘܼܫܵܒܹ̈ܐ ܡܵܪܲܢ ܐܲܩܝܼܡܲܝܢܝ ܩܖܵܡ
ܡܲܖܒܚܵܟܼ،
ܡܵܪܝܵܐ ܡܲܢܘܼ ܢܸܥܡܲܪ ܒܡܲܫܟܢܵܟܼ،
ܘܡܲܢܘܼ ܢܸܫܪܸܐ ܒܛܘܼܪܵܟܼ ܩܲܕܝܼܫܵܐ.
ܫܲܡܵܫܵܐ:
ܐܲܝܢܵܐ ܕܲܡܗܲܠܸـܟܼ ܕܠܵܐ ܡܘܼܡ ܘܥܵܒܹ̇ـܖ ܙܲܕܝܼܩܘܼܬܼܵܐ،
ܘܲܡܡܲܠܸܠ ܩܘܼܫܬܵܐ ܒܠܸܒܹܗ ܘܠܵܐ ܢܲܟܘܼܠܬܼܵܢ ܒܠܸܫܵܢܹܗ.
ܟܵܗܢܵܐ:
ܘܠܵܐ ܥܵܒܹ̇ܖ ܠܚܲܒܼܪܹܗ ܒܝܼܫܬܵـܐ،
ܘܫܘܼܚܕܵܐ ܥܲܠ ܩܲܪܝܼܒܹܗ ܠܵܐ ܡܩܲܒܸܠ.
ܫܲܡܵܫܵܐ:
ܘܡܲܣܠܲܝ ܒܥܲܝ̈ܢܵܘܗܝ ܡܲܪܓܙܵܢܵܐ،
ܘܲܠܕܵܚܠܵܘ̈ܗܝـ ܕܡܵܪܝܵܐ ܡܝܲܩܲܪ.
ܟܵܗܢܵܐ:
ܘܝܵܡܹܐ ܠܚܲܒܼܪܹܗ ܘܠܵܐ ܡܕܲܓܸܠ، ܘܟܸܣܦܹܗ ܒܪܸܒܝܼܬܼܵܐ ܠܵܐ
ܝܵܗܹ̇ܒܼ.
ܫܲܡܵܫܵܐ:
ܘܫܘܼܚܕܵܐ ܥܲܠ ܙܲܟܵܝܵܐ ܠܵܐ ܢܵܣܹ̇ـܒܼ،
ܡ̇ܢ ܕܥܵܒܹ̇ـܖ ܗܵܠܹܝܢ ܟܹܐܝܢ ܗ̄ܘܼ،
ܘܠܵܐ ܡܸܬܬܙܝܼܥ ܠܥܵܠܲܡ.
ܟܵܗܢܵܐ:
ܫܘܼܒܼܚܵܐ ܠܐܲܒܵܐ ܘܠܲܒܪܵܐ ܘܲܠܪܘܼܚܵܐ ܕܩܘܼܖܫܵܐ،
ܡܢ݂ ܥܵܠܲܡ
ܘܲܥܖܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ.
ܒܕܲܟܼܝܘܼܬܼ ܚܘܼܫܵܒܹ̈ܐ ܡܵܪܲܢ ܐܲܩܝܼܡܲܝܢܝ ܩܖܵܡ ܡܲܖܒܚܵܟܼ.
ܫܲܡܵܫܵܐ:
ܡܵܪܝܵܐ ܡܲܢܘܼ ܢܸܥܡܲܪ ܒܡܲܫܟܢܵܟܼ ܘܡܲܢܘܼ ܢܸܫܪܸܐ ܒܛܘܼܪܵܟܼ
ܩܲܕܝܼܫܵܐ،
ܡܵܐ ܦܐܹܐ ܘܲܫܒܼܝܼܚ ܒܹܝܬܼ ܡܲܩܕܫܵܟܼ ܐܲܠܵܗܵܐ ܡܩܲܕܸܫ ܟܠ.
܀ ܀ ܀
ܘܐܸܢ ܡܸܫܬܲܡܫܝܼܢ ܐ̄ܪ̈ܵܙܹܐ ܒܵܬܲܪ ܨܠܘܿܬܼܵܐ ܛܲܟܼܣܵܝܬܵܐ،
ܗܵܪܟܵܐ ܡܫܲܪܹܝܢ:
ܘܲܡܩܝܼܡ ܫܲܡܵܫܵܐ:
ܫܠܵܡܵܐ ܥܲܡܲܢ.
ܘܣܵܐܹܡ ܟܵܗܢܵܐ ܒܸܣܡܹ̈ܐ،
ܐܸܢ ܡܵܨܝܵܐ،
ܘܲܡܨܲܠܸܐ ܨܠܘܿܬܼܵܐ ܕܥܲܠ ܓܸܠܝܵܢܹܗ ܕܡܵܪܲܢ:
ܐܲܫܘܵܐ ܠܲܢ ܡܵܪܲܢ ܘܐܲܠܵܗܲܢ ܕܢܸܬܼܗܲܢܘܿܢ ܠܸܒܵـ̈ـܘܵܬܲـܢ
ܒܚܘܼܒܵܟܼ،
ܘܢܸܬܼܢܲܗܪ̈ܵܢ ܢܲܦ̮ܫܵـ̈ܬܲܢ ܒܝܼܖܲܥܬܹܗ ܕܲܫܪܵܪܵܟܼ،
ܘܢܸܬܼܢܲܩܲܦ ܠܡܲܘܗܲܒܼܬܼܵܐ ܕܦܘܼܪܩܵܢܵܐ ܕܫܲܟܸܢܬ ܠܲܢ
ܒܪ̈ܲܚܡܲܝܟ، ܕܢܲܩܒܸܠ ܒܐܲܦܹ̈ܐ ܓܲܠܝ̈ܵܬܼܵـܐ
ܠܓܸܠܝܵܢܵܟܼ ܕܡܸܢ ܫܡܲܝܵܐ.
ܘܥܲܠ ܐܲܦܲܝ̈ ܟܠܗܘܿܢ ܥܘܼܖܪ̈ܵܢܲܝܟ ܘܛܲܝ̈ܒܘܵܬܼܵܟܼ
ܕܲܠܘܵܬܲـܢ ܕܠܵܐ ܡܸܬܼܦܲܪܥܝܼܢ،
ܢܲܘܕܸܐ ܠܵܟܼ ܘܲܢܫܲܒܚܵܟܼ ܕܠܵܐ ܫܲܠܘܵܐ ܒܥܹܕܬܵܟܼ
ܡܟܲܠܲܠܬܵܐ
ܡܲܠܝܲܬܼ ܟܠ ܥܘܼܖܪ̈ܵܢܝܼܢ ܘܟܠ ܛܘܼܒܼܝܼ̈ܢ،
ܕܐܲܢ̄ܬܘܼ ܡܵܪܵܐ ܘܒܵܪܘܿܝܵܐ ܕܟܠ ܠܥܵܠܡܝܼܢ.
ܘܐܵܙܹ̇ܠ ܟܵܗܢܵܐ ܘܩܵܐܹ̇ܡ ܠܓܼܲܒ ܟܘܼܪܣܝܵܐ ܦܪܝܼܫܵܐ
ܕܲܒܩܲܢܟܹܐ.
ܘܡܲܩܦܝܼܢ:
ܐܵܡܹܝܢ.
ܘܐܵܡ̇ܪܝܼܢ:
ܠܵܟܼܘܼ ܡܵܪܵܐ ܕܟܠܵܐ ܡܲܘܕܹܝܢܲܢ،
ܘܠܵܟܼ ܝܑܼܫܘܿܥ ܡܫܝܼܚܵܐ ܡܫܲܒܚܝܼܢܲܢ، ܕܐܲܢ̄ܬܘܼ ܡܢܲܚܡܵܢܵܐ
ܕܦܲܓܼܪ̈ܲܝܢ، ܘܐܲܢ̄ܬܘܼ ܦܵܪܘܿܩܵܐ ܕܢܲܦ̮ܫ̈ܵܬܲـܢ.
ܫܲܡܵܫܵܐ:
ܛܵܒܼ ܠܡܲܘܕܵܝܘܼ ܠܡܵܪܝܵܐ،
ܘܲܠܡܸܙܡܲܪ ܠܲܫܡܵܟܼ ܡܪܲܝܡܵܐ.
ܥܲܡܵܐ:
ܠܵܟܼܘܼ ܡܵܪܵܐ
...
ܘܫܲܪܟܵܐ.
ܫܲܡܵܫܵܐ:
ܫܘܼܒܼܚܵܐ ܠܐܲܒܵܐ ܘܠܲܒܪܵܐ ܘܲܠܪܘܼܚܵܐ ܕܩܘܼܖܫܵܐ،
ܡ̣ܢ ܥܵܠܲܡ ܘܲܥܖܲܡܵܐ ܠܥܵܠܲܡ،
ܐܵܡܹܝܢ ܘܐܵܡܹܝܢ.
ܥܲܡܵܐ:
ܠܵܟܼܘܼ ܡܵܪܵܐ
... ܘܫܲܪܟܵܐ.
ܘܡܸܚܖܵܐ ܕܡܸܬܼܐܲܡܪܵܐ ܦܵܬܼܚ̇ܝܼܢ ܘܹܐܠܵܐ ܒܲܪܵܝܬܵܐ.
ܫܲܡܵܫܵܐ:
ܢܨܲܠܸܐ. ܫܠܵܡܵܐ ܥܲܡܲܢ.
ܨܠܘܿܬܼܵܐ ܕܠܵܟܼܘܼ ܡܵܪܵܐ
ܐܲܢ̄ܬܘܼ ܡܵܪܝ ܫܲܪܝܼܪܵܐܝܼܬܼ ܡܢܲܚܡܵܢܵܐ ܕܦܲܓܼܪ̈ܲܝܢ،
ܘܐܲܢ̄ܬܘܼ ܦܵܪܘܿܩܵܐ ܛܵܒܼܵܐ ܕܢܲܦ̮ܫ̈ܵܬܲܢ،
ܘܲܡܢܲܛܪܵܢܵܐ ܐܲܡܝܼܢܵܐ ܕܚܲܝܲܝ̈ܢ،
ܘܠܵܟܼ ܚܲܝܵܒܼܝܼܢܲܢ،
ܕܢܲܘܕܸܐ ܘܢܸܣܓܘܿܖ ܘܲܢܫܲܒܲܚ ܒܟܠܥܸܕܵܢ، ܡܵܪܵܐ
ܕܟܠ ܠܥܵܠܡܝܼܢ.
ܥܲܡܵܐ:
ܐܵܡܹܝܢ.
ܛܟܣܐ
ܕܡܠܬܐ ܕܐܠܗܐ
ܘܡܸܬܼܦܢܸܐ ܫܲܡܵܫܵܐ ܠܘܵܬܼ ܥܲܡܵܐ ܘܐܵܡܲܪ:
ܐܲܪܝܼܡܘ ܩܵܠܟܼܘܿܢ ܘܫܲܒܲܚܘ ܟܠܹܗ ܥܲܡܵܐ ܠܐܲܠܵܗܵܐ ܚܲܝܵܐ.
ܘܥܵܢܹܝ̇ܢ:
ܩܲܕܝܼܫܵܐ ܐܲܠܵܗܵܐ، ܩܲܕܝܼܫܵܐ ܚܲܝܠܬܼܵܢܵܐ، ܩܲܕܝܼܫܵܐ ܠܵܐ
ܡܵܝܘܿܬܼܵܐ، ܐܸܬܼܪܲܚܲܡܥܠܲܝܢ.
ܫܲܡܵܫܵܐ:
ܫܘܼܒܼܚܵܐ ܠܐܲܒܵܐ ܘܠܲܒܪܵܐ ܘܲܠܪܘܼܚܵܐ ܕܩܘܼܖܫܵܐ.
ܥܲܡܵܐ:
ܩܲܕܝܼܫܵܐ ܐܲܠܵܗܵܐ
... ܘܫܲܪܟܵܐ
ܫܲܡܵܫܵܐ:
ܡܢ݂ ܥܵܠܲܡ ܘܲܥܖܲܡܵܐ ܠܥܵܠܲܡ. ܐܵܡܹܝܢ ܘܐܵܡܹܝܢ.
ܥܲܡܵܐ:
ܩܲܕܝܼܫܵܐ ܐܲܠܵܗܵܐ
... ܘܫܲܪܟܵܐ
ܫܲܡܵܫܵܐ:
ܢܨܲܠܸܐ. ܫܠܵܡܵܐ ܥܲܡܲܢ.
ܨܠܘܿܬܼܵܐ ܕܩܲܕܝܼܫܵܐ ܐܲܠܵܗܵܐ
ܩܲܕܝܼܫܵܐ ܘܲܫܒܼܝܼܚܵܐ ܘܚܲܝܠܬܼܵܢܵܐ ܘܠܵܐ ܡܵܝܘܿܬܼܵܐ،
ܕܲܒܩܲܕܝܼܫܹ̈ܐ ܥܵܡܲܪ ܘܡܸܬܬܢܝܼܚ ܨܸܒܼܝܵܢܹܗ،
ܡܸܬܼܟܲܫܦܝܼܢܲܢ؛
ܐܸܬܼܦܲܢ ܡܵܪܝ ܘܚܘܼܣ ܘܪܲܚܸܡ ܥܠܲܝܢ ܐܲܝܟܼ ܕܲܡܥܵܖܲܬ،
ܒܟܠܥܸܕܵܢ ܡܵܪܵܐ ܕܟܠ، ܐܲܒܵܐ ܘܲܒܪܵܐ ܘܪܘܼܚܵܐ ܕܩܘܼܖܫܵܐ
ܠܥܵܠܡܝܼܢ.
ܥܲܡܵܐ:
ܐܵܡܹܝܢ.
(ܘܝܵܬܼܒܝܼܢ).
ܩܸܪ̈ܝܵܢܹــܐ
ܡܫܲܡܫܵܢܵܐ:
ܢܨܲܠܸܐ. ܫܠܵܡܵܐ ܥܲܡܲܢ.
ܨܠܘܿܬܼܵܐ ܕܲܩܖܵܡ ܫܠܝܼܚܵܐ
ܚܲܟܸܡܲܝܢ ܡܵܪܝ ܒܢܵܡܘܿܣܵܟܼ،
ܘܐܲܢܗܲܪ ܙܲܘܥܲܝ̈ܢ ܒܝܼܖܲܥܬܼܵܟܼ،
ܘܩܲܕܸܫ ܢܲܦ̮ܫ̈ܵܬܲܢ ܒܲܫܪܵܪܵܟܼ،
ܘܗܲܒܼܠܲܢ ܕܢܸܗܘܸܐ ܡܸܬܛܦܝܼ̈ܣܵܢܹܐ ܠܡܸܠܲܝ̈ܟ ܘܓܵܡܘܿܪܹ̈ܐ
ܠܦܘܼܩܕܵܢܲܝ̈ܟ ܒܟܠܥܸܕܵܢ. ܡܵܪܵܐ ܕܟܠ ܠܥܵܠܡܝܼܢ.
ܘܥܵܢܹܝ̇ܢ:
ܐܵܡܹܝܢ.
ܘܲܡܫܲܪܸܐ ܩܵܪܘܿܝܵܐ ܕܲܫܠܝܼܚܵܐ ܡ̣ܢ ܓܲܒܵܐ ܓܲܪܒܝܵܝܵܐ:
(ܦܵܘܠܘܿܣ)
ܫܠܝܼܚܵܐ ܐܸܓܲܪܬܵܐ ܕܲܠܘܵܬܼ
(ܦܠܵܢܵܝܹ̈ܐ).
ܐܲܚܲܝ̈. ܒܲܪܸܟܼܡܵܪܝ.
ܘܡܸܬܼܦܢܸܐ ܠܘܵܬܼ ܟܵܗܢܵܐ ܘܢܸܬܼܒܲܪܲܟܼ ܡܸܢܹܗ.
ܘܥܵܢܹ̇ܐ ܟܵܗܢܵـܐ:
ܡܫܝܼܚܵܐ ܢܚܲܟܡܵܟܼ ܒܝܘܼܠܦܵܢܹܗ ܩܲܕܝܼܫܵܐ،
ܘܢܸܥܒܖܵܟܼ ܡܲܚܙܝܼܬܼܵܐ ܫܲܦܝܼܪܬܵܐ ܠܟܠܗܘܿܢ ܐܲܝܠܹܝܢ
ܕܨܵܝܬܝܼܢ ܠܵܟܼ.
ܙܘܼܝܵܚܵܐ ܕܐܹܘܲܢܓܲܠܝܘܿܢ
ܘܡܵܐ ܕܫܵܠܹܡ ܫܠܝܼܚܵܐ ܐܵܡܲ̇ܪ ܫܲܡܵܫܵܐ:
ܫܘܼܒܼܚܵܐ ܠܲܡܫܝܼܚܵܐ ܡܵܪܲـܢ.
ܘܡܲܩܸܦ:
ܗܲܠܸܠܘܼܝܵܐ ܗܲܠܸܠܘܼܝܵܐ ܐܹܗܲܠܸܠܘܼܝܵܐ.
ܘܐܵܙܹ̇ܠ ܟܵܗܢܵܐ ܠܒܹܝܬܼ ܓܲܙܵܐ ܠܡܸܣܥܲܪ ܠܐܹܘܲܢܓܲܠܝܘܿܢ
ܩܲܕܝܼܫܵܐ ܘܡܲܝܬܹܐ ܠܹܗ ܒܙܘܼܝܵܚܵܐ ܠܬܲܪܥܵܐ ܕܩܲܢܟܹܐ
ܠܓܲܒܵܐ ܓܲܪܒܝܵܝܵܐ ܟܲܖ ܐܵܡܲܪ:
ܫܘܼܒܼܚܵܐ ܠܪ̈ܲܚܡܹܐ ܡܬܼܘܿܡܵܝܹ̈ܐ ܕܫܲܠܚܘܼܟܼ ܨܹܐܖܲܝܢ،
ܡܫܝܼܚܵܐ ܢܘܼܗܪܹܗ ܕܥܵܠܡܵܐ ܘܚܲܝܹ̈ܐ ܕܟܠ ܠܥܵܠܡܝܼܢ.
ܐܵܡܹܝܢ.
ܘܩܵـܐܹ̇ܡ ܥܲܡܵܐ.
ܘܟܸܢ ܫܲܡܵܫܵܐ ܡܩܝܼܡ:
ܒܫܸܠܝܵܐ ܗܘܵܘ ܘܲܫܠܵܘ.
ܘܲܡܒܲܪܸܟܼ ܟܵܗܢܵܐ ܠܥܲܡܵܐ ܒܐܹܘܲܢܓܲܠܝܘܿܢ ܘܐܵܡܲܪ:
ܫܠܵܡܵܐ ܥܲܡܟܼܘܿܢ.
ܥܲܡܵܐ:
ܘܥܲܡܵܟܼ
ܘܥܲܡ ܪܘܼܚܵܟܼ.
ܘܐܵܡܲܪ ܟܵܗܢܵܐ؛
ܐܹܘܲܢܓܲܠܝܘܿܢ
ܩܲܕܝܼܫܵܐ ܕܡܵܪܲܢ ܝܼܫܘܿܥ ܡܫܝܼܚܵܐ ܟܵܪܘܿܙܘܼܬܼܵܐ ܕ...
ܥܲܡܵܐ؛
ܫܘܼܒܼܚܵܐ ܠܲܡܫܝܼܚܵܐ ܡܵܪܲܢ.
ܫܲܡܵܫܵܐ؛
ܐܵܡܹܝܢ. ܫܠܵܘ.
ܘܩܵܪܹܐ ܟܵܗܢܵܐ ܠܐܹܘܲܢܓܲܠܝܘܿܢ. ܘܡܵܐ ܕܫܵܠܹܡ ܐܵܡܲ̇ܪ:
ܫܘܼܒܼܚܵܐ ܠܐܲܠܵܗܵܐ ܐܲܡܝܼܢܵܐܝܼܬܼ.
ܘܥܵܢܝܹ̇ܢ:
ܫܘܼܒܼܚܵܐ ܠܲܡܫܝܼܚܵܐ ܡܵܪܲܢ.
ܛܟܣܐ ܕܩܘܪܒܢܐ
[ܗܵܪܟܵܐ
ܫܲܡܵܫܵܐ ܩܵܥܹ̇ܐ:
ܡ̇ܢ ܕܠܵܐ ܫܩܝܼܠܵܐ ܠܹܗ ܡܲܥܡܘܿܕܝܼܬܼܵـܐ،
ܢܹܐܙܲܠ.
ܡ̇ܢ ܕܠܵܐ ܡܩܲܒܸܠ ܠܹܗ ܪܘܼܫܡܵܐ ܕܚܲܝܹ̈ܐ، ܢܹܐܙܲܠ.
ܡ̇ܢ ܕܠܵܐ ܢܵܣܹܒܼ ܠܹܗ ܢܹܐܙܲܠ،
ܙܸܠܘ ܫܵܡܘܿܥܹ̈ܐ ܘܲܚܙܵܘ ܬܲܪ̈ܥܹܐ.]
ܘܲܡܫܲܪܹܝܢ ܥܘܿܢܝܼܬܼܵܐ ܕܐ̄ܪ̈ܵܙܹܐ:
ܒܪܘܼܟܵܒܼ:
ܗܵܐ ܦܵܬܼܘܿܪܵܐ:
ܗܵܐ ܫܵܪܘܼܬܼܝ ܡܛܲܝܒܼܵܐ، ܘܟܠ ܡܸܕܸܡ ܡܛܲܝܲܒܼ، ܬܵܘ
ܠܡܸܫܬܘܼܬܼܵܐ:
ܐܸܬܼܟܲܢܲܫܘ ܠܘܵܬܹܗ ܓܒܼܵܘ̈ܗܝ:
ܗܵܐ ܡܙܲܡܢܝܼܬܘܿܢ ܠܚܲܝܹ̈ܐ ܚܲܕ̈ܬܹܐ،
ܕܦܲܓܼܪܵܐ ܘܲܕܡܵܐ ܡܚܲܣܝܵܢܵܐ ܨܲܒܸܬܼܘ ܩܢܘܿܡܲܝ̈ܟܘܿܢ.
ܘܒܲܙܡܝܼܪ̈ܵܬܼܵܐ ܕܪܘܼܚܵܐ ܫܲܒܲܚܘ ܘܐܲܘܕܵܘ ܠܒܲܪ ܡܲܠܟܵܐ
ܕܲܢܚܸܬܼ ܨܹܐܖܲܝܢ ܘܦܲܪܩܲܢ ܒܲܨܠܝܼܒܹܗ.
ܘܝܲܗ̄ܒܼ ܠܲܢ ܦܲܓܼܪܹܗ ܘܲܕܡܹܗ، ܕܒܹܗ ܪܵܘܙܝܼܢ ܟܠܗܘܿܢ
ܩܲܕܝܼ̈ܫܹܐ، ܘܩܵܥܹܝܢ ܠܹܗ ܩܲܕܝܼܫ ܩܲܕܝܼܫ ܩܲܕܝܼܫ
ܡܲܚܝܵܢܲܢ.
(ܬܢܝܼ).
ܫܝܵܓܼܬܵܐ ܕܐܝܼ̈ܖܲܝܵܐ
ܘܡܵܐ
ܕܡܸܬܼܐܲܡܪܵܐ
ܥܘܿܢܝܼܬܼܵܐ
ܡܫܝܼܓܼ
ܟܵܗܢܵܐ
ܐܝܼ̈ܖܵܘܼܗܝ ܘܲܡܟܲܦܲܪ ܠܗܹܝܢ ܟܲܖ ܐܵܡܲܪ ܢܝܼܚܵܐܝܼܬܼ:
ܐܲܠܵܗܵـܐ
ܡܵܪܹܟܠ ܢܫܝܼܓܼ ܨܵܐܬܼܵـܐ
ܕܚܲܘܒܲܝ̈ܢ ܒܙܘܿܦܵܐ ܕܲܚܢܵܢܹܗ، ܘܢܸܡܪܘܿܩ ܟܘܼ̈ܬܼܡܵܬܼܵـܐ
ܕܲܚܛܵܗܲܝ̈ܢ ܒܝܲܡܵܐ ܕܲܡܪܲܚܡܵܢܘܼܬܹܗ. ܐܵܡܝܹܢ.
ܘܟܸܢ:
ܡܵܪܝܵܐ ܢܟܲܦܲܪ ܫܘܼܚܬܵܐ ܕܚܲܘܒܲܝ̈ܢ ܘܕܲܚܛܵܗܲܝ̈ܢ
ܒܛܲܝܒܘܼܬܹܗ ܘܲܒܪ̈ܲܚܡܵܘܗܝ. ܐܵܡܹܝܢ.
ܡܲܥܲܠܬܵـܐ
ܕܲܡܩܲܕܫܵܢܵܐ ܠܒܹܝܬܼ ܩܘܼܖܫܵܐ
ܘܦܵܬܼܚܝܼـܢ ܘܹܐܠܵܐ ܓܵܘܵܝܬܵܐ ܕܡܲܖܒܚܵܐ،
ܐܸܢ ܐܝܼܬܼ، ܘܐܵܙܹܠ ܟܵܗܢܵܐ ܠܡܸܨܥܲܬܼ ܩܲܢܟܹܐ ܩܖܵܡ
ܡܲܖܒܚܵܐ ܕܢܸܥܘܿܠ ܠܲܩܖܘܿܫ ܩܘܼܕܫܹ̈ܐ، ܘܲܡܩܲܪܸܒܼ ܬܠܵܬܼ
ܡܵܛܘܿܢܝܼܵܣ ܟܲܖ ܒܟܠ ܚܖܵܐ ܡܵܛܘܿܢܝܵܐ ܠܲܩܖܵܡܵܘܗܝ ܩܵܪܹܒܼ.
ܘܥܲܡ ܫܘܼܪܵܝ ܡܵܛܘܿܢܝܼܵܐ ܡܸܬܼܟܲܫܲܦ ܗܵܟܲܢ ܟܲܖ ܐܵܡܲ̇ܪ:
ܟܲܖ ܪܣܝܼܣܝܼܢ ܠܸܒܵܘ̈ܬܲܢ ܘܲܕܟܹܝܢ ܡܢ݂ ܬܹܐܪܬܵܐ ܒܝܼܫܬܵܐ،
ܢܸܫܬܘܸܐ ܕܢܸܥܘܿܠ ܠܲܩܖܘܿܫ ܩܘܼܕܫܹ̈ܐ ܪ̈ܵܡܹܐ ܘܲܡܥܲܠܲܝ̈ܵܐ،
ܘܕܲܟܼܝܵܐܝܼܬܼ ܘܙܲܗܝܵܐܝܼܬܼ ܘܥܝܼܪܵܐܝܼܬܼ ܘܩܲܕܝܼܫܵܐܝܼܬܼ
ܢܩܘܼܡ ܩܖܵܡ ܡܲܖܒܚܵܟܼ ܩܲܕܝܼܫܵܐ، ܘܲܢܩܲܪܸܒܼ ܠܵܟܼ ܕܸܒܚܹ̈ܐ
ܪ̈ܘܼܚܵܢܵܝܹܐ ܘܲܡܠܝܼ̈ܠܹܐ ܒܗܲܝܡܵܢܘܼܬܼܵܐ ܕܲܫܪܵܪܵܐ.
[ܘܡܲܩܸܦ:
ܐܲܢ̄ܬ ܕܹܝܢ ܛܵܒܼܵܐ ܕܠܵܐ ܐܵܠܹ̇ܡ ܠܥܵܠܲܡ ܘܠܵܐ ܠܥܵܠܲܡ
ܢܵـ̇ܛܲܪ ܪܘܼܓܼܙܹܗ، ܐܲܗܦܸܟܼ ܐܲܦܲܝ̈ܟ ܡܢ݂ ܚܛܵܗܲܝ̈
ܘܟܠܗܹܝܢ ܣܵܟܼܠܘܵܬܼ̈ܝ ܥܛܝܼ، ܒܣܘܿܓܼܵܐܐ ܪܲܒܵܐ
ܕܲܡܪܲܚܡܵܢܘܼܬܼܵܟܼ،
ܐܲܒܵܐ ܘܲܒܪܵܐ ܘܪܘܼܚܵܐ ܕܩܘܼܖܫܵܐ.]
ܘܐܸܢ ܠܲܝܬ ܐܲܬܼܪܵܐ ܡܲܩܸܦ ܗܵܖܹܐ:
ܡܵܪܲܢ ܝܑܼܫܘܿܥ ܡܫܝܼܚܵܐ ܢܸܗܘܸܐ ܥܲܡ ܟܠܲܢ ܒܛܲܝܒܘܼܬܹܗ
ܘܲܒܪ̈ܲܚܡܵܘܗܝ ܠܥܵܠܡܝܼܢ. ܐܵܡܹܝܢ.
ܘܡܵܐ ܕܡ̇ܵܛܹܐ ܠܡܲܖܒܚܵܐ ܣ̇ܵܓܹܖ ܘܩ̇ܵܐܹܡ ܘܢ̇ܵܫܹܩ
ܠܲܡܨܲܥܬܼܵـܐ
ܘܲܠܩܲܪܢܵܐ ܕܝܲܡܝܼܢܵܐ ܘܲܕܣܸܡܵܠܵܐ،
ܘܟܸܢ ܡܸܬܼܟܲܫܲܦ ܗܵܟܲܢ ܟܲܖ ܡܲܪܬܸܡ ܒܣܸܦܘ̈ܵܬܹܗ:
ܐܹܝܢ ܡܵܪܲܢ ܘܐܲܠܵܗܲܢ،
ܠܵܐ ܬܚܘܼܪ ܒܣܘܿܓܼܵܐܐ ܕܲܚܛܵܗܲܝ̈ܢ ܘܠܵܐ ܬܸܓܼܥܲܨ
ܡܵܪܘܼܬܼܵܟܼ ܡܢ݂ ܝܘܼܩܪܵܐ ܕܒܝܼܫ̈ܵܬܲܢ،
ܐܸܠܵܐ ܒܛܲܝܒܘܼܬܼܵܟܼ ܠܵܐ ܡܸܬܼܡܲܠܠܵܢܝܼܬܼܵܐ ܩܲܒܸܠ
ܠܕܸܒܼܚܬܼܵܐ ܗܵܖܹܐ ܡܢ݂ ܐܝܼܖܲܝ̈ܢ، ܘܗܲܒܼ ܒܵܗ̇ ܚܲܝܠܵــܐ
ܘܡܸܬܼܡܲܨܝܵܢܘܼܬܼܵܐ ܕܬܸܫܟܲـܚ ܚܛܵܗܲܝ̈ܢ ܣܲܓܝܼ̈ــܐܹܐ
ܠܲܡܚܲܣܵܝܘܼ، ܕܡܵܐ ܕܡܸܬܼܓܠܸܐ ܒܪܵܟܼ ܚܲܒܝܼܒܼܵܐ ܒܚܲܪܬܼܵܐ
ܕܙܲܒܼܢܹ̈ܐ ܒܐ̄ܢܵܫܘܼܬܼܵܐ ܕܡܸܢܲܢ ܢܣ݂ܲܒܼ، ܢܸܫܟܲܚ
ܩܖܵܡܵܘ̈ܗܝ ܛܲܝܒܘܼܬܼܵܐ ܘܪ̈ܲܚܡܹܐ ܘܢܸܫܬܘܸܐ ܠܲܡܫܲܒܵܚܘܼ
ܥܲܡ ܟܸܢܫܹ̈ܐ ܡܸܬܼܝܲܖܥܵܢܹ̈ܐ.
ܡܣܩܬܐ ܕܐ̄ܪ̈ܙܐ ܠܡܕܒܚܐ
ܘܟܸܢ ܡܲܝܬܸܐ ܫܲܡܵܫܵܐ ܠܦܵܬܼܘܿܪܵܐ ܡ̣ܢ ܛܲܒܠܝܼܬܼܵܐ
ܘܡܲܘܫܸܛ ܐ̄ܪ̈ܵܙܹܐ ܠܟܵܗܢܵܐ،
ܘܗܘܼ ܟܵܗܢܵܐ ܡܲܣܸܩ ܠܗܘܿܢ ܒܙܘܼܝܵܚܵܐ ܥܲܠ ܡܲܖܒܚܵܐ، ܟܲܖ
ܛܥܝܼܢ ܠܟܵܣܵܐ ܒܝܲܡܝܼܢܹܗ ܘܲܠܦܝܼܠܵܣܵܐ ܒܣܸܡܵܠܹܗ: ܘܥܵܒܹ̇ܖ
ܐܝܼܖܵܘ̈ܗܝ ܨܠܝܼܒܼܵܐܝܼܬܼ.
ܘܐܵܡܲܪ ܫܲܡܵܫܵܐ:
ܢܨܲܠܸܐ. ܫܠܵܡܵܐ ܥܲܡܲܢ.
ܘܐܵܡܲ̇ܪ ܟܵܗܢܵܐ ܒܩܵܠܵܐ ܫܡܝܼܥܵܐ:
ܢܲܣܸܩ ܬܸܫܒܘܿܚܬܵܐ ܠܲܬܠܝܼܬܼܵܝܘܼܬܼܵܟܼ ܡܫܲܒܲܚܬܵܐ
ܒܟܠܥܸܕܵܢ ܠܥܵܠܡܝܼܢ.
ܘܥܵܢܹ̇ܐ ܫܲܡܵܫܵܐ:
ܐܵܡܹܝܢ.
ܘܡܲܩܸܦ ܟܵܗܢܵܐ:
ܡܫܝܼܚܵܐ ܕܐܸܬܕܒܲܚ ܚܠܵܦ ܦܘܼܪܩܵܢܲܢ، ܘܦܲܩܸܖ ܠܲܢ ܕܢܸܥܒܸܖ
ܥܘܼܗܕܵܢܵܐ ܕܡܲܘܬܹܗ ܘܕܲܩܒܼܘܼܪܬܹܗ ܘܕܲܩܝܵܡܬܹܗ، ܗܘ̤
ܢܩܲܒܠܝܼܗ̇ ܠܕܸܒܼܚܬܼܵܐ ܗܵܖܹܐ ܡܢ݂ ܐܝܼܖܲܝ̈ܢ،
ܒܛܲܝܒܘܼܬܹܗ ܘܲܒܪ̈ܲܚܡܵܘܗܝ. ܐܵܡܹܝܢ.
ܘܢܵܩܹ̇ܫ ܦܝܼܠܵܣܵܐ ܠܟܵܣܵܐ (ܓ) ܙܲܒܼܢܝܼ̈ܢ ܘܐܵܡܲܪ:
ܒܦܘܼܩܕܵܢܵܟܼ ܡܵܪܲـܢ ܘܐܲܠܵܗܲـܢ
(ܬܢܝܼ)
ܡܸܬܬܣܝܼܡܝܼܢ ܘܡܸܣܬܲܖܪܝܼܢ ܐ̄ܪ̈ܵܙܹܐ ܗܵܠܹܝܢ ܫܒܼܝܼܚܹ̈ܐ
ܘܩܲܕܝܼ̈ܫܹܐ ܘܡܲܚܝܵܢܹ̈ܐ ܘܐܲܠܵܗܵܝܹ̈ܐ ܥܲܠ ܡܲܖܒܚܵܐ
ܡܚܲܣܝܵܢܵܐ،
ܥܖܲܡܵܐ ܠܡܹܐܬܼܝܼܬܹܗ ܕܡܵܪܲـܢ ܕܬܲܪܬܹܝܢ ܙܲܒܼܢܝܼ̈ܢ ܕܡܢ݂
ܫܡܲܝܵܐ: ܕܠܹܗ ܫܘܼܒܼܚܵܐ ܒܟܠܥܸܕܵܢ ܠܥܵܠܡܝܼܢ. ܐܵܡܹܝܢ.
ܘܣܵܕܲܪ ܠܐ̄ܪ̈ܵܙܹܐ ܥܲܠ ܡܲܖܒܚܵܐ، ܠܟܵܣܵܐ ܕܝܹܢ ܡܢ݂
ܓܲܪܒܝܵܐ ܘܲܠܦܝܼܠܵܣܵܐ ܡܢ݂ ܬܲܝܡܢܵܐ، ܘܲܡܟܲܣܸܐ ܠܗܘܿܢ
ܒܫܘܿܫܸܦܵܐ ܙܗܝܼܪܵܐܝܼܬܼ.
ܘܐܵܡܪܝܼܢ ܐܲܩܲܦܬܼܵܐ ܕܥܘܿܢܝܬܼܵܐ ܕܐ̄ܪܵܙܹܐ:
ܫܘܼܒܼܚܵܐ ܠܐܲܒܵܐ ܘܠܲܒܪܵܐ ܘܲܠܪܘܼܚܵܐ ܕܩܘܼܖܫܵܐ؛
ܥܲܠ ܡܲܖܒܲܚ ܩܘܼܖܫܵܐ ܢܸܗܘܸܐ ܕܘܼܟܼܪܵܢܵܗ̇، ܕܲܒܬܼܘܼܠܬܵܐ
ܡܲܪܝܲܡ ܐܸܡܹܗ ܕܐܲܠܵܗܵܐ (ܐܵܘ
ܐܸܡܹܗ ܕܲܡܫܝܼܚܵܐ)܀
ܡܢ݂ ܥܵܠܲܡ ܘܲܥܖܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ؛
ܫܠܝܼܚܵܘ̈ܗܝ ܕܲܒܪܵܐ ܘܪ̈ܵܚܡܵܘܗܝ ܕܝܼܚܝܼܖܵܐ،
ܕܘܼܟܼܪܵܢܗܘܿܢ ܢܸܗܘܸܐ ܒܥܹܕܬܹܗ ܕܲܡܫܝܼܚܵܐ܀
ܢܹܐܡܲܪ ܟܠܹܗ ܥܲܡܵܐ ܐܵܡܹܝܢ ܘܐܵܡܹܝܢ؛
ܕܘܼܟܼܪܵܢ ܡܵܪܝ
ܬܐܘܿܡܵܐ
ܐܵܘ ܣܢܹܐܓܼܪܵܐ ܕܥܹܕܬܵܐ، ܐܸܢ ܐܝܼܬܼ، ܐܵܘ ܩܲܕܝܼܫܵܐ ܐܵܘ
ܩܲܕܝܼܫܬܵܐ
ܕܖܘܼܟܼܪܵܢܗܘܿܢ
ܡܸܙܕܲܝܲܚ
ܥܲܠ ܡܲܖܒܲܚܩܘܼܖܫܵܐ،
ܥܲܡ ܟܹܐܢܹ̈ܐ ܕܲܢܨܲܚܘ ܘܣܵܗܕܹ̈ܐ ܕܐܸܬܼܟܲܠܲܠܘ܀
ܗܵܐ ܫܟܸܒܼܘ
ܥܲܠ ܣܲܒܼܪܵܟܼ ܟܠܗܘܿܢ ܥܲܢܝܼܖܲܝ̈ܢ،
ܕܒܲܩܝܵܡܬܵܟܼ ܫܒܼܝܼܚܬܵܐ ܒܫܘܼܒܼܚܵܐ ܬܩܝܼܡ ܐܸܢܘܿܢ.
ܗܵܢܵܐ ܕܹܝܢ ܥܘܼܢܵܝܵܐ ܠܵܐ ܢܸܫܬܲܚܠܲܦ ܒܟܠܗܘܿܢ ܩܘܼܕܵܫܹ̈ܐ.
ܘܡܵܐ ܕܫܸܠܡܲܬܼ ܥܘܿܢܝܼܬܼܐ ܕܐ̄ܪܵܙܹܐ ܥܲܡ ܟܠܵܗ̇
ܐܲܩܲܦܬܼܵܗ، ܐܵܡܲܪ ܥܲܡܵܐ:
ܘܢܸܬܼܩܲܒܲܠ ܩܘܼܪܒܵܢܵܐ ܗܵܢܵܐ ܒܐܲܦܹ̈ܐ ܓܲܠܝ̈ܵܬܼܵـܐ،
ܘܢܸܬܼܩܲܕܲܫ ܒܡܸܠܬܼܵـܐ
ܕܐܲܠܵܗܵܐ ܘܲܒܪܘܼܚܵܐ ܕܩܘܼܖܫܵܐ، ܕܢܸܗܘܸܐ ܠܲܢ ܠܥܘܼܖܪܵܢܵܐ
ܘܲܠܦܘܼܪܩܵܢܵܐ ܘܲܠܚܲܝܹ̈ܐ ܕܲܠܥܵܠܲܡ ܥܵܠܡܝܼܢ ܒܡܲܠܟܘܼܬܼܵܐ
ܕܲܫܡܲܝܵܐ، ܒܛܲܝܒܘܼܬܹܗ ܕܲܡܫܝܼܚܵܐ.
ܡܸܬܛܲܝܒܼܵܢܘܼܬܼܵܐ ܓܵܘܵܢܵܝܬܵܐ ܠܩܘܼܪܵܒܼ ܩܘܼܪܒܵܢܵܐ
ܨܘܼܪܬܵܐ ܕܗܲܝܡܵܢܘܼܬܼܵܐ
ܘܗܘ̤ ܟܵܗܢܵܐ ܢܵܚܹ̇ܬܼ ܠܲܬܼܪܲܥ ܩܲܢܟܹܐ،
ܦܵܫܹܛ ܐܝܼܖܵܘ̈ܗܝ ܟܲܖ ܐܲܦܵܘ̈ܗܝ ܠܡܲܥܪܒܼܵܐ، ܐܵܘܟܹܝܬܼ
ܠܥܲܡܵܐ، ܘܐܵܡܲ̇ܪ ܒܩܵܠܵܐ ܪܵܡܵܐ:
ܡܗܲܝܡܢܝܼܢܲܢ. ܘܟܠܗܘܿܢ
ܡܲܩܦܝܼܢ:
ܡܗܲܝܡܢܝܼܢܲܢ ܒܚܲܖ ܐܲܠܵܗܵܐ ܐܲܒܵܐ ܐܲܚܝܼܖ ܟܠ،
ܥܵܒܼܘܿܖܵܐ ܕܟܠܗܹܝܢ ܐܲܝܠܹܝܢ ܕܡܸܬܼܚܲܙ̈ܝܵܢ ܘܲܕܠܵܐ
ܡܸܬܼܚܲܙ̈ܝܵܢ.
ܘܲܒܚܲܖ ܡܵܪܝܵܐ ܝܑܼܫܘܿܥ ܡܫܝܼܚܵܐ، ܒܪܹܗ ܕܐܲܠܵܗܵܐ
ܝܑܼܚܝܼܖܵܝܵܐ،
ܒܘܼܟܼܪܵܐ ܕܟܠܗܹܝܢ ܒܸܪ̈ܝܵܬܼܵܐ. ܗܵܘ̇ ܕܡܢ݂ ܐܲܒܘܼܗܝ
ܐܸܬܼܝܼܠܸܖ ܩܖܵܡ ܟܠܗܘܿܢ ܥܵܠܡܹ̈ܐ،
ܘܠܵܐ ܐܸܬܼܥ̱ܒܸܖ. ܐܲܠܵܗܵܐ ܫܲܪܝܼܪܵܐ ܕܡܢ݂ ܐܲܠܵܗܵܐ
ܫܲܪܝܼܪܵܐ، ܒܲܪ ܟܝܵܢܵܐ ܕܐܲܒܘܼܗܝ،
ܕܒܐܝܼܖܵܘ̈ܗܝ ܐܸܬܬܲܩܲܢܘ ܥܵܠܡܹ̈ܐ ܘܐܸܬܼܒܪܝܼ ܟܠܡܸܕܸܡ.
ܗܵܘ̇ ܕܡܸܛܠܵܬܲܢ ܒܢܲܝ̈ܢܵܫܵܐ ܘܡܸܛܠ ܦܘܼܪܩܵܢܲܢ ܢܚܸܬ݂ܼ ܡܢ݂
ܫܡܲܝܵܐ، ܘܐܸܬܼܓܲܫܲܡ ܡܢ݂ ܪܘܼܚܵܐ ܕܩܘܼܖܫܵܐ، ܘܲܗܘܵܐ
ܒܲܪܢܵܫܵܐ. ܘܐܸܬܼܒܛܸܢ ܘܐܸܬܼܝܼܠܸܖ ܡܢ݂ ܡܲܪܝܲܡ ܒܬܼܘܼܠܬܵܐ.
ܘܚܲܫ݂ ܘܐܸܙܕܩܸܦ ܒܝܲܘܡܲܝ̈ ܦܲܢܛܝܘܿܣ ܦܝܼܠܵܛܘܿܣ. ܡ̣ܝܼܬܼ
ܘܐܸܬܼܩܒܲܪ ܘܩܵܡ݂ ܠܲܬܠܵܬܼܵܐ ܝܲܘܡܝܼ̈ܢ ܐܲܝܟܼ ܕܲܟܬܼܝܼܒܼ.
ܘܲܣܠܸܩ݂ ܠܲܫܡܲܝܵܐ،
ܘܝܼܬܸܒ݂ܼ ܡܢ݂ ܝܲܡܝܼܢܵܐ ܕܐܲܒܘܼܗܝ. ܘܬܼܘܼܒܼ ܥܬܼܝܼܖ
ܠܡܐܹܬܼܵܐ ܠܲܡܖܵܢ ܠܡܝܼ̈ܬܹܐ ܘܲܠܚܲܝܹ̈ܐ.
ܘܲܒܚܲܖ ܪܘܼܚܵܐ ܕܩܘܼܖܫܵܐ، ܪܘܼܚܵܐ ܕܲܫܪܵܪܵܐ، ܗܵܘ̇
ܕܡ̣ܢ ܐܲܒܵܐ ܢܵܦܹܩ̇، ܪܘܼܚܵܐ ܡܲܚܝܵܢܵܐ. ܘܒܲܚܖܵܐ ܥܹܕܬܵܐ
ܩܲܕܝܼܫܬܵܐ ܘܲܫܠܝܼܚܵܝܬܵܐ ܩܵܬܼܘܿܠܝܼܩܝܼ. ܡܲܘܕܹܝܢܲܢ
ܒܲܚܖܵܐ ܡܲܥܡܘܿܕܝܼܬܼܵܐ ܠܫܘܼܒܼܩܵܢܵܐ ܕܲܚܛܵܗܹ̈ܐ،
ܘܒܲܩܝܵܡܬܵܐ ܕܦܲܓܼܪܹ̈ܐ،
ܘܲܒܚܲܝܹ̈ܐ ܕܲܠܥܵܠܲܡ ܥܵܠܡܝܼܢ.
ܘܡܵܐ ܕܫܸܠܡܲܬܼ ܨܘܼܪܬܵܐ ܕܗܲܝܡܵܢܘܼܬܼܵܐ ܣܵܠܹ̇ܩ ܟܵܗܢܵܐ
ܠܡܲܖܒܚܵܐ،
ܘܲܡܩܲܪܸܒ ܡܵܛܘܿܢܝܼܵܐ ܟܲܖ ܡܲܪܬܸܡ ܒܣܸܦܘ̈ܵܬܹܗ ܨܠܘܿܬܼܵܐ
ܗܵܖܹܐ ܕܥܲܠ ܟܵܗܢܘܼܬܼܵܐ:
ܫܘܼܒܼܚܵܐ ܠܵܟܼ ܡܲܫܟܚܵܢܵܐ ܕܐܲܒܝܼܖܹ̈ܐ. ܫܘܼܒܼܚܵܐ ܠܵܟܼ
ܡܟܲܢܫܵܢܵܐ ܕܲܡܒܲܕܪܹ̈ܐ. ܫܘܼܒܼܚܵܐ ܠܵܟ ܡܲܩܪܒܼܵܢܵܐ
ܕܪ̈ܲܚܝܼܩܹܐ. ܫܘܼܒܼܚܵܐ ܠܵܟ ܡܲܦܢܝܵܢܵܐ ܕܛܵܥܲܝ̈ܵܐ
ܠܝܼܖܲܥܬܼܵܐ ܕܲܫܪܵܪܵܐ. ܫܘܼܒܼܚܵܐ ܠܵܟܼ ܡܵܪܝ ܕܲܩܪܵܝܬܵܢܝ
ܐܵܦ ܠܝܼ ܚܲܠܵܫܵܐ ܒܛܲܝܒܘܼܬܼܵܟܼ،
ܘܩܲܪܸܒܼܬܵܢܝ ܠܘܵܬܵܟܼ ܒܲܚܢܵܢܵܟ، ܘܣܲܡܬܵܢܝ ܐܲܝ̄ܟܼ
ܗܲܕܵܡܵܐ ܝܼܖܝܼܥܵܐ ܒܓܘܼܫܡܵܐ ܪܲܒܵܐ ܕܥܹܕܬܵܟܼ ܩܲܕܝܼܫܬܵܐ
ܩܵܬܼܘܿܠܝܼܩܝܼ،
ܕܐܹܩܲܪܸܒܼ ܩܖܵܡܲܝܟ ܕܸܒܼܚܬܼܵܐ ܗܵܖܹܐ ܚܲܝܬܼܵܐ ܘܩܲܕܝܼܫܬܵܐ
ܘܲܡܩܲܒܲܠܬܵܐ،
ܕܐܝܼܬܹܝܗ̇ ܕܘܼܟܼܪܵܢܵܐ ܕܚܲܫܹܗ ܘܲܕܡܲܘܬܹܗ ܘܕܲܩܒܼܘܼܪܬܹܗ
ܘܕܲܩܝܵܡܬܹܗ ܕܡܵܪܲܢ ܘܦܵܪܘܿܩܲܢ ܝܑܼܫܘܿܥ ܡܫܝܼܚܵܐ،
ܕܒܹܗ ܐܸܨܛܒܼܝܼܬ ܘܐܬܼܪܲܥܝܼܬ ܠܡܸܫܒܲܩ ܚܛܵܗܹܐ ܕܟܠܗܘܿܢ
ܒܢܲܝ̈ܢܵܫܵܐ.
ܘܐܸܢ ܐܝܼܬܼ ܐܲܦܸܣܩܘܿܦܵܐ ܐܵܘ ܟܵܗ̈ܢܹܐ ܐܵܡܲܪ ܠܘܵܬܼܗܘܿܢ:
ܒܲܪܸܟܼܡܵܪܝ، ܒܲܪܸܟܼܡܵܪܝ، ܒܲܪܸܟܼܡܵܪܝ.
ܘܲܠܘܵܬܼ ܟܠܗܘܿܢ ܕܲܒܡܲܖܒܚܵܐ
ܐܵܡܲ̇ܪ:
ܐܲܚܲܝ̈،
ܨܲܠܵܘ ܥܠܲܝ.
ܘܥܵܢܝܹܢ ܠܹܗ:
ܡܫܝܼܚܵܐ ܢܸܫܡܲܥ ܨܠܵܘ̈ܵܬܼܵܟܼ،
ܡܫܝܼܚܵܐ ܢܩܲܒܸܠ ܩܘܼܪܒܵܢܵܟܼ،
ܡܫܝܼܚܵܐ ܢܙܲܗܸܐ ܠܟܵܗܢܘܼܬܼܵܟܼ
(ܠܟܘܼܡܪܘܼܬܼܵܟܼ).
ܘܟܲܖ ܡܵܛܹܐ ܩܖܵܡ ܡܲܖܒܚܵܐ ܡܲܩܸܦ ܓܗܵܢܬܵܐ ܗܵܖܹܐ
ܢܝܼܚܵܐܝܼܬܼ. ܘܢܸܗܘܸܐ ܦܵܫܹܛ ܐܝܼܖܵܘ̈ܗܝ ܟܲܖ ܓܗܝܼܢ،
ܘܗܵܟܼܘܵܬܼ ܥܵܒܹܖ ܒܟܠܗܹܝܢ ܓܗ̈ܵܢܵܬܼܵܐ:
ܡܲܘܕܹܝܢܲܢ ܡܵܪܝ ܠܥܘܼܬܼܪܵܐ ܫܦܝܼܥܵܐ ܕܛܲܝ̈ܒܘܵܬܼܵܟܼ
ܕܲܠܘܵܬܲـܢ،
ܕܟܲܖ ܚܲܛܵܝܹ̈ܐ ܐܝܼܬܼܲܝܢ ܘܲܒܨܝܼܪܹ̈ܐ،
ܡܸܛܠ ܣܘܿܓܼܵܐܐ ܕܲܡܪܲܚܡܵܢܘܼܬܼܵܟܼ،
ܐܲܫܘܝܼܬܲܢ ܕܲܢܫܲܡܸܫ ܠܐ̄ܪ̈ܵܙܹܐ ܩܲܕܝܼ̈ܫܹܐ ܕܦܲܓܼܪܵܐ
ܘܲܕܡܵܐ ܕܲܡܫܝܼܚܵܟܼ،
ܟܲܖ ܫܵܐܠܝܼܢܲܢ ܥܘܼܖܪܵܢܵܐ ܕܡܸܢܵܟܼ ܠܚܘܼܝܵܠܵܐ
ܕܢܲܦ̮ܫ̈ܵܬܲܢ.
ܛܲܟܼܣܵܐ ܕܲܫܠܵܡܵܐ
ܘܡܵܐ ܕܣܵܠܹܩ ܟܵܗܢܵܐ ܠܡܲܖܒܚܵܐ: ܫܲܡܵܫܹ̈ܐ ܐܵܡܪܝܼܢ:
ܘܟܲܖ ܗܵܫܵܐ ܐܸܬܼܩܪܝܼܢܲܢ،
ܠܡܸܫܬܲܘܬܵܦܘܼ ܒܩܘܼܪܒܵܢܵܐ، ܢܸܬܸܠ ܫܠܵܡܵܐ ܠܲܚ̈ܖܵܖܹܐ،
ܐܲܝܟܼ ܦܘܼܩܕܵܢܹܗ ܕܲܡܫܝܼܚܵܐ، ܫܠܵܡܵܐ ܫܲܦܝܵܐ ܕܠܵܐ
ܢܸܟܼܠܵܐ، ܫܠܵܡܵܐ ܕܝܲܗ̄ܒܼ ܗ̄ܘܵܐ ܦܵܪܘܿܩܲܢ ܠܟܸܢܫܵܐ
ܒܪܝܼܟܼܵܐ ܕܬܲܠܡܝܼ̈ܖܹܐ.
ܘܡܲܩܸܦ ܟܵܗܢܵܐ:
ܕܲܒܚܘܼܒܵــܐ ܫܲܠܡܵܐ ܘܲܒܗܲܝܡܵܢܘܼܬܼܵــܐ
ܕܲܫܪܵܪܵــܐ
ܢܫܲܡܸܫ ܠܡܲܘܗܲܒܼܬܼܵܟܼ ܕܲܠܘܵܬܲـܢ.
ܘܥܵܢ̇ܝܹܢ:
ܐܵܡܹܝܢ. ܒܲܪܸܟܼܡܵܪܝ.
ܘܡܸܬܼܦܢܸܐ ܟܵܗܢܵܐ ܠܘܵܬܼ ܥܲܡܵܐ ܘܐܵܡܲ̇ܪ ܟܲܖ ܪܵܫܹ̇ܡ: (♰)
ܫܠܵܡܵܐ ܥܲܡܟܼܘܿܢ.
ܘܥܵܢܹ̇ܐ ܥܲܡܵܐ:
ܘܥܲܡܵܟܼ ܘܥܲܡ ܪܘܼܚܵܟܼ.
ܘܐܵܙܹ̇ܠ ܫܲܡܵܫܵܐ ܠܘܵܬܼ ܟܵܗܢܵܐ،
ܘܣܵܐܹ̇ܡ ܟܵܗܢܵܐ ܝܲܡܝܼܢܹܗ ܥܲܠ ܐ̄ܪ̈ܵܙܹܐ، ܘܗܵܝܕܹܝܢ
ܡܸܫܬܲܘܬܦܝܼܢ ܟܵܗܢܵܐ ܘܫܲܡܵܫܵܐ ܒܲܫܠܵܡܹܗ ܕܡܵܪܲـܢ ܟܲܖ
ܡܥܲܦܩܝܼܢ ܐܝܼܖܲܝ̈ܵܐ،
ܘܢܵܫܹ̇ܩ ܟܠܢܵܫ ܪܹܫ ܨܸܒ̈ܥܵܬܹܗ. ܘܐܵܡܲ̇ܪ ܫܲܡܵܫܵܐ ܠܘܵܬܼ
ܥܲܡܵܐ:
ܐܲܚܲܝ̈،
ܗܲܒܼܘ ܫܠܵܡܵܐ ܚܲܖ ܠܚܲܖ ܒܚܘܼܒܹܗ ܕܲܡܫܝܼܚܵܐ.
ܘܝܵܗܹ̇ܒ ܫܠܵܡܵܐ ܠܲܡܗܲܝ̈ܡܢܹܐ ܘܡܸܫܬܲܘܬܦܝܼܢ ܒܹܗ ܒܹܗ
ܒܲܙܢܵܐ. ܘܲܡܙܲܡܪܝܼܢ ܥܘܿܢܝܼܬܼܵـܐ ܘܝܵܬܹܒ ܥܲܡܵܐ:
ܢܸܫܩ̄ܠܘܼܢ ܛܘܼܪܹ̈ܐ ܫܠܵܡܵܐ ܠܥܲܡܵܟܼ:
ܫܠܵܡܵܐ ܘܫܲܝܢܵܐ ܢܸܣܓܸܐ ܠܥܲܡܵܟܼ ܫܲܝܢܹܗ ܕܥܵܠܡܵܐ.
ܡܫܝܼܚܵܐ ܕܐܸܬܼܵܐ ܠܦܘܼܪܩܵܢܲܢ. ܙܪܘܿܥ ܐܲܘܝܘܼܬܼܵܐ
ܒܲܒܼܢܹ̈ܝܗܿ ܕܥܹܕܬܵܐ ܕܢܸܗܘܘܿܢ ܙܵܡܪܝܼܢ ܥܲܡ ܥܝܼܪܹ̈ܐ
ܫܘܼܒܼܚܵܐ ܠܲܫܡܵܟܼ.
ܘܩܲܝܸܡ ܟܵܗ̈ܢܹܐ ܘܫܲܝܸܢ ܡܲܠܟܹ̈ܐ.
ܘܒܲܛܸܠ ܩܪ̈ܵܒܹܐ ܡܼܢ ܣܲܘ̈ܦܹܝܗܿ ܕܐܲܪܥܵܐ.
ܘܢܲܛܲܪ ܠܟܸܢܫܵܐ ܕܣܵܓܘܿܖܲܝ̈ܟ.
ܕܠܵܟܼܘܼ ܩܵܪܹܝܢ ܒܟܠܥܸܕܵܢ.
ܘܲܣܥܘܿܪ ܡܲܪ̈ܥܹܐ ܒܛܲܝܒܘܼܬܼܵܟܼ.
ܘܐܲܚܠܸܡ ܟܪ̈ܝܼܗܹܐ ܒܲܚܢܵܢܵܟܼ.
ܘܐܲܘܫܸܛ ܐܝܼܖܵܐ ܕܥܘܼܖܪ̈ܵܢܹܐ.
ܠܟܠܗܘܿܢ ܐܲܝܠܹܝܢ ܕܐܲܠܝܼܨܝܼܢ.
ܡܵܪܲܢ ܚܘܼܣܥܠܲܝܢ܀
ܕܝܘܿܦܲܛܟܼܝܼܢ
ܗܵܪܟܵܐ
ܡܬܼܦܢܸܐ ܫܲܡܵܫܵܐ ܠܘܵܬܼ ܥܲܡܵܐ ܘܩܵܪܹܐ ܕܝܘܿܦܲܛܟܼܝܼ̈ܢ
ܗܵܢܵܘ ܕܹܝܢ ܣܦܲܪ ܚܲܝܹ̈ܐ ܘܡܝܼ̈ܬܹܐ،
ܘܗܵܟܲܢܵܐ ܡܫܲܪܸܐ:
ܢܨܲܠܸܐ ܘܢܸܒܼܥܸܐ ܡܢ݂ ܐܲܠܵܗܵܐ ܡܵܪܹܟܠ ܚܠܵܦ ܟܠܹܗ ܝܲܠܕܵܐ
ܕܥܹܕܬܵܐ، ܦܪܝܼܫܵܐܝܼܬܼ ܚܠܵܦ
ܦܠܵܢ ܘܲܦܠܵܢ
ܘܲܡܫܲܡܲܗ ܠܬܹܐܪ̈ܵܬܼܵܐ ܦܪ̈ܝܼܫܵܬܵܐ ܕܚܠܵܦܲܝܗܹܝܢ
ܡܬܼܩܲܪܲܒܼ ܩܘܼܪܒܵܢܵܐ.
ܘܚ̇ܵܬܹܡ:
ܚܠܵܦ ܟܠܗܘܿܢ ܘܚܠܵܦ ܟܠܲܢ ܢܬܼܩܲܒܲܠ ܩܘܼܪܒܵܢܵܐ ܗܵܢܵܐ
ܠܥܵܠܡܝܼܢ.
ܥܘܼܬܵܖܵܐ ܠܩܘܼܕܵܫܵܐ
ܘܬܵܢܹ̇ܐ ܟܵܗܢܵـܐ ܢܝܼܚܵܐܝܼܬܼ ܟܘܼܫܵܦܵܐ ܗܵܢܵܐ ܕܡܵܪܝ
ܢܲܪܣܲܝ:
ܡܵܪܝܵــܐ ܐܲܠܵܗܵܐ ܚܲܝܠܬܼܵܢܵــܐ، ܣܲܝܲܥܹܝܗܿ
ܠܲܡܚܝܼܠܘܼܬܼܝ ܒܲܡܪܲܚܡܵܢܘܼܬܼܵܟܼ،
ܘܒܲܡܥܲܕܪܵܢܘܼܬܼܵܐ ܕܛܲܝܒܘܼܬܼܵܟܼ ܐܲܫܘܵܢܝ ܕܐܹܩܲܪܸܒܼ
ܩܖܵܡܲܝܟ ܕܸܒܼܚܬܼܵܐ ܗܵܖܹܐ ܚܲܝܬܼܵܐ ܘܩܲܕܝܼܫܬܵܐ، ܐܲܝܟܼ
ܕܲܠܥܘܼܖܪܵܢܵܐ ܕܟܠܹܗ ܓܵܘܵܐ،
ܘܲܠܬܸܫܒܘܿܚܬܵܐ ܕܲܬܠܝܼܬܼܵܝܘܼܬܼܵܟܼ ܡܫܲܒܲܚܬܵܐ: ܐܲܒܵܐ
ܘܲܒܪܵܐ ܘܪܘܼܚܵܐ ܕܩܘܼܖܫܵܐ. ܐܵܡܹܝܢ.
ܗܵܫܵܐ ܡܪܝܼܡ ܟܵܗܢܵܐ ܠܫܘܿܫܸܦܵܐ ܙܗܝܼܪܵܐܝܼܬܼ ܡܼܢ
ܐ̄ܪܵܙܹܐ. ܘܡܲܟܪܸܟܼ ܠܹܗ ܚܖܵܪܲܝ ܟܵܣܵܐ ܘܦܝܼܠܵܣܵܐ.
ܘܟܸܢ ܡܩܲܪܸܒܼ
ܩܘܕܫܐ ܕܫܠܝ̈ܚܐ ܛܘܒܢ̈ܐ
ܕܲܥܒܼܝܼܖ ܠܡܵܪܝ ܐܲܕܲܝ ܘܡܵܪܝ ܡܵܐܪܝܼ
ܡܬܲܠܡܖܵܢܹ̈ܐ ܕܡܲܖܢܚܵܐ
ܘܲܡܩܝܼܡ ܫܲܡܵܫܵܐ:
ܫܠܵܡܵܐ ܥܲܡܲܢ.
ܘܐܵܡܲ̇ܪ ܟܵܗܢܵܐ ܟܲܖ ܡܸܬܼܦܢܸܐ ܠܘܵܬܼ ܥܲܡܵܐ:
ܛܲܝܒܘܼܬܹܗ ܕܡܵܪܲـܢ ܝܑܼܫܘܿܥ ܡܫܝܼܚܵܐ،
ܘܚܘܼܒܹܗ ܕܐܲܠܵܗܵܐ ܐܲܒܵܐ،
ܘܫܲܘܬܵܦܘܼܬܼܵܐ ܕܪܘܼܚܵܐ ܕܩܘܼܖܫܵܐ ܬܸܗܘܸܐ ܥܲܡ ܟܠܲܢ،
ܗܵܫܵܐ ܘܲܒܟܠܙܒܲܢ ܘܲܠܥܵܠܲܡ ܥܵܠܡܝܼܢ.
ܥܲܡܵܐ:
ܐܵܡܹܝܢ.
ܟܵܗܢܵܐ ܟܲܖ ܡܪܝܼܡ ܐܝܼܖܵܘ̈ܗܝ:
ܠܥܸܠ ܢܸܗܘܘܿܢ ܡܲܕܥܲܝ̈ܟܘܿܢ.
ܘܡܸܬܼܦܢܸܐ ܟܵܗܢܵܐ ܠܘܵܬܼ ܡܲܖܒܚܵܐ.
ܥܲܡܵܐ:
ܠܘܵܬܼܵܟܼ ܐܲܠܵܗܹܗ ܕܐܲܒܼܪܵܗܵܡ ܘܕܐܝܼܣܚܵܩ ܘܕܝܼܣܪܵܝܹܠ
ܡܲܠܟܵܐ ܡܫܲܒܚܵܐ.
ܟܵܗܢܵܐ ܪܵܡܹܙ ܠܐ̄ܪܵܙܹܐ ܘܲܡܪܝܼܡ ܐܝܼܖܵܘ̈ܗܝ:
ܩܘܼܪܒܵܢܵܐ ܠܐܲܠܵܗܵܐ ܡܵܪܹܟܠ ܡܸܬܼܩܲܪܲܒܼ.
(♰) ܘܪܵܫܹܡ ܥܲܠ ܐ̄ܪ̈ܵܙܹܐ.
ܘܥܵܢܹ̇ܐ ܥܲܡܵܐ:
ܝܵـܐܹ̇ܐ ܘܙܵܕܹ̇ܩ.
ܟܘܼܫܵܦܵܐ
ܘܲܡܨܲܠܸܐ ܟܵܗܢܵܐ ܠܸܒܵܢܵܐܝܼܬܼ ܟܲܖ ܦܫܝܼܛܵܢ ܐܝܼܖܵܘܼ̈ܗܝ
ܠܥܸܠ:
ܡܵܪܝܵܐ ܡܵܪܝܵܐ، ܗܲܒܼܠܲܢ ܓܲܠܝܘܼܬܼ ܐܲܦܹ̈ܐ ܩܖܵܡܲܝܟ،
ܕܲܒܦܵܪܹܗ̄ܣܝܼܵܐ ܕܡܸܢܵܟܼ ܢܸܓܡܪܝܼܗ̇ ܠܬܸܫܡܸܫܬܵـܐ
ܗܵܖܹܐ ܚܲܝܬܼܵـܐ
ܘܩܲܕܝܼܫܬܵـܐ،
ܟܲܖ ܕܲܟܼܝܵـ̈ܢ ܬܹܐܪ̈ܵܬܲــܢ ܡܢ݂ ܟܠܵܗ̇ ܒܝܼܫܘܼܬܼܵܐ
ܘܡܲܪܝܼܪܘܼܬܼܵܐ، ܘܲܙܪܘܿܥ ܒܲܢ ܚܘܼܒܵܐ ܘܫܲܝܢܵܐ
ܘܐܲܘܝܘܼܬܼܵܐ ܕܠܘܵܬܼ ܚܖܵܖܹ̈ܐ ܘܕܲܠܘܵܬܼ ܟܠܢܵܫ܀
ܓܗܵܢܬܵـܐ
ܘܐܵܡܲ̇ܪ ܟܵܗܢܵܐ ܒܩܵܠܵܐ ܫܡܝܼܥܵܐ:
ܫܘܼܒܼܚܵܐ ܠܵܟܼ ܫܡܵܐ ܣܓܝܼܖܵܐ ܘܲܡܫܲܒܚܵܐ
ܕܲܬܠܝܼܬܼܵܝܘܼܬܼܵܐ ܡܫܲܒܲܚܬܵܐ،
ܐܲܒܵܐ ܘܲܒܪܵܐ ܘܪܘܼܚܵܐ ܕܩܘܼܖܫܵܐ، ܕܲܒܪܵܐ ܥܵܠܡܵܐ
ܒܛܲܝܒܘܼܬܹܗ ܘܥܵܡܘܿܪ̈ܵܘܗܝ ܒܲܡܪܲܚܡܵܢܘܼܬܹܗ، ܘܲܦܪܲܩ
ܒܢܲܝ̈ܢܵܫܵܐ ܒܲܚܢܵܢܹܗ، ܘܲܥ̣ܒܲܖ ܛܲܝܒܘܼܬܼܵܐ ܪܲܒܬܼܵܐ
ܠܘܵܬܼ ܡܵܝ̈ܘܿܬܹܐ.
ܠܪܲܒܘܼܬܼܵܟܼ ܡܵܪܝ ܒܵܪܟܝܼܢ ܘܣܵܓܼܕܝܼܢ ܐܵܠܹܦ
ܐܵܠܦܝܼ̈ܢ ܕܥܸܠܵܝܹ̈ܐ ܘܪܸܒܘܼ ܪܸ̈ܒܘܵܢ ܕܡܲܠܲܐܟܹ̈ܐ
ܩܲܕܝܼ̈ܫܹܐ، ܘܡܲܫܪ̈ܝܵܬܼܵܐ ܕܪ̈ܘܼܚܵܢܹܐ ܡܫܲܡܫܵܢܹ̈ܐ
ܕܢܘܼܪܵܐ ܘܲܕܪܘܼܚܵܐ ܠܲܫܡܵܟܼ ܡܫܲܒܚܝܼܢ. ܘܥܲܡ ܟܪ̈ܘܿܒܹܐ
ܩܲܕܝܼ̈ܫܹܐ ܘܲܣܪ̈ܵܦܹܐ ܪ̈ܘܼܚܵܢܹܐ ܣܸܓܼܕܬܼܵܐ ܠܡܵܪܘܼܬܼܵܟܼ
ܡܩܲܪܒܼܝܼܢ.
ܘܐܵܦ ܚܢܲܢ ܡܵܪܝ ܐܲܫܘܵܐ ܠܲܢ ܕܥܲܡ ܗܵܠܹܝܢ
ܚܲܝܠܵܘ̈ܬܼܵܐ ܫܡܲܝ̈ܵܢܹܐ ܢܸܫܬܲܘܬܲܦ، ܟܲܖ ܩܵܥܹܝ̇ܢ
ܘܲܡܫܲܒܚܝܼܢ ܕܠܵܐ ܫܲܠܘܵܐ ܘܩܵܪܹܝ̇ܢ ܗܵܢܵܐ ܠܗܵܢܵܐ
ܘܐܵܡܪܝܼܢ؛
ܩܵܢܘܿܢܵܐ
ܘܥܵܢܹ̇ܐ ܥܲܡܵܐ:
ܩܲܕܝܼܫ ܩܲܕܝܼܫ ܩܲܕܝܼܫ ܡܵܪܝܵܐ ܐܲܠܵܗܵܐ ܚܲܝܸܠܬܼܵܢܵܐ،
ܕܲܡܠܹܝܢ ܫܡܲܝܵܐ ܘܐܲܪܥܵܐ ܡܢ݂ ܬܸܫ̈ܒܚܵܬܹܗ.
ܐܘܿܫܲܥܢܵܐ ܒܲܡܪ̈ܲܘܡܹܐ. ܐܘܿܫܲܥܢܵܐ ܠܲܒܪܹܗ ܕܖܵܘܝܼܖ.
ܒܪܝܼܟܼ ܕܐܸܬ݂ܼܵܐ ܘܐܵܬܹܐ ܒܲܫܡܹܗ ܕܡܵܪܝܵܐ. ܐܘܿܫܲܥܢܵܐ
ܒܲܡܪ̈ܲܘܡܹܐ.
ܒܫܵܒܼܘܿܥܵܐ ܕܹܝܢ ܕܨܲܘܡܵܐ ܚܠܵܦ ܐܘܿܫܲܥܢܵܐ ܐܵܡ̇ܪܝܼܢ:
ܘܡܢ݂ ܟܝܵܢ ܐܝܼܬܼܘܼܬܹܗ ܘܡܢ݂ ܗܸܖܪܵܐ ܕܙܝܼܘܹܗ ܡܫܲܒܚܵܐ܀
ܟܘܼܫܵܦܵܐ
ܘܲܡܨܲܠܸܐ ܟܵܗܢܵܐ ܠܸܒܵܢܵܐܝܼܬܼ:
ܩܲܕܝܼܫܲܬ ܐܲܠܵܗܵܐ ܐܲܒܵܐ ܕܲܫܪܵܪܵܐ ܗܵܘ̇ ܕܡܸܢܹܗ
ܡܸܫܬܲܡܗܵܐ ܟܠ ܐܲܒܼܵܗܘܼܬܼܵܐ ܕܒܲܫܡܲܝܵܐ ܘܒܲܐܪܥܵܐ،
ܩܲܕܝܼܫܲܬ ܒܪܵܐ ܡܬܼܘܿܡܵܝܵܐ ܕܟܠ ܒܐܝܼܖܹܗ ܗܘ݂ܵܐ،
ܩܲܕܝܼܫܲܬ ܪܘܼܚܵܐ ܕܩܘܼܖܫܵܐ ܐܝܼܬܼܝܵܐ ܕܟܠ ܒܐܝܼܖܹܗ
ܡܸܬܼܩܲܕܲܫ.
ܘܥܲܡ ܟܠ ܩܲܕܝܼܫܲܬ ܥܵܒܹ̇ܖ ܟܵܗܢܵܐ ܡܵܛܘܿܢܝܵܐ ܩܖܵܡ
ܡܲܖܒܚܵܐ.
ܘܵܝܠܝܼ ܘܵܝܠܝܼ ܕܬܲܘܝܼܪ ܐ̄ܢܵܐ، ܡܸܛܠ ܕܓܲܒܼܪܵܐ ܐ̄ܢܵܐ
ܛܡܲܐ ܣܸܦ̈ܘܵܬܼܵܐ ܘܒܲܝܢܲܬܼ ܥܲܡܵܐ ܕܛܲܡ̈ܐܵܢ ܣܸܦ̈ܘܵܬܹܗ
ܥܵܡܲ̇ܪ ܐ̄ܢܵܐ ܘܲܠܡܲܠܟܵܐ ܡܵܪܝܵܐ ܚܲܝܠܬܼܵܢܵܐ ܚܙܲܝ
ܥܲܝܢܲܝ̈. ܡܵܐ ܕܚܝܼܠ ܗ̄ܘ݂ ܐܲܬܼܪܵܐ ܗܵܢܵܐ ܕܝܲܘܡܵܢܵܐ ܥܹܝܢ
ܒܥܹܝܢ ܚܙܹܝܬܼ ܠܡܵܪܝܵܐ. ܘܠܲܝܬܵܘܗܝ ܗܵܢܵܐ ܐܸܠܵܐ ܐܸܢ
ܒܲܝܬܹܗ ܕܐܲܠܵܗܵܐ. ܘܗܵܢܵܘ ܬܲܪܥܹܗ ܕܲܫܡܲܝܵܐ.
ܘܗܵܫܵܐ ܬܸܗܘܸܐ ܛܲܝܒܘܼܬܼܵܟܼ ܥܠܲܝܢ ܡܵܪܝܵܐ، ܘܕܲܟܵܐ
ܛܲܡܐܘܼܬܲـܢ،
ܘܩܲܕܸܫ ܣܸܦ̈ܘܵܬܲـܢ،
ܘܚܲܠܸܛ ܡܵܪܝ ܩ̈ܵܠܹܐ ܕܲܒܨܝܼܪܘܼܬܲـܢ ܒܩܘܼܕܵܫܵܐ ܕܲܣܪ̈ܵܦܹܐ
ܘܗܘܼ̈ܠܵܠܹܐ ܕܡܲܠܲܐܟܹ̈ܐ. ܫܘܼܒܼܚܵܐ ܠܪ̈ܲܚܡܲܝܟ
ܕܲܠܥܲܦܪ̈ܵܢܹܐ ܫܲܘܬܸܦܬ ܐܸܢܘܿܢ ܥܲܡ ܪ̈ܘܼܚܵܢܹܐ܀
ܓܗܵܢܬܵـܐ
ܘܡܲܩܸܦ ܟܵܗܢܵܐ ܒܩܵܠܵܐ ܫܡܝܼܥܵܐ:
ܡܲܘܕܹܝܢܲܢ ܠܵܟܼ ܡܵܪܝ، ܚܢܲܢ ܥܲܒܼܕܲܝ̈ܟ ܒܨܝܼܪܹ̈ܐ
ܘܚܲܠܵܫܹ̈ܐ ܘܕܵܘܲܝܵـ̈ܐ، ܕܲܥܒܲܖܬ ܒܲܢ ܛܲܝܒܘܼܬܼܵܐ ܪܲܒܬܵܐ
ܕܠܵܐ ܡܸܬܼܦܲܪܥܵܐ،
ܒܕܲܠܒܸܫܬ ܐ̄ܢܵܫܘܼܬܲـܢ ܕܬܲܚܹܝܢ ܒܐܲܠܵܗܘܼܬܼܵܟܼ،
ܘܪܲܡܪܸܡܬ ܫܸܦܠܲܢ، ܘܐܲܩܝܼܡܬ ܡܲܦܘܼܠܬܲـܢ،
ܘܢܲܚܸܡܬ ܡܝܼܬܼܘܼܬܲـܢ،
ܘܲܫܒܲܩܬ ܚܲܘ̈ܒܵܬܲـܢ،
ܘܙܲܕܸܩܬ ܠܚܲܛܵܝܘܼܬܲـܢ،
ܘܐܲܢܗܲܪܬ ܠܝܼܖܲܥܬܲـܢ،
ܘܚܲܝܸܒܼܬ ܡܵܪܲـܢ ܘܐܲܠܵܗܲـܢ ܠܲܒܥܸܠܕܒܵܒܲܝ̈ܢ، ܘܢܲܨܲܚܬ
ܠܲܒܨܝܼܪܘܼܬܹܗ ܕܲܟܝܵܢܲܢ ܚܲܠܵܫܵܐ ܒܪ̈ܲܚܡܹܐ ܫܦܝܼ̈ܥܹܐ
ܕܛܲܝܒܘܼܬܼܵܟܼ܀
ܩܵܢܘܿܢܵܐ
ܘܥܲܠ ܐܲܦܲܝ̈ ܟܠܗܘܿܢ ܥܘܼܖܪ̈ܵܢܲܝܟ ܘܛܲܝ̈ܒܘܵܬܼܵܟܼ
ܕܲܠܘܵܬܲـܢ ܢܲܣܸܩ ܠܵܟܼ ܬܸܫܒܘܿܚܬܵـܐ
ܘܐܝܼܩܵܪܵܐ ܘܬܲܘܕܝܼܬܼܵـܐ
ܘܣܸܓܼܕܬܼܵܐ، ܗܵܫܵܐ ܘܲܒܟܠܙܒܲܢ ܘܲܠܥܵܠܲܡ ܥܵܠܡܝܼܢ.
(♰)
ܘܪܵܫܹܡ ܥܲܠ ܐ̄ܪ̈ܵܙܹܐ.
ܥܲܡܵܐ:
ܐܵܡܹܝܢ.
ܫܲܡܵܫܵܐ:
ܒܡܲܕܥܲܝ̈ܟܘܿܢ ܨܲܠܵܘ. ܫܠܵܡܵܐ ܥܲܡܲܢ.
ܟܘܼܫܵܦܵܐ
ܘܲܡܨܲܠܸܐ ܟܵܗܢܵܐ ܒܩܵܠܵܐ ܫܡܝܼܥܵܐ ܟܲܖ
ܦܫܝܼܛܵܢ ܐܝܼܖܵܘ̈ܗܝ ܠܥܸܠ:
ܡܵܪܝܵܐ ܐܲܠܵܗܵܐ ܚܲܝܠܬܼܵܢܵܐ ܩܲܒܸܠܲܝܗܝ ܠܩܘܼܪܒܵܢܵܐ ܗܵܢܵܐ
ܥܲܠ ܐܲܦܲܝ̈ ܟܠܵܗ̇ ܥܹܕܬܵܐ ܩܲܕܝܼܫܬܵܐ ܩܵܬܼܘܿܠܝܼܩܝܼ،
ܥܲܠ ܐܲܦܲܝ̈ ܟܠܗܹܝܢ ܛܲܝ̈ܒܘܵܬܼܵܟ ܕܲܠܘܵܬܼ ܒܬܼܘܼܠܲܬܼ
ܥܵܠܡܝܼܢ ܡܵܪܬܝ ܡܲܪܝܲܡ ܛܘܼܒܼܵܢܝܼܬܼܵـܐ
ܘܲܡܟܼܝܼܪܵܗ̇ ܡܵܪܝ ܝܵܘܣܸܦ ܟܹܐܢܵܐ،
ܘܕܲܠܘܵܬܼ ܟܠܗܘܿܢ ܐܲܒܼ̈ܗܵܬܼܵܐ ܟܹܐܢܹ̈ܐ ܘܙܲܕܝܼܩܹ̈ܐ
ܕܲܫ̣ܦܲܪܘ ܩܖܵܡܲܝܟ، ܘܕܲܠܘܵܬܼ ܟܠܗܘܿܢ ܫܠܝܼܚܹ̈ܐ ܘܲܢܒܼܝܹ̈ܐ،
ܘܕܲܠܘܵܬܼ ܟܠܗܘܿܢ ܣܵܗ̈ܕܹܐ ܘܡܵܘܕܝܵܢܹ̈ܐ، ܘܲܚܠܵܦ
ܐܲܒܼܵܗܲܝ̈ܢ ܩܲܕܝܼܫܹ̈ܐ ܡܵܪܝ
ܦܠܵܢ
ܦܵܦܵܐ ܕܪܗ̄ܘܿܡܹܐ، ܘܡܵܪܝ
ܦܠܵܢ
ܩܵܬܼܘܿܠܝܼܩܵܐ ܦܵܛܪܝܼܵܪܟܐ،
ܘܡܵܪܝ
ܦܠܵܢ
ܐܲܦܣܩܘܿܦܵܐ
(ܡܝܼܛܪܵܦܘܿܠܝܹܛܵܐ)،
ܘܲܚܠܵܦ ܟܠܗܘܿܢ ܐܲܦܸܣ̈ـܩܘܿܦܹܐ ܘܩܲܫܝܼ̈ܫܹܐ ܘܲܡܫܲܡܫܵܢܹ̈ܐ،
ܘܫܲܪܟܵܐ ܕܬܸܓܡܹ̈ܐ ܕܲܒܢܲܝ̈ ܥܹܕܬܵܐ، ܘܲܚܠܵܦ ܟܠܗܘܿܢ
ܐܲܒܝܼ̈ܠܹܐ ܘܲܡܥܵܩܹ̈ܐ، ܘܲܚܠܵܦ ܟܠܗܘܿܢ ܣܢܝܼ̈ܩܹܐ
ܘܲܡܛܲܪ̈ܦܹܐ. ܘܲܚܠܵܦ ܟܠܗܘܿܢ ܟܪ̈ܝܼܗܹܐ ܘܐܲܠܝܼܨܹ̈ܐ،
ܘܲܚܠܵܦ ܟܠܗܘܿܢ ܥܲܢܝܼ̈ܖܹܐ ܕܲܦܪܲܫܘ݂ ܘܫܲܢܝܼܘ ܡܢ݂
ܒܲܝܢܵܬܲـܢ. ܘܲܚܠܵܦ ܥܲܡܵܐ ܗܵܢܵܐ ܕܚ̇ܵܐܲܪ ܘܲܡܣܲܟܸܐ
ܠܪ̈ܲܚܡܲܝܟ، ܘܲܚܠܵܦ ܚܲܠܵܫܘܼܬܼܝ ܘܕܲܘܝܘܼܬܼܝ ܘܡܸܣܟܹܢܘܼܬܼܝ܀
ܐܵܘ ܗܵܢܵܐ ܟܘܼܫܵܦܵܐ،
ܒܩܵܠܵܐ ܫܡܝܼܥܵܐ:
ܐܹܝܢ ܡܵܪܲـܢ ܘܐܲܠܵܗܲـܢ،
ܢܸܬܼܩܲܒܲܠ ܩܘܼܪܒܵܢܵܐ ܗܵܢܵܐ ܚܠܵܦ ܟܠܵܗ̇ ܥܹܕܬܵܐ
ܩܲܕܝܼܫܬܵܐ ܩܵܬܼܘܿܠܝܼܩܝܼ، ܕܬܸܬܼܩܲܝܲܡ ܘܬܸܬܼܢܲܛܲܪ ܕܠܵܐ
ܙܘܼܥܙܵܥܵܐ،
ܘܲܚܠܵܦ ܐܲܒܼܵܗܲܝ̈ܢ ܩܲܕܝܼܫܹ̈ܐ ܡܵܪܝ
ܦܠܵܢ
ܦܵܦܵܐ ܕܪܗ̄ܘܿܡܹܐ،
ܘܡܵܪܝ
ܦܠܵܢ
ܩܵܬܼܘܿܠܝܼܩܵܐ ܦܵܛܪܝܼܵܪܟܝܼܣ،
ܘܡܵܪܝ
ܦܠܵܢ
ܐܲܦܣܩܘܿܦܵܐ
(ܡܝܼܛܪܵܦܘܿܠܝܹܛܵܐ)،
ܘܲܚܠܵܦ ܟܵܗܢܹ̈ܐ ܘܡܸܫܬܲܐܠܵܢܹ̈ܐ،
ܕܢܸܬܼܩܲܝܡܘܼܢ ܒܫܲܝܢܵܐ ܕܥܹܕܵܬܼ̈ܐ ܘܒܲܫܠܵܡܵܐ
ܕܦܸܢܝܵـ̈ܬܼܵܐ،
ܘܲܚܠܵܦ ܡܸܣܟܹܢܹ̈ܐ ܘܲܣܢܝܼ̈ܩܹܐ ܘܲܡܛܲܪ̈ܦܹܐ، ܘܲܚܠܵܦ
ܐܲܒܼܝܼ̈ܠܹܐ ܘܲܡܥܵܩܹ̈ܐ ܘܲܡܢܲܘ̈ܠܹܐ،
ܘܲܚܠܵܦ ܟܠܗܘܿܢ ܐܲܝܠܹܝܢ ܕܲܩܖܵܡ ܡܲܖܒܚܵܟܼ
ܩܲܕܝܼܫܵܐ ܩܵܝ̇ܡܝܼܢ، ܘܲܨܠܘܿܬܼܵܐ ܒܐܝܼܖܲܝ̈
ܚܲܛܵܝܘܼܬܼܝ
ܫܵܐ̇ܠܝܼܢ، ܦܲܢܵܐ ܫܹܐܠܲܬܼܗܘܿܢ ܘܚܲܣܵܐ ܚܲܘܒܲܝ̈ܗܘܿܢ
ܘܲܥܛܝܼ ܚܛܵܗܲܝ̈ܗܘܿܢ،
ܘܲܚܠܵܦ ܐܲܬܼܪܵܐ ܗܵܢܵܐ ܘܥܵܡܘܿܪ̈ܵܘܗܝ،
ܘܲܚܠܵܦ ܡܖܝܼܢ̄ܬܵܐ
(ܐܵܘ ܩܪܝܼܬܼܵـܐ)
ܗܵܖܹܐ ܘܝܲܬܵܒܹܝ̈ܗ̇؛
ܐܲܟܼܪܸܟܹܝܗ̇ ܡܵܪܝ ܫܘܼܪܵܐ ܚܲܣܝܼܢܵܐ،
ܘܐܲܥܒܲܪ ܡܸܢܵܗ̇ ܒܛܲܝܒܘܼܬܼܵܟܼ ܟܠܗܹܝܢ ܡܲܚܘ̈ܵܬܼܵܐ،
ܘܠܵܐ ܢܸܫܬܲܠܲܛ ܒܲܢ ܒܵܙܘܿܙܵܐ ܘܠܵܐ ܢܸܚܕܸܐ ܠܲܢ ܣܲܢܐܵܐ.
ܘܲܚܠܵܦ
ܦܠܵܢ ܘܲܦܠܵܢ
ܘܫܲܡܵܫܵܐ ܐܵܡܲ̇ܪ:
ܒܫܸܠܝܵܐ ܘܲܒܕܸܚܠܬܼܵـܐ
ܗܘܲܝܬܘܿܢ ܩܵܝ̇ܡܝܼܢ ܘܲܡܨܲܠܹܝܢ.
ܘܩܵܐܹܡ ܥܲܡܵܐ.
ܓܗܵܢܬܵـܐ
ܐܲܢ̄ܬ ܡܵܪܝ ܒܪ̈ܲܚܡܲܝܟ ܣܲܓܝܼ̈ܐܹܐ ܕܠܵܐ ܡܸܬܼܡܲܠܠܝܼܢ،
ܥܒܸܖ ܒܥܘܼܗܕܵܢܹܗ ܕܲܡܫܝܼܚܵܟܼ ܕܘܼܟܼܪܵܢܵܐ ܛܵܒܼܵܐ ܠܟܠܗܘܿܢ
ܐܲܒܼܵـ̈ܗܵܬܼܵܐ ܟܹܐܢܹ̈ܐ ܘܙܲܕܝܼܩܹ̈ܐ ܕܲܫܦܲܪܘ ܩܖܵܡܲܝܟ،
ܘܲܫܠܝܼܚܹ̈ܐ ܘܲܢܒܼܝܹ̈ܐ ܘܡܲܠܦܵܢܹ̈ܐ،
ܘܣܵܗܕܹ̈ܐ ܘܡܲܘܕܝܵܢܹ̈ܐ، ܘܐܲܦܸܣܩ̈ܘܿܦܹܐ
ܘܩܲܫܝܼܫܹ̈ܐ ܘܲܡܫܲܡܫܵܢܹ̈ܐ، ܘܟܠܗܘܿܢ ܒܢܹܝ̈ܗ̇ ܕܥܹܕܬܵܐ
ܩܲܕܝܼܫܬܵܐ ܩܵܬܼܘܿܠܝܼܩܝܼ، ܐܲܝܠܹܝܢ ܕܐܸܬܼܪܫܸܡܘ
(♰)
ܒܪܘܼܫܡܵܐ ܚܲܝܵܐ ܕܡܲܥܡܘܿܕܝܼܬܼܵـܐ
ܩܲܕܝܼܫܬܵܐ܀
ܘܥܵܒܹܖ ܪܘܼܫܡܵܐ ܕܲܨܠܝܼܒܵܐ ܥܲܠ ܬܪܘܿܢܘܿܣ.
ܐܹܝܢ ܡܵܪܲܢ ܘܐܲܠܵܗܲܢ ܥܒܸܖ ܥܲܡܲܢ ܫܲܝܢܵܟܼ ܘܲܫܠܵܡܵܟܼ
ܟܠܗܘܿܢ ܝܲܘ̈ܡܵܬܹܗ ܕܥܵܠܡܵܐ، ܕܢܸܕܥܘܼܢܵܟܼ ܟܠܗܘܿܢ
ܥܵܡܘܿܪܹ̈ܝܗ̇ ܕܐܲܪܥܵܐ ܕܐܲܢ̄ܬ ܐܲܢ̄ܬ ܐܲܠܵܗܵܐ ܐܲܒܵܐ
ܕܲܫܪܵܪܵܐ ܒܲܠܚܘܿܖܲܝܟ، ܘܐܲܢ̄ܬ ܫܲܕܲܪܬ ܠܡܵܪܲܢ ܝܑܼܫܘܿܥ
ܡܫܝܼܚܵܐ ܒܪܵܟܼ ܘܚܲܒܝܼܒܼܵܟܼ، ܘܗܘ̤ ܡܵܪܲـܢ ܘܐܲܠܵܗܲܢ
ܐܲܠܦܲܢ ܒܲܣܒܲܪܬܹܗ ܡܲܚܝܵܢܝܼܬܼܵـܐ
ܟܠܵܗ̇ ܕܲܟܼܝܘܼܬܼܵـܐ
ܘܩܲܕܝܼܫܘܼܬܼܵܐ.
ܗܵܪܟܵܐ ܟܵܗܢܵܐ ܟܲܖ ܣܵܐܹܿܡ ܒܘܼܪܟܵܐ ܐܵܡܲܪ.
ܘܐܵܦ
ܚܢܲܢ ܡܵܪܝ
ܥܲܒܼܕܲܝ̈ܟ ܒܨܝܼܪܹ̈ܐ ܘܚܲܠܵܫܹ̈ܐ ܘܕܼܵܘܲܝܵـ̈ܐ،
ܕܲܟܢܝܼܫܝܼܢܲܢ ܒܲܫܡܹܗ،
ܘܩܵܝ̇ܡܝܼܢܲܢ ܩܖܵܡܲܝܟ ܒܥܸܕܵܢܵܐ ܗܵܢܵܐ
(ܗܵܪܟܵܐ ܩܵܐܹ̇ܡ)،
ܘܩܲܒܸܠܢܲܢ
ܒܝܘܼܒܵܠܵܐ ܛܘܼܦ̮ܣܵܐ ܕܡܸܢܹܗ، ܟܲܖ ܚܵܖܹܝܢܲܢ ܘܲܡܫܲܒܚܝܼܢܲܢ
ܘܲܡܪܲܡܪܡܝܼܢܲܢ ܘܲܡܗܲܠܠܝܼܢܲܢ،
ܡܥܲܗܕܝܼܢܲܢ ܘܥܵܒܼ̇ܕܝܼܢܲܢ ܠܹܗ ܠܐ̄ܪ̈ܵܙܵܐ ܗܵܢܵܐ ܪܲܒܵܐ
ܘܲܕܚܝܼܠܵܐ ܘܩܲܕܝܼܫܵܐ ܘܡܲܚܝܵܢܵܐ ܘܐܲܠܵܗܵܝܵܐ ܕܚܲܫܹܗ
ܘܲܕܡܲܘܬܹܗ ܘܕܲܩܒܼܘܼܪܬܹܗ ܘܕܲܩܝܵܡܬܹܗ ܕܡܵܪܲـܢ ܘܦܵܪܘܿܩܲܢ
ܝܑܼܫܘܿܥ ܡܫܝܼܚܵܐ ܐܲܟܼܡܵܐ ܕܗܘ̤ ܐܲܠܸܦ ܠܲܢ:
ܟܲܖ ܓܹܝܪ ܡܛܵܐ ܙܲܒܼܢܵܐ ܗܵܘ ܕܒܹܗ ܥܬܼܝܼܖ ܗ̄ܘܵܐ ܕܢܸܚܲܫ
ܘܲܕܢܸܩܪܘܿܒܼ ܠܡܲܘܬܵܐ، ܒܗܵܘ ܠܸܠܝܵܐ ܕܡܸܫܬܠܸܡ ܗ̄ܘ݂ܵܐ،
ܢܣܲܒܼ ܠܲܚܡܵܐ ܒܐܝܼܖܵܘ̈ܗܝ ܩܲܕܝܼ̈ܫܵܬܼܵܐ
(ܢܵܣܹܒܼ ܒܘܼܟܼܪܵܐ ܒܐܝܼܖܵܘ̈ܗܝ)،
ܘܐܲܪܝܼܡ ܥܲܝܢܵܘ̈ܗܝ ܠܘܵܬܼܵܟܼ ܐܲܠܵܗܵܐ ܐܲܒܘܼܗܝ ܐܲܚܝܼܖ ܟܠ
ܘܐܲܘܕܝܼ ܠܵܟܼ،
ܘܒܲܪܸܟܼ،
ܘܲܩܨ݂ܵܐ، ܘܝܲܗ̄ܒܼ ܠܬܲܠܡܝܼܖܵܘ̈ܗܝ ܟܲܖ ܐܵܡܲ̇ܪ: ܣܲܒܼܘ
ܐܲܟܼܘܿܠܘ ܡܸܢܹܗ ܟܠܟܼܘܿܢ:
ܗܵܢܵܐ ܗ̄ܘܼ ܦܲܓܼܪܝ ܕܥܲܠ ܐܲܦܲܝ̈ܟܘܿܢ ܡܸܬܼܩܨܸܐ
ܠܫܘܼܒܼܩܵܢܵܐ ܕܲܚܛܵܗܹ̈ܐ܀
ܘܥܵܢܹܝ̇ܢ:
ܐܵܡܹܝܢ.
ܗܵܟܲܢܵܐ ܡܢ݂ ܒܵܬܲܪ ܕܐܲܚܫܸܡܘ، ܢܣܲܒܼ ܒܐܝܼܖܵܘ̈ܗܝ
ܩܲܕܝ̈ܫܵܬܼܵܐ ܟܵܣܵܐ ܕܲܟܼܝܵܐ
(ܢܵܣܹܒܼ ܟܵܣܵܐ ܒܐܝܼܖܵܘ̈ܗܝ)،
ܘܐܲܘܕܝܼ ܠܵܟܼ،
ܘܒܲܪܸܟܼ،
ܘܝܲܗ̄ܒܼ ܠܬܲܠܡܝܼܖܵܘ̈ܗܝ ܟܲܖ ܐܵܡܲ̇ܪ: ܣܲܒܼܘ ܐܸܫܬܵܘ ܡܸܢܹܗ
ܟܠܟܼܘܿܢ،
ܗܵܢܵܐ ܗ̄ܘܼ ܕܹܡܝ
ܕܲܖܝܵܬܹܩܹܐ ܚܖܲܬܵܐ ܕܲܠܥܵܠܲܡ، ܕܲܚܠܵܦܲܝܟܘܿܢ ܘܲܚܠܵܦ
ܣܲܓܝܼ̈ܐܹܐ ܡܸܬܼܐ̄ܫܸܖ ܠܫܘܼܒܼܩܵܢܵܐ ܕܲܚܛܵܗܹ̈ܐ܀
ܘܥܵܢܹܝ̇ܢ:
ܐܵܡܹܝܢ.
ܟܵܗܢܵܐ:
ܟܠ ܐܸܡܲܬܼܝـ ܕܥܵܒܼ̇ܕܝܼܬܘܿܢ ܗܵܠܹܝܢ ܠܕܘܼܟܼܪܵܢܝ ܗ̄ܘ݂
ܡܥܲܗܕܝܼܬܘܿܢ.
ܘܥܵܢܹܝ̇ܢ:
ܐܵܡܹܝܢ
(ܡܗܲܝܡܢܝܼܢܲܢ
ܘܡܲܘܕܹܝܢܲܢ.)
ܘܡܲܩܸܦ
ܟܵܗܢܵܐ:
ܘܗܵܫܵܐ ܕܹܝܢ، ܟܲܖ ܥܘܼܗܕܵܢܹܗ ܥܵܒܼ̇ܕܝܼܢܲܢ ܐܲܝܟܼ
ܕܐܸܬܼܦܲܩܲܖܢܲܢ، ܘܦܲܓܼܪܹܗ ܘܲܕܡܹܗ ܥܲܠ ܡܲܖܒܚܵܐ ܕܲܟܼܝܵܐ
ܘܩܲܕܝܼܫܵܐ ܡܩܲܪܒܼܝܼܢܲܢ،
ܘܲܡܪܝܼܡ ܐܝܼܖܵܘܗܝ ܠܥܸܠ.
ܢܹܐܬܸܐ ܡܵܪܝ ܪܘܼܚܵܟܼ ܩܲܕܝܼܫܵܐ
ܘܢܸܬܬܢܝܼܚ ܥܲܠ ܩܘܼܪܒܵܢܵܐ ܗܵܢܵܐ ܕܥܲܒܼܕܲܝ̈ܟ
ܘܲܢܒܲܪܟܼܝܼܘܗܝ ܘܲܢܩܲܕܫܝܼܘܗܝ
ܕܢܸܗܘܸܐ ܠܲܢ ܡܵܪܝ ܠܚܘܼܣܵܝܵܐ ܕܚܲܘܒܹ̈ܐ ܘܲܠܫܘܼܒܼܩܵܢܵܐ
ܕܲܚܛܵܗܹ̈ܐ،
ܘܲܠܣܲܒܼܪܵܐ ܪܲܒܵܐ ܕܲܩܝܵܡܬܵܐ ܕܡܢ݂ ܒܹܝܬܼ ܡܝܼ̈ܬܹܐ،
ܘܲܠܚܲܝܹ̈ܐ ܚܲܖ̈ܬܹܐ ܒܡܲܠܟܘܼܬܼܵܐ ܕܲܫܡܲܝܵܐ ܥܲܡ ܟܠ
ܕܲܫܦܲܪܘ ܩܖܵܡܲܝܟ.
ܩܵܢܘܿܢܵܐ
ܘܥܲܠ ܐܲܦܲܝ̈ ܟܠܵܗ̇ ܡܕܲܒܪܵܢܘܼܬܼܵܐ ܗܵܖܹܐ ܪܲܒܬܼܵܐ
ܘܲܬܡܝܼܗܬܵܐ ܕܲܠܘܵܬܲـܢ،
ܢܲܘܕܸܐ ܠܵܟܼ ܘܲܢܫܲܒܚܵܟܼ ܕܠܵܐ ܫܲܠܘܵܐ ܒܥܹܕܬܵܟܼ ܦܪܝܼܩܲܬܼ
ܒܲܕܡܹܗ ܝܲܩܝܼܪܵܐ ܕܲܡܫܝܼܚܵܟܼ،
ܒܦܘܼܡܹ̈ܐ ܦܬܼܝܼܚܹ̈ܐ ܘܲܒܐܲܦܹ̈ܐ ܓܲܠܝ̈ܵܬܼܵܐ. ܟܲܖ
ܡܲܣܩܝܼܢܲܢ ܬܸܫܒܘܿܚܬܵܐ ܘܐܝܼܩܵܪܵܐ ܘܬܲܘܕܝܼܬܼܵܐ
ܘܣܸܓܼܕܬܼܵܐ
ܘܥܵܒܹܖ ܡܵܛܘܿܢܝܼܵܐ ܩܖܵܡ ܡܲܖܒܚܵܐ
ܠܲܫܡܵܟܼ ܚܲܝܵܐ ܘܩܲܕܝܼܫܵܐ ܘܡܲܚܝܵܢܵܐ. ܗܵܫܵܐ
(♰)
ܘܲܒܟܠܙܒܲܢ ܘܲܠܥܵܠܲܡ ܥܵܠܡܝܼܢ.
ܘܪܵܫܹܡ ܥܲܠ ܐ̄ܪ̈ܵܙܹܐ.
ܥܲܡܵܐ:
ܐܵܡܹܝܢ.
ܘܗܘ̤ ܥܲܡܵܐ ܡܙܲܡܲܪ ܥܘܿܢܝܼܬܼܐ ܗܵܖܹܐ:
ܩܘܼܪܒܵܢܵܐ ܡܩܲܪܸܒܼ ܠܐܲܠܵܗܵܐ، ܘܟܠܹܗ ܚܲܝܠܵܐ ܕܲܫܡܲܝܵܐ
ܩܵܐܹ̇ܡ ܠܥܸܠ ܡܸܢܹܗ:
ܟܵܗܢܵܐ ܡܵܐ ܕܥܵܐܹ̇ܠ ܩܖܵܡ ܡܲܖܒܲܚܩܘܼܖܫܵܐ،
ܐܝܼܖܵܘ̈ܗܝ ܕܲܟܼܝܵܐܝܼܬܼ ܦܵܫܹ̇ܛ ܠܲܫܡܲܝܵܐ، ܘܲܡܙܲܡܸܢ
ܠܪܘܼܚܵܐ ܘܢܵܚ̇ܬܵܐ ܡ̣ܢ ܪܲܘܡܵܐ،
ܘܲܡܩܲܕܫܵܐ ܦܲܓܼܪܹܗ ܘܲܕܡܹܗ ܕܲܡܫܝܼܚܵܐ.
ܟܲܕ ܟܵܗܢܵܐ ܐܵܡܲܪ ܟܘܼܫܵܦܵܐ ܗܵܢܵܐ ܢܝܼܚܵܐܝܬܼ:
ܡܫܝܼܚܵܐ ܫܠܵܡܵܐ ܕܥܸܠܵܝܹ̈ܐ، ܘܫܲܝܢܵܐ ܪܲܒܵܐ ܕܬܲܚܬܵܝܹ̈ܐ.
ܐܲܫܪܵܐ ܡܵܪܝ ܫܲܝܢܵܟܼ ܘܲܫܠܵܡܵܟܼ ܒܐܲܪܒܲܥ ܦܸܢܝ̈ܵܬܹܗ
ܕܥܵܠܡܵܐ. ܘܝܲܬܝܼܪܵܐܝܼܬܼ ܒܥܹܕܬܵܟܼ ܩܲܕܝܼܫܬܵܐ
ܩܵܬܼܘܿܠܝܼܩܝܼ. ܘܫܲܝܸܢ ܟܵܗܢܘܼܬܼܵܐ ܐܵܦ ܡܲܠܟܘܼܬܼܵܐ،
ܘܒܲܛܸܠ ܩܪ̈ܵܒܹܐ ܡܢ݂ ܣܲܘ̈ܦܹܝܗ ܕܐܲܪܥܵܐ. ܘܒܲܕܲܪ ܥܲܡܡܹ̈ܐ
ܦܠܝܼ̈ܓܹܐ ܕܨܵܒܹܝ̇ܢ ܩܪܵܒܼܵܐ،
ܕܥܘܼܡܪܵܐ ܫܲܠܝܵܐ ܘܢܝܼܚܵܐ ܢܸܥܡܲܪ ܒܟܠܵܗ̇ ܢܲܟܼܦܘܼܬܼܵܐ
ܘܕܸܚܠܲܬܼ ܐܲܠܵܗܵܐ܀
ܛܟܣܐ ܕܩܨܝܐ ܘܕܪܘܫܡܐ
[ܘܲܡܨܲܠܸܐ
ܟܵܗܢܵܐ ܓܗܵܢܬܵـܐ
ܗܵܖܹܐ ܢܝܼܚܵܐܝܼܬܼ:
ܡܲܘܕܸܐ ܐ̄ܢܵܐ ܠܵܟܼ ܐܲܒܵܐ ܡܵܪܵܐ ܕܲܫܡܲܝܵܐ ܘܕܲܐܪܥܵܐ،
ܕܟܲܖ ܚܲܛܵܝܵܐ ܐܝܼܬܲܝ ܘܲܒܨܝܼܪܵܐ،
ܡܸܛܠ ܣܘܿܓܼܵܐܐ ܕܲܡܪܲܚܡܵܢܘܼܬܼܵܟܼ،
ܐܲܫܘܝܼܬܵܢܝ ܒܛܲܝܒܘܼܬܼܵܟܼ ܠܲܡܩܲܪܵܒܼܘܼ ܩܖܵܡܲܝܟ ܐ̄ܪ̈ܵܙܹܐ
ܗܵܠܹܝܢ ܕܚܝܼ̈ܠܹܐ ܘܩܲܕܝܼ̈ܫܹܐ ܘܡܲܚܝܵܢܹ̈ܐ ܘܐܲܠܵܗܵܝܹ̈ܐ
ܕܦܲܓܼܪܹܗ ܘܲܖܡܹܗ ܕܲܡܫܝܼܚܵܟܼ،
ܕܐܹܫܲܡܸܫ ܠܥܲܡܵܟܼ ܘܥܵܢܵـ̈ܐ ܕܡܲܪܥܝܼܬܼܵܟܼ،
ܚܘܼܣܵܝܵܐ ܕܚܲܘܒܲܝ̈ܗܘܿܢ،
ܘܫܘܼܒܼܩܵܢܵܐ ܕܲܚܛܵܗܲܝ̈ܗܘܿܢ،
ܘܦܘܼܪܩܵܢܵܐ ܕܢܲܦ̮ܫܵܬܼܗ̈ܘܿܢ،
ܘܬܲܪܥܘܼܬܼܵܐ ܕܟܠܹܗ ܥܵܠܡܵܐ، ܘܫܲܝܢܵܐ ܘܲܫܠܵܡܵܐ ܕܟܠܗܹܝܢ
ܥܹـ̈ܕܵܬܼܵܐ܀]
ܗܵܝܕܹܝܢ ܫܲܡܵܫܵܐ ܡܩܝܼܡ:
ܫܠܵܡܵܐ ܥܲܡܲܢ.
ܘܩܵܪܹܒܼ ܟܵܗܢܵܐ ܠܘܵܬܼ ܡܲܖܒܚܵܐ ܘܐܵܡܲ̇ܪ:
ܡܩܲܪܒܼܵܐ ܠܲܢ ܡܵܪܲـܢ ܘܐܲܠܵܗܲـܢ ܡܪܲܚܡܵܢܘܼܬܼܵܐ
ܕܛܲܝܒܘܼܬܼܵܟܼ ܨܹܝܖ ܐ̄ܪ̈ܵܙܹܐ ܗܵܠܹܝܢ ܫܒܼܝܼ̈ܚܹܐ
ܘܩܲܕܝܼ̈ܫܹܐ ܘܡܲܚܝܵـ̈ܢܹܐ ܘܐܲܠܵܗܵܝܹ̈ܐ، ܟܲܖ ܠܵܐ
ܫܵܘܹ̇ܝܢܲܢ܀
ܬܢܝܼ
ܓ ܙܲܒܼܢܝܼ̈ܢ،
ܩܲܖܡܵܝܬܵܐ ܟܲܖ ܩܵܐܹ̇ܡ ܩܖܵܡ ܡܲܖܒܚܵܐ، ܘܲܕܬܲܪܬܹܝܢ ܡܢ݂
ܓܲܒܵܐ ܕܓܲܪܒܝܵܐ ܕܡܲܖܒܚܵܐ، ܐܵܘܟܹܝܬܼ ܡܢ݂
ܣܸܡܵܠܹܗ ܕܟܵܗܢܵܐ، ܕܲܬܼܠܵܬܼ ܕܹܝܢ ܡܢ݂ ܓܲܒܵܐ ܕܡܲܖܢܚܵܐ
ܟܲܖ ܐܲܦܵܘ̈ܗܝ ܠܥܲܡܵܐ. ܘܲܒܼܫܘܼܠܵܡ ܟܠ ܙܒܲܢ̄ܬܵܐ ܣ̇ܵܓܹܖ
ܘܢܵܫܹ̇ܩ ܠܡܲܖܒܚܵܐ ܟܲܖ ܦܵܟܲܪ ܐܝܼ̈ܖܵܘܗܝ ܥܲܠ ܚܲܖܝܹܗ
ܨܠܝܼܒܼܵܐܝܼܬܼ. ܘܐܸܢ ܠܵܐ ܡܨܸܐ ܟܵܗܢܵܐ ܠܡܸܟܪܲܟܼ ܚܖܵܪܲܝ
ܡܲܖܒܚܵܐ، ܢܵܫܹܩ ܠܲܡܨܲܥܬܹܗ ܕܡܲܖܒܚܵܐ ܘܲܠܓܲܪܒܝܵܐ
ܘܲܠܬܲܝܡܢܵܐ.
ܘܥܵܢܹ̇ܐ ܠܹܗ ܡܫܲܡܫܵܢܵܐ:
ܒܲܫܪܵܪܵܐ ܟܲܖ ܠܵܐ ܫܵܘܹ̇ܝܢܲܢ.
ܟܸܢ ܩܵܐܹ̇ܡ ܟܵܗܢܵܐ ܘܫܵܩܹ̇ܠ ܠܒܘܼܟܼܪܵܐ ܒܬܲܪ̈ܬܲܝܗܹܝܢ
ܐܝܼܖܵܘ̈ܗܝ، ܘܲܡܪܝܼܡ ܠܹܗ ܠܥܸܠ ܟܲܖ ܚܵܐܲܪ ܒܹܗ، ܘܣܵܐܹ̇ܡ
ܠܹܗ ܥܲܠ ܥܲܝ̈ܢܵܘܗܝ. ܘܢܵܫܹܩ ܠܒܘܟܼܪܵܐ ܨܠܝܼܒܵܐܝܼܬܼ ܟܲܖ
ܠܵܐ ܡܩܲܪܸܒܼ ܠܹܗ ܠܣܸܦܘܵܬܹܗ ܐܸܠܵܐ ܛܘܼܦ̮ܣܵܢܵܐܝܼܬܼ.
ܘܐܵܡܲ̇ܪ،
ܒܩܵܠܵܐ ܫܡܝܼܥܵܐ:
ܫܘܼܒܼܚܵܐ ܠܵܟܼ ܠܲܚܡܵܐ ܚܲܝܵܐ ܘܡܲܚܝܵܢܵܐ ܕܲܢܚܸܬܼ ܡܢ݂
ܫܡܲܝܵܐ،
ܘܝܵܗܹ̇ܒܼ ܚܲܝܹ̈ܐ ܠܥܵܠܡܵܐ ܟܠܹܗ ܡܢ݂ ܣܵܟܹܗ،
ܕܐܵܟܼܘܿܠܵܘ̈ܗܝ ܠܵܐ ܡܵܝ̇ܬܝܼܢ،
ܘܢܵܣܘܿܒܼܵܘ̈ܗܝ ܒܹܗ ܡܸܬܼܦܲܪܩܝܼܢ، ܘܒܹܗ ܡܸܬܼܚܲܣܹܝܢ
ܘܚܵܐܹ̇ܝܢ ܒܹܗ ܠܥܵܠܡܝܼܢ܀
ܘܥܵܢܹܝ̇ܢ:
ܐܵܡܹܝܢ.
ܘܡܲܩܸܦ:
ܩܵܪܒܼܝܼܢܲܢ ܡܵܪܝ ܒܗܲܝܡܵܢܘܼܬܼܵܐ ܕܲܫܪܵܪܵܐ ܕܲܫܡܵܟܼ ܠܘܵܬܼ
ܐ̄ܪ̈ܵܙܹܐ ܗܵܠܹܝܢ ܩܲܕܝܼ̈ܫܹܐ، ܘܩܵܨܹ̇ܝܢܲܢ ܒܲܚܢܵܢܵܟܼ
ܘܪܵܫܡܝܼܢܲܢ ܒܲܡܪܲܚܡܵܢܘܼܬܼܵܟܼ ܦܲܓܼܪܹܗ ܘܲܕܡܹܗ ܕܡܲܚܝܵܢܲܢ
ܡܵܪܲـܢ ܝܑܼܫܘܿܥ ܡܫܝܼܚܵܐ،
ܒܫܸܡ ܐܲܒܵܐ ܘܲܒܪܵܐ ܘܪܘܼܚܵܐ ܕܩܘܼܖܫܵܐ
܀
ܘܥܲܡ ܫܘܼܡܵܗܵܐ ܕܲܬܠܝܼܬܼܵܝܘܼܬܼܵܐ ܩܵܨܹܐ ܠܒܘܼܟܼܪܵܐ
ܕܒܐܝܼܖܵܘ̈ܗܝ ܠܲܬܪܹܝܢ ܦܸܠܓܝܼ̈ܢ،
ܘܣܵܐܹ̇ܡ ܠܦܸܠܓܵܐ ܗܵܘ̇ ܕܣܸܡܵܠܵܐ ܥܲܠ ܦܝܼܠܵܣܵܐ ܠܐܲܦܲܝ̈
ܟܵܣܵܐ.
ܘܥܵܢܹܝ̇ܢ:
ܐܵܡܹܝܢ.
ܘܐܵܡܲܪ:
ܡܸܬܼܪܫܸܡ ܕܡܵܐ ܝܲܩܝܼܪܵܐ ܒܦܲܓܼܪܵܐ ܡܲܚܝܵܢܵܐ ܕܡܵܪܲـܢ
ܝܑܼܫܘܿܥ ܡܫܝܼܚܵܐ،
ܒܫܸܡ ܐܲܒܵܐ ܘܲܒܪܵܐ ܘܪܘܼܚܵܐ ܕܩܘܼܖܫܵܐ
܀
ܘܪܵܫܹ̇ܡ ܒܦܸܠܓܵܐ ܕܒܐܝܼܖܹܗ ܠܲܕܡܵܐ ܟܲܖ ܡܛܲܒܲܥ ܬܘܼܠܬܹܗ.
ܘܥܵܢܹܝ̇ܢ:
ܐܵܡܹܝܢ.
ܟܸܢ ܐܵܡܲ̇ܪ:
ܡܸܬܼܪܫܸܡ ܦܲܓܼܪܵܐ ܩܲܕܝܼܫܵܐ ܒܲܕܡܵܐ ܡܚܲܣܝܵܢܵܐ ܕܡܵܪܲـܢ
ܝܑܼܫܘܿܥ ܡܫܝܼܚܵܐ،
ܒܫܸܡ ܐܲܒܵܐ ܘܲܒܪܵܐ ܘܪܘܼܚܵܐ ܕܩܘܼܖܫܵܐ
܀
ܘܒܹܗ ܒܦܸܠܓܵܐ ܕܲܒܐܝܼܖܹܗ ܪܵܫܹ̇ܡ ܠܦܸܠܓܵܐ ܕܲܒܦܝܼܠܵܣܵܐ
ܘܡܲܪܟܸܢ ܠܹܗ ܠܘܵܬܹܗ ܟܲܖ ܚܵܝܪܵܐ ܡܢܵܬܼܵܐ ܨܒܼܝܼܥܬܵܐ
ܠܐܲܦܲܝ̈ ܡܲܖܢܚܵܐ.
ܘܥܵܢܹܝ̇ܢ:
ܐܵܡܹܝܢ.
ܘܲܡܚܲܘܸܐ ܟܵܗܢܵܐ ܠܥܲܡܵܐ ܐ̄ܪ̈ܵܙܹܐ ܩܲܕܝܼ̈ܫܹܐ ܟܲܖ
ܠܒܼܝܼܟܼ ܟܵܣܵܐ ܒܐܝܼܖܹܗ ܕܝܲܡܝܼܢܵܐ ܘܦܝܼܠܵܣܵܐ ܒܐܝܼܖܹܗ
ܕܣܸܡܵܠܵܐ ܘܐܵܡܲ̇ܪ ܒܩܵܠܵܐ
ܫܡܝܼܥܵܐ:
ܐܸܬܼܦܪܸܫܘ ܘܐܸܬܼܩܲܕܲܫܘ ܘܐܸܬܼܓܡܲܪܘ ܘܐܸܫܬܲܡܠܝܼܘ
ܘܐܸܬܼܚܲܝܲܖܘ ܘܐܸܬܼܚܲܠܲܛܘ ܘܐܸܬܼܢܲܩܲܦܘ ܘܐܸܬܚܲܬܲܡܘ
ܐ̄ܪ̈ܵܙܹܐ ܗܵܠܹܝܢ ܡܲܚ̈ܝܵܢܹܐ ܒܲܫܡܵܐ ܣܓܼܝܼܖܵܐ
ܕܲܬܠܝܼܬܼܵܝܘܼܬܼܵܐ ܡܫܲܒܲܚܬܵܐ ܐܲܒܵܐ ܘܲܒܪܵܐ ܘܪܘܼܚܵܐ
ܕܩܘܼܖܫܵܐ،
ܗܵܪܟܵܐ ܐܵܡܪܝܼܢ ܥܘܿܢܝܬܼܵܐ
ܟܪ̈ܘܿܒܹܐ ܘܲܣܪ̈ܵܦܹܐ
[ܟܲܖ ܡܲܩܸܦ ܟܵܗܢܵܐ ܢܝܼܚܵܐܝܼܬܼ:
ܕܢܸܗܘܘܿܢ ܠܲܢ ܡܵܪܝ ܠܚܘܼܣܵܝܵܐ ܕܚܲܘ̈ܒܹܐ ܘܲܠܫܘܼܒܼܩܵܢܵܐ
ܕܲܚܛܵܗܹ̈ܐ ܘܲܠܣܲܒܼܪܵܐ ܪܲܒܵܐ ܕܲܩܝܵܡܬܵܐ ܕܡܢ݂ ܒܹܝܬܼ
ܡܝܼ̈ܬܹܐ ܘܲܠܚܲܝܹ̈ܐ ܚܲܖ̈ܬܹܐ ܒܡܲܠܟܘܼܬܼܵܐ ܕܲܫܡܲܝܵܐ، ܠܲܢ
ܘܲܠܥܹܕܬܹܗ ܩܲܕܝܼܫܬܵܐ ܕܲܡܫܝܼܚܵܐ ܡܵܪܲܢ ܕܲܬܢܵܢ ܘܕܲܒܟܠ
ܐܲܬܲܪ، ܗܵܫܵܐ ܘܲܒܟܠܙܒܲܢ ܘܲܠܥܵܠܲܡ ܥܵܠܡܝܼܢ܀]
ܘܣܵܐܹ̇ܡ ܐܸܢܘܿܢ ܟܵܗܢܵܐ ܥܲܠ ܡܲܖܒܚܵܐ. ܘܣܵـ̇ܓܹܖ ܘܩܵܐܹܡ̇
ܘܢܵܫܹ̇ܩ ܠܹܗ ܒܲܡܨܲܥܬܹܗ ܘܦܵܢܹܐ ܠܓܲܒܵܐ ܡܲܥܪܒܵܝܵܐ
ܕܡܲܖܒܚܵܐ ܟܲܖ ܐܲܦܵܘܗ̈ܝ ܠܥܲܡܵܐ. ܘܫܵܪܹܐ ܠܫܘܿܫܸܦܵܐ
ܕܲܟܪܝܼܟܼ ܚܖܵܪܲܝ ܦܵܬܼܘܿܪܵܐ ܘܟܵܣܵܐ ܘܣܵܐܹܡ ܠܹܗ ܡܼܢ
ܓܲܒܵܐ ܕܦܝܼܠܵܣܵܐ. ܝܵܬܹܒ ܥܲܡܵܐ ܘܲܡܙܲܡܲܪ
ܥܘܿܢܝܼܬܼܵܐ:
ܫܲܒܚܘܼܗܝ ܟܠܗܘܿܢ ܡܲܠܲܐܟܼܵܘ̈ܗܝ:
ܟܪ̈ܘܿܒܹܐ ܘܲܣܪ̈ܵܦܹܐ ܘܪ̈ܲܒܲܝ ܡܲܠܲܐܟܹ̈ܐ،
ܒܕܸܚܠܵܐ ܘܒܲܪܬܹܝܬܼܵـܐ
ܩܵܝ̇ܡܝܼܢ ܩܖܵܡ ܡܲܖܒܚܵܐ. ܘܚܵܝ̇ܪܝܼܢ ܒܹܗ ܒܟܵܗܢܵܐ
(ܒܟܘܼܡܪܵܐ)،
ܕܩܵܨܹܐ ܘܲܡܦܲܠܸܓܼ
ܦܲܓܼܪܹܗ ܕܲܡܫܝܼܚܵܐ،
ܠܚܘܼܣܵܝܵܐ ܕܚܲܘܒܹ̈ܐ܀
ܛܟܣܐ ܕܡܣܒܐ ܕܐ̄ܪ̈ܙܐ
ܟܸܢ ܡܲܙܥܸܩ ܟܵܗܢܵܐ ܒܩܵܠܵܐ ܪܵܡܵܐ ܠܘܵܬܼ ܥܲܡܵܐ ܐܲܝܟܼ ܗܵܘ
ܕܲܡܣܲܒܲܪ ܚܲܖܘܼܬܼܵܐ:
ܛܲܝܒܘܼܬܹܗ ܕܡܵܪܲـܢ ܝܑܼܫܘܿܥ ܡܫܝܼܚܵܐ،
ܘܚܘܼܒܹܗ ܕܐܲܠܵܗܵܐ ܐܲܒܵܐ،
ܘܫܲܘܬܵܦܘܼܬܼܵܐ ܕܪܘܼܚܵܐ ܕܩܘܼܖܫܵܐ ܬܸܗܘܸܐ ܥܲܡ ܟܠܲܢ،
ܗܵܫܵܐ ܘܲܒܟܠܙܒܲܢ ܘܲܠܥܵܠܲܡ ܥܵܠܡܝܼܢ.
ܘܡܸܬܼܦܢܸܐ ܠܐܲܦܲܝ̈ ܡܲܖܢܚܵܐ.
ܘܡܲܟܪܸܙ ܫܲܡܵܫܵܐ:
ܟܠܲܢ ܒܕܸܚܠܬܼܵܐ ܘܐܝܼܩܵܪܵܐ ܢܸܩܪܘܿܒܼ ܠܐ̄ܪܵܙܵܐ ܕܦܲܓܼܪܹܗ
ܘܲܕܡܹܗ ܝܲܩܝܼܪܵܐ ܕܦܵܪܘܿܩܲܢ. ܒܠܸܒܵܐ ܕܲܟܼܝܵܐ
ܘܲܒܗܲܝܡܵܢܘܼܬܼܵܐ ܫܲܪܝܼܪܬܵܐ ܢܸܬܕܟܲܪ ܚܲܫܹܗ ܘܢܸܬܼܒܲܝܲܐ
ܒܲܩܝܵܡܬܹܗ. ܕܡܸܛܠܵܬܲـܢ ܓܹܝܪ ܝܑܼܚܝܼܖܵܝܹܗ ܕܐܲܠܵܗܵܐ
ܦܲܓܼܪܵܐ ܡܵܝܘܿܬܼܵܐ ܘܢܲܦ̮ܫܵܐ ܡܠܝܼܠܬܵܐ
ܘܝܲܖܘܼܥܬܼܵܢܝܼܬܼܵܐ ܘܠܵܐ ܡܵܝܘܿܬܼܬܵܐ ܡܢ݂ ܒܢܲܝ̈ܢܵܫܵܐ
ܢܣ݂ܲܒܼ. ܘܲܒܢܵܡܘܣܵܘ̈ܗܝ ܡܲܚ̈ܝܵܢܹܐ ܘܲܒܦܘܼܩܕܵܢܵܘ̈ܗܝ
ܩܲܕܝܼ̈ܫܹܐ ܡܢ݂ ܛܵܥܝܘܼܬܼܵܐ ܠܝܼܖܲܥܬܼܵܐ ܕܲܫܪܵܪܵܐ ܩܲܪܒܲܢ.
ܘܒܵܬܲܪ ܟܠܵܗ̇ ܡܕܲܒܪܵܢܘܼܬܹܗ ܕܲܚܠܵܦܲܝܢ، ܪܹܫܝܼܬܹܗ
ܕܲܟܝܵܢܲܢ ܒܲܙܩܝܼܦܵܐ ܐܸܬܼܢܲܣܝܼ ܘܡܢ݂ ܒܹܝܬܼ ܡܝܼ̈ܬܹܐ ܩܵܡ݂
ܘܠܲܫܡܲܝܵܐ ܐܸܣܬܲܠܲܩ، ܘܐܲܫܠܸܡ ܠܲܢ ܐ̄ܪ̈ܵܙܵܘܗܝ ܩܲܕܝܼܫܹܐ
ܕܲܒܗܘܿܢ ܢܸܬܕܟܲܪ ܟܠܵܗ̇ ܛܲܝܒܘܼܬܹܗ ܕܲܠܘܵܬܲܢ.
ܚܢܲܢ ܗܵܟܹܝܠ ܒܚܘܼܒܵܐ ܫܦܝܼܥܵܐ ܘܲܒܨܸܒܼܝܵܢܵܐ ܡܲܟܝܼܟܼܵܐ
ܢܩܲܒܸܠ ܡܲܘܗܲܒܼܬܼܵܐ ܕܚܲܝܹ̈ܐ ܕܲܠܥܵܠܲܡ. ܘܒܲܨܠܘܿܬܼܵܐ
ܕܟܼܝܼܬܼܵܐ ܘܲܒܚܲܫܵܐ ܕܦܘܼܪܫܵܢܵܐ ܢܸܫܬܲܘܬܲܦ ܠܐ̄ܪ̈ܵܙܹܐ
ܕܥܹܕܬܵܐ ܒܣܲܒܼܪܵܐ ܕܲܬܝܵܒܼܘܼܬܼܵܐ، ܟܲܖ ܡܸܬܼܦܢܹܝܢܲܢ ܡܢ݂
ܣܲܟܼ̈ܠܘܵܬܲܢ،
ܘܚܵܐ̇ܫܝܼܢܲܢ ܥܲܠ ܚܛܵܗܲܝ̈ܢ، ܘܫܵܐ̇ܠܝܼܢܲܢ ܪ̈ܲܚܡܹܐ
ܘܫܘܼܒܼܩܵܢܵܐ ܡܢ݂ ܐܲܠܵܗܵܐ ܡܵܪܹܟܠ ܘܡܲܪܦܹܝܢܲܢ
ܣܲܟܼ̈ܠܘܵܬܼܵܐ ܠܲܟܼـ̈ܢܵܘܵܬܲܢ.
ܘܥܵܢܹܝܢ؛
ܡܵܪܝܵܐ ܚܲܣܵܐ ܚܛܵܗܹ̈ܐ ܘܣܲܟܼ̈ܠܘܵܬܼܵܐ ܕܥܲܒܼܕܲܝ̈ܟ.
ܘܲܡܕܲܟܹܝܢܲܢ ܬܹܐܪ̈ܵܬܲܢ ܡܼܢ ܦܘܼ̈ܠܵܓܹܐ ܘܚܸܪ̈ܝܵܢܹܐ.
ܡܵܪܝܵܐ ܚܲܣܵܐ... ܟܲܖ
ܫܲܦ̈ܝܵܢ ܢܲܧ̈ܫܵܬܲܢ ܡܼܢ ܐܲܟܬܼܵܐ ܘܲܒܥܸܠܕܒܼܵܒܼܘܼܬܼܵܐ.
ܡܵܪܝܵܐ ܚܲܣܵܐ...
ܢܸܣܲܒܼ ܩܘܼܖܫܵܐ ܘܢܸܬܼܩܲܕܲܫ ܒܪܘܼܚܵܐ ܕܩܘܿܖܫܵܐ.
ܡܵܪܝܵܐ ܚܲܣܵܐ...
ܒܐܲܘܝܘܼܬܼܵܐ ܘܲܒܚܘܼܠܛܵܢܵܐ ܕܪܸ̈ܥܝܵܢܲܝܢ ܢܩܲܒܸܠ
ܒܫܵܠܡܘܼܬܼܵܐ ܕܲܚ̈ܖܵܖܹܐ ܠܫܲܘܬܵܦܘܼܬܼܗܘܿܢ ܕܐ̄ܪ̈ܵܙܹܐ.
ܡܵܪܝܵܐ ܚܲܣܵܐ...
ܕܢܸܗܘܘܿܢ ܠܲܢ ܡܵܪܝ ܠܲܩܝܵܡܬܵܐ ܕܦܲܓܼܪ̈ܲܝܢ ܘܲܠܦܘܼܪܩܵܢܵܐ
ܕܢܲܧܫܵܬܲܢ. ܘܲܠܚܲܝܹ̈ܐ
ܕܲܠܥܵܠܲܡ ܥܵܠܡܝܼܢ.
ܘܥܲܖ ܡܸܬܼܐܲܡܪܵܐ ܩܵܨܹ̇ܐ ܟܵܗܢܵܐ ܠܦܲܓܪܵܐ ܘܲܡܛܲܝܸܒܼ
ܩܨܵܝܹ̈ܐ ܠܡܲܣܒܼܵܐ ܕܐ̄ܪ̈ܵܙܹܐ،
ܘܨܵܒ̇ܲܥ ܓܡܘܼܪܬܵܐ ܡܸܛܠ ܛܠܵܝܹ̈ܐ.
ܘܡܵܐ ܕܫܸܠܡܲܬܼ ܟܵܪܘܿܙܘܼܬܼܵܐ ܐܵܡܲ̇ܪ ܫܲܡܵܫܵܐ:
ܢܨܲܠܸܐ. ܫܠܵܡܵܐ ܥܲܡܲܢ.
ܘܬܵܢܹ̇ܐ ܟܵܗܢܵـܐ ܒܩܵܠܵܐ ܫܡܝܼܥܵܐ ܟܲܖ ܦܫܝܼܛܵܢ
ܐܝܼܖܵܘܼ̈ܗܝ:
ܨܠܘܿܬܼܵܐ ܕܲܩܖܵܡ ܐܲܒܘܼܢ ܕܒܲܫܡܲܝܵܐ
ܚܲܣܵܐ ܡܵܪܝ ܒܲܚܢܵܢܵܟܼ ܚܛܵܗܹ̈ܐ ܘܣܲܟܼܠـ̈ܘܵܬܼܵܐ
ܕܥܲܒܼܕܲܝ̈ܟ، ܘܩܲܕܸܫ ܣܸܦܘ̈ܵܬܲـܢ ܒܛܲܝܒܘܼܬܼܵܟܼ،
ܕܢܸ̈ܬܠܵܢ ܦܹܐܪܹ̈ܐ ܕܫܘܼܒܼܚܵܐ ܠܐܲܠܵܗܘܼܬܼܵܟܼ ܡܪܲܝܲܡܬܵܐ
ܥܲܡ ܟܠܗܘܿܢ ܩܲܕܝܼܫܲܝ̈ܟ ܒܡܲܠܟܘܼܬܼܵܟܼ.
ܘܐܲܫܘܵܐ ܠܲܢ ܡܵܪܲـܢ ܘܐܲܠܵܗܲـܢ ܕܐܲܡܝܼܢܵܐܝܼܬܼ ܕܠܵܐ
ܡܘܼܡ ܩܖܵܡܲܝܟ ܢܩܘܼܡ ܒܠܸܒܵܐ ܕܲܟܼܝܵܐ ܘܒܲܐܦܹ̈ܐ
ܓܲܠܝ̈ܵܬܼܵܐ. ܘܲܒܦܵܪܹܗ̄ܣܸܝܵܐ ܗܵܝ̇ـ ܕܡܸܢܵܟܼ ܒܪ̈ܲܚܡܹܐ
ܐܸܬܼܝܲܗ̄ܒܲܬܼ ܠܲܢ ܟܠܲܢ ܫܲܘܝܵܐܝܼܬܼ ܢܸܩܪܹܝܟܼ ܘܗܵܟܲܢܵܐ
ܢܹܐܡܲܪ:
ܘܥܵܢܹܝ̇ܢ:
ܐܲܒܘܼܢ ܕܒܲܫܡܲܝܵܐ ܢܸܬܼܩܲــܕܲܫ
ܫܡܵܟܼ، ܬܹܐܬܸܐ ܡܲܠܟܘܼܬܼܵܟܼ، ܢܸܗܘܸـܐ
ܨܸܒܼܝܵܢܵܟܼ،
ܐܲܝܟܲܢܵـܐ ܕܒܲܫܡܲܝܵܐ ܐܵܦ ܒܐܲܪܥܵܐ. ܗܲܒܼܠܲܢ ܠܲܚܡܵܐ
ܕܣܘܼܢܩܵܢܲܢ ܝܲܘܡܵܢܵܐ،
ܘܲܫܒܼܘܿܩ ܠܲܢ ܚܲܘܒܲܝ̈ܢ ܘܲܚܛܵܗܲܝ̈ܢ،
ܐܲܝܟܲܢܵܐ ܕܐܵܦ ܚܢܲܢ ܫܒܲܩ̣ܢ ܠܚܲܝܵܒܲܝ̈ܢ. ܘܠܵܐ ܬܲܥܠܲܢ
ܠܢܸܣܝܘܿܢܵܐ،
ܐܸܠܵܐ ܦܲܨܵܢ ܡܢ݂ ܒܝܼܫܵܐ، ܡܸܛܠ ܕܖܝܼܠܵܟܼ ܗ̄ܝܼ
ܡܲܠܟܘܼܬܼܵܐ ܘܚܲܝܠܵܐ ܘܬܸܫܒܘܿܚܬܵــܐ
ܠܥܵܠܲܡ ܥܵܠܡܝܼܢ. ܐܵܡܹܝܢ.
ܘܡܲܩܸܦ:
ܐܹܝܢ ܡܵܪܝܵܐ ܐܲܠܵܗܵܐ ܚܲܝܠܬܼܵܢܵܐ، ܐܲܠܵܗܲܢ ܛܵܒܼܵܐ
ܘܐܲܒܘܼܢ ܡܠܸܐ ܪ̈ܲܚܡܹܐ، ܒܵܥܹܝܢܲܢ ܡܸܢܵܟܼ ܘܡܸܬܼܟܲܫܦܝܼܢܲܢ
ܠܣܘܿܓܼܵܐܐ ܕܲܡܪܲܚܡܵܢܘܼܬܼܵܟܼ. ܠܵܐ ܡܵܪܝ ܠܵܐ ܡܵܪܝ
ܬܲܥܸܠܲܝܢ ܠܢܸܣܝܘܿܢܵܐ، ܐܸܠܵܐ ܦܪܘܿܩ ܘܦܲܨܵܢ ܡܢ݂ ܒܝܼܫܵܐ
ܘܚܲܝ̈ܠܵܘܵܬܹܗ، ܡܸܛܠ ܕܖܝܼܠܵܟܼ ܗ̄ܝܼ ܡܲܠܟܘܼܬܼܵܐ ܘܚܲܝܠܵܐ
ܘܥܘܼܫܢܵܐ ܘܓܲܢ̄ܒܵܪܘܼܬܼܵܐ ܘܫܘܼܠܛܵܢܵܐ ܒܲܫܡܲܝܵܐ
ܘܒܲܐܪܥܵܐ، ܗܵܫܵܐ
(♰)
ܘܲܒܟܠܙܒܲܢ ܘܲܠܥܵܠܲܡ ܥܵܠܡܝܼܢ.
ܘܪܵܫܸܡ ܥܲܠ ܩܢܘܿܡܹܗ.
ܘܥܵܢܹܝ̇ܢ:
ܐܵܡܹܝܢ.
ܡܸܬܼܦܢܸܐ ܟܵܗܢܵܐ ܠܘܵܬܼ ܥܲܡܵܐ
ܘܐܵܡܲ̇ܪ:
ܫܠܵܡܵܐ ܥܲܡܟܼܘܿܢ
(♰).
ܘܥܵܢܹ̇ܐ ܥܲܡܵܐ:
ܘܥܲܡܵܟܼ ܘܥܲܡ ܪܘܼܚܵܟܼ.
ܘܡܲܩܸܦ
ܟܲܖ ܪܵܡܹ̇ܙ ܥܲܠ ܩܘܼܖܫܵܐ ܠܘܵܬܼ ܥܲܡܵܐ:
ܩܘܼܖܫܵܐ ܠܩܲܕܝܼ̈ܫܹܐ ܝܵـ̇ܐܹܐ ܒܫܲܠܡܘܼܬܼܵܐ.
ܘܥܵܢܹܝ̇ܢ:
ܚܲܖ ܐܲܒܵܐ ܩܲܕܝܼܫܵܐ، ܚܲܖ ܒܪܵܐ ܩܲܕܝܼܫܵܐ، ܚܲܖ ܪܘܼܚܵܐ
ܩܲܕܝܼܫܵܐ. ܫܘܼܒܼܚܵܐ ܠܐܲܒܵܐ ܘܠܲܒܪܵܐ ܘܲܠܪܘܼܚܵܐ ܩܲܕܝܼܫܵܐ
ܠܥܵܠܲܡ ܥܵܠܡܝܼܢ. ܐܵܡܹܝܢ.
ܘܐܵܡܲ̇ܪ ܫܲܡܵܫܵܐ ܠܘܵܬܼ ܥܲܡܵܐ:
ܫܲܒܲܚܘ ܠܐܲܠܵܗܵܐ ܚܲܝܵܐ.
ܘܫܵܩܹܠ ܟܵܗܢܵܐ ܒܘܼܟܼܪܵܐ ܒܐܝܼܖܹܗ ܕܣܸܡܵܠܵܐ ܘܲܡܚܲܘܸܐ ܠܹܗ
ܠܥܲܡܵܐ ܟܲܖ ܡܲܣܡܸܟ ܠܹܗ ܥܲܠ ܟܵܣܵܐ.
ܘܥܵܢܹܝ̇ܢ:
ܬܸܫܒܘܿܚܬܵܐ ܠܹܗ ܒܥܹܕܬܹܗ، ܘܲܥܠܲܝܢ ܪ̈ܲܚܡܵܘܗܝ ܘܲܚܢܵܢܹܗ
ܒܟܠܗܘܿܢ ܙܲܒܼܢܹ̈ܐ ܘܥܸܕܵܢܹ̈ܐ.
ܘܐܵܡܪܝܼܢ ܥܘܿܢܝܼܬܼܵܐ ܗܵܖܹܐ:
ܢܹܐܟܼܠܘܼܢ ܡܸܣܟܹܝ̈ܢܹܐ ܘܢܸܣܒܥܘܼܢ:
ܦܲܓܼܪܹܗ ܕܲܡܫܝܼܚܵܐ ܘܲܕܡܹܗ ܝܲܩܝܼܪܵܐ،
ܥܲــܠ ܡܲܖܒܲܚ ܩܘܼܖܫܵܐ. ܒܕܸܚܠܬܼܵܐ ܘܲܒܪܸܚܡܬܼܵܐ ܟܠܲܢ
ܢܸܬܼܩܲܪܲܒܼ ܠܹܗ،
ܘܥܲܡ ܡܲܠܲܐܟܹ̈ܐ ܢܝܲܒܸـܒܼ ܠܹــܗ؛
ܩܲܕܝܼـܫ ܩܲܕܝܼـܫ ܩܲܕܝܼـܫ ܡܵܪܝܵــܐ ܐܲܠܵــܗܵܐ܀
ܘܩܵܪܹܒܼ ܟܵܗܢܵܐ ܠܦܵܬܼܘܿܪܵܐ ܘܲܡܨܲܠܸܐ ܓ. ܙܲܒܼܢܝܼ̈ܢ:
ܩܲܕܸܫ ܦܲܓܼܪ̈ܲܝܢ ܒܦܲܓܼܪܵܟܼ ܩܲܕܝܼܫܵܐ، ܘܚܲܣܵܐ ܚܲܘܒܲܝ̈ܢ
ܒܲܕܡܵܟܼ ܝܲܩܝܼܪܵܐ، ܘܕܲܟܵܐ ܬܹܐܪ̈ܵܬܲـܢ ܒܙܘܿܦܵܐ
ܕܲܚܢܵܢܵܟܼ،
ܡܫܝܼܚܵܐ ܣܲܒܼܪܹܗ ܕܲܟܝܵܢܲܢ ܠܥܵܠܡܝܼܢ.
ܘܢܵܣܹ̇ܒܼ ܩܘܼܖܫܵܐ ܒܐܝܼܖܹܗ ܟܲܖ ܐܵܡܲ̇ܪ:
ܡܵܪܝܵܐ ܡܫܝܼܚܵܐ ܛܥܝܼܢ ܐ̄ܢܵܐ ܟܲܖ ܠܵܐ ܫܵܘܹ̇ܐ ܐ̄ܢܵܐ،
ܥܘܼܬܼܪܵܐ ܕܪ̈ܲܚܡܲܝܟ ܘܪܲܒܘܼܬܼ ܚܲܝܠܹܗ ܕܐ̄ܪܵܙܵܟܼ
ܕܚܝܼܠܵܐ، ܕܲܒܛܲܝܒܘܼ ܢܵܣܹ̇ܒܼ ܐ̄ܢܵܐ، ܚܲܘܵܐ ܒܝܼ ܐܵܦܸܢ
ܠܵܐ ܫܵܘܹ̇ܐ ܐ̄ܢܵܐ
ܘܩܵܪܹܒܼ.
ܘܟܸܢ ܠܵܒܹ̇ܟܼ ܠܟܵܣܵܐ ܟܲܖ ܐܵܡܲ̇ܪ:
ܟܵܣܵܐ ܕܲܖܡܵܟܼ ܝܲܩܝܼܪܵܐ ܡܙܲܓܼܬ ܒܵܗ̇ ܒܡܸܫܬܘܼܬܼܵܟܼ
ܠܟܸܢܫܹ̈ܐ ܕܲܙܡܝܼܢܲܝ̈ܟ، ܐܘܿ ܚܲܬܼܢܵܐ ܫܡܲܝܵܢܵܐ، ܘܡܸܢܵܗ̇
ܐܲܫܩܝܼܬ ܠܚܲܛܵܝܘܼܬܼܝ. ܫܘܼܒܼܚܵܐ ܠܵܟܼ ܥܲܠ ܚܘܼܒܵܟܼ ܕܠܵܐ
ܡܸܬܼܡܲܠܲܠ.
ܘܢܵܣܹ̇ܒܼ.
ܘܡܵܐ ܕܐܸܫܬܲܘܬܲܦ ܟܵܗܢܵܐ،
ܡܲܙܥܸܩ ܡܫܲܡܫܵܢܵܐ:
ܒܲܪܸܟܼܡܵܪܝ.
ܘܲܡܚܲܘܸܐ ܟܵܗܢܵܐ ܩܘܼܖܫܵܐ ܠܥܲܡܵܐ ܟܲܖ ܐܵܡܲ̇ܪ ܒܩܵܠܵܐ
ܫܡܝܼܥܵܐ:
ܡܲܘܗܲܒܼܬܼܵܐ ܕܛܲܝܒܘܼܬܹܗ ܕܡܲܚܝܵܢܲܢ ܡܵܪܲـܢ ܝܑܼܫܘܿܥ
ܡܫܝܼܚܵܐ ܬܸܫܬܲܡܠܸܐ ܒܪ̈ܲܚܡܹܐ ܥܲܡ ܟܠܲܢ.
ܘܥܵܢܹܝ̇ܢ:
ܠܥܵܠܲܡ ܥܵܠܡܝܼܢ ܐܵܡܹܝܢ.
ܘܩܵܥܹ̇ܐ ܗܘ݂ ܡܫܲܡܫܵܢܵܐ:
ܐܲܚܲܝ̈ ܩܲܒܸܠܘ ܦܲܓܼܪܹܗ ܕܲܒܪܵܐ ܐܵܡܪܵܐ ܥܹܕܬܵܐ، ܘܐܸܫܬܵܘ
ܟܵܣܹܗ ܒܗܲܝܡܵܢܘܼܬܼܵܐ ܒܹܝܬܼ ܡܲܠܟܘܼܬܼܵܐ.
ܘܩܵܪܒ̇ܝܼܢ ܢܵܣܘܿܒܹ̈ܐ ܕܢܸܫܬܲܘܬܦܘܼܢ. ܟܲܖ ܠܘܼܩܖܵܡ
ܡܥܲܛܪܝܼܢ ܐܝܼܖܲܝ̈ܗܘܿܢ ܒܒܸܣܡܹ̈ܐ ܐܸܢ ܡܵܨܝܵܐ. ܘܗܵܟܲܢܵܐ
ܩܵܪܒܿܝܼܢ؛ ܩܲܖܡܵܐܝܼܬܼ ܩܠܹܪܝܼܩܵܝܹ̈ܐ، ܐܵܘܟܹܝܬܼ:
ܐܲܦܸܣـܩ̈ܘܿܦܹܐ ܘܩܲܫ̈ܝܼܫܹܐ ܘܲܡܫܲܡܫܵܢܹ̈ܐ، ܒܣܸܖܪܵܐ
ܕܖܲܪ̈ܓܲܝܗܘܿܢ ܐܵܬܹܝܢ ܠܘܵܬܼ ܡܲܖܒܚܵܐ، ܘܲܠܟܠܚܲܖ ܡܸܢܗܘܿܢ
ܢܸܬܼܝܼܗܸܒܼ ܠܹܗ ܕܢܸܫܬܲܘܬܲܦ ܒܦܲܓܼܪܵܐ ܚܲܝܵܐ ܡ̣ܢ ܐܝܼܖܹܗ
ܕܲܡܩܲܕܫܵܢܵܐ، ܘܲܒܟܵܣܵܐ ܕܲܟܼܝܵܐ ܡ̣ܢ ܐܝܼܖܹܗ
ܕܲܡܫܲܡܫܵܢܵܐ.
ܘܢܵܚܹ̇ܬܼ ܟܵܗܢܵܐ ܠܲܬܼܪܲܥ ܩܲܢܟܹܐ ܟܲܖ ܛܥܝܼܢ ܦܵܬܼܘܿܪܵܐ
ܘܥܲܡܹܗ ܡܫܲܡܫܵܢܵܐ ܟܲܖ ܛܥܝܼܢ ܟܵܣܵܐ. ܘܗܵܝܕܹܝܢ ܩܵܪܒ̇ܝܼܢ
ܥܲܠ ܬܲܪܥܵܐ ܕܩܲܢܟܹܐ ܗܹܘܦܲܕܝܵܩܢܹ̈ܐ ܘܩܵܪ̈ܘܿܝܹܐ ܘܫܲܪܟܵܐ
ܕܢܵܣܘܿܒܹ̈ܐ ܕܢܸܫܬܲܘܬܦܘܼܢ. ܘܦܵܫܹ̇ܛ ܢܵܣܘܿܒܼܵܐ ܐܝܼܖܵܘ̈ܗܝ
ܒܛܘܼܦ̮ܣܵܐ ܕܲܨܠܝܼܒܼܵܐ، ܘܣܵܐܹ̇ܡ ܟܵܗܢܵܐ ܠܦܲܓܼܪܵܐ ܥܲܠ
ܐܝܼܖܹܗ ܕܝܲܡܝܼܢܵܐ ܕܢܵܣܘܿܒܼܵܐ ܟܲܖ ܐܵܡܲ̇ܪ:
ܦܲܓܼܪܹܗ ܕܡܵܪܲـܢ،
ܐܵܘ
ܦܲܓܼܪܹܗ ܕܲܡܫܝܼܚܵܐ، ܐܵܘ
ܦܲܓܼܪܹܗ ܕܡܲܠܟܵܐ ܡܫܝܼܚܵܐ (ܠܐܲܦܸܣـܩܘܿܦܵܐ
ܚܲܣܝܵܐ، ܐܵܘ ܠܟܵܗܢܵܐ
ܢܲܟܼܦܵܐ،
ܐܵܘ
ܠܲܡܫܲܡܫܵܢܵܐ ܕܐܲܠܵܗܵܐ،
ܐܵܘ ܠܲܡܗܲܝܡܢܵܐ
ܙܲܗܝܵܐ): ܠܚܘܼܣܵܝܵܐ
ܕܚܲܘ̈ܒܹܐ ܘܲܠܚܲܝܹ̈ܐ ܕܲܠܥܵܠܲܡ.
ܘܥܵܢܹ̇ܐ ܢܵܣܘܿܒܼܵܐ:
ܐܵܡܹܝܢ.
ܘܡܸܬܼܒܲܪܲܟܼ ܒܩܘܼܖܫܵܐ ܟܲܖ ܡܲܩܪܸܒܼ
ܠܹܗ
ܒܹܝܬܼ
ܥܲܝ̈ܢܵܘܗܝ ܘܟܸܢ ܢܵܣܹ̇ܒܼ ܠܹܗ.
ܘܲܡܫܲܡܫܵܢܵܐ ܐܵܡܲ̇ܪ ܥܲܠ ܟܵܣܵܐ:
ܕܡܹܗ ܕܡܵܪܲܢ،
ܐܵܘ
ܕܡܹܗ ܕܲܡܫܝܼܚܵܐ،
ܐܵܘ
ܕܡܵܐ ܝܲܩܝܼܪܵܐ؛
ܠܚܘܼܣܵܝܵܐ ܕܚܲܘ̈ܒܹܐ ܘܲܠܚܲܝܹ̈ܐ ܕܲܠܥܵܠܲܡ.
ܐܵܘ ܡܸܫܬܘܼܬܼܵܐ
ܪܘܼܚܵܢܵܝܬܵܐ
(ܠܟܠ ܐ̄ܢܵܫ ܠܦܘܼܬܼ ܕܲܪܓܹܗ)
ܠܚܲܝܹ̈ܐ ܕܲܠܥܵܠܲܡ.
ܘܥܵܢܹ̇ܐ ܢܵܣܘܿܒܼܵܐ:
ܐܵܡܹܝܢ.
ܘܫܵܬܹ̇ܐ.
ܘܡܵܨܝܵܐ ܕܢܸܬܼܝܼܗܸܒܼ ܩܘܼܖܫܵܐ ܒܲܨܒܼܵܥܬܵܐ ܕܲܩܨܵܝܵܐ
ܒܲܖܡܵܐ، ܘܗܵܝܕܹܝܢ ܣܵܐܹ̇ܡ ܟܵܗܢܵܐ ܠܲܩܨܵܝܵܐ ܒܦܘܼܡܹܗ
ܕܢܵܣܘܿܒܼܵܐ ܟܲܖ ܐܵܡܲـ̇ܪ:
ܦܲܓܼܪܹܗ ܘܲܕܡܹܗ ܕܡܵܪܲـܢ،
ܠܲܡܗܲܝܡܢܵܐ ܙܲܗܝܵܐ، ܠܚܘܼܣܵܝܵܐ ܕܚܲܘ̈ܒܹܐ ܘܲܠܚܲܝܹ̈ܐ
ܕܲܠܥܵܠܲܡ.
ܘܥܲܖ ܡܸܬܼܦܲܠܲܓܼ ܩܘܼܖܫܵܐ ܐܵܡ̇ܪܝܼܢ ܩܝܼܢܬܵܐ ܚܖܵܐ
ܕܡܲܣܒܼܵܐ ܕܐ̄ܪ̈ܵܙܹܐ.
ܘܟܸܢ ܐܵܡ̇ܪܝܼܢ ܬܸܫܒܘܿܚܬܵܐ ܕܩܘܼܒܵܠܛܲܝܒܘܼܬܼܵܐ ܕܡܵܪܝ
ܛܝܼܡܵܬܼܵܐܘܿܣ ܩܵܬܼܘܿܠܝܼܩܵܐ:
ܐ̄ܪ̈ܵܙܹܐ ܕܲܢܣܲܒܼܢ ܒܗܲܝܡܵܢܘܼܬܼܵܐ،
ܢܸܗܘܘܿܢ ܠܲܢ ܡܵܪܝ ܠܚܘܼܣܵܝ ܚܲܘܒܹ̈ܐ. ܕܡܘܼܬܼܵܐ ܕܥܲܒܼܕܵܐ
ܘܲܕܥܵܒܼܘܿܖܵܐ،
ܐܲܢ̄ܬܘܼ ܡܫܝܼܚܵܐ ܡܲܠܟܵܐ ܕܥܵܠܡܹـ̈ـܐ. ܒܦܲܓܼܪܵܟܼ ܘܲܕܡܵܟܼ
ܚܲܣܝܼܬ ܘܲܫܒܲܩ̣ܬ،
ܡܘܼܡܹ̈ܐ ܘܚܲܘ̈ܒܹܐ ܕܟܠ ܕܗܲܝܡܸܢܘ ܒܵܟܼ. ܘܐܲܫܘܵܐ ܠܟܠܲܢ
ܕܲܒܓܸܠܝܵܢܵܟܼ،
ܒܦܵܪܹܗ̄ܣܝܼܵܐ ܢܸܦܘܿܩ ܠܐܘܼܪܥܵــܟܼ. ܘܥܲܡ ܣܸـܖܪ̈ܲܝܗܘܿܢ
ܕܲܫܡܲܝܵܢܹ̈ܐ،
ܢܲܣܸܩ ܫܘܼܒܼܚܵܐ. ܐܵܡܹܝܢ ܘܐܵܡܹܝܢ.
ܘܡܵܐ
ܕܲܫܩ݂ܲܠ ܥܲܡܵܐ ܩܘܼܖܫܵܐ
ܦܵܢܹ̇ܐ ܟܵܗܢܵـܐ
ܠܡܲܖܒܚܵܐ.
ܘܡܲܟܪܸܙ
ܫܲܡܵܫܵܐ
ܟܲܖ ܐܲܦܵܘ̈ܗܝ ܠܥܲܡܵܐ:
ܟܠܲܢ ܗܵܟܹܝܠ ܐܲܝܠܹܝܢ ܕܲܒܝܲܖ ܡܲܘܗܲܒܬܼܵܐ ܕܛܲܝܒܘܼܬܵܐ
ܕܪܘܼܚܵܐ ܕܩܘܼܖܫܵܐ، ܩܪܸܒܼܢܲܢ ܘܐܸܫܬܘܝܼܢܲܢ ܘܐܸܫܬܲܘܬܲܦܢܲܢ
ܒܡܲܣܒܼܵܐ ܕܐ̄ܪ̈ܵܙܹܐ ܗܵܠܹܝܢ ܫܒܼܝܼ̈ܚܹܐ ܘܩܲܕܝܼ̈ܫܹܐ
ܘܡܲܚܝ̈ܵܢܹܐ ܘܐܲܠܵܗܵܝܹ̈ܐ، ܢܲܘܕܸܐ ܟܠܲܢ ܐܲܟܼܚ̄ܖ ܘܲܢܫܲܒܲܚ
ܠܐܲܠܵܗܵܐ ܝܵܗܘܿܒܼܗܘܿܢ.
ܘܥܵܢܹܝ̇ܢ:
ܫܘܼܒܼܚܵܐ ܠܹܗ ܥܲܠ ܡܲܘܗܲܒܼܬܹܗ ܕܠܵܐ ܡܸܬܼܡܲܠܠܵܐ.
ܫܲܡܵܫܵܐ:
ܢܨܲܠܸܐ. ܫܠܵܡܵܐ ܥܲܡܲܢ.
ܘܲܡܨܲܠܸܐ ܟܵܗܢܵـܐ ܒܩܵܠܵܐ ܫܡܝܼܥܵܐ:
ܬܸܫܒܘܿܚܬܵܐ ܡܵܪܝ ܘܐܝܼܩܵܪܵܐ ܘܬܲܘܕܝܼܬܼܵܐ ܘܣܸܓܼܕܬܼܵܐ
ܘܩܘܼܒܵܠ ܛܲܝܒܘܼܬܼܵܐ ܐܲܡܝܼܢܬܵܐ ܚܲܝܵܒܼܝܼܢܲܢ ܠܡܲܣܵܩܘܼ
ܠܲܬܠܝܼܬܵܝܘܼܬܼܵܟܼ ܡܫܲܒܲܚܬܵܐ،
ܥܲܠ ܐܲܦܲܝ̈ ܡܲܘܗܲܒܼܬܼܵܐ ܕܐ̄ܪ̈ܵܙܹܐ ܩܲܕܝܼܫܹܐ ܕܝܲܗ̄ܒܼܬ
ܠܲܢ ܒܲܚܢܵܢܵܟܼ ܠܚܘܼܣܵܝ ܚܲܘ̈ܒܵܬܲܢ،
ܡܵܪܵܐ ܕܟܠ ܐܲܒܵܐ ܘܲܒܪܵܐ ܘܪܘܼܚܵܐ ܕܩܘܼܖܫܵܐ ܠܥܵܠܡܝܼܢ.܀
ܘܥܵܢܹܝ̇ܢ:
ܐܵܡܹܝܢ. ܒܲܪܸܟܼܡܵܪܝ.
ܘܲܡܨܲܠܸܐ ܚܒܲܪܬܼܵܗ
ܒܪܝܼܟܼ ܐܝܼܩܵܪܵܟܼ ܣܓܼܝܼܖܵܐ ܡ̣ܢ ܐܲܬܼܪܵܟܼ ܡܥܲܠܝܵܐ
ܡܚܲܣܝܵܢܵܐ ܕܚܲܘ̈ܒܲܝܢ ܘܕܲܚ̈ܛܵܗܲܝܢ،
ܘܡܲܥܒܪܵܢܵܐ ܕܣܲܟܼ̈ܠܘܵܬܲـܢ ܒܐ̄ܪ̈ܵܙܵܘܗܝ ܫܒܼܝܼ̈ܚܹܐ
ܘܩܲܕܝܼ̈ܫܹܐ ܘܡܲܚܝܵܢ̈ـܹܐ ܘܐܲܠܵܗܵܝܹ̈ܐ.
ܡܫܝܼܚܵܐ ܣܲܒܼܪܹܗ ܕܲܟܝܵܢܲܢ ܒܟܠ ܥܸܕܵܢ ܠܥܵܠܡܝܼܢ.܀
ܘܩܵܥܹܝܢ ܥܘܼܢܵܝܵܐ:
ܒܪܝܼܟܼ ܦܲܓܼܪܵܟܼ ܘܲܕܡܵܟܼ ܡܵܪܲـܢ، ܠܚܘܼܣܵܝܵܐ ܕܥܲܡܡܹ̈ܐ
ܝܲܗ̄ܒܼܬܵܝܗܝ، ܘܒܹܗ ܩܲܕܫܬܵܝܗܝ ܠܲܟܝܵܢܲܢ، ܕܢܸܙܡܲܪ
ܫܘܼܒܼܚܵܐ ܠܡܵܪܘܼܬܼܵܟܼ. ܗܲܠܹܠܘܼܝܵܐ. ܗܲܠܹܠܘܼܝܵܐ.
ܫܲܡܵܫܵܐ:
ܒܲܪܸܟܼܡܵܪܝ.
ܘܢܵܦܹܩ ܟܵܗܢܵܐ ܘܩܵܐܹ̇
ܡ ܒܲܬܼܪܲܥ ܡܲܖܒܚܵܐ، ܡܢ݂ ܝܲܡܝܼܢܵܐ ܕܩܲܢܟܹܐ، ܘܲܡܒܲܪܸܟܼ
ܠܥܲܡܵܐ.
ܚܘܬܡܐ
ܡܵܪܲـܢ ܝܑܼܫܘܿܥ ܡܫܝܼܚܵܐ ܕܫܲܡܸܫܢܵܝܗܝ ܘܙܲܝܲܚܢܵܝܗܝـ
ܘܝܲܩܲܪܢܵܝܗܝـ،
ܒܐ̄ܪ̈ܵܙܵܘܗܝ ܫܒܼܝܼ̈ܚܹܐ ܘܩܲܕܝܼ̈ܫܹܐ ܘܡܲܚܝܵܢܹ̈ܐ
ܘܐܲܠܵܗܵܝܹ̈ܐ،
ܗܘ̣ ܢܲܫܘܸܐ ܠܲܢ ܠܫܘܼܒܼܚܵܐ ܦܲܐܝܵܐ ܕܡܲܠܟܘܼܬܹܗ،
ܘܲܠܒܘܼܣܵܡܵܐ ܕܥܲܡ ܡܲܠܲܐܟܼܵܘ̈ܗܝ ܩܲܕܝܼܫܹ̈ܐ،
ܘܲܠܓܲܠܝܘܼܬܼ ܐܲܦܹ̈ܐ ܕܲܩܖܵܡܵܘܗܝ،
ܘܲܠܩܲܘܡܵܐ ܕܡ̣ܢ ܝܲܡܝܼܢܹܗ ܒܐܘܿܪܸܫܠܸܡ ܕܲܠܥܸܠ،
ܒܛܲܝܒܘܼܬܹܗ ܘܲܒܪ̈ܲܚܡܵܘܗܝ.
ܕܠܹܗ ܫܘܼܒܼܚܵܐ،
ܘܲܥܠܲܝܢ ܘܥܲܠ ܟܠ ܒܸܪ̈ܝܵܢ ܬܲܓܸܢ ܝܲܡܝܼܢܵܐ ܕܲܒܛܝܼܠܘܼܬܹܗ،
ܗܵܫܵܐ
(♰)
ܘܲܒܟܠܙܒܲܢ ܘܲܠܥܵܠܲܡ ܥܵܠܡܝܼܢ܀
ܘܪܵܫܹ̇ܡ ܥܲܠ ܥܲܡܵܐ.
ܐ̄ܚܪܢܐ
ܠܲܕܚܲܣܝܼ ܚܲܘܒܲܝ̈ܢ ܒܦܲܓܼܪܹܗ، ܘܲܥܛܵܐ ܠܲܚܛܵܗܲܝܢ ܒܲܕܡܹܗ،
ܬܸܫܒܘܿܚܬܵܐ ܠܹܗ ܒܥܹܕܬܹܗ، ܘܲܥܠܲܝܟܘܿܢ ܐܘܿ ܥܲܡܹܗ ܕܡܵܪܝܵܐ
ܘܥܵܢܵـ̈ܐ ܕܡܲܪܥܝܼܬܹܗ، ܢܲܫܦܲܥ ܥܠܲܝܟܘܿܢ ܛܵܒܼܵܬܹ̈ܗ،
ܘܢܲܡܛܲܪ ܒܒܼܵܬܲܝ̈ܟܘܿܢ ܒܘܼܪ̈ܟܵܬܹܗ ܘܡܲܘ̈ܗܒܼܵܬܹܗ،
ܘܲܢܦܲܨܹܝܟܼܘܿܢ ܡܵܪܲـܢ ܘܐܲܠܵܗܲܢ ܡ̣ܢ ܒܝܼܫܵܐ
ܘܚܲܝ̈ܠܵܘܵܬܹܗ،
ܒܲܨܠܘܿܬܼ ܡܵܪܬܝ ܡܲܪܝܲܡ ܛܘܼܒܼܵܢܝܼܬܼܵܐ ܘܲܕܟܠܗܘܿܢ
ܩܲܕܿܝܼ̈ܫܹܐ.
ܘܬܸܗܘܘܿܢ ܚܬܼܝܼ̈ܡܹܐ ܘܲܢܛܝܼܪܹ̈ܐ ܡ̣ܢ ܟܠ ܢܸܟܼܝܵܢܝܼ̈ܢ
ܟܣܲܝ̈ܵܐ ܘܲܓܠܲܝ̈ܵܐ،
ܗܵܫܵܐ
(♰)
ܘܲܒܟܠܙܒܲܢ ܘܲܠܥܵܠܲܡ ܥܵܠܡܝܼܢ.܀
ܐ̄ܚܪܢܐ
ܡܵܪܲـܢ ܝܑܼܫܘܿܥ ܡܫܝܼܚܵܐ، ܕܲܫܩܲܠܢܲܢ ܦܲܓܼܪܹܗ ܡ̣ܢ
ܦܝܼܠܵܣܵܐ، ܘܐܸܫܬܝܼܢܲܢ ܠܲܕܡܹܗ ܡ̣ܢ ܟܵܣܵܐ، ܗܘ̣ ܢܲܫܘܸܐ
ܠܲܢ ܕܥܲܡ ܓܲܝܵܣܵܐ،
ܢܸܙܡܲܪ ܠܹܗ ܫܘܼܒܼܚܵܐ ܒܦܲܪܕܲܝܣܵܐ، ܥܲܡ ܟܹܐܢܹ̈ܐ ܓܵܡܪ̈ܲܝ
ܨܸܒܼܝܵܢܹܗ، ܒܐܘܿܪܸܫܠܸܡ ܕܲܠܥܸܠ، ܕܗܘ̣ ܡܫܝܼܚܵܐ ܣܲܒܼܪܹܗ
ܕܲܟܝܵܢܲܢ،
ܗܵܫܵܐ
(♰)
ܘܲܒܟܠܙܒܲܢ ܘܲܠܥܵܠܲܡ ܥܵܠܡܝܼܢ.܀
܀
ܫܠܡ
܀
ܘܲܡܨܲܠܸܐ ܟܵܗܢܵܐ ܨܠܘܿܬܼܵܐ ܕܩܘܼܒܵܠ ܛܲܝܒܘܼܬܼܵܐ
