ܛܲܟܼܣܵܐ
ܕܐ̄ܪ̈ܵܙܹܐ ܐܲܠܵܗܵܝܹ̈ܐ
ܕܥܹܕܬܵܐ ܕܡܲܖܢܚܵܐ
ܕܟܲܠܕܵܝܹ̈ܐ ܘܐܵܬܼܘܿܪ̈ܵܝܹܐ
ܐܲܨܲܚܬܵܐ ܡܫܲܪܲܪܬܵܐ ܕܚܘܼܕܵܬܼܵܐ ܛܲܟܼܣܵܝܵܐ
ܟܬܼܵܒܼܵܐ ܕܥܲܡܵܐ ܀ ܣܘܵܖܵܝܵܐ
2007
ܛܟܣܐ ܕܓܠܝܢܗ ܕܡܪܢ
ܟܵܗܢܵܐ:
ܒܫܸܡ ܐܲܒܵܐ ܘܲܒܪܵܐ ܘܪܘܼܚܵܐ ܕܩܘܼܖܫܵܐ. ܬܸܫܒܘܿܚܬܵܐ ܠܐܲܠܵܗܵܐ
ܒܲܡܪ̈ܲܘܡܹܐ،
ܘܥܲܠ ܐܲܪܥܵܐ ܫܠܵܡܵܐ ܘܣܲܒܼܪܵܐ ܛܵܒܼܵܐ ܠܲܒܢܲܝ̈ܢܵܫܵܐ ܒܟܠܥܸܕܵܢ
ܠܥܵܠܡܝܼܢ.
ܥܲܡܵܐ:
ܒܲܪܸܟܼܡܵܪܝ، ܐܲܒܘܼܢ ܕܒܲܫܡܲܝܵܐ ܢܸܬܼܩܲܕܲܫ ܫܡܵܟܼ ܬܹܐܬܸܐ
ܡܲܠܟܘܼܬܼܵܟܼ؛
ܩܲܕܝܼܫ ܩܲܕܝܼܫ ܩܕܝܼܫܲܬ ܐܲܒܘܼܢ ܕܒܲܫܡܲܝܵܐ،
ܕܲܡܠܹܝܢ ܫܡܲܝܵـ̈ܐ ܘܐܲܪܥܵܐ ܪܲܒܘܼܬܼ ܫܘܼܒܼܚܵܟܼ. ܥܝܼܪܹ̈ܐ
ܘܐ̄ܢܵܫܵـ̈ܐ ܩܵܥܹܝ̇ܢ ܠܵܟܼ؛
ܩܲܕܝܼܫ ܩܲܕܝܼܫ ܩܕܝܼܫܲܬ.
ܟܵܗܢܵܐ:
ܫܘܼܒܼܚܵܐ ܠܐܲܒܵܐ ܘܠܲܒܪܵܐ ܘܲܠܪܘܼܚܵܐ ܕܩܘܼܖܫܵܐ.
ܥܲܡܵܐ:
ܡܢ݂ ܥܵܠܲܡ ܘܲܥܖܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ. ܐܲܒܘܼܢ
ܕܒܲܫܡܲܝܵܐ ܢܸܬܼܩܲܕܲܫ ܫܡܵܟܼ...
ܫܲܡܵܫܵܐ؛
ܫܠܵܡܵܐ ܥܲܡܲܢ.
ܟܵܗܢܵܐ:
ܩܵܕ̄ܡܸܕ ܬܪܘܿܢܘܼܣ ܡܵܪܝܼ ܫܒܼܝܼܚܵܐ ܕܪܲܒܘܼܬܼܘܼܟܼ، ܘܟܘܼܪܣܝܵܐ
ܪܵܡܵܐ ܘܥܸܠܝܵܐ ܕܐܝܼܩܵܪܘܼܟܼ، ܘܒܹܝܡܵܐ ܗܹܝܒܵܢܬܵܐ
ܕܥܲܙܝܼܙܘܼܬܹܗ ܕܚܘܼܒܘܼܟܼ، ܘܡܲܖܒܚܵܐ ܡܚܲܣܝܵܢܵܐ ܕܸܢܨܸܒܼܠܹܗ
ܪܸܡܙܘܼܟܼ، ܘܐܲܬܼܪܵܐ ܕܸܫܪܹܝܬܼܵܐ ܕܫܘܼܒܼܚܘܼܟܼ،
ܐܲܚܢܝܼܢ̄ ܥܲܡܵܐ ܕܝܼܠܘܼܟܼ ܘܥܸܪ̈ܒܹܐ ܕܡܲܪܥܝܼܬܼܘܼܟܼ، ܥܸܡܸܕ
ܐܲܠܦܹ̈ܐ ܕܟܪ̈ܘܼܒܹܐ ܡܗܲܠܠܵܢܹ̈ܐ ܜܵܠܘܼܟܼ، ܘܐܲܠܦܵܝܹ̈ܐ
ܕܣܪ̈ܵܦܹܐ ܘܕܪ̈ܵܒܹܐ ܕܡܲܠܵܐܟܹ̈ܐ ܡܩܲܕܫܵܢܘܼܟܼ، ܟܒܲܪܟܘܼܟܼ
ܘܟܣܲܓܕܘܼܟܼ، ܟܡܘܿܕܘܼܟܼ ܘܟܸܡܫܲܒܚܘܼܟ، ܒܟܘܿܠ ܥܸܕܵܢܵܐ ܡܵܪܵܐ
ܕܟܘܿܠ، ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܖܫܵܐ ܠܥܵܠܡܝܼܢ.
ܥܲܡܵܐ:
ܐܵܡܹܝܢ.
(ܥܘܿܢܝܼܬܼܵܐ ܕܩܲܢܟܹܐ)
ܟܵܗܢܵܐ:
ܘܟܘܼܕ
ܧܵܝܸܚ
ܒܲܢ ܡܵܪܲܢ ܘܐܲܠܵܗܲܢ ܪܝܼܚܵܐ
ܗܲܢܝܼܐܵܐ
ܕܒܲܣܝܼܡܘܼܬܼܵܐ
ܕܚܘܼܒܘܼܟܼ، ܘܒܵܗܪܝܼܢ̄ ܓܝܵܢܵܬܼ̈ܢ ܒܝܼܖܲܥܬܵܐ ܕܚܲܩܘܼܬܼܘܼܟܼ،
ܜܵܒܼܘܼܟܼ ܬܲܕ ܩܲܒܠܘܼܟܼ ܓܸܠܝܵܢܘܼܟܼ
ܕܡ̣ܢ
ܫܡܲܝܵܐ.
ܘܛܲܠܸܒܸܕ ܟܘܼܠܲܝ ܥ̈ܘܿܢܹܐ ܕܝܼܠܘܼܟܼ ܘܢܲܥܡܸܬܝ̈ܵܬܼܘܼܟܼ
ܥܒܼܝܼ̈ܖܹܐ ܛܵܠܲܢ، ܟܫܲܟܪܘܼܟܼܠܘܼܟܼ
ܘܟܸܡܫܲܒܚܘܼܟܼܠܘܼܟܼ
ܕܠܵܐ ܒܜܵܠܵܐ ܒܥܹܕܬܘܼܟ ܡܟܘܼܠܵܠܬܵܐ ܡܠܝܼܬܼܵܐ
ܟܘܼܠ ܥܘܿܢܹ̈ܐ
ܘܟܘܼܠ ܜܘܼܒܹ̈ܐ، ܕܐܵܝܸܬ ܐܝܼܘܸܬ ܡܵܪܵܐ ܘܒܵܪܘܿܝܵܐ
ܕܟܘܿܠ ܠܥܵܠܡܝܼܢ.
ܥܲܡܵܐ:
ܐܵܡܹܝܢ.
ܠܵܟܼܘܼ ܡܵܪܵܐ
ܠܵܟܼܘܼ ܡܵܪܵܐ ܕܟܠܵܐ ܡܲܘܕܹܝܢܲܢ،
ܘܠܵܟܼ ܝܑܼܫܘܿܥ ܡܫܝܼܚܵܐ ܡܫܲܒܚܝܼܢܲܢ،
ܕܐܲܢ̄ܬܘܼ ܡܢܲܚܡܵܢܵܐ ܕܦܲܓܼܪ̈ܲܝܢ،
ܘܐܲܢ̄ܬܘܼ ܦܵܪܘܿܩܵܐ ܕܢܲܧܫ̈ܵܬܲܢ.
ܫܲܡܵܫܵܐ:
ܛܵܒܼ ܠܡܲܘܕܵܝܘܼ ܠܡܵܪܝܵܐ ܘܲܠܡܸܙܡܲܪ ܠܲܫܡܵܟܼ ܡܪܲܝܡܵܐ.
ܥܲܡܵܐ:
ܠܵܟܼܘܼ ܡܵܪܵܐ...
ܘܫܲܪܟܵܐ.
ܫܲܡܵܫܵܐ:
ܫܘܼܒܼܚܵܐ ܠܐܲܒܵܐ ܘܠܲܒܪܵܐ ܘܲܠܪܘܼܚܵܐ ܕܩܘܼܖܫܵܐ،
ܡ̣ܢ ܥܵܠܲܡ ܘܲܥܖܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ.
ܥܲܡܵܐ:
ܠܵܟܼܘܼ ܡܵܪܵܐ...
ܫܲܡܵܫܵܐ:
ܢܨܲܠܸܐ. ܫܠܵܡܵܐ ܥܲܡܲܢ.
ܟܵܗܢܵܐ؛
ܐܵܝܸܬ ܐܝܼܘܸܬ ܡܵܪܝܼ ܒܚܲܩܘܼܬܼܵܐ
ܡܢܲܚܡܵܢܵܐ ܕܦܲܓܪܹ̈ܐ ܕܝܼܠܲܢ، ܘܐܵܝܸܬ ܐܝܼܘܸܬ ܡܚܲܠܨܵܢܵܐ
ܜܵܒܼܵــܐ ܕܸܓܝܵܢܵܬܼ̈ܢ، ܘܢܲܜܵܪܵܐ
ܐܲܡܝܼܢ ܕܚܵܝܲܢ، ܘܜܵܠܘܼܟܼ ܡܵܪܝܼ ܕܹܝܢܵܢܹ̈ܐ
ܝܼܘܘܼܟܼ ܕܫܲܟܪܘܼܟܼ ܘܣܲܓܖܘܼܟܼ ܘܡܫܲܒܚܘܼܟܼ
ܒܟܘܿܠ ܥܸܕܵܢܵܐ، ܡܵܪܵܐ ܕܟܠ ܠܥܵܠܡܝܼܢ.
ܥܲܡܵܐ:
ܐܵܡܹܝܢ
ܛܟܣܐ ܕܡܠܬܐ ܕܐܠܗܐ
ܫܲܡܵܫܵܐ:
ܐܲܪܝܼܡܘ ܩܵܠܟܼܘܿܢ ܘܫܲܒܲܚܘ ܟܠܹܗ ܥܲܡܵܐ ܠܐܲܠܵܗܵܐ ܚܲܝܵܐ.
ܥܲܡܵܐ:
ܩܲܕܝܼܫܵܐ ܐܲܠܵܗܵܐ،
ܩܲܕܝܼܫܵܐ ܚܲܝܠܬܼܵܢܵܐ،
ܩܲܕܝܼܫܵܐ ܠܵܐ ܡܵܝܘܿܬܼܵܐ،
ܐܸܬܼܪܲܚܲܡܥܠܲܝܢ.
ܫܲܡܵܫܵܐ:
ܫܘܼܒܼܚܵܐ ܠܐܲܒܵܐ ܘܠܲܒܪܵܐ ܘܲܠܪܘܼܚܵܐ ܕܩܘܼܖܫܵܐ.
ܥܲܡܵܐ:
ܩܲܕܝܼܫܵܐ ܐܲܠܵܗܵܐ...
ܘܫܲܪܟܵܐ.
ܫܲܡܵܫܵܐ:
ܡܢ݂ ܥܵܠܲܡ ܘܲܥܖܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ.
ܥܲܡܵܐ:
ܩܲܕܝܼܫܵܐ ܐܲܠܵܗܵܐ...
ܘܫܲܪܟܵܐ.
ܫܲܡܵܫܵܐ:
ܢܨܲܠܸܐ. ܫܠܵܡܵܐ ܥܲܡܲܢ.
ܟܵܗܢܵܐ؛
ܩܲܕܝܼܫܵܐ ܘܲܫܒܼܝܼܚܵܐ ܘܚܹܝܠܵܢܵܐ ܘܠܵܐ ܡܵܝܘܿܬܼܵܐ، ܕܸܒܓܵܘ
ܕܩܲܕܝܼܫܹ̈ܐ ܟܥܵܡܸܪ ܘܟܢܵܝܸܚܿ ܥܸܓ̱ܒܘܿܢܹܗ، ܟܸܡܢܘܿܢܘܼܟܼ،
ܡܲܨܸܬܼ ܡܵܪܝܼ، ܘܚܘܼܣ ܘܡܪܵܚܸܡ ܥܸܠܲܢ،
ܕܐܲܝܟܼ ܕܐܝܼܠܵܗ̇ ܥܵܕܸܬܘܼܟܼ ܒܟܘܼܠ ܥܸܕܵܢܵܐ، ܡܵܪܵܐ ܕܟܘܿܠ
ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܖܫܵܐ، ܠܥܵܠܡܝܼܢ.
ܥܲܡܵܐ:
ܐܵܡܹܝܢ.
ܘܟܝܵܬܒܼܝܼܢ̄.
ܩܸܪ̈ܝܵܢܹܐ
ܫܲܡܵܫܵܐ؛
ܢܨܲܠܸܐ ܫܠܵܡܵܐ ܥܲܡܲܢ.
ܟܵܗܢܵܐ:
ܝܵܐ ܡܕܲܒܿܪܵܢܵܐ ܚܲܟܝܼܡܵܐ، ܐܵܟܼܵܠܵܐ ܕܓܼܲܡ ܕܸܒܢܲܝ̈ ܒܹܝܬܼܹܗ،
ܟܼܸܙܘܿܢܬܵܐ ܪܲܒܬܼܵܐ ܕܟܡܲܓ̱ܪܝܵܐ ܟܘܼܠܲܝ ܥܘܼܢܹ̈ܐ ܘܟܘܼܠܲܝ
ܛܘܼܒܹ̈ܐ ܒܡܪܲܚܡܵܢܘܼܬܹܗ، ܒܓܵܘܘܼܟܼ ܟܸܡܢܘܿܢܘܼܟܼ؛ ܡܲܨܸܬܼ ܝܵܐ
ܡܵܪܝܼ، ܘܚܘܼܣ ܘܡܪܲܚܸܡܥܸܠܲܢ ܕܐܲܝܟܼ ܕܝܼܠܵܗ ܥܵܕܸܬܘܼܟܼ
ܒܟܠܥܸܕܵܢܵܐ. ܡܵܪܵܐ ܕܟܠ ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܖܫܵܐ
ܠܥܵܠܡܝܼܢ. ܥܲܡܵܐ:
ܐܵܡܹܝܢ.
ܩܵܪܘܿܝܵܐ:
ܣܸܦܪܵܐ ܕܲܦܠܵܢ، ܒܲܪܸܟܼܡܵܪܝ.
(ܩܸܪܝܵܢܵܐ)
ܫܠܝܼܚܵܐ
ܟܵܗܢܵܐ:
ܡܲܒܗܸܪ ܡܵܪܲܢ ܘܐܲܠܵܗܲܢ ܚܹܝܠܵܐ ܕܚܘܼܫ̈ܵܒܲܢ، ܠܡܲܨܘܿܬܸܐ
ܘܠܸܧܗܵܡܵܐ ܫܡܲܥܬܵܐ ܒܲܣܝܼܡܬܵܐ ܕܦܘܼܩܕܵܢܘܼ̈ܟܼ ܡܲܚܿܝܵܢܹ̈ܐ
ܘܐܲܠܵܗܵܝܹ̈ܐ.
ܘܗܲܒܼܠܲܢ ܒܢܲܥܡܸܬܘܼܟܼ ܘܒܪ̈ܲܚܡܸܐ ܕܝܼܠܘܼܟܼ ܕܩܲܜܧܘܼܟܼ ܡܸܢܲܝ
ܧܵܝܸܕܸܐ:
ܚܘܼܒܵܐ ܘܐܸܡܘܼܕ، ܘܦܘܼܪܩܵܢܵܐ ܕܸܟܚܵܫܸܚܿ ܬܵܐ ܓܝܵܢܵܐ ܘܬܵܐ
ܦܲܓ̣ܪܵܐ.
ܘܡܙܲܡܪܘܼܟܼ ܛܵܠܘܼܟܼ ܫܘܼܒܼܚܵܐ ܕܵܝܸܡ ܕܠܵܐ ܒܜܵܠܵܐ ܒܟܘܿܠ
ܥܸܕܵܢܵܐ، ܡܵܪܵܐ ܕܟܘܿܠ ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܖܫܵܐ،
ܠܥܵܠܡܝܼܢ.
ܩܵܪܘܿܝܵܐ:
(ܦܵܘܠܘܿܣ)
ܫܠܝܼܚܵܐ ܐܸܓܲܪܬܵܐ ܕܲܠܘܵܬܼ. ܐܲܚܲܝ̈. ܒܲܪܸܟܼܡܵܪܝ.
ܟܵܗܢܵܐ:
ܡܫܝܼܚܵܐ ܢܚܲܟܡܵܟܼ ܒܝܘܼܠܦܵܢܹܗ ܩܲܕܝܼܫܵܐ ܘܢܸܥܒܖܵܟܼ
ܡܲܚܙܝܼܬܼܵܐ ܫܲܦܝܼܪܬܵܐ ܠܟܠܗܘܿܢ ܐܲܝܠܹܝܢ ܕܨܵܝܬܝܼܢ ܠܵܟܼ.
ܙܘܼܝܵܚܵܐ ܕܐܹܘܲܢܓܲܠܝܘܿܢ
ܫܲܡܵܫܵܐ:
ܢܩܘܼܡ ܥܬܼܝܼܖܵܐܝܼܬܼ ܠܡܸܫܡܲܥ ܠܐܹܘܲܢܓܲܠܝܘܿܢ ܩܲܕܝܼܫܵܐ.
ܥܲܡܵܐ:
ܗܲܠܸܠܘܼܝܵܐ ܗܲܠܸܠܘܼܝܵܐ
ܐܹܗܲܠܸܠܘܼܝܵܐ.
ܫܲܡܵܫܵܐ:
ܒܫܸܠܝܵܐ ܗܘܵܘ ܘܲܫܠܵܘ.
ܟܵܗܢܵܐ:
ܫܠܵܡܵܐ ܥܲܡܟܼܘܿܢ.
ܥܲܡܵܐ:
ܘܥܲܡܵܟܼ ܘܥܲܡ ܪܘܼܚܵܟܼ.
ܟܵܗܢܵܐ؛
ܐܹܘܲܢܓܲܠܝܘܿܢ ܩܲܕܝܼܫܵܐ ܕܡܵܪܲܢ ܝܼܫܘܿܥ ܡܫܝܼܚܵܐ، ܟܵܪܘܙܘܼܬܼܵܐ
ܕ...
ܥܲܡܵܐ؛
ܫܘܼܒܼܚܵܐ ܠܲܡܫܝܼܚܵܐ ܡܵܪܲܢ. ܐܵܡܹܝܢ. ܫܠܵܘ.
ܒܵܬܼܲܪ ܐܹܘܲܢܓܲܠܝܘܿܢ؛
ܟܵܗܢܵܐ:
ܫܘܼܒܼܚܵܐ ܠܐܲܠܵܗܵܐ ܐܲܡܝܼܢܵܐܝܼܬܼ.
ܥܲܡܵܐ:
ܫܘܼܒܼܚܵܐ ܠܲܡܫܝܼܚܵܐ ܡܵܪܲܢ.
ܒܵܥܘܼܬܼܵܐ
ܫܲܡܵܫܵܐ:
ܩܹܝܡܘܼܟܼ ܟܘܼܠܲܢ ܪܲܢܕܵܐ، ܒܗܲܝܡܵܢܘܼܬܼܵܐ ܘܣܲܒܼܪܵܐ، ܜܲܠܒܘܼܟܼ
ܘܐܲܡܪܘܼܟܼ:
ܡܵܪܲܢ ܡܪܵܚܸܡ ܥܸܠܲܢ.
ܥܲܡܵܐ:
ܡܵܪܲܢ ܡܪܵܚܸܡ ܥܸܠܲܢ.
ܫܲܡܵܫܵܐ:
ܒܵܒܵܐ ܕܪ̈ܲܚܡܹܐ، ܘܐܲܠܵܗܵܐ ܕܟܘܿܠ ܣܘܼܠܵܝܵܐ، ܟܜܲܠܒܘܼܟܼ
ܡܸܢܘܼܟܼ.
*
ܝܵܐ ܡܚܲܠܨܵܢܲܢ ܘܐܲܟܼܵܠܵـܐ ܕܓ̣ܲـܡ ܕܝܼܠܲܢ ܘܸܡܕܲܒܪܵܢܵܐ
ܕܟܘܿܠ، ܟܜܲܠܒܘܼܟܼ ܡܸܢܘܼܟܼ.
*
ܬܵܐ ܫܹܝܢܵܐ ܘܬܧܵܩܘܼܬܼܵܐ ܘܪܚܵܫܬܵܐ ܜܵܒܼܬܵܐ ܕܟܘܼܠܹܗ ܥܵܠܡܵܐ
ܘܕܟܠܲܝ ܥܹܕܵܬܼ̈ܵܐ، ܟܜܲܠܒܘܼܟܼ ܡܸܢܘܼܟܼ.
*
ܬܵܐ ܐܲܬܼܪܲܢ ܘܬܵܐ ܟܘܼܠܲܝ ܐܲܬܼܪ̈ܵܘܵܬܼܵܐ، ܘܬܵܐ ܗܵܢܹܝܢ̄
ܕܸܒܗܲܝܡܵܢܘܼܬܼܵܐ ܥܡܝܼܪܹ̈ܐܝܼܠܲܝ ܒܓܵܘܲܝ، ܟܜܲܠܒܘܼܟܼ ܡܸܢܘܼܟܼ.
*
ܬܵܐ ܒܲܣܝܼܡܘܼܬܼܵܐ ܕܦܘܿܚܵܐ، ܘܩܸܫܜܘܼܬܼܵܐ ܕܫܵܢ̄ܬܵܐ، ܘܬܵܐ
ܕܲܟܼܠܵܐ ܕܦܹܐܪܹ̈ܐ، ܘܬܵܐ ܪܚܵܫܬܵܐ ܜܵܒܼܬܵܐ ܕܟܘܼܠܹܗ ܥܲܠܡܵܐ،
ܟܜܲܠܒܘܼܟܼ ܡܸܢܘܼܟܼ.
*
ܬܵܐ ܚܘܼܠܡܵܢܵܐ ܕܒܵܒܵܘܵܬܼ̈ܢ ܩܲܕܝܼܫܹ̈ܐ:
ܡܵܪܝ...
ܟܘܼܡܪܵܐ ܪܵܒܵــܐ ܦܵܦܵܐ ܕܪܗ̄ܘܿܡܹܐ، ܘܡܵܪܝ...
ܩܵܬܼܘܿܠܝܼܩܵܐ ܦܵܜܸܪܝܵܪܟܝܼܣ، ܘܡܵܪܝ...
ܐܲܦܸܣܩܘܿܦܵܐ
(ܡܹܝܜܪܵܦܘܿܠܝܼܜܵܐ)
ܘܬܵܐ ܟܘܼܠܲܝ ܒܢܲܝ̈ ܬܸܫܡܸܫܬܲܝـ، ܟܜܲܠܒܘܼܟܼ ܡܸܢܘܼܟܼ.
*
ܬܵܐ ܟܘܼܠܲܝ ܟܪ̈ܝܼܗܹܐ ܘܥܝܼܩܹ̈ܐ، ܘܓܼܒܝ̈ܢܹܐ ܘܣܢܝܼ̈ܩܹܐ،
ܘܡܥܘܼܖܒܹ̈ܐ ܘܡܫܘܼܩܝܹ̈ܐ ، ܟܛܲܠܒܘܼܟܼ ܡܸܢܘܼܟܼ.
*
ܬܵܐ ܟܘܼܠܲܝ ܥܲܢܝܼ̈ܖܹܐ ܕܝܼܠܲܢ ܕܸܦܪܸܫܠܲܝ ܡ̣ܢ ܒܲܝܢܵܬܼܲܢ
ܥܸܠܸܕ ܐܸܡܘܼܕ ܕܩܝܵܡܬܵܐ، ܟܜܲܠܒܘܼܟܼ ܡܸܢܘܼܟܼ.
*
ܡܚܵܠܸܨ ܠܟܠܲܢ ܡܫܝܼܚܵܐ ܡܵܪܲܢ ܒܢܲܥܡܸܬܘܼܟܼ،
ܘܡܲܙܸܕ ܒܲܝܢܵܬܼܲܢ ܫܲܝܢܘܼܟܼ ܘܫܠܵܡܘܼܟܼ،
ܘܡܪܵܚܸܡ ܥܸܠܲܢ.
ܥܲܡܵܐ:
ܡܵܪܲܢ ܡܪܵܚܸܡ ܥܸܠܲܢ.
ܫܲܡܵܫܵܐ:
ܢܲܧܫ̈ܵܬܲܢ ܘܕܲܚ̈ܖܵܖܹܐ ܠܐܲܒܵܐ ܘܠܲܒܪܵܐ ܘܲܠܪܘܼܚܵܐ ܕܩܘܼܖܫܵܐ
ܢܲܓܼܥܸܠ.
ܥܲܡܵܐ:
ܠܵܟܼ ܡܵܪܝܵܐ ܐܲܠܵܗܵܐ.
ܟܵܗܢܵܐ:
ܡܸܢܘܼܟܼ ܡܵܪܝܵܐ ܐܲܠܵܗܵܐ ܚܲܝܠܵܢܵܐ ܟܜܲܠܒܘܼܟܼ ܘܟܸܡܢܘܿܢܘܼܟܼ،
ܡܟܵܡܸܠ ܥܸܡܲܢ ܢܲܥܡܸܬܘܼܟܼ، ܘܡܲܫܦܸـܟܼ ܒܐܝܼ̈ܖܵܬܲܢ ܚܠܹܝܬܘܼܟܼ،
ܘܪ̈ܲܚܡܹܐ ܘܚܲܢܝܼܢܘܼܬܼܵܐ ܕܐܲܠܵܗܘܼܬܼܘܼܟܼ ܗܵܘܵܝܢ̄ ܬܵܐ
ܚܘܼܣܵܝܵܐ ܕܸܓܢܵܗܹ̈ܐ ܕܥܲܡܵܐ ܕܝܼܠܘܼܟܼ ܘܬܵܐ ܫܘܼܒܼܩܵܢܵܐ
ܕܸܚ̈ܜܝܼܵܬܼ̈ܐ ܕܟܠܵܗ̇ ܥܸܪܒܵܐ ܕܡܲܪܥܝܼܬܼܘܼܟܼ ܕܸܡܓܘܼܒܹܝܠܘܼܟܼ
ܛܵܠܘܼܟܼ ܒܢܲܥܡܸܬܘܼܟܼ ܘܪ̈ܲܚܡܹܐ ܕܝܼܠܘܼܟܼ ܡܵܪܵܐ ܕܟܠ ܒܵܒܵܐ
ܘܒܪܘܿܢܵܐ ܘܪܘܼܚܵܐ ܕܩܘܼܖܫܵܐ ܠܥܵܠܡܝܼܢ.
ܛܟܣܐ ܕܩܘܪܒܢܐ
[ܡ̇ܢ
ܕܠܵܐ ܫܩܝܼܠܵܐ ܠܹܗ ܡܲܥܡܘܿܕܝܼܬܼܵܐ،
ܢܹܐܙܲܠ.
ܡ̇ܢ ܕܠܵܐ ܡܩܲܒܸܠ ܠܹܗ ܪܘܼܫܡܵܐ ܕܚܲܝܹ̈ܐ، ܢܹܐܙܲܠ.
ܡ̇ܢ ܕܠܵܐ ܢܵܣܹܒܼ ܠܹܗ ܢܹܐܙܲܠ،
ܙܸܠܘ ܫܵܡܘܿܥܹ̈ܐ ܘܲܚܙܵܘ ܬܲܪ̈ܥܹܐ.]
ܡܣܩܬܐ ܕܐ̄ܪ̈ܙܐ ܠܡܕܒܚܐ
ܗܵܐ ܫܵܪܘܼܬܼܝ ܡܛܲܝܒܼܵܐ، ܘܟܠ ܡܸܕܸܡ ܡܛܲܝܲܒܼ، ܬܵܘ
ܠܡܸܫܬܘܼܬܼܵܐ:
ܐܬܼܟܲܢܲܫܘ ܠܘܵܬܹܗ ܓܒܼܵܘ̈ܗܝ:
ܗܵܐ ܡܙܲܡܢܝܼܬܘܿܢ ܠܚܲܝܹ̈ܐ ܚܲܕ̈ܬܹܐ،
ܕܦܲܓܼܪܵܐ ܘܲܕܡܵܐ ܡܚܲܣܝܵܢܵܐ ܨܲܒܸܬܼܘ ܩܢܘܿܡܲܝ̈ܟܘܿܢ.
ܘܒܲܙܡܝܼܪ̈ܵܬܼܵܐ ܕܪܘܼܚܵܐ ܫܲܒܲܚܘ ܘܐܲܘܕܵܘ ܠܒܲܪ ܡܲܠܟܵܐ
ܕܲܢܚܸܬܼ ܨܹܐܖܲܝܢ ܘܦܲܪܩܲܢ ܒܲܨܠܝܼܒܹܗ.
ܘܝܲܗ̄ܒܼ ܠܲܢ ܦܲܓܼܪܹܗ ܘܲܕܡܹܗ، ܕܒܹܗ ܪܵܘܙܝܼܢ ܟܠܗܘܿܢ
ܩܲܕܝܼ̈ܫܹܐ، ܘܩܵܥܹܝܢ ܠܹܗ ܩܲܕܝܼܫ ܩܲܕܝܼܫ ܩܲܕܝܼܫ ܡܲܚܝܵܢܲܢ.
ܫܲܡܵܫܵܐ:
ܢܨܲܠܸܐ. ܫܠܵܡܵܐ ܥܲܡܲܢ.
ܟܵܗܢܵܐ:
ܡܲܣܩܘܼܟܼ ܬܸܫܒܘܿܚܬܵܐ ܬܵܐ ܬܠܝܼܬܼܵܝܘܼܬܼܘܼܟܼ ܡܫܘܼܒܲܚܬܵܐ
ܒܟܠܥܸܕܵܢ ܠܥܵܠܡܝܼܢ.
ܫܲܡܵܫܵܐ:
ܐܵܡܹܝܢ.
ܟܵܗܢܵܐ:
ܡܫܝܼܚܵܐ ܕܦܸܫܠܸܗ ܕܒܼܝܼܚܵܐ ܚܠܵܦܸܕ ܦܘܼܪܩܵܢܲܢ، ܘܟܸܡܦܵܩܸܖܠܲܢ
ܕܥܲܒܼܖܘܼܟܼ ܥܘܼܗܕܵܢܵܐ ܕܡܘܿܬܹܗ ܘܕܩܒܼܘܼܪܬܹܗ ܘܕܩܝܵܡܬܹܗ،
ܐܵܗܘܼ ܩܵܒܸܠܠܵܗ̇ ܠܕܸܒܼܚܬܼܵܐ ܗܵܖܹܐ ܡܢ݂ ܐܝܼ̈ܕܵܬܲܢ،
ܒܢܲܥܡܸܬܹܗ ܘܒܪ̈ܲܚܡܹܐ ܕܝܼܠܹܗ. ܐܵܡܹܝܢ.
ܒܦܘܼܩܕܵܢܘܼܟܼ ܡܵܪܲܢ ܘܐܲܠܵܗܲܢ ܟܦܵܝܫܝܼܢ̄ ܕܸܪ̈ܝܹܐ
ܘܡܛܘܼܟܼܣܹ̈ܐ ܐ̄ܪ̈ܵܙܹܐ ܗܵܢܝܼܢ̄ ܫܒܼܝܼܚܹ̈ܐ ܘܩܲܕܝܼ̈ܫܹܐ
ܘܡܲܚܝܵܢܹ̈ܐ ܘܐܲܠܵܗܵܝܹ̈ܐ ܥܸܠܸܕ ܡܲܖܒܚܵܐ ܡܚܲܣܝܵܢܵܐ،
ܗܸܠ ܐܝܼܬܼܹܬܹܗ ܕܡܵܪܲܢ ܓܲܗܵܐ ܕܬܸܪ̄ܬܹܝܢ̄ ܕܡܢ݂ ܫܡܲܝܵܐ؛
ܛܵܠܹܗ ܗܵܘܹܐ ܫܘܼܒܼܚܵܐ ܒܟܠܥܸܕܵܢ ܠܥܵܠܡܝܼܢ. ܐܵܡܹܝܢ.
ܫܘܼܒܼܚܵܐ ܠܐܲܒܵܐ ܘܠܲܒܪܵܐ ܘܲܠܪܘܼܚܵܐ ܕܩܘܼܖܫܵܐ؛
ܥܲܠ ܡܲܖܒܲܚ ܩܘܼܖܫܵܐ ܢܸܗܘܸܐ ܕܘܼܟܼܪܵܢܵܗ̇، ܕܲܒܬܼܘܼܠܬܵܐ
ܡܲܪܝܲܡ ܐܸܡܹܗ ܕܐܲܠܵܗܵܐ
(ܐܵܘ
ܐܸܡܹܗ ܕܲܡܫܝܼܚܵܐ).
ܡܢ݂ ܥܵܠܲܡ ܘܲܥܖܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ؛
ܫܠܝܼܚܵܘ̈ܗܝ ܕܲܒܪܵܐ ܘܪ̈ܲܚܡܵܘܗܝ ܕܝܼܚܝܼܖܵܐ،
ܕܘܼܟܼܪܵܢܗܘܿܢ ܢܸܗܘܸܐ ܒܥܹܕܬܹܗ ܕܲܡܫܝܼܚܵܐ.
ܢܹܐܡܲܪ ܟܠܹܗ ܥܲܡܵܐ ܐܵܡܹܝܢ ܘܐܵܡܹܝܢ؛
ܕܘܼܟܼܪܵܢ ܡܵܪܝ (ܬܐܘܿܡܵܐ)
ܥܲܠ ܡܲܖܒܲܚܩܘܼܖܫܵܐ،
ܥܲܡ ܟܹܐܢܹ̈ܐ ܕܲܢܨܲܚܘ ܘܣܵܗܕܹ̈ܐ ܕܐܸܬܼܟܲܠܲܠܘ.
ܗܵܐ ܫܟܸܒܼܘ
ܥܲܠ ܣܲܒܼܪܵܟܼ ܟܠܗܘܿܢ ܥܲܢܝܼܖܲܝ̈ܢ،
ܕܒܲܩܝܵܡܬܵܟܼ ܫܒܼܝܼܚܬܵܐ ܒܫܘܼܒܼܚܵܐ ܬܩܝܼܡ ܐܸܢܘܿܢ.
ܥܲܡܵܐ:
ܘܦܵܝܸܫ ܩܒܝܼܠܵܐ ܩܘܼܪܒܵܢܵܐ ܗܵܖܝܼ ܒܦܲܬܼ̈ܘܵܬܼܵܐ ܓܸܠܝܸ̈ܐ،
ܘܦܵܝܸܫ ܡܩܘܼܕܫܵܐ ܒܬܵܢܹܝܬܼܵܐ ܕܐܲܠܵܗܵܐ ܘܒܪܘܼܚܵܐ ܕܩܘܼܕܫܵܐ،
ܕܗܵܘܹܐ ܛܵܠܲܢ ܬܵܐ ܥܘܿܢ ܘܬܵܐ ܚܲܠܵܨ،
ܘܬܵܐ ܚܲܝܹ̈ܐ ܕܲܠܥܵܠܲܡ ܥܵܠܡܝܼܢ ܒܡܲܠܟܘܼܬܼܵܐ ܕܲܫܡܲܝܵܐ،
ܒܛܲܝܒܘܼܬܹܗ ܕܲܡܫܝܼܚܵܐ.
ܨܘܼܪܬܵܐ ܕܗܲܝܡܵܢܘܼܬܼܵܐ
ܟܵܗܢܵܐ:
ܡܗܲܝܡܢܝܼܢܲܢ.
ܥܲܡܵܐ؛
ܟܸܡܗܲܝܸܡܢܘܼܟܼ ܒܚܲܕ̄ ܐܲܠܵܗܵܐ
ܒܵܒܵܐ ܐܲܚܝܼܖ ܟܘܿܠ، ܒܲܪܵܝܵـܐ ܕܟܘܼܠܡܵܐ ܕܸܟܦܵܝܸܫ ܚܸܙܝܵܐ
ܘܕܠܵܐ ܟܦܵܝܸܫ ܚܸܙܝܵܐ.
*
ܘܒܚܲܕ ܡܵܪܝܵܐ ܝܼܫـܘܿܥ ܡܫܝܼܚܵܐ، ܒܸـܪ ܕܐܲܠܵܗܵܐ ܝܼܚܝܼܖܵܝܵܐ
ܒܘܼܟܼܪܵܐ ܕܟܘܼܠܲܝ ܒܸܪ̈ܝܵܬܼܵܐ.
ܗܵܘ ܕܡ̣ܢ ܒܵܒܹܗ ܦܝܼܫܠܹܗ ܗܘܼܝܵܐ ܩܵܕ̄ܡ ܟܘܼܠܲܝ ܥܵܠܡܹ̈ܐ، ܘܠܵܐ
ܦܝܼܫܠܹܗ ܥܒܼܝܼܖܵܐ، ܐܲܠܵܗܵܐ ܫܵܪܝܼܪܵܐ ܕܡ̣ܢ ܐܲܠܵܗܵܐ
ܫܵܪܝܼܪܵܐ، ܒܸܪ ܕܸܟܝܵܢܵܐ ܕܒܵܒܹܗ، ܕܒܐܝܼܕܵܬܹ̈ܗ ܦܝܼܫܠܵܝ
ܢܨܝܼܒܹ̈ܐ ܥܵܠܡܹ̈ܐ ܘܦܝܼܫܠܹܗ ܒܸܪܝܵܐ ܟܘܼܠܡܸܢܕܝܼ.
ܗܵܘ ܕܡ̄ܜܵܠܸܒܲܢ، ܐܲܚܢܝܼ ܒܢܹܝ̈ܢܵܫܵܐ، ܘܡ̄ܜܲܠܸܒܸܗ ܕܚܵܠܵܨ
ܕܝܼܠܲܢ ܢܚܸܬܼܠܸܗ ܡ̣ܢ ܫܡܲܝܵܐ ܘܫܩܸܠܠܸܗ ܓܘܼܫܡܵܐ ܡ̣ܢ ܪܘܼܚܵܐ
ܕܩܘܼܖܫܵܐ،
ܘܦܸܫܠܸܗ ܒܲܪܢܵܫܵܐ.
ܦܸܫܠܹܗ ܒܜܝܼܢܵܐ ܘܗܘܹܐܠܸܗ ܡ̣ܢ ܡܲܪܝܲܡ ܒܬܼܘܼܠܬܵܐ.
ܜܥܸܢܠܸܗ ܚܲܫܵܐ ܘܨܠܝܼܒܼ ܒܝܘܼ̈ܡܵܬܼܵܐ ܕܦܲܢܜܝܼܘܿܣ ܦܝܼܠܵܜܘܼܣ.
ܘܡܝܼܬܼܠܸܗ ܘܩܒܼܝܼܪ، ܘܒܝܘܿܡܵܐ ܕܸܬܠܵܬܼܵܐ ܩܸܡܠܸܗ ܕܐܲܝܟܼ
ܕܐܝܼܠܸܗ ܟܬܼܝܼܒܼܵܐ.
ܘܣܸܩܠܸܗ ܠܸܫܡܲܝܵܐ ܘܝ̄ܬܸܒܼܠܸܗ ܡ̣ܢ ܝܲܡܢܸܐ ܕܒܵܒܹܗ.
ܘܓܵܗܵܐ ܐ̄ܚܸܪܬܵܐ ܒܸܕܐܵܬܹܐ ܬܲܕ ܕܵܝܸܢ ܒܝܼܚܵܝܸ̈ܐ ܘܡܝܼ̈ܬܹܐ.
*
ܘܒܚܲܖ̄ ܪܘܼܚܵܐ ܕܩܘܼܖܫܵܐ، ܪܘܼܚܵܐ ܕܫܪܵܪܵܐ، ܗܵܘ ܕܡ̣ܢ ܒܵܒܵܐ
ܟܦܵܠܸܛܜ، ܪܘܼܚܵܐ ܡܲܚܝܵܢܵܐ.
ܘܸܒܚܖܵܐ ܥܹܕܬܵܐ، ܩܲܕܝܼܫܬܵܐ، ܫܠܝܼܚܵܝܬܵܐ، ܩܵܬܼܘܿܠܝܼܩܝܼ.
*
ܟܡܘܿܕܘܼܟܼ ܒܸܚܖܵܐ ܡܲܥܡܘܿܕܝܼܬܼܵܐ ܬܵܐ ܫܘܼܒܼܩܵܢܵܐ
ܕܸܚ̈ܜܝܼܵܬܲܢ.
ܘܒܸܩܝܵܡܬܵܐ ܕܦܲܓܼܪܹ̈ܐ ܘܒܚܵܝܸܐ ܕܠܥܵܠܲܡ ܥܵܠܡܝܼܢ.
ܫܲܡܵܫܹ̈ܐ:
ܘܟܘܼܕ ܕܵܗܵܐ ܦܸܫܠܲܢ ܩܸܪ̈ܝܸܐ،
ܬܲܕ ܡܫܲܪܟܘܼܟܼ ܒܩܘܼܪܒܵܢܵܐ، ܝܵܗܒܼܘܼܟܼ ܫܠܵܡܵܐ ܬܵܐ ܚ̈ܖܵܖܹܐ،
ܐܲܝܟܼ ܦܘܼܩܕܵܢܹܗ ܕܲܡܫܝܼܚܵܐ، ܫܠܵܡܵܐ ܨܸܦܝܵܐ ܕܠܵܐ ܙܸܓܼܠܵܐ،
ܗܵܘ ܫܠܵܡܵܐ ܕܗܒܼܸܠܠܸܗ ܦܵܪܘܿܩܲܢ،
ܠܟܸܢܫܵܐ ܒܪܝܼܟܼܵܐ ܕܬܲܠܡܝܼ̈ܖܹܐ.
ܟܲܗܢܵܐ:
ܕܒܚܘܼܒܵܐ ܟܡܝܼܠܵܐ ܘܒܗܲܝܡܵܢܘܼܬܼܵܐ ܕܲܫܪܵܪܵܐ ܥܲܒܼܖܘܼܟܼ
ܬܸܫܡܸܫܬܵܐ ܬܵܐ ܚܠܹܝܬܘܼܟܼ ܗܒܼܸܠܬܵܐ ܛܵܠܲܢ.
ܥܲܡܵܐ:
ܐܵܡܹܝܢ. ܒܲܪܸܟܼܡܵܪܝ.
ܟܵܗܢܵܐ:
ܫܠܵܡܵܐ ܥܲܡܟܼܘܿܢ.
ܥܲܡܵܐ:
ܘܥܲܡܵܟܼ ܘܥܲܡ ܪܘܼܚܵܟܼ.
ܫܲܡܵܫܵܐ:
ܐܲܚܲܝ̈،
ܗܲܒܼܘ ܫܠܵܡܵܐ ܚܲܖ ܠܚܲܖ ܒܚܘܼܒܹܗ ܕܲܡܫܝܼܚܵܐ.
ܢܸܫܩ̄ܠܘܼܢ ܛܘܼܪܹ̈ܐ ܫܠܵܡܵܐ ܠܥܲܡܵܟܼ:
ܫܠܵܡܵܐ ܘܫܲܝܢܵܐ ܢܸܣܓܸܐ ܠܥܲܡܵܟܼ ܫܲܝܢܹܗ ܕܥܵܠܡܵܐ. ܡܫܝܼܚܵܐ
ܕܐܸܬܼܵܐ ܠܦܘܼܪܩܵܢܲܢ. ܙܪܘܿܥ ܐܲܘܝܘܼܬܼܵܐ ܒܲܒܼܢܹ̈ܝܗܿ ܕܥܹܕܬܵܐ.
ܕܢܸܗܘܘܿܢ ܙܵܡܪܝܼܢ ܥܲܡ ܥܝܼܪܹ̈ܐ ܫܘܼܒܼܚܵܐ ܠܲܫܡܵܟܼ.
ܘܩܲܝܸܡ ܟܵܗ̈ܢܹܐ ܘܫܲܝܸܢ ܡܲܠܟܹ̈ܐ.
ܘܒܲܛܸܠ ܩܪ̈ܵܒܹܐ ܡܼܢ ܣܲܘ̈ܦܹܝܗܿ ܕܐܲܪܥܵܐ.
ܘܢܲܛܲܪ ܠܟܸܢܫܵܐ ܕܣܵܓܘܿܖܲܝܟ.
ܕܠܵܟܼܘܼ ܩܵܪܹܝܢ ܒܟܠܥܸܕܵܢ.
ܘܲܣܥܘܿܪ ܡܲܪ̈ܥܹܐ ܒܛܲܝܒܘܼܬܼܵܟܼ.
ܘܐܲܚܠܸܡ ܟܪ̈ܝܼܗܹܐ ܒܲܚܢܵܢܵܟܼ.
ܘܐܲܘܫܸܛ ܐܝܼܖܵܐ ܕܥܘܼܖܪ̈ܵܢܹܐ.
ܠܟܠܗܘܿܢ ܐܲܝܠܹܝܢ ܕܐܲܠܝܼܨܝܼܢ.
ܡܵܪܲܢ ܚܘܼܣܥܠܲܝܢ.
ܕܝܘܿܦܲܛܟܼܝܼܢ
ܫܲܡܵܫܵܐ:
ܡܨܵܠܘܼܟܼ ܘܛܲܠܒܘܼܟܼ ܡܢ݂ ܐܲܠܵܗܵܐ ܡܵܪܵܐ ܕܟܠ ܚܠܵܦܸܕ ܟܠܵܝ
ܝܲܠܕܹ̈ܐ ܕܥܹܕܬܵܐ، ܦܪܝܼܫܵܐܝܼܬܼ ܚܠܵܦܸܕ
ܦܠܵܢ ܘܲܦܠܵܢ... ܚܠܵܦ
ܟܠܗܘܿܢ ܘܚܠܵܦ ܟܠܲܢ ܢܬܼܩܲܒܲܠ ܩܘܼܪܒܵܢܵܐ ܗܵܢܵܐ ܠܥܵܠܡܝܼܢ.
ܫܲܡܵܫܵܐ؛
ܫܲܟܪܘܼܟܼ ܘܜܲܠܒܘܼܟܼ ܘܸܡܢܘܿܢܘܼܟܼ، ܟܘܼܠܲܢ، ܒܨܸܦܝܘܿܬܼܵܐ
ܘܸܫܬܹܝܟܼܵܢܬܵܐ ܡ̣ܢ ܡܵܪܝܵܐ.
ܩܘܼܡܘܼ ܪܲܢܕܵܐ ܘܚܘܼܪܘܼ ܒܗܵܢܘܿܢ̄ ܕܸܟܦܹܝܫܝܼܢ̄ ܥܒܼܝܼܖܹ̈ـܐ.
ܐ̄ܪ̈ܵܙܹܐ ܗܹܝ̈ܒܵܢܹܐ ܕܸܟܦܹܝܫܝܼܢ̄ ܡܩܘܼܕܫܹ̈ܐ.
ܟܵܗܢܵܐ ܩܪܸܒܼܠܹܗ ܕܸܡܨܵܠܸܐ، ܬܲܕ ܒܡܸܨܥܵܝܘܼܬܹܗ ܫܠܵܡܵܐ
ܫܵܦܸـܟܼ ܜܵܠܘܿܟܼܘܼܢ.
ܡܲܟܝܼܦـܘܼ ܥܹܝ̈ܢܘܿܟܼܘܼܢ ܠܬܹܚܬ̄ ܘܗܘܿܢܘܿܟܼܘܼܢ ܦܫܘܼܜܘܼ
ܠܸܫܡܲܝܵܐ.
ܒܸܪܓ݂ܝܼܫܘܼܬܼܵܐ ܘܐܝܼܟܼܵܠܬܵܐ ܕܓܲܡ ܜܠܘܼܒܘܼ ܘܡܫܲܦܸܠܦܘܼ
ܒܗܵܖܝܼ ܥܸܕܵܢܵܐ.
ܘܐ̄ܢܵܫܵܐ ܠܵܐ ܡܓ̱ܵܣܸܪ ܕܡܲܚܟܸܐ.
ܘܡܵܢܝܼ ܕܸܡܨܵܠܸܐ ܒܠܸܒܹـܗ ܡܨܵܠܸܐ.
ܒܫܸܠܝܘܼܬܼܵܐ ܘܪܲܗܒܵܐ ܗܵܘܘܿܬܘܼܢ ܩܝܼܡܹ̈ܐ ܘܒܨܲܠܘܿܝܹܐ.*
(ܘܲܒܫܸܠܝܵܐ
ܘܲܒܕܸܚܠܬܼܵܐ ܗܘܲܝܬܘܿܢ ܩܵܝ̇ܡܝܼܢ ܘܲܡܨܲܠܝܹܢ.)
ܘܟܸܢ ܡܩܲܪܸܒܼ ܟܵܗܢܵܐ
ܩܘܕܫܐ ܕܫܠܝ̈ܚܐ ܛܘܒܢ̈ܐ
ܫܲܡܵܫܵܐ:
ܫܠܵܡܵܐ ܥܲܡܲܢ.
ܟܵܗܢܵܐ:
ܛܲܝܒܘܼܬܹܗ ܕܡܵܪܲܢ ܝܑܼܫܘܿܥ ܡܫܝܼܚܵܐ ܘܚܘܼܒܹܗ ܕܐܲܠܵܗܵܐ ܐܲܒܵܐ
ܘܫܲܘܬܵܦܘܼܬܼܵܐ ܕܪܘܼܚܵܐ ܕܩܘܼܖܫܵܐ ܬܸܗܘܸܐ ܥܲܡ ܟܠܲܢ، ܗܵܫܵܐ
ܘܲܒܟܠܙܒܲܢ ܘܲܠܥܵܠܲܡ ܥܵܠܡܝܼܢ.
ܥܲܡܵܐ:
ܐܵܡܹܝܢ.
ܟܵܗܢܵܐ:
ܠܥܸܠ ܢܸܗܘܘܿܢ ܡܲܕܥܲܝ̈ܟܘܿܢ.
ܥܲܡܵܐ:
ܠܘܵܬܼܵܟܼ ܐܲܠܵܗܹܗ ܕܐܲܒܼܪܵܗܵܡ ܘܕܐܝܼܣܚܵܩ ܘܕܝܼܣܪܵܝܹܠ ܡܲܠܟܵܐ
ܡܫܲܒܚܵܐ.
ܟܵܗܢܵـܐ:
ܩܘܼܪܒܵܢܵܐ ܠܐܲܠܵܗܵܐ ܡܵܪܹܟܠ ܡܸܬܼܩܲܪܲܒܼ.
ܥܲܡܵܐ:
ܝܵܐܹܐ ܘܙܵܕܹ̇ܩ.
[
ܐ]
ܟܵܗܢܵܐ:
ܫܘܼܒܼܚܵܐ ܛܵܠܘܼܟܼ ܫܸܡܵܐ ܣܓܼܝܖܵܐ ܘܡܫܘܼܒܚܵܐ ܕܬܠܝܼܬܼܵܝܘܼܬܼܵܐ
ܡܫܘܼܒܵܚܬܵܐ، ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܖܫܵܐ، ܕܒܪܹܐܠܹܗ
ܥܵܠܡܵܐ ܒܢܲܥܡܸܬܹܗ ܘܥܵܡܘܿܪܹ̈ܐ ܕܝܼܠܹܗ ܒܸܡܪܲܚܡܵܢܘܼܬܼܹܗ،
ܘܡܚܘܼܠܸܨܠܸܗ ܒܢܲܝ̈ܢܵܫܵܐ ܒܚܲܢܝܼܢܘܼܬܼܹܗ، ܘܥܒܼܸܖܠܹܗ ܢܲܥܡܵܐ
ܪܲܒܬܼܵܐ ܬܵܐ ܡܵܝ̈ܘܿܬܼܹܐ. ܬܵܐ ܪܲܒܘܼܬܼܘܼܟܼ ܡܵܪܝܼ، ܟܒܵܪܟܝܼܢ̄
ܘܟܣܵܓܼܕܝܼܢ̄ ܐܲܠܦܵܝܹ̈ܐ ܕܐܲܠܦܵܝܹ̈ܐ ܕܥܸܠܵܝܹ̈ܐ، ܘܪܸ̈ܒܘܵܬܼܵܐ
ܕܪܸ̈ܒܘܵܬܼܵܐ ܕܡܲܠܵܐܟܼܹܐ ܩܲܕܝܼ̈ܫܹܐ، ܘܡܲܫܪ̈ܝܵܬܼܵܐ
ܕܪ̈ܘܼܚܵܢܹܐ ܡܫܲܡ̈ܫܵܢܹܐ ܕܢܘܼܪܵܐ ܘܕܪܘܼܚܵܐ ܬܵܐ ܫܸܡܘܼܟܼ
ܟܸܡܫܵܒܚܝܼܢ̄. ܘܥܸܡܸܕ ܟܪ̈ܘܼܒܼܹܐ ܩܲܕܝܼ̈ܫܹܐ ܘܣܪ̈ܵܦܹܐ
ܪ̈ܘܼܚܵܢܹܐ ܣܓܼܵܖܵܐ ܬܵܐ ܡܵܪܘܼܬܼܘܼܟܼ ܟܡܲܩܸܪܒܼܝܼܢ̄، ܘܗܲܡ
ܐܲܚܿܢܝܼ ܡܵܪܝܼ، ܡܲܛܒܼܝܼ ܠܲܢ ܕܥܸܡܸ ܕܗܵܢ ܚܲܝ̈ܠܵܘܵܬܼܵܐ
ܫܡܲܝ̈ܵܢܹܐ ܡܫܲܪܟܘܼܟܼ، ܟܘܼܕ ܟܸܡܥܵܝܛܝܼܢ̄ ܘܟܸܡܫܲܒܚܝܼܢ̄ ܕܠܵܐ
ܒܛܵܠܵܐ، ܘܟܩܵܪܹܐ ܚܲܖ̄ ܬܵܐ ܐ̄ܚܸܿܪ̄ܢܵܐ ܘܟܐܵܡܪܝܼܢ̄؛
ܥܲܡܵܐ:
ܩܲܕܝܼܫ ܩܲܕܝܼܫ ܩܲܕܝܼܫ ܡܵܪܝܵܐ ܐܲܠܵܗܵܐ ܚܲܝܠܬܼܵܢܵܐ، ܕܲܡܠܹܝܢ
ܫܡܲܝܵܐ ܘܐܲܪܥܵܐ ܡܢ݂ ܬܸܫܒܚ̈ܵܬܹܗ.
ܐܘܿܫܲܥܢܵܐ ܒܲܡܪ̈ܲܘܡܹܐ. ܐܘܿܫܲܥܢܵܐ ܠܲܒܪܹܗ ܕܖܵܘܝܼܖ.
ܒܪܝܼܟܼ ܕܐܸܬܼܵܐ ܘܐܵܬܹܐ ܒܲܫܡܹܗ ܕܡܵܪܝܵܐ. ܐܘܿܫܲܥܢܵܐ
ܒܲܡܪ̈ܲܘܡܹܐ.
(ܒܨܲܘܡܵܐ؛
ܡܼܢ ܟܝܵܢ ܐܝܼܬܼܘܼܬܹܗ، ܘܡܼܢ ܗܸܖܪܵܐ ܕܙܝܼܘܹܗ ܡܫܲܒܚܵܐ.)
[ܒ]
ܟܵܗܢܵܐ:
ܟܫܲܟܪܘܼܟܼܠܘܼܟܼ ܡܵܪܝܼ، ܐܲܚܿܢܝܼ ܥܲܒܼܕܹ̈ܐ ܕܝܼܠܘܼܟܼ ܒܨܝܼܪܹ̈ܐ
ܘܚܲܠܵܫܹ̈ܐ ܘܡܫܘܼܩܝܹ̈ܐ، ܕܥܒܼܸܖܠܘܼܟܼ ܛܵܠܲܢ ܢܲܥܡܸܐ ܪܲܒܬܼܵܐ
ܕܠܵܐ ܟܐܵܬܼܝܵܐ ܠܦܪܵܥܵܐ، ܒܹܝܕ ܠܒܸܫܠܘܼܟܼ ܠܐ̄ܢܵܫܘܼܬܼܲܢ ܬܲܕ
ܡܲܚܿܗܸܬܲܢ ܒܐܲܠܵܗܘܼܬܼܘܼܟܼ، ܘܡܘܼܥܠܹܠܘܼܟܼ ܠܡܲܟܝܼܟܼܘܼܬܼܲܢ،
ܘܡܘܼܩܸܡܠܘܼܟܼ ܠܢܦܲܠܬܲܢ، ܘܡܢܘܼܚܸܡܠܘܼܟܼ ܠܡܝܼܬܼܘܼܬܼܲܢ،
ܘܫܒܼܸܩܠܘܼܟܼ ܓܢ̈ܵܗܹܐ ܕܝܼܠܲܢ، ܘܡܙܘܼܕܸܩܠܘܼܟܼ ܠܚܲܛܵܝܘܼܬܼܲܢ،
ܘܡܘܼܒܗܹܪܘܼܟܼ ܠܝܼܖܲܥܬܲܢ، ܘܡܘܼܢܟܼܸܦܠܘܼܟܼ ܡܵܪܲܢ ܘܐܲܠܵܗܲܢ
ܠܕܸܫܡܸ̈ܢܹܐ ܕܝܼܠܲܢ، ܘܡܘܼܢܨܹܝܪܘܼܟܼ ܠܒܨܝܼܪܘܼܬܼܹܗ ܕܲܟܝܵܢܲܢ
ܚܲܠܵܫܵܐ ܒܪ̈ܲܚܡܹܐ ܫܦܝܼ̈ܟܼܹܐ ܕܢܲܥܡܸܬܘܼܟܼ.
ܘܛܲܠܸܒܸܕ ܟܘܼܠܲܝ ܥ̈ܘܿܢܹܐ ܕܝܼܠܘܼܟܼ ܘܢܲܥܡܸܬܝ̈ܵܬܼܘܼܟܼ
ܥܒܼܝܼ̈ܖܹܐ ܛܵܠܲܢ، ܟܡܲܣܩܘܼܟܼ ܛܵܠܘܼܟܼ ܬܸܫܒܘܿܚܬܵܐ ܘܐܝܼܩܵܪܵܐ
ܘܫܟܵܪܵܐ ܘܣܓܼܵܖܵܐ، ܕܵܗܵܐ ܘܒܟܘܼܠ ܙܲܒܼܢܵܐ ܘܲܠܥܵܠܲܡ ܥܵܠܡܝܼܢ.
ܥܲܡܵܐ:
ܐܵܡܹܝܢ.
[ܓ]
ܫܲܡܵܫܵܐ:
ܒܡܲܕܥܲܝ̈ܟܘܿܢ، ܨܲܠܵܘ. ܫܠܵܡܵܐ ܥܲܡܲܢ.
ܟܵܗܢܵܐ:
ܡܵܪܝܵܐ ܐܲܠܵܗܵܐ ܚܲܝܠܵܢܵܐ، ܩܒܘܿܠܠܸܗ ܗܵܖ ܩܘܼܪܒܵܢܵܐ ܛܵܠܸܒܸܕ
ܟܘܼܠܵܗ ܥܹܕܬܵܐ ܩܲܕܝܼܫܬܵܐ ܩܵܬܼܘܿܠܝܼܩܝܼ، ܛܵܠܸܒܸܕ ܟܘܼܠܲܝ
ܢܲܥܡܸܬܝ̈ܵܬܼܵܐ ܥܒܼܝܼ̈ܖܹܐ ܬܵܐ ܒܬܼܘܿܠܲܬܼ ܥܵܠܡܝܼܢ ܡܵܪܬܝ
ܡܲܪܝܲܡ ܛܘܒܼܵܢܝܼܬܼܵܐ، ܘܛܠܝܼܒܵܗ ܡܵܪܝ ܝܵܘܣܸܦ ܟܹܐܢܵܐ، ܘܬܵܐ
ܟܘܼܠܲܝ ܒܵܒܵܘ̈ܵܬܼܵܐ ܟܹܐܢܹ̈ܐ ܘܙܲܕܝܼ̈ܩܹܐ ܕܫܦܹܪܠܵܝ ܩܖܵܡܘܼܟܼ،
ܘܬܵܐ ܟܘܼܠܲܝ ܫܠܝܼ̈ܚܹܐ ܘܢܒܼܝܹ̈ܐ، ܘܬܵܐ ܟܘܼܠܲܝ ܣܵܗ̈ܕܹܐ
ܘܡܲܘܕܝ̈ܵܢܹܐ، ܘܚܠܵܦ ܕܒܵܒܵܘ̈ܵܬܼܲܢ ܩܲܕܝܼ̈ܫܹܐ ܡܵܪܝ ... ܦܵܦܵܐ
ܕܪܗ̄ܘܿܡܹܐ، ܡܵܪܝ ... ܩܵܬܼܘܿܠܝܼܩܵܐ ܦܵܛܪܝܼܵܪܟܵܐ، ܘܡܵܪܝ ...
ܐܲܦܸܣܩܘܿܦܵܐ (ܡܝܼܛܪܵܦܘܿܠܝܹܛܵܐ)،
ܘܚܠܵܦ ܕܟܘܼܠܲܝ ܐܲܦܸܣܩܘܹ̈ܦܹܐ ܘܩܲܫܝܼ̈ܫܹܐ ܘܡܫܲܡܫܵܢܹ̈ܐ،
ܘܬܵܡܵܡܸܬܵܐ ܕܓ̱ܘܼܝܼ̈ܢܹܐ ܕܒܢܲܝ̈ ܥܹܕܬܵܐ، ܘܚܠܵܦ ܕܟܘܼܠܲܝ
ܓܼܒܝܼ̈ܢܹܐ ܘܥܝܼ̈ܩܹܐ، ܘܚܠܵܦ ܕܟܘܼܠܲܝ ܣܢܝܼ̈ܩܹܐ ܘܡܥܘܼܖܒܹ̈ܐ،
ܘܚܠܵܦ ܕܟܘܼܠܲܝ ܟܪ̈ܝܼܗܹܐ ܘܡܫܘܼܩܝܹ̈ܐ، ܘܚܠܵܦ ܕܟܘܼܠܲܝ
ܥܲܢܝܼ̈ܖܹܐ ܕܦܪܸܫܠܵܝ ܘܡܫܘܼܢܹܠܵܝ ܡܼܢ ܒܲܝܢܵܬܼܲܢ. ܘܚܠܵܦ
ܕܥܲܡܵܐ ܗܵܖܝܼ ܕܟܚܵܝܸܪ ܘܟܣܵܦܸܪ ܠܪ̈ܲܚܡܹܐ ܕܝܼܠܘܼܟܼ، ܘܚܠܵܦ
ܚܲܠܵܫܘܼܬܼܝܼ ܘܕܲܘܝܘܼܬܼܝܼ ܘܡܸܣܟܹܝܢܘܼܬܼܝܼ.
ܘܫܲܡܵܫܵܐ:
ܒܫܸܠܝܵܐ ܘܲܒܕܸܚܠܬܼܵܐ ܗܘܲܝܬܘܿܢ ܩܵܝ̇ܡܝܼܢ ܘܲܡܨܲܠܹܝܢ.
ܘܟܩܵܝܸܡ ܥܲܡܵܐ.
ܟܵܗܢܵܐ:
ܐܵܝܸܬ ܡܵܪܝܼ ܒܪ̈ܲܚܡܹܐ ܕܝܼܠܘܼܟܼ ܟܲܒܝܼܪܹ̈ܐ ܕܠܵܐ ܟܐܵܬܹܝܢ̄
ܠܸܡܘܿܨܘܿܧܹܐ، ܥܒܼܘܿܖ، ܒܥܘܼܗܕܵܢܹܗ ܕܡܫܝܼܚܘܼܟܼ، ܬܸܟܼܪܘܿܢܵܐ
ܛܵܒܼܵܐ ܬܵܐ ܟܘܼܠܵܝ ܒܵܒܵܘ̈ܵܬܼܵܐ ܟܹܐܢܹ̈ܐ ܘܙܲܕܝܼ̈ܩܹܐ
ܕܫܦܹܪܠܵܝ ܩܖܵܡܘܼܟܼ، ܘܫܠܝܼ̈ܚܹܐ ܘܢܒܼܝܹ̈ܐ ܘܡܲܠܦܵܢܹ̈ܐ،
ܘܣܵܗܕܹܐ ܘܡܲܘܕܝ̈ܵܢܹܐ، ܘܐܲܦܸܣܩ̈ܘܿܦܹܐ ܘܩܲܫܝܼ̈ܫܹܐ
ܘܡܫܲܡܫܵܢܹ̈ܐ، ܘܟܘܼܠܵܝ ܝܲܠܖܹ̈ܐ ܕܥܹܕܬܵܐ ܩܲܕܝܼܫܬܵܐ
ܩܵܬܼܘܿܠܝܼܩܝܼ، ܗܵܢܲܝ ܕܦܸܫܠܵܝ ܪ̈ܫܝܼܡܹܐ ܒܪܘܼܫܡܵܐ ܒܝܼܚܵܝܹܐ
ܕܡܲܥܡܘܿܕܝܼܬܼܵܐ ܩܲܕܝܼܫܬܵܐ.
ܐܹܝܢ ܡܵܪܲܢ ܘܐܲܠܵܗܲܢ، ܥܒܼܘܖ ܥܸܡܲܢ ܫܲܝܢܘܼܟܼ ܘܫܠܵܡܘܼܟܼ
ܟܘܼܠܵܝ ܝܲܘܡ̈ܵܬܼܵܐ ܕܥܵܠܡܵܐ، ܬܲܕ ܝܵܖܥܝܼܢ̄ ܠܘܼܟܼ ܟܘܼܠܵܝ
ܥܡܝܼܪܹ̈ܐ ܕܐܲܪܥܵܐ، ܕܐܵܝܸܬ ܝܼܘܸܬ ܐܲܠܵܗܵܐ ܒܵܒܵܐ ܕܚܲܩܘܼܬܼܵܐ
ܠܚܘܿܖܘܼܟܼ، ܘܐܵܝܸܬ ܡܫܘܼܕܹܪܠܘܼܟܼ ܠܡܵܪܲܢ ܝܼܫܘܿܥ ܡܫܝܼܚܵܐ،
ܒܪܘܿܢܘܼܟܼ ܘܚܲܒܝܼܒܼܘܼܟܼ، ܘܐܵܗܘܼ ܡܵܪܲܢ ܘܐܲܠܵܗܲܢ
ܟܸܡܡܘܿܠܸܦܠܲܢ ܒܐܹܘܲܢܓܵܠܝܼܘܿܢ ܕܝܼܠܹܗ ܡܲܚܝܵܢܵܐ ܟܘܼܠܵܗܿ
ܕܲܟܼܝܼܘܼܬܼܵܐ ܘܩܲܕܝܼܫܘܼܬܼܵܐ.
ܘܗܲܡ ܐܲܚܢܝܼ، ܡܵܪܝܼ، ܥܲܒܼܕܹ̈ܐ ܕܝܼܠܘܼܟܼ ܒܨܝܼܪܹ̈ܐ ܘܚܲܠܵܫܹ̈ܐ
ܘܡܫܘܼܩܝܹ̈ܐ، ܕܝܼܘܘܼܟܼ ܓ̱ܡܝܼ̈ܥܹܐ ܒܫܸܡܹܗ ܘܩܝܼ̈ܡܹܐ ܝܘܼܟܼ
ܩܖܵܡܘܼܟܼ ܒܗܵܖܝܼ ܥܸܕܵܢܵܐ، ܘܕܸܩܒܸܠܲܢ ܒܣܲܦܹܝܬܼܵܐ ܛܘܼܧܣܵܐ
ܕܡܸܢܹܗ، ܟܘܼܕ ܐܲܚܢܝܼ ܦܨܝܼ̈ܚܹܐ ܘܡܫܲܒܘܿܚܹ̈ܐ، ܘܡܪ̈ܲܡܪܘܿܡܹܐ
ܘܡܗܲܠܠܘܿܠܹ̈ܐ، ܟܥܲܒܼܕܘܼܟܼ ܥܘܼܗܕܵܢܵܐ ܕܐ̄ܪ̈ܵܙܵܐ ܗܵܖܝܼ ܪܵܒܵܐ
ܘܗܹܝܒܵܢܵܐ ܘܩܲܕܝܼܫܵܐ ܘܡܲܚܗܝܵܢܵܐ ܘܐܲܠܵܗܵܝܵܐ ܕܚܲܫܹܗ
ܘܕܡܘܿܬܼܹܗ ܘܕܲܩܒܼܲܪܬܹܗ ܘܕܲܩܝܵܡܬܹܗ ܕܡܵܪܲܢ ܘܦܵܪܘܿܩܲܢ ܝܼܫܘܿܥ
ܡܫܝܼܚܵܐ، ܕܐܲܝܟܼ ܕܐܵܗ̄ܘ ܟܸܡ ܡܘܿܠܸܦ ܠܲܢ؛
ܟܘܼܕ ܡܜܹܐܠܹܗ ܙܲܒܼܢܵܐ، ܗܵܘ ܕܸܒܓܵܘܹܗ ܒܸܕܜܵـــܥܸܢ ܗ̄ܘܵܐ
ܚܲܫܵܐ ܘܩܵܪܸܒܼ ܠܡܘܿܬܼܵܐ، ܒܗܵܘ ܠܲܝܠܸܐ ܕܦܝܼܫܠܹܗ ܡܣܘܼܠܡܵܐ،
ܫܩܸܠܠܹܗ ܠܲܚܡܵܐ ܒܐܝܼ̈ܖܵܬܹܗ ܩܲܕܝܼ̈ܫܵܬܼܵܐ.
ܘܡܘܼܪܸܡܠܸܗ ܥܹܝ̈ܢܹܗ ܨܘܿܒܘܼܟܼ ܐܲܠܵܗܵܐ ܒܵܒܹـܗ ܐܲܚܝܼܕ ܟܘܿܠ
ܘܟܸܡܫܵܟܹܝܪܘܼܟܼ
ܘܡܒܘܼܪܸܟܼܠܹܗ، ܘܸܩܨܹܐܠܹܗ، ܘܝܗܒܸܠܠܹܗ ܬܵܐ ܬܲܠܡܝܼ̈ܖܹܐ ܕܝܼܠܹܗ
ܟܘܼܕ ܐܵܗܘܼ ܒܐܝܼܡܵܪܵܐ:
ܫܩܘܼܠܘܼ ܐܸܟܼܠܘܼ ܡܸܢܹܗ ܟܘܼܠܘܿܟܼܘܼܢ ܗܵܖܝܼܠܹܗ ܦܲܓ݂ܼـــܪܝܼ
ܕܡ̄ܜܵܠܸܒܘܿܟܼܘܼܢ ܟܦܵܝܸܫ ܩܸܨܝܵܐ ܬܵܐ ܫܘܼܒܼܩܵܢܵܐ ܕܚܜܵܗܹ̈ܐ.
ܘܥܵܢܹܝ̇ܢ:
ܐܵܡܹܝܢ.
ܗܵܕܐܲܝܟܼ ܒܵܬܲܪܡܵܐ ܕܸܡܥܘܼܫܹܝܠܵܝ، ܫܩܸܠܠܸܗ ܒܐܝܼ̈ܖܵܬܹܗ
ܩܲܕܝܼ̈ܫܵܬܼܵܐ ܟܵܣܵܐ ܕܲܟܼܝܵܐ، ܘܟܸܡܫܵܟܹܝܪܠ̄ܘܼܟܼ
ܘܸܡܒܘܼܪܸܟܼܠܸܗ، ܘܝ̄ܗܒܸܠܠܸܗ ܬܵܐ ܬܲܠܡܝܼ̈ܖܹܐ ܕܝܼܠܹܗ ܟܘܼܕ
ܐܵܗܘܼ ܒܐܝܼܡܵܪܵܐ:
ܫܩܘܼܠܘܼ ܫܬܘܿ ܡܸܢܹܗ ܟܘܼܠܘܿܟܼܘܼܢ؛ ܗܵܖܝܼܠܸܗ ܕܸܡܝܼ ܕܥܲܗܕܵܐ
ܚܵܕܬܼܵܐ ܕܠܥܵܠܲܡ، ܕܚܠܵܦܘܿܟܼܘܼܢ ܘܚܠܵܦ ܕܟܲܒܝܼܪܹ̈ܐ ܟܦܵܝܸܫ
ܫܦܝܼܟܼܵܐ ܬܵܐ ܫܘܼܒܼܩܵܢܵܐ ܕܚܜܵܗܹ̈ܐ.
ܘܥܵܢܹܝ̇ܢ:
ܐܵܡܹܝܢ.
ܟܵܗܢܵܐ:
ܟܠ ܐܝܼܡܲܢ ܕܥܵܒܼܕܘܼܬܘܼܢ ܗܵܢܝܼܢ̄ ܠܬܸܟܼܪܘܿܢܝܼ ܡܥܲܗܕܘܼܬܘܼܢ.
ܘܥܵܢܹܝ̇ܢ:
ܐܵܡܹܝܢ
(ܡܗܲܝܡܢܝܼܢܲܢ ܘܡܲܘܕܹܝܢܲܢ.)
ܟܵܗܢܵܐ:
ܘܕܵܗܵܐ ܟܘܼܕ ܐܲܚܢܝܼ ܟܥܵܒܼܖܘܼܟܼ ܥܘܼܗܕܵܢܹܗ، ܕܐܲܝܟܼ ܕܦܸܫܠܲܢ
ܦܩܝܼ̈ܖܹܐ، ܘܦܲܓܼܪܹܗ ܘܕܸܡܹܗ ܥܸܠܸ ܕܡܲܖܒܚܵܐ ܕܲܟܼܝܵܐ
ܘܩܲܕܝܼܫܵܐ ܟܡܲܩܸܪܒܼܘܼܟܼ،
ܫܘܼܕ ܐܵܬܼܹܐ ܡܵܪܝܼ ܪܘܼܚܘܼܟܼ ܩܲܕܝܼܫܵܐ
ܘܢܵܝܸܟܼ ܥܸܠܸܕ ܩܘܼܪܒܵܢܵܐ ܗܵܖܝܼ ܕܥܲܒܼܕܹ̈ܐ ܕܝܼܠܘܼܟܼ،
ܘܡܒܵܪܸܟܼܠܹܗ ܘܡܩܵܕܸܫܠܹܗ،
ܬܲܕ ܗܵܘܹܐ ܠܲܢ ܡܵܪܝܼ ܬܵܐ ܚܘܼܣܵܝܵܐ ܕܓܢܵܗܹ̈ܐ ܘܬܵܐ
ܫܘܼܒܼܩܵܢܵܐ ܕܚܛܝܼ̈ܵܬܼܵܐ، ܬܵܐ ܐܡܘܼܕ ܪܵܒܵܐ ܕܩܝܵܡܬܵܐ ܕܡܼܢ
ܒܲܝܢܲܬܼ ܡܝܼ̈ܬܼܹܐ، ܘܬܵܐ ܚܵܝܹ̈ܐ ܚܵܕ̄ܬܼܹܐ ܒܡܲܠܟܘܼܬܼܵܐ
ܕܫܡܲܝ̈ܵܐ ܥܸܡܸܕ ܟܘܼܠܲܝ ܗܵܢܲܝܢ̄ ܕܫܦܹܪܠܲܝ ܩܖܵܡܘܼܟܼ.
ܘܛܵܠܸܒܸܕ ܟܘܼܠܵܗܿ ܗܵܖܝܼ ܡܕܲܒܪܵܢܘܼܬܼܵܐ ܪܲܒܬܼܵܐ
ܘܡܥܘܼܓ̱ܵܒܬܵܐ ܥܒܼܸܖܬܵܐ ܛܵܠܲܢ، ܟܫܲܟܪܘܼܟܼ ܠܘܼܟܼ
ܘܟܸܡܫܲܒܚܘܼܟܼܠܘܼܟܼ ܕܠܵܐ ܒܛܵܠܵܐ ܒܥܹܕܬܘܼܟܼ ܡܚܘܼܠܵܨܬܵܐ
ܒܕܸܡܵܐ ܡܝܘܼܩܪܵܐ ܕܡܫܝܼܚܘܼܟܼ ܒܟܸܡܹ̈ܐ ܦܬܼܝܼ̈ܚܹܐ
ܘܦܲܬܼ̈ܘܵܬܼܵܐ ܓܸܠܝܹ̈ܐ، ܟܘܼܕ ܐܲܚܢܝܼܢ̄ ܟܡܲܣܩܘܼܟܼ ܬܸܫܒܘܿܚܬܵܐ
ܘܐܝܼܩܵܪܵܐ ܘܫܟܵܪܵܐ ܘܣܓܵܖܵܐ، ܬܵܐ ܫܸܡܘܼܟܼ ܒܹܚܵܝܵܐ ܘܩܲܕܝܼܫܵܐ
ܘܡܲܚܝܵܢܵܐ، ܗܵܫܵܐ ܘܲܒܟܠܙܒܼܲܢ ܘܲܠܥܵܠܲܡ ܥܵܠܡܝܼܢ.
ܥܲܡܵܐ:
ܐܵܡܹܝܢ.
ܩܘܼܪܒܵܢܵܐ ܡܩܲܪܸܒܼ ܠܐܲܠܵܗܵܐ. ܘܟܠܹܗ ܚܲܝܠܵܐ ܕܲܫܡܲܝܵܐ ܩܵܐܹ̇ܡ
ܠܥܸܠ ܡܸܢܹܗ.
ܟܵܗܢܵܐ ܡܵܐ ܕܥܵܐܹ̇ܠ ܩܖܵܡ ܡܲܖܒܲܚܩܘܼܖܫܵܐ، ܐܝܼܖܵܘ̈ܗܝ
ܕܲܟܼܝܵܐܝܼܬܼ ܦܵܫܹ̇ܛ ܠܵܫܡܲܝܵܐ، ܘܲܡܙܲܡܸܢ ܠܪܘܼܚܵܐ ܘܢܵܚ̇ܬܵܐ
ܡ̣ܢ ܪܲܘܡܵܐ،
ܘܲܡܩܲܕܫܵܐ ܦܲܓܼܪܹܗ ܘܲܕܡܹܗ ܕܲܡܫܝܼܚܵܐ.
ܛܟܣܐ ܕܩܨܝܐ ܘܕܪܘܫܡܐ
ܟܵܗܢܵܐ:
ܡܒܵܣܸܡܠܲܢ ܡܵܪܲܢ ܘܐܲܠܵܗܲܢ ܒܪܹܝܚܵܐ ܗܲܢܝܼܐܵܐ ܕܒܲܣܝܼܡܘܼܬܹܗ
ܕܚܘܼܒܘܼܟܼ. ܘܡܚܲܠܸܠܲܢ ܒܓܵܘܹܗ ܡܢ݂ ܫܸܟܼܬܵܐ ܕܚܛܝܼܬܼܵܐ،
ܪܵܥܝܵܐ ܛܵܒܼܵܐ ܕܦܠܸܛܠܸܗ ܒܸܓ̱ܝܵܠܵܐ ܥܸܠܲܢ ܘܚܙܹܐܠܸܗ
ܠܣܲܟܲܪܬܲܢ ܘܟܦܵܨܸܟܼ ܒܸܕܥܵܪܬܲܢ؛ ܡܚܵܣܝܼ ܠܝܼ ܓܢܵܗܝܼ̈
ܘܚܛܝ̈ܵܬܼܝܼـ، ܗܵܢܲܝ ܕܒܝܼܖܲܥܬܝܼـ ܘܗܵܢܲܝ ܕܠܵܐ ܒܝܼܖܲܥܬܝܼـ،
ܒܢܲܥܡܸܬܘܼܟܼ ܘܒܪ̈ܲܚܡܹܐ ܕܝܼܠܘܼܟܼ.
ܫܲܡܵܫܵܐ:
ܐܵܡܹܝܢ.
ܟܵܗܢܵܐ:
ܡܲܩܸܪܒܼܵܐܠܲܢ، ܡܵܪܲܢ ܘܐܲܠܵܗܲܢ، ܡܪܲܚܡܵܢܘܼܬܼܵܐ ܕܢܲܥܡܸܬܘܼܟܼ
ܠܓܹܝܒܸܕ ܗܵܢ ܐ̄ܪ̈ܵܙܹܐ ܫܒܼܝܼܚܹ̈ܐ ܘܩܲܕܝܼ̈ܫܹܐ ܘܡܲܚܝܵܢܹ̈ܐ
ܘܐܲܠܵܗܵܝܹ̈ܐ، ܟܲܖ ܠܵܐ ܫܵܘܹ̇ܝܢܲܢ.
ܫܲܡܵܫܵܐ:
ܒܲܫܪܵܪܵܐ ܟܲܖ ܠܵܐ ܫܵܘܹ̇ܝܢܲܢ. (ܓ
ܙܲܒܼܢܝܼ̈ܢ)
ܟܵܗܢܵܐ:
ܫܘܼܒܼܚܵܐ ܛܵܠܘܼܟܼ ܠܲܚܡܵܐ ܚܲܝܵܐ ܘܡܲܚܝܵܢܵܐ ܕܢܚܸܬܼܠܸܗ ܡܢ݂
ܫܡܲܝܵܐ ܘܟܝܵܗ̄ܒܸܠܼ ܚܲܝܹ̈ܐ ܠܥܵܠܡܵܐ ܟܠܹܗ ܡܢ݂ ܣܵܟܹܗ،
ܕܐܵܟܼܵܠܹ̈ܗ ܠܵܐ ܟܡܵܝ̇ܬܝܼܢ̄،
ܘܫܵܩܵܠܹ̈ܗ ܒܓܵܘܹܗ ܟܚܵܠܨܝܼܢ̄، ܘܒܓܵܘܹܗ ܟܦܵܝܫܝܼܢ̄ ܡܚܘܼܣܝܹ̈ܐ
ܘܟܚܵܗܹܝܢ̄ ܒܓܵܘܹܗ ܠܥܵܠܡܝܼܢ.
ܥܲܡܵܐ: ܐܵܡܹܝܢ.
ܟܵܗܢܵܐ:
ܩܲܪܒܼܘܼܟܼ ܡܵܪܝܼ ܒܗܲܝܡܵܢܘܼܬܼܵܐ ܕܲܫܪܵܪܵܐ ܕܫܸܡܘܟܼ ܠܓܹܝܒܸܕ
ܗܵܢ ܐ̄ܪ̈ܵܙܹܐ ܩܲܕܝ̈ܫܹܐ، ܘܟܩܵܨܘܼܟܼ ܒܲܚܢܵܢܘܼܟܼ، ܘܟܪܲܫܡܘܼܟܼ
ܒܸܡܪܲܚܡܵܢܘܼܬܼܘܼܟܼ، ܦܲܓܼܪܹܗ ܘܕܸܡܹܗ ܕܡܲܚܝܵܢܲܢ ܡܵܪܲܢ ܝܼܫܘܿܥ
ܡܫܝܼܚܵܐ، ܒܫܸܡ ܐܲܒܵܐ ܘܲܒܪܵܐ ܘܪܘܼܚܵܐ ܕܩܘܼܖܫܵܐ.
ܥܲܡܵܐ:
ܐܵܡܹܝܢ.
ܟܵܗܢܵܐ:
ܟܦܵܝܸܫ ܪܫܝܼܡܵܐ ܕܸܡܵܐ ܝܲܩܝܼܪܵܐ ܒܦܲܓܼܪܵܐ ܡܲܚܝܵܢܵܐ ܕܡܵܪܲܢ
ܝܼܫܘܿܥ ܡܫܝܼܚܵـܐ، ܒܫܸܡ ܐܲܒܵܐ ܘܲܒܪܵܐ ܘܪܘܼܚܵܐ ܕܩܘܼܖܫܵܐ.
ܥܲܡܵܐ:
ܐܵܡܹܝܢ.
ܟܵܗܢܵܐ:
ܟܦܵܝܸـܫ ܪܫܝܼــܡܵܐ ܦܲܓܼܪܵܐ ܩܲܕܝܼܫܵܐ ܒܕܸܡܵܐ ܡܚܲܣܝܵܢܵܐ
ܕܡܵܪܲܢ ܝܼܫܘܿܥ ܡܫܝܼܚܵــܐ، ܒܫܸܡ ܐܲܒܵܐ ܘܲܒܪܵܐ ܘܪܘܼܚܵܐ
ܕܩܘܼܖܫܵܐ.
ܥܲܡܵܐ:
ܐܵܡܹܝܢ.
ܟܵܗܢܵܐ:
ܐܸܬܼܦܪܸܫܘ ܘܐܸܬܼܩܲܕܲܫܘ ܘܐܸܬܼܓܡܲܪܘ ܘܐܸܫܬܲܡܠܝܼܘ ܘܐܸܬܼܚܲܝܲܖܘ
ܘܐܸܬܼܚܲܠܲܛܘ ܘܐܸܬܼܢܲܩܲܦܘ ܘܐܸܬܼܚܲܬܲܡܘ ܐ̄ܪ̈ܵܙܹܐ ܗܵܠܹܝܢ
ܡܲܚܝ̈ܵܢܹܐ ܒܲܫܡܵܐ ܣܓܼܝܼܖܵܐ ܕܲܬܠܝܼܬܼܝܘܼܬܼܵܐ ܡܫܲܒܲܚܬܵܐ
ܐܲܒܵܐ ܘܲܒܪܵܐ ܘܪܘܼܚܵܐ ܕܩܘܼܖܫܵܐ...
ܫܲܒܚܘܼܗܝ ܟܠܗܘܿܢ ܡܲܠܲܐܟܼܵܘ̈ܗܝ:
ܟܪ̈ܘܿܒܹܐ ܘܲܣܪ̈ܵܦܹܐ ܘܪ̈ܲܒܲܝ ܡܲܠܲܐܟܹ̈ܐ، ܒܕܸܚܠܵܐ
ܘܒܲܪܬܹܝܬܼܵܐ ܩܵܝ̇ܡܝܼܢ ܩܖܵܡ ܡܲܖܒܚܵܐ. ܘܚܵܝ̇ܪܝܼܢ ܒܹܗ ܒܟܵܗܢܵܐ
(ܒܟܘܼܡܪܵܐ)
ܕܩܵܨܹ̇ܐ ܘܲܡܦܲܠܸܓܼ،
ܦܲܓܼܪܹܗ ܕܲܡܫܝܼܚܵܐ ܠܚܘܼܣܵܝܵܐ ܕܚܲܘܒܹ̈ܐ.
ܛܟܣܐ ܕܡܣܒܐ ܕܐ̄ܪ̈ܙܐ
ܟܵܗܢܵܐ:
ܢܲܥܡܸܐ ܕܡܵܪܲܢ ܝܼܫܘܿܥ ܡܫܝܼܚܵܐ، ܘܚܘܼܒܹܗ ܕܐܲܠܵܗܵܐ ܒܵܒܵܐ
ܘܫܲܪܝܼܟܘܼܬܼܵܐ ܕܪܘܼܚܵܐ ܕܩܘܼܖܫܵܐ ܗܘܿܝܵܐ ܥܸܡܸܕ ܟܘܿܠܲܢ،
ܕܵܗܵܐ ܘܒܟܘܿܠ ܙܲܒܼܢܵܐ ܘܲܠܥܵܠܲܡ ܥܵܠܡܝܼܢ.
ܫܲܡܵܫܵܐ:
ܟܘܼܠܲܢ ܒܗܹܝܒܵܐ ܘܐܝܼܩܵܪܵܐ ܩܲܪܒܼܘܼܟܼ ܠܐ̄ܪܵܙܵܐ ܕܦܲܓܼܪܹܗ
ܘܕܸܡܹܗ ܝܲܩܝܼܪܵܐ ܕܦܵܪܘܿܩܲܢ.
ܒܠܸܒܵܐ ܨܸܦܝܵܐ ܘܗܲܝܡܵܢܘܼܬܼܵܐ ܚܲܩܵܢܝܼ ܬܲܟܼܪܘܼܟܼ ܚܲܫܹܗ
ܘܡܣܵܠܘܼܟܼ ܓܝܵܢܲܢ ܒܸܩܝܵܡܬܹܗ.
ܡܒܹܝܕ ܡ̄ܜܵܠܸܒܲܢ ܐܝܼܚܝܼܖܵܝܸܗ ܕܐܲܠܵܗܵܐ ܦܲܓܼܪܵܐ ܡܵܝܘܿܬܼܵܐ
ܘܓܝܵܢܵܐ ܡܲܚܟܝܵܢܝܼܬܼܵܐ ܘܝܵܖܵܥܬܵܐ ܘܠܵܐ ܡܵܝܘܿܬܼܬܵܐ ܡ̣ܢ
ܒܢܲܝ̈ܢܵܫܵܐ ܫܩܸܠܠܹܗ.
ܘܒܢܵܡܘܿܣܹ̈ܗ ܡܲܚܝܵܢܹ̈ܐ ܘܦܘܼܩܕܵܢܹ̈ܗ ܩܲܕܝܼ̈ܫܹܐ ܡ̣ܢ
ܜܵܥܝܘܼܬܼܵܐ ܠܝܼܖܵܥܬܵܐ ܕܚܲܩܘܼܬܼܵܐ ܟܸܡܲܩܪܸܒܼܠܲܢ.
ܘܒܵܬܲܪ ܟܘܼܠܵܗ̇ ܡܖܲܒܪܵܢܘܼܬܹܗ ܡ̄ܜܵܠܸܒܲܢ، ܪܹܫܝܼܬܼܵܐ
ܕܸܟܝܵܢܲܢ ܒܸܨܠܝܼܒܼܵܐ ܦܝܼܫܠܸܗ ܡܓ̱ܘܼܪܒܵܐ، ܘܡ̣ܢ ܒܹܝܢܲܬܼ
ܡܝܼ̈ܬܹܐ ܩܸܡܠܹܗ، ܘܠܸܫܡܲܝܵܐ ܣܸܩܠܸܗ، ܘܡܣܘܼܠܸܡܠܸܗ ܜܵܠܲܢ
ܐ̄ܪ̈ܵܙܹܗ ܩܲܕܝܼ̈ܫܹܐ، ܕܸܒܓܵܘܲܝ ܬܵܟܼܪܘܼܟܼ ܟܘܼܠܵܗ̇ ܜܵܒܼܘܼܬܹܗ
ܥܸܡܲܢ.
ܕܵܗܵܐ ܐܲܚܢܝܼ ܒܚܘܼܒܵܐ ܫܦܝܼܟܼܵܐ ܘܒܥܸܓ̱ܒܘܿܢܵܐ ܡܲܟܝܼܟܼܵܐ
ܩܲܒܠܘܼܟܼ ܚܠܹܝܬܵܐ ܕܚܵܝܹ̈ܐ ܐܲܒܵܕܝܼܢܵܝܹ̈ܐ.
ܘܒܸܨܠܘܿܬܼܵܐ ܨܦܝܼܬܼܵܐ ܘܒܚܲܫܵܐ ܕܦܸܪܫܘܿܢܵܐ ܡܫܲܪܟܘܼܟܼ
ܒܐ̄ܪ̈ܵܙܹܐ ܕܥܹܕܬܵܐ، ܒܐܸܡܘܼܕ ܕܸܬܝܵܒܼܘܼܬܼܵܐ.
ܟܘܼܕ ܐܲܚܢܝܼ ܕܵܥܪܘܼܟܼ ܡ̣ܢ ܓܢܵܗ̈ܢ، ܘܸܡܦܲܫܸܡܢܘܼܟܼ ܥܲܠ
ܚܜܝܼ̈ܬܲܢ، ܘܜܵܠܒܘܼܟܼ ܪ̈ܲܚܡܸܐ ܘܫܘܼܒܼܩܵܢܵܐ ܡ̣ܢ ܐܲܠܵܗܵܐ
ܡܵܪܸܐ ܕܟܘܿܠ، ܘܫܵܒܼܩܘܼܟܼ ܓܢܵܗܹ̈ܐ ܕܐܲܚܵܢ̄ܘܵܬܼ̈ܢ.
ܥܲܡܵܐ؛
ܡܵܪܝܵܐ ܡܚܵܣܝܼ ܚ̈ܛܵܗܹܐ ܘܓܢܵܗܹ̈ܐ ܕܥܲܒܼ̈ܕܹܐ ܕܝܼܠܘܼܟܼ.
ܘܡܨܵܦܘܼܟܼ ܢܝܼ̈ܬܵܬܲܢ ܡ̣ܢ ܦܸܠܓܼܘܿܢܹ̈ܐ ܘܩܵܠܵܥ̈ܝܵܬܼܵܐ.
ܡܵܪܝܵܐ ܡܚܵܣܝܼ ܚ̈ܛܵܗܹܐ ܘܓܢܵܗܹ̈ܐ ܕܥܲܒܼ̈ܕܹܐ ܕܝܼܠܘܼܟܼ.
ܘܟܘܼܕ ܨܵܦܵܝ ܓܝܵܢܵܬܼ̈ܢ ܡ̣ܢ ܟܸܢܬܵܐ ܘܕܸܫܡܸܢܵܝܘܼܬܼܵܐ.
ܡܵܪܝܵܐ ܡܚܵܣܝܼ ܚ̈ܛܵܗܹܐ ܘܓܢܵܗܹ̈ܐ ܕܥܲܒܼ̈ܕܹܐ ܕܝܼܠܘܼܟܼ.
ܫܵܩܠܘܼܟܼ ܩܘܼܖܫܵܐ ܘܦܹܝܫܘܼܟܼ ܡܩܘܼܕܫܹ̈ܐ ܒܪܘܼܚܵܐ ܕܩܘܼܖܫܵܐ.
ܡܵܪܝܵܐ ܡܚܵܣܝܼ ܚ̈ܛܵܗܹܐ ܘܓܢܵܗܹ̈ܐ ܕܥܲܒܼ̈ܕܹܐ ܕܝܼܠܘܼܟܼ.
ܒܸܬܧܵܩܘܼܬܼܵܐ ܘܚܘܼܝܵܖܵܐ ܕܗܘܿܢ̈ܲܢ ܩܲܒܠܘܼܟܼ ܒܚܘܼܒܵܐ
ܕܸܚܖܵܖܸܐ ܠܫܲܪܝܼܟܘܼܬܼܵܐ ܒܐ̄ܪ̈ܵܙܹܐ.
ܝܵܐ ܡܵܪܝܵܐ ܡܚܵܣܝܼ ܚܿܛܝܼ̈ܵܬܼܵܐ ܘܓܢܵܗܹ̈ܐ ܕܟܼܵܕܵܡܹ̈ܐ
ܕܝܼܠܘܼܟܼ.
ܕܗܵܘܵܝܢ̄ ܜܵܠܲܢ، ܝܵܐ ܡܵܪܝܼـ، ܬܵܐ ܩܝܵܡܬܵܐ ܕܦܲܓܼܪ̈ܲܢ ܘܬܵܐ
ܦܘܼܪܩܵܢܵܐ ܕܸܓܝܵܢܵܬܼ̈ܢ.
ܘܬܵܐ ܚܲܝܹ̈ܐ ܕܠܥܵܠܲܡ ܥܵܠܡܝܼܢ.
ܫܲܡܵܫܵܐ:
ܢܨܲܠܸܐ ܫܠܵܡܵܐ ܥܲܡܲܢ.
ܟܵܗܢܵܐ:
ܡܚܵܣܝܼ، ܡܵܪܝ، ܒܚܲܢܝܼܢܘܼܬܼܘܼܟܼ ܚܜܝܼܵܬܼ̈ܐ ܘܓܢܵܗܹ̈ܐ
ܕܥܲܒܕܹ̈ܐ ܕܝܼܠܘܼܟܼ.
ܘܡܩܵܕܸܫ ܣܸܦܘܵܬܼ̈ܢ ܒܢܲܥܡܸܬܘܼܟܼ، ܕܝܵܗ̄ܒܼـܝܼܢ̄ ܦܹܐܪܹ̈ܐ
ܕܫܘܼܒܼܚܵܐ ܬܵܐ ܐܲܠܵܗܘܼܬܼܘܼܟܼ ܡܪܲܝܲܡܬܵܐ، ܥܸܡܸܕ ܟܠܲܝ
ܩܲܕܝܼ̈ܫܹܐ ܕܝܼܠܘܼܟܼ ܒܡܲܠܟܘܼܬܼܘܼܟܼ.
ܘܡܲܛـܒܼܝܼܠܲܢ ܡܵܪܲܢ ܘܐܲܠܵܗܲܢ ܒܕܵܝܸܡܘܼܬܼܵܐ ܕܠܵܐ ܡܘܼܡܵܐ
ܩܵܕ̄ܡܘܼܟܼ ܩܹܝܡܘܼܟܼ ܒܠܸܒܵܐ ܨܸܦܝܵܐ ܘܦܵܬܼܘܵܬܼ̈ܐ ܓܸܠܝܹ̈ܐ.
ܘܒܒܸܣܬܵܐܘܼܬܼܵܐ، ܗܵܝ ܕܡܸܢܘܼܟܼ ܒܪ̈ܲܚܡܹܐ ܦܸܫܠܵܗ̇ ܗܒܼܝܼܠܬܵܐ
ܜܵܠܲܢ، ܟܘܿܠܲܢ ܒܸܚܖܵܖܹܐ ܩܵܪܘܼܟܼܠܘܼܟܼ، ܘܗܵܖܐܲܝܟܼ ܐܵܡܪܘܼܟܼ:
ܥܲܡܵܐ:
ܒܵܒܲܢ ܕܐܝܼܠܹܗ ܒܸܫܡܲܝܵܐ، ܦܵܝܸܫ ܡܩܘܼܕܫܵܐ ܫܸܡܘܼܟܼ، ܐܵܬܼܝܵܐ
ܡܲܠܟܘܼܬܼܘܼܟܼ، ܗܵܘܸܐ ܥܸܓ̱ܒܘܿܢܘܼܟܼ، ܕܐܸܝܟܼ ܕܐܝܼܠܸܗ
ܒܸܫܡܲܝܵܐ ܗܵܕܐܲܝܟܼ ܗܲܡ ܒܐܲܪܥܵܐ.
ܗܲܒܼܠܲܢ ܠܲܚܡܵܐ ܕܣܘܼܢܩܵܢܲܢ ܗܸܕܝܘܼܡ̄.
ܘܫܒܼܘܿܩ ܜܵܠܲܢ ܓܢܵܗ̈ܢ ܘܸܚܜܝܼܵܬ̈ܢ، ܕܐܲܝܟܼ ܕܗܲܡ ܐܲܚܿܢܝܼ
ܫܒܸܩܠܲܢ ܬܵܐ ܗܵܢܵܝ ܕܸܚܛܹܐܠܲܝ ܥܸܠܲܢ.
ܘܠܵܐ ܡܲܥ̄ܒܝܼܪܸܬܠܲܢ ܒܓ̱ܘܼܪܵܒܵܐ،
ܐܸܠܵܐ ܡܚܵܠܸܨܠܲܢ ܡ̣ܢ ܒܝܼܫܵܐ.
ܡܒܹܝܕ ܕܝܼܠܘܼܟܼ ܐܝܼܠܵܗ̇ ܡܲܠܟܘܼܬܼܵܐ ܘܚܲܝܠܵܐ ܘܬܸܫܒܘܿܚܬܵܐ
ܠܥܵܠܲܡ ܠܥܵܠܡܝܼܢ.
ܐܵܡܹܝܢ.
ܟܵܗܢܵܐ:
ܐܹܝܢ ܡܵܪܝܵܐ ܐܲܠܵܗܵܐ ܚܹܝܠܵܢܵܐ، ܐܲܠܵܗܲܢ ܜܵܒܼܵܐ ܘܒܵܒܲܢ
ܡܸܠܝܵܐ ܪ̈ܲܚܡܹܐ، ܟܜܲܠܒܘܼܟܼ ܡܸܢܘܼܟܼ ܘܟܸܡܢܘܿܢܘܼܟܼ ܡ̣ܢ
ܟܲܒܝܼܪܘܼܬܼܵܐ ܕܸܡܪܲܚܡܵܢܘܼܬܼܘܼܟܼ:
ܠܵܐ ܡܵܪܝܼ، ܠܵܐ ܡܵܪܝܼ ܡܲܥ̄ܒܝܼܪܸܬܲܢ ܒܓ̱ܘܼܪܵܒܵܐ، ܐܸܠܵܐ
ܦܪܘܿܩ ܘܡܚܵܠܸܨܠܲܢ ܡ̣ܢ ܒܝܼܫܵܐ ܘܚܹܝܠܵܘܵܬܹ̈ܗ، ܡܒܹܝܕ ܕܝܼܠܘܼܟܼ
ܐܝܼܠܵܗ̇ ܡܲܠܟܘܼܬܼܵܐ ܘܚܹܝܠܵܐ ܘܥܘܼܫܢܵܐ ܘܓܲܢ̄ܒܵܪܘܼܬܼܵܐ
ܘܫܘܼܠܜܵܢܵܐ ܒܸܫܡܲܝܵܐ ܘܒܐܲܪܥܵܐ، ܗܵܫܵܐ ܘܲܒܟܠܙܒܲܢ ܘܲܠܥܵܠܲܡ
ܥܵܠܡܝܼܢ.
ܥܲܡܵܐ:
ܐܵܡܹܝܢ.
ܟܵܗܢܵܐ:
ܫܠܵܡܵܐ ܥܲܡܟܼܘܿܢ.
ܥܲܡܵܐ:
ܘܥܲܡܵܟܼ ܘܥܲܡ ܪܘܼܚܵܟܼ.
ܟܵܗܢܵܐ:
ܩܘܼܖܫܵܐ ܠܩܲܕܝܼ̈ܫܹܐ ܝܵܐܹܐ ܒܫܲܠܡܘܼܬܼܵܐ.
ܥܲܡܵܐ:
ܚܲܖ ܐܲܒܵܐ ܩܲܕܝܼܫܵܐ، ܚܲܖ ܒܪܵܐ ܩܲܕܝܼܫܵܐ، ܚܲܖ ܪܘܼܚܵܐ
ܩܲܕܝܼܫܵܐ،
ܫܘܼܒܼܚܵܐ ܠܐܲܒܵܐ ܘܠܲܒܪܵܐ ܘܲܠܪܘܼܚܵܐ ܩܲܕܝܼܫܵܐ ܠܥܵܠܲܡ
ܥܵܠܡܝܼܢ. ܐܵܡܹܝܢ.
ܫܲܡܵܫܵܐ:
ܫܲܒܲܚܘ ܠܐܲܠܵܗܵܐ ܚܲܝܵܐ.
ܥܲܡܵܐ:
ܬܸܫܒܘܿܚܬܵܐ ܠܹܗ ܒܥܹܕܬܹܗ، ܘܲܥܠܲܝܢ ܪ̈ܲܚܡܵܘܗܝ ܘܲܚܢܵܢܹܗ
ܒܟܠܗܘܿܢ ܙܲܒܼܢܹ̈ܐ ܘܥܸܕܵܢܹ̈ܐ.
(ܥܘܼܢܵܝܵܐ ܕܒܹܝܡ)
ܢܹܐܟܼܠܘܼܢ ܡܸܣܟܹ̈ܢܹܐ ܘܢܸܣܒܥܘܼܢ:
ܦܲܓܼܪܹܗ ܕܲܡܫܝܼܚܵܐ ܘܲܕܡܹܗ ܝܲܩܝܼܪܵܐ، ܥܲܠ ܡܲܖܒܲܚ ܩܘܼܖܫܵܐ.
ܒܕܸܚܠܬܼܵܐ ܘܲܒܪܸܚܡܬܼܵܐ ܟܠܲܢ ܢܸܬܼܩܲܪܲܒܼ ܠܹܗ، ܘܥܲܡ
ܡܲܠܲܐܟܹ̈ܐ ܢܝܲܒܸܒܼ ܠܹܗ؛ ܩܲܕܝܼܫ ܩܲܕܝܼܫ ܩܲܕܝܼܫ ܡܵܪܝܵܐ
ܐܲܠܵܗܵܐ܀
ܫܲܡܵܫܵܐ:
ܒܲܪܸܟܼܡܵܪܝ.
ܟܵܗܢܵܐ:
ܡܲܘܗܲܒܼܬܼܵܐ ܕܛܲܝܒܘܼܬܹܗ ܕܡܲܚܝܵܢܲܢ ܡܵܪܲܢ ܝܑܼܫܘܿܥ ܡܫܝܼܚܵܐ
ܬܸܫܬܲܡܠܸܐ ܒܪ̈ܲܚܡܹܐ ܥܲܡ ܟܠܲܢ.
ܥܲܡܵܐ:
ܠܥܵܠܲܡ ܥܵܠܡܝܼܢ ܐܵܡܹܝܢ.
ܫܲܡܵܫܵܐ:
ܐܲܚܲܝ̈ ܩܲܒܸܠܘ ܦܲܓܼܪܹܗ ܕܲܒܪܵܐ ܐܵܡܪܵܐ ܥܹܕܬܵܐ، ܘܐܸܫܬܵܘ
ܟܵܣܹܗ ܒܗܲܝܡܵܢܘܼܬܼܵܐ ܒܹܝܬܼ ܡܲܠܟܘܼܬܼܵܐ.
ܬܸܫܒܘܿܚܬܵܐ ܕܩܘܼܒܵܠܛܲܝܒܘܼܬܼܵܐ
ܕܡܵܪܝ ܐܲܦܪܹܝܡ:
ܡܵܪܲܢ ܝܑܼܫܘܿܥ ܡܲܠܟܵܐ ܣܓܼܝܼܖܵܐ،
ܕܲܙܟܼܵܐ ܒܚܲܫܹܗ ܠܡܲܘܬܵܐ ܛܪܘܼܢܵܐ*
ܒܪܵܐ ܕܐܲܠܵܗܵܐ ܕܐܸܫܬܲܘܕܝܼ ܠܲܢ،
ܚܲܝܹ̈ܐ ܚܲܖܬܹ̈ܐ ܒܡܲܠܟܘܼܬܼ ܪܲܘܡܵܐ*
ܒܲܛܸܠ ܡܸܢܲܢ ܟܠ ܢܸܟܼܝܵܢܝܼ̈ܢ،
ܘܐܲܫܪܵܐ ܒܐܲܬܼܪܲܢ ܫܲܝܢܵܐ ܘܪ̈ܲܚܡܹܐ*
ܕܲܒܝܘܿܡ ܕܸܢܚܵܟܼ ܢܸܚܸܐ ܩܖܵܡܲܝܟ،
ܘܢܸܦܘܿܩ ܠܐܘܼܪܥܵܟܼ ܐܲܝܟܼ ܨܸܒܼܝܵܢܵܟܼ*
ܒܝܲܖ ܐܘܿܫܲܥܢܸ̈ܐ ܢܲܘܕܸܐ ܠܲܫܡܵܟܼ،
ܥܲܠ ܛܲܝܒܘܼܬܼܵܟܼ ܕܲܠܘܵܬܼ ܓܸܢܣܲܢ*
ܕܲܣܓܼܝܼܘ ܪ̈ܲܚܡܲܝܟ ܨܹܝܖ ܐ̄ܢܵܫܘܼܬܲܢ،
ܘܲܖܢܲܚ ܚܘܼܒܵܟܼ ܥܲܠ ܡܝܼܬܼܘܼܬܲܢ*
ܘܲܥܛܲܝܬ ܚܲܘ̈ܒܲܝܢ ܒܝܲܖ ܚܘܼܣܵܝܵܟܼ،
ܫܘܼܒܼܚܵܐ ܠܲܫܡܵܟܼ ܥܲܠ ܡܲܘܗܲܒܼܬܼܵܟܼ*
ܒܪܝܼܟܼ ܐܝܼܩܵܪܵܟܼ ܡܼܢ ܓܵܘ ܐܲܬܼܪܵܟܼ،
ܫܵܒܹܩ ܚܲܘ̈ܒܹܐ ܡܸܛܠ ܪ̈ܲܚܡܵܘܗܝ*
ܘܲܒܛܲܝܒܘܼܬܼܵܟܼ ܐܲܫܘܵܐ ܠܟܠܲܢ،
ܕܢܲܘܕܸܐ ܘܢܸܣܓܘܿܖ ܠܐܲܠܵܗܘܼܬܼܵܟܼ*
ܘܲܠܡܵܪܘܼܬܼܵܟܼ
ܒܟܠ ܥܸܕܵܢܝܼ̈ܢ،
ܢܲܣܸܩ ܫܘܼܒܼܚܵܐ ܐܵܡܹܝܢ ܘܐܵܡܹܝܢ܀
ܫܲܡܵܫܵܐ:
ܟܘܼܠܲܢ ܕܵܗܵܐ ܐܲܚܿܢܝܼ ܕܸܒܚܿܠܹܝܬܵܐ ܕܜܲܝܒܘܼܬܼܵܐ ܕܪܘܼܚܵܐ
ܕܩܘܼܖܫܵܐ ܩܪܸܒܼܠܲܢ ܘܸܚܿܫܸܚܿܠܲܢ ܕܸܡܫܲܪܟܘܼܟܼ ܒܸܫܩܵܠܵܐ ܕܗܵܢ
ܐ̄ܪ̈ܵܙܹܐ ܫܒܼܝܼܚܹ̈ܐ ܘܩܲܕܝܼ̈ܫܹܐ ܘܡܲܚܝܵܢܹ̈ܐ ܘܐܲܠܵܗܵܝܹ̈ܐ.
ܫܲܟܪܘܼܟܼ ܟܘܼܠܲܢ ܒܸܚܖܵܖܹܐ ܘܡܫܲܒܚܘܼܟܼ ܬܵܐ ܐܲܠܵܗܵܐ
ܝܵܗܒܼܵܠܲܝܗ̄ܘܢ.
ܥܲܡܵܐ:
ܫܘܼܒܼܚܵܐ ܠܹܗ ܥܲܠ ܡܲܘܗܲܒܼܬܹܗ ܕܠܵܐ ܡܸܬܼܡܲܠܠܵܐ.
ܫܲܡܵܫܵܐ:
ܢܨܲܠܸܐ. ܫܠܵܡܵܐ ܥܲܡܲܢ.
ܟܵܗܢܵܐ:
ܟܫܵܟܠܵܐ ܝܵܐ ܡܵܪܝܵܐ ܒܟܘܿܠ ܝܘܼ̈ܡܵܬܼܵܐ، ܘܟܙܵܕܩܵܐ ܒܟܘܿܠ
ܙܲܒܼܢܹ̈ܐ ܘܟܚܵܫܚܵܐ ܒܟܘܿܠ ܫܵܥܝܵܬܼ̈ܐ ܠܡܘܿܕܘܿܝܸܐ ܘܠܸܣܓ݂ܵܖܵܐ
ܘܸܠܫܲܒܘܿܚܸܐ ܬܵܐ ܫܸܡܵܐ ܗܹܝܒܵܢܵܐ ܕܪܲܒܘܼܬܼܘܼܟܼ.
ܕܡܘܼܜܒܹܐܠܘܼܟܼ ܡܵܪܝܼ ܒܢܲܥܡܸܬܘܼܟܼ ܠܓܸܢܣܵܐ ܡܚܝܼܠܵܐ
ܕܒܢܹܝ̈ܢܵܫܵܐ ܡܵܝܘܿܬܹ̈ܐ، ܕܥܸܡܸܕ ܪ̈ܘܼܚܵܢܹܐ ܬܵܐ ܫܸܡܘܼܟܼ
ܡܩܲܕܫܝܼܢ، ܘܒܐ̄ܪ̈ܵܙܹܐ ܕܸܚܠܹܝܬܘܼܟܼ ܡܫܲܪܟܝܼܢ، ܘܸܒܚܸܠܝܘܼܬܼܵܐ
ܕܬܵܢܵܝܵܬܼ̈ܘܼܟܼ ܒܲܣܡܝܼܢ، ܘܩܵܠܹ̈ܐ ܕܫܘܼܒܼܚܵܐ ܘܕܸܫܟܵܪܵܐ ܬܵܐ
ܐܲܠܵܗܘܼܬܼܘܼܟܼ ܥܠܝܼܬܼܵܐ ܡܲܣܩܝܼܢ، ܒܟܘܿܠ ܥܸـܕܵܢܵܐ، ܡܵܪܵܐ
ܕܟܘܿܠ:
ܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܖܫܵܐ ܠܥܵܠܡܝܼܢ.
ܥܲܡܵܐ:
ܐܵܡܹܝܢ ܒܲܪܸܟܼܡܵܪܝ.
ܟܲܗܢܵܐ:
ܡܫܝܼܚܵܐ ܐܲܠܵܗܲܢ ܘܡܵܪܲܢ، ܡܲܠܟܲܢ ܘܦܵܪܘܿܩܲܢ، ܘܡܲܚܝܵܢܲܢ
ܘܫܲܒܼܵܩܵܐ ܕܸܚܜܝܼܵܬܼ̈ܢ، ܕܸܒܢܲܥܡܸܬܹܗ ܘܪ̈ܲܚܡܸܐ ܕܝܼܠܹܗ
ܟܸܡܡܲܜܒܹܐܠܲܢ ܠܸܫܩܵܠܵܐ ܦܲܓܼܪܹܗ ܘܕܸܡܹܗ ܝܲܩܝܼܪܹ̈ܐ
ܡܩܲܕ̈ܫܵܢܹܐ ܕܟܘܿܠ، ܐܵܗܘܼ ܝܵܗܒܸܠ ܠܲܢ ܕܫܲܦܪܘܼܟܼ ܜܵܠܹܗ
ܒܬܲܢܵܝܵܬܼ̈ܢ ܘܒܸܥܒܼܵܖ̈ܢ ܘܒܚܘܼܫܵܒܼ̈ܢ ܘܫܘܼܓ̄ܠܵܢ̈ܢ.
ܘܫܘܼܕ ܗܵܘܹܐܠܲܢ ܡܵܪܝܼ ܗܵܖ ܪܗܒܼܘܿܢܵܐ ܕܸܫܩܸܠܠܲܢ
ܘܒܸܕܫܲܩܠܘܼܟܼ ܬܵܐ ܚܘܼܣܵܝܵܐ ܕܸܓܢܵܗܹ̈ܐ ܘܬܵܐ ܫܘܼܒܼܩܵܢܵܐ
ܕܸܚܜܝܼܵܬܼ̈ܐ ܘܬܵܐ ܐܸܡܘܼܕ ܪܵܒܵܐ ܕܸܩܝܵܡܬܵܐ ܡ̣ܢ
ܒܹܝܢܲܬܼ ܡܝܼ̈ܬܹܐ ܘܬܵܐ ܚܵܝܹ̈ܐ ܚܵܖ̈ܬܹܐ ܒܡܲܠܟܘܼܬܼܵܐ
ܕܸܫܡܲܝܵܐ، ܥܸܡܸܕ ܟܘܼܠ ܗܵܢܵܝ ܕܸܫܦܹܪܠܵܝ ܩܵܕ̄ܡܹܗ، ܒܜܲܝܒܘܼܬܹܗ
ܘܪ̈ܲܚܡܹܐ ܕܝܼܠܹܗ، ܠܥܵܠܡܝܼܢ.
ܐܵܡܹܝܢ.
ܥܲܡܵܐ:
ܐܲܒܘܼܢ ܕܒܲܫܡܲܝܵܐ ܢܸܬܼܩܲܕܲܫ ܫܡܵܟܼ ܬܹܐܬܸܐ ܡܲܠܟܘܼܬܼܵܟܼ
ܩܲܕܝܼܫ ܩܲܕܝܼܫ ܩܲܕܝܼܫܲܬ ܐܲܒܘܼܢ ܕܒܲܫܡܲܝܵܐ.
ܕܲܡܠܹܝܢ ܫܡܲܝ̈ܵܐ ܘܐܲܪܥܵܐ ܪܲܒܿܘܼܬܼ ܫܘܼܒܼܚܵܟܼ ܥܝܼܪܹ̈ܐ
ܘܐ̄ܢܵܫ̈ܵܐ ܩܵܥܹܝ̇ܢ ܠܵܟܼ؛
ܩܲܕܝܼܫ ܩܲܕܝܼܫ ܩܲܕܝܼܫܲܬ.
ܟܵܗܢܵܐ:
ܫܘܼܒܼܚܵܐ ܠܐܲܒܵܐ ܘܠܲܒܪܵܐ ܘܲܠܪܘܼܚܵܐ ܕܩܘܼܖܫܵܐ.
ܥܲܡܵܐ:
ܡܢ݂ ܥܵܠܲܡ ܘܲܥܖܲܡܵܐ ܠܥܵܠܲܡ ܐܵܡܹܝܢ ܘܐܵܡܹܝܢ. ܐܲܒܘܼܢ
ܕܒܲܫܡܲܝܵܐ ܢܸܬܼܩܲܕܲܫ ܫܡܵܟܼ...
ܥܲܡܵܐ:
ܒܲܪܸܟܼܡܵܪܝ.
ܚܘܬܡܐ
ܗܵܘ ܕܟܸܡܒܵܪܸܟܸܠܲܢ ܒܟܘܼܠ ܒܘܼܪ̈ܟܵܬܼܵܐ ܕܪܘܼܚܵܐ ܒܸܫܡܲܝܵܐ
ܝܼܫܘܿܥ ܡܫܝܼܚܵܐ ܡܵܪܲܢ، ܕܟܸܡܥܵܙܸܡܠܲܢ ܠܡܲܠܟܘܼܬܹܗ،
ܘܟܸܡܩܵܪܹܐܠܲܢ ܘܟܸܡܲܩܪܸܒܼܠܲܢ ܠܜܘܼܒܹ̈ܐ ܕܝܼܠܹܗ ܡܫܘܼܗܝܸ̈ܐ،
ܕܠܵܐ ܟܥܵܒܼܪܝܼܢ̄ ܘܠܵܐ ܟܚܲܪܒܼܝܼܢ̄ ܘܠܵـܐ ܟܸܡܚܲܒܠܝܼܢ̄.
ܡܸܝܟܼ ܕܸܡܘܘܼܥܸـܕܠܸܗ ܒܐܹܘܲܢܓܵܠܝܼܘܿܢ ܕܝܼܠܹܗ ܡܲܚܝܵܢܵܐ
ܘܐ̄ܡܹܪܠܸܗ ܬܵܐ ܟܸܢܫܵܐ ܒܪܝܼܟܼܵܐ ܕܬܲܠܡܝܼ̈ܖܹܐ ܕܝܼܠܹܗ:
ܐܵܡܹܝܢ ܐܵܡܹܝܢ ܟܐܵܡܪܸܢ ܜܵܠܘܿܟܼܘܼܢ، ܟܘܿܠ ܕܐܵܟܸܠ ܦܲܓ݂ܪܝܼ
ܘܫܵܬܸܐ ܕܸܡܝܼ ܒܓܵܘܝܼ ܒܖܵܒܸܬ ܘܐܵܢܵܐ ܒܓܵܘܸܗ، ܘܐܵܢܵܐ
ܒܡܲܩܝܼܡܸܢܠܹܗ ܒܝܲܘܡܵܐ ܐ̄ܚܵܪܵܝܵܐ، ܘܠܕܝܼܢܵܐ ܠܵܐ ܟܐܵܬܸܐ،
ܐܸܠܵܐ ܡܫܘܼܢܹܐܠܸܗ ܡ̣ܢ ܡܘܿܬܼܵܐ ܠܚܵܝܹ̈ܐ ܕܸܠܥܵܠܲܡ.
ܐܵܗܘܼ ܡܒܵܪܸܟܼ ܠܟܸܢܫܵܐ ܕܝܼܠܲܢ، ܘܢܵܜܸܪ ܠܓ̱ܵܡܵܥܸܬܲܢ،
ܘܡܣܵܩܸܠ ܠܥܲܡܵܐ ܕܝܼܠܲܢ، ܕܐ̄ܬܹܐܠܸܗ ܘܡܘܼܒܣܸܡܠܸܗ ܒܚܹܝܠܵܐ
ܕܐ̄ܪ̈ܵܙܹܐ ܫܒܼܝܼ̈ܚܹܐ ܘܩܲܕܝܼ̈ܫܹܐ ܘܡܲܚܝܵܢܹ̈ܐ ܘܐܲܠܵܗܵܝܹ̈ܐ.
ܘܒܢܝܼܫܵܢ ܒܝܼܚܵܝܸܐ ܕܸܨܠܝܼܒܼܵܐ ܡܵܪܵܢܵܝܵܐ ܗܵܘܘܿܬܘܼܢ
ܚܬܝܼ̈ܡܹܐ ܘܸܢܜܝܼܪܹ̈ܐ ܡ̣ܢ ܟܘܿܠ ܙܝܵܢܹ̈ܐ ܟܸܣܝܹ̈ܐ ܘܓܸܠܝܹ̈ܐ،
ܗܵܫܵܐ ܘܒܟܠ ܙܒܲܢ ܘܠܥܵܠܲܡ ܥܵܠܡܝܼܢ.
ܨܠܘܬܐ ܕܩܘܒܠ ܛܝܒܘܬܐ
ܡܒܘܼܪܟܼܵܐ ܝܼܘܸܬ ܡܵܪܝܵܐ ܐܲܠܵܗܵܐ ܕܒܵܒܵܘܵܬܲܢ،
ܘܥܸܠܝܵܐ ܝܼܠܸܗ ܘܡܫܘܼܒܚܵܐ ܫܸܡܘܼܟܼ ܠܥܵܠܲܡ، ܡܒܹܝܕ ܕܠܵܐ
ܥܒܸܖܠܘܼܟܼ ܥܸܡܲܢ ܟܼܕܹܝܓܸܕ ܕܚܛܝܼܵܬܼܲܢ، ܐܸܠܵܐ ܒܟܲܒܝܼܪܘܼܬܼܵܐ
ܕܪ̈ܲܚܡܹܐ ܕܝܼܠܘܼܟܼ ܟܸܡܚܲܠܨܸܬܠܲܢ ܡܢ݂ ܫܘܼܠܛܵܢܹܗ ܕܚܸܫܟܵܐ،
ܘܟܸܡ ܩܵܪܸܬܠܲܢ ܠܡܲܠܟܘܼܬܼܵܐ ܕܒܪܘܿܢܘܼܟܼ ܚܲܒܝܼܒܼܵܐ ܡܵܪܲܢ
ܝܑܼܫܘܿܥ ܡܫܝܼܚܵܐ،
ܕܒܓܵܘܹܗ ܡܒܘܼܛܸܠܘܼܟܼ ܘܫܪܹܐܠܘܼܟܼ ܫܘܼܠܛܵܢܵܐ ܕܡܘܿܬܼܵܐ،
ܘܟܸܡܝܵܗ̄ܒܸܬܠܲܢ ܚܲܝܹـ̈ܐ ܕܲܠܥܵܠܲܡ ܕܠܵܐ ܟܸܡܚܲܒܠܝܼܢ̄.
ܕܵܗܵܐ ܝܵܐ ܡܵܪܝܵܐ ܕܟܸܡ ܡܲܛܒܸܬܠܲܢ ܬܲܕ ܩܵܝܡܘܼܟܼ ܩܖܵܡܸܕ
ܡܲܖܒܚܘܼܟܼ ܕܲܟܼܝܵܐ ܘܩܲܕܝܼܫܵܐ،
ܘܡܲܩܸܪܒܼܘܼܟܼ ܛܵܠܘܼܟܼ ܕܸܒܼܚܬܼܵܐ ܗܵܖܝܼ ܒܹܚܵܝܹܐ ܘܩܲܕܝܼܫܬܵܐ،
ܘܒܚܲܢܝܼܢܘܼܬܼܘܼܟܼ ܟܸܡܩܵܒܠܘܼܟܼܠܵܗܿ ܠܡܲܘܗܲܒܼܬܼܵܐ ܗܵܖܝܼ
ܐܲܠܵܗܵܝܬܵܐ،
ܫܘܼܕ ܠܵܐ ܗܵܘܝܵܐ ܛܵܠܲܢ ܠܵܐ ܬܵܐ ܕܝܼܢܵܐ ܘܠܵܐ ܬܵܐ ܚܲܫܒܲܢܬܵܐ،
ܐܸܠܵܐ ܬܵܐ ܪ̈ܲܚܡܹܐ ܘܬܵܐ ܚܲܢܝܼܢܘܼܬܼܵܐ ܘܬܵܐ ܫܘܼܒܼܩܵܢܵܐ
ܕܚܛܝܵܬܼܵܐ ܘܬܵܐ ܩܝܵܡܬܵܐ ܕܡܢ݂ ܒܹܝܢܲܬܼ ܡܝܼ̈ܬܹܐ ܘܬܵܐ ܚܲܝܹ̈ܐ
ܕܲܠܥܵܠܲܡ. ܘܗܵܘܘܼܟܼ ܟܠܲܢ ܣܵܗ̈ܕܹܐ ܡܟܲܡܠܵܢܹ̈ܐ ܕܫܘܼܒܼܚܘܼܟܼ،
ܘܡܲܥܡܪܹ̈ܐ ܨܸܦܝܹ̈ܐ ܘܗܲܝ̈ܟܠܹܐ ܩܲܕܝܼܫܹ̈ܐ ܬܵܐ ܫܪܹܝܬܼܘܼܟܼ.
ܘܒܹܝܕ ܕܦܸܫܠܲܢ ܡܚܘܼܝܖܹܐ ܥܸܡܸܕ ܦܲܓܼܪܹܗ ܘܕܸܡܹܗ ܕܲܡܫܝܼܚܘܼܟܼ،
ܒܸܕ ܡܦܲܠܗܘܼܟܼ ܥܸܡܸܕ ܟܠܵܝ ܩܲܕܝܼ̈ܫܹܐ ܕܝܼܠܘܼܟܼ ܒܕܸܢܚܵܐ
ܕܝܼܠܹܗ ܪܵܒܵܐ ܘܲܫܒܼܝܼܚܵܐ، ܘܗܵܖܐܲܝܟܼ ܛܵܠܘܼܟܼ ܘܛܵܠܹܗ ܘܬܵܐ
ܪܘܼܚܵܐ ܕܩܘܼܖܫܵܐ ܗܵܘܹܐ ܫܘܼܒܼܚܵܐ ܘܐܝܼܩܵܪܵܐ ܘܬܲܘܕܝܼܬܼܵܐ
ܘܣܸܓܼܕܬܼܵܐ، ܗܵܫܵܐ ܘܲܒܟܠܙܒܲܢ ܘܲܠܥܵܠܲܡ ܥܵܠܡܝܼܢ.܀
|
